香港 Xocat Forum 討論區 - Powered by Discuz! Board

標題: [灌水] 香港優勢 [打印本頁]

作者: Rainybreeze 時間: 2007-6-14 23:02 標題: 香港優勢

呢條題目可能應該走去政治版, 不過, 果邊狹窄到無癮

悶悶地, 討論下, 如果版主唔介意.

如果將來要用“香港優勢”來競爭, 請問咩係 “香港優勢”?

作者: 毛球 時間: 2007-6-17 01:51

引用:

原帖由 Rainybreeze 於 2007-6-14 11:02 PM 發表
呢條題目可能應該走去政治版, 不過, 果邊狹窄到無癮

悶悶地, 討論下, 如果版主唔介意.

如果將來要用“香港優勢”來競爭, 請問咩係 “香港優勢”?

點解用"將來"呢個字眼呢? 香港唔係過去, 現在都用緊"香港優勢"黎競爭緊咩?

作者: Rainybreeze 時間: 2007-6-17 11:31

因為學緊d高官，d所謂有識之士吹水．

聽到佢地講要基於　”香港優勢”　就走去高科技形社會發展，真係嘔心　

作者: 毛球 時間: 2007-6-17 13:44

引用:

原帖由 Rainybreeze 於 2007-6-17 11:31 AM 發表
因為學緊d高官，d所謂有識之士吹水．

聽到佢地講要基於　”香港優勢”　就走去高科技形社會發展，真係嘔心　

邊個講架, quote黎睇下先? 又, 點解會嘔心?

作者: LoserII 時間: 2007-6-28 00:09

“香港優勢”是香港人是牛是馬, 只工作不吃飯來競爭. 肥了高官, 害了小市民. 高官全部多才多藝, 甚麽處長都能勝任, 就是“香港優勢”. 將來會是世界第一金融中心 ? 或是世界末日. 可憐 !

作者: pirates 時間: 2007-6-28 12:06

小弟睇到香港優勢就係有大陸射往射往！

作者: mingfai 時間: 2007-6-28 16:25

每次聽到特首講...香港優勢...(不論董生或曾生)..個腦就煩一煩...個心就寒一寒...! 當然任何地方都有佢既優勢.只不過係睇下邊方面...但我們特首往往將呢個四字真言奉為金句..經常掛係口邊....! 你幾時聽過上海.北京
地方政府會話自己有乜乜優惠...因為本身有自信有實力..大家係睇得到..跟本唔洗講!

你幾時聽講..香港首富話自己幾咁有錢..渣緊架乜野車..帶緊只乜野表...!因為對他們來說,.什麼都不太重要了.
反而..一個死慳死抵儲到錢..買只勞力士既人..就慌死人睇唔到一椒...他有只勞一樣..!

.

作者: Rainybreeze 時間: 2007-6-28 19:59

傾下偈, 咪開心囉. 再探討下先.

因為有競爭, 所有先至講 "優勢".  咁競爭就假設係為咗 “適者生存’, 或者”生存得成功d”.  咁”成功d”定義就當係“有權力’, 或者 ”有較大影響力”.

呢d定義假設絕對係主觀到不得了, 肯定係好有問題.  絕對可能被推翻.  不過, 如果唔介意, 就當呢d定義假設係哲學邏輯辯證o既基礎假設. 又或者可以建議下其他o既基礎假設.

生存就係鬥爭, 真係毛主席唔順.

又翻轉頭, 悶悶地, 請繼續傾下講下咩係 “香港優勢"

作者: 練肉 時間: 2007-6-29 08:37

提示: 作者被禁止或刪除內容自動屏蔽

作者: 毛球 時間: 2007-6-29 20:15

香港冇優勢, d移民一族回歸香港做咩?
香港冇優勢, d太空人妻離子散做咩?
香港冇優勢, d跨國外資機構晌香港設亞洲總部做咩?
香港冇優勢, d遊行人士晌度求咩?
香港冇優勢, 你仲晌度等咩?

作者: Rainybreeze 時間: 2007-6-30 08:40

[quote]我睇唔到上面兩樣點絕對主觀法，點樣容易被推翻,,,,,[quote]

毛澤東話生存係鬥爭, 美國佬憲法話生存係追求快樂, 呢d咪主觀啦.

作者: 毛球 時間: 2007-7-1 01:03

引用:

原帖由 Rainybreeze 於 2007-6-30 08:40 AM 發表
我睇唔到上面兩樣點絕對主?

毛澤東話生存係鬥爭, 美國佬憲法話生存係追求快樂, 呢d咪主觀啦.

追求快樂, 係追求成功既快樂, 安逸既快樂, 定係無爭既快樂呢? 美國係一個霸權國, 輸餐飯都休想, 勝在講野好聽.

作者: Rainybreeze 時間: 2007-7-4 14:50

又當“香港優勢”係整體社區所有”優勢”條件加所有”劣勢”條件o既結果. 又或者, 有d個別”優勢”條件係強到可以咩起哂?

作者: eoeobop 時間: 2007-7-15 20:11

“香港優勢”－－－－靠近中國這個廉價世界工厰

作者: Rainybreeze 時間: 2007-7-16 22:20 標題: 回復 #14 eoeobop 的帖子

o拿, 又有個咁樣o既諗法,

如果競爭就假設係為咗 “適者生存”, 或者, ”生存得成功d”. AND ”成功d”定義就當係“有權力’, 或者 ”有較大影響力”.

咁 ”香港既市場價值”, 或者, “市場對香港需求” 會唔會係其中一個“適者生存”既元素.

仲有, 我地同時sale緊幾個市場, 呢一刻同埋下一代, 香港, 祖國世界. 咁邊個市場會係重要d?

作者: pakai 時間: 2007-7-21 19:32

你所講香港優勢衹得50年壽命而已！對唔住！計數差，尚餘40年壽命。

作者: kykyky121212 時間: 2007-8-10 08:29 標題: 大陸文化感染香港，大陸就有優勢

大家去海洋公園就可體證大陸文化的利害。大陸同胞永遠插隊。你排隊佢插隊，食煙吐口水。問你點頂？宜家佢地吾去迪士尼，因為迪士尼咁低B，同我國D偉大文化完全無得fight，點會幫襯呀。海洋公園就吾同，有兩隻熊貓維維樂樂。大陸同胞實撐場。你話香港勁定大陸勁？人多過你，假貨多過真貨，茅蠆野又到家。你話大陸同香港比，我賣大陸贏。就算是青樓紅粉都靚過陀地喇！一句到尾大陸有優勢。

作者: keibeast 時間: 2007-8-10 12:41

香港以前o既優勢係有老毛搞亂中國, 香港一個小小的港口食正條水. 如果大陸好香港又好似而家咁, 你估會點 ???

靠食住尼-- 應該唔得.
賭場, 色情事業-- 比 macau 同大陸玩左.
通訊-- 新發展城市一定好過佢,.
人材-- 就慘不忍睹, 好o既都走曬.
金融-- 大陸遲早趕上.
機場--今日係世界第一, 將來會唔會有更好的機場出現 ?
老翻-- 鬥唔過大陸
器官市場-- 到時d人冇 $$$ 賣身都要 (當然係黑市啦).
生產--早就北上啦, 而家d商家都準備去越南.
av --鬥唔過日本

以上全是無聊時手多多, 亂寫, 唔o岩聽唔好嬲.

作者: keibeast 時間: 2007-8-10 12:45

引用:

原帖由 kykyky121212 於 2007-8-10 12:29 PM 發表
大家去海洋公園就可體證大陸文化的利害。大陸同胞永遠插隊。你排隊佢插隊，食煙吐口水。問你點頂？宜家佢地吾去迪士尼，因為迪士尼咁低B，同我國D偉大文化完全無得fight，點會幫襯呀。海洋公園就吾同，有兩隻熊貓 ...

要更正, 我以前都係咁看大陸人. 唔係所有大陸人都係咁. 最令我難忘的是杭州人, 排隊, 不亂丟垃圾, 有禮貌, 我仲懷疑自己係唔係唔o向我認識o既中國 (廣東一帶).

作者: kykyky121212 時間: 2007-8-11 06:08

多謝keibeast。當然大陸都有好野。我說的大陸優勢是一般表像。個別情況梗有D好人。我到華山旅行把空膠水瓶放在背囊旁，忽被大風吹去，心想隨處拋棄垃圾是我國的風尚，故不理會。隨後一個女仔(是遊人，不是工作人員)看見地上膠瓶即拾起放到垃圾箱。無可否認大陸同胞在進步中，但要全面提升國民質素則是漫長的路。

作者: 漁童 時間: 2007-8-11 17:55

引用:

原帖由 keibeast 於 2007-8-10 12:41 發表
靠食住尼-- 應該唔得. 香港發達至今, 梗係唔係靠食住尼啦.
賭場, 色情事業-- 比 macau 同大陸玩左. 咁有幾唔好?
通訊-- 新發展城市一定好過佢,. 咁即係香港好唔好?
人材-- 就慘不忍睹, 好o既都走曬. 唔係嘛, 我都仲晌度. 你呢?
金融-- 大陸遲早趕上. 有競爭先有進步.
機場--今日係世界第一, 將來會唔會有更好的機場出現 ? 梗係會啦.
老翻-- 鬥唔過大陸咁又有幾唔好?
器官市場-- 到時d人冇 $$$ 賣身都要 (當然係黑市啦). ???
生產--早就北上啦, 而家d商家都準備去越南. 阿媽都教大個要坐寫字樓啦, 邊個發達國家靠本地工業?
av --鬥唔過日本咁又又有幾唔好?

以上全是無聊時手多多, 亂寫, 唔o岩聽唔好嬲.

閣下患得患失既心情, 確令人同情, 不過如果唔係太知香港有咩優勢既, 都唔好亂寫一通, 因為香港真係越黎越多無知青年以為香港冇樣好, 日唱夜唱工都唔返, 咁就真係唔駛五十年就變啦.

作者: keibeast 時間: 2007-8-12 16:30

啦, 邊個發達國家靠本地工業?

我可以說上面的都是風涼話, 因為我出生於香港住左十幾年, 中五之後就冇再住在香港, 到過好多國家, 最後落根於南方小島上. 只是香港有幾個重要工程被邀回來過幾年做設計顧問. 所以正如你講患得患失. 香港好唔好對我影響唔大, 但係出生地好當然係會令自己自豪.

如果問香港的前途, 以現時的走向可以算是往下走的機會會比較大.

大你講阿媽都教大個要坐寫字樓, 冇錯, 但係backup寫字樓的是基本的工業和建造業. 如果此行業衰落時, 仲要寫字樓做mug, one man band都覺用太多人. 香港要重振 70-90年代輝煌時刻, 工業絕對不可缺少. 可是要有些什麼工業呢 ??

最後你覺得弓"咁又有幾唔好?" o既果幾樣, 好不幸真正賺錢的數額可以嚇死人. 唔信可以查一查有關報告.

作者: keibeast 時間: 2007-8-12 16:31

肥彭講過香港優勢, 係自由制度和活在其中的香港人, 佢地勤力, 誠懇, 有目標. 在港台度聽過的, 不過全文就唔係好記得了.

[ 本帖最後由 keibeast 於 2007-8-12 20:56 編輯 ]

作者: 漁童 時間: 2007-8-12 21:34

引用:

原帖由 keibeast 於 2007-8-12 16:30 發表
啦, 邊個發達國家靠本地工業?

我可以說上面的都是風涼話, 因為我出生於香港住左十幾年, 中五之後就冇再住在香港, 到過好多國家, 最後落根於南方小島上. 只是香港有幾個重要工程被邀回來過幾年做設計顧問. 所 ...

不靠香港, 只回來說說風涼話作消遣的民族, 發言總是脫離現實, 實在大可不理.

任何一個地方, 發展到一定程度, 必將其已穩定掌握的工業轉移到工資較低的地方, 以增加產品競爭力, 不單香港, 日本和台灣的工業亦靠著大陸, 西歐靠東歐, 美國靠南美. 可能你南方小島天然資源豐厚, 唔明咩叫工業, 咩叫貿易.

呢個世界唔同地方搵錢方法唔同, 人地靠色情同賭博搵到錢, 閣下回來過幾年做設計顧問搵到錢, 我漁童打魚都搵到兩餐, 不過聽講買賣軍火都唔弱, 唔知你點睇.

作者: keibeast 時間: 2007-8-13 16:47

買賣軍火都唔弱, 如果香港夠膽學小國奧地利設計, 生產手槍也是很好的. 香港人的設計好多都好好, 不過就係冇工業backup佢地. btw 你講o既工業轉移到工資較低的地方係冇錯, 咁轉移了之後貧富懸殊會加劇, 低下層通常跟著工業遷移, 可惜香港人做得到嗎. 美國靠南美其實是走不回頭路而已, 當一個國家由生產轉為只銷售時就是經濟往下坡的跡象. 香港亦走過呢條路. 只係大家冇注意到而已. 以為明天會更好, 不過tomorrow never come.

有些人搵幾年錢等於一個打工仔搵一世錢(40年).

作者: y2ksagittarius 時間: 2007-8-17 04:29

引用:

原帖由 keibeast 於 2007-8-12 16:30 發表
啦, 邊個發達國家靠本地工業?

我可以說上面的都是風涼話, 因為我出生於香港住左十幾年, 中五之後就冇再住在香港, 到過好多國家, 最後落根於南方小島上. 只是香港有幾個重要工程被邀回來過幾年做設計顧問. 所 ...

我都係o係南方小島wo
呢o係邊個南方小島呀?

作者: 呀mug順拿 時間: 2007-8-17 04:53

佢o向南 Y 島呀! hehehe

作者: Rainybreeze 時間: 2007-8-18 02:48

問題又可以咁諗。香港形勢同世界形勢都變化緊。變化過程或多或少會歷史重演, 無得停。呢個變化過程作為社會性”適者生存”, 最後都係淘弱留強。

參考翻全世界O既歷史, 變化過程已經唔簡單, 如果自己講唔掂數, 唔團結。唔好講 ”優勢”, 做鬼都唔靈。

肥彭O既自由制度, 又要自由, 又要政府介入, 輸打贏要, 長毛, 陳太, 阿扁哥, 同理d講野唔洗付責任O既才子, 同意到不得了。

作者: keibeast 時間: 2007-8-18 06:25

英國時代香港政府對工業只介入稅務, 工業安全, 廉潔, 後期加入環境管理. 相信係最低的介入度. 除非行業犯法, 政府唔會行政干預.

作者: 漁童 時間: 2007-8-18 16:41

引用:

原帖由 keibeast 於 2007-8-18 06:25 發表
英國時代香港政府對工業只介入稅務, 工業安全, 廉潔, 後期加入環境管理. 相信係最低的介入度. 除非行業犯法, 政府唔會行政干預.

你都係"講野唔洗付責任O既才子"?

作者: Rainybreeze 時間: 2007-8-18 23:03

引用:

原帖由 keibeast 於 2007-8-18 06:25 發表
英國時代香港政府對工業只介入稅務, 工業安全, 廉潔, 後期加入環境管理. 相信係最低的介入度. 除非行業犯法, 政府唔會行政干預.

題外話, 殖民地時代, 的確出過好官, 為香港做過好事, 為香港爭取。

小弟唔老o厲o既係肥彭, 作為一個政客, 佢做o既野唔係為香港, 係為左英國利益。小弟明白佢有佢o既立場. 但係作為香港人, 小弟無辦法認同一個不顧子民的政客為官。

唔好意思, 再講落去, 就對版主九哥唔尊重。

作者: keibeast 時間: 2007-8-19 17:21

我冇親身見過肥彭, 我只睇過佢簽o既 clk core projects o既 contract 用左24小時多d就簽完幾百份. 佢做o既事情都是以英國利益為主. 可是他於人性方面, 佢就為香港造了一個可以支持幾十年經濟的機場. 再者, 錢一定要拿回去英國的. 佢用呢個方式, 從中漏出來的錢大部分都流回香港市民中-- (香港 sub-contractors, 同工人). 當年小小一個泥工都兩三萬一個月.

香港人唔利用呢幾十年的機會爭取東南亞區的生存空間, 當時間用盡時, 真的會變得很被動. 董建華已經浪費了很多個年頭於北大人和民主派的角力. 當然佢係站在北大人果邊.

最後, 你以上的文章, 基於你觀點, 我完全唔覺有什麼所謂唔尊重, 除非呢度係冇言論的由. 香港係自由港, 大隻講絕對冇問題.

作者: Rainybreeze 時間: 2007-8-19 21:34

版主容忍我嚮哲學版講政治.

我亦希望可以用哲學O既理性分釋技術吹O尼個題目O既水. 我有責任自律.

自由越多, 責任越大. 尊重人家, 尊重自己.

歡迎光臨香港 Xocat Forum 討論區 (http://p.xocat.com/p/)