引用:

原帖由 dw194711 於 2012-3-24 16:56 發表

收獲就相當不俗，不過係私人秘密，唔講得，鎖你。 ...

大夫一場去到舊金山，冇理由唔辣埋去Las Vegas整番两手卦？

啱嘅，都係唔好揚，明白哂！

引用:

原帖由 stary 於 2012-3-24 23:02 發表

    筆兄說得很對、世間一切事並無绝對、有得一定有失,失去又可能得到更多!...

好欣賞stary兄咁後生就可睇嘢咁化、咁透徹，令參悟能力已臻極高境界。

我有理由相信老兄此功力定必從一番，甚至多番心酸挫折累積而成，只是不足為外人道而已。  

世事之發生往往非自己可控制，既然係咁，不如留番精力去做好自己可控制嗰瓣，而一般在此心酸、無奈、無助處境下，往往可做不多，亦不可改變／抗衡人哋做法，那唯有自我調節，即老兄提到之「放下」是也，將唔開心減至最少，等自己好過啲，亦即搞好心理衛生好了。

照字行間顯示，老兄早已可做到了，真幸運，努力、加油，共勉之！

引用:

原帖由 理魯竇 於 2012-4-4 00:20 發表

不過街口剛好被那個[遭灣嗱]手表廣告牌遮住咗嗟，

理兄提起「遭灣嗱」表，大家還記得那些年仲有隻表叫「窩路堅」嗎？

呢，「喎路邊」呀！

引用:

原帖由 維圓阿伯 於 2012-4-4 15:52 發表

周星池式鼻祖電台廣告'梅係梅花既梅,花係梅花既花'認真毛離頭掛

維園兄話那些年之壞鬼唐人翻譯師爺無厘頭，我就話佢哋見啲鬼佬懵吓懵吓，乘機搗佢米，專登將啲表名改衰佢。  

邊度有人會鍾意自己賣嘅表叫成「就round嗱」、「喎路邊」㗎？

引用:

原帖由 維圓阿伯 於 2012-4-4 15:52 發表

蟹油 '伊波路'錶,好名掛又夠香艷,重有梅花嘜錶

講開翻譯名稱，大家或有聽過澳門葡文名稱Macao之由來吧？  

話說百多年前某日，一西洋水手上岸取水，因從未到過澳門，想知地名好報告艦長。


一路上荒野無人，突見一蛋家佬担住两桶水迎面而來，截停想問其地名。點知蛋家佬已担到氣羅氣喘，俾佢阻頭阻勢，自己又唔識西洋文，都唔知個番鬼佬噏乜，好唔老脾咁問番個鬼佬想問乜嘢，曰: 「乜x？」。

個水手聽罷以為嗰個係答案，於是回禀艦長話嗰度地名原來叫做「乜x」，而艦長亦從實mark低响佢地圖上以後稱之為Macao是也！




[ 本帖最後由 mtpen 於 2012-4-6 20:29 編輯 ]

引用:

原帖由 維圓阿伯 於 2012-4-6 21:20 發表

阿筆蛇,非常'爛'的笑話啵,我十八歲巳經成日講

唓，早啲講吖，維圓Sir，我見呢個forum冇乜人提，等我仲扮野人獻曝，驚失傳，所以講吓等啲後生仔知啲隣近地區嘅掌故添！

係呢，乜老兄平時好忙嘅咩，唔多見上嚟吹水嘅，都咬糧好耐啦，做義務教官呀你？

引用:

原帖由 維圓阿伯 於 2012-4-6 21:20 發表

據傳西洋仔咸蝦燦口述

維圓Sir，你提起「西洋仔」「咸蝦燦」，講我就知係指葡萄牙人，但我真係唔知其來源／典故，因乜解究咁稱呼，老兄可有知道嗎？

引用:

原帖由 維圓阿伯 於 2012-4-7 12:10 發表

小弟自幼家貧書小讀,水平不足有名你叫維園阿伯一名.在此藏龍臥虎...

維圓Sir太謙喇！

講出身窮、讀書少，大家彼此彼此啦！

懶寫至啩？

若果唔想患上老人痴呆症，聽我講啦，寫吓嘢冇衰㗎嘞！

君不見好多大作家都好長命，或與此有關，信焉？

引用:

原帖由 維圓阿伯 於 2012-4-7 12:10 發表

在此藏龍臥虎科林,不敢發言,天天樂做旁觀者跟阿sir學下野心滿意足了...

仲有，上嚟吹水啫，等於幾個阿伯响榕樹頭度吹水，冇使睇過乜嘢quali先准吹得係話？家陣又唔係學術研討會，所以請維圓Sir萬二個放心！

若有人夠胆唔俾面老兄你，冇有識死柴你台，我會誓死同你護航，共同進退，okay?

引用:

原帖由 維圓阿伯 於 2012-4-7 15:45 發表

..以前放假得閑唔係馬場就馬交,而家就學人行山轆單車,可能人老怕死了 ...

呢啲唔係怕死，而係識死啫！

皆因人老精、鬼老靈，識得趨吉避凶而已！

維圓Sir你做得啱，唔同時間／年紀要／會做唔同嘅嘢嘛！

引用:

原帖由 維圓阿伯 於 2012-4-7 15:45 發表

..就是做一些事情自己以前從未做過的,當然是要自己喜歡啦,如阿伯楂左一世羅絲批,而家就學人上網 ...

諗諗吓覺得維圓Sir份人都幾風趣，可能你做阿Sir嘅時候郁吓就screw人，居然將陀住支嘢當作羅絲批，咁就真係大煲劑矣！

若果老兄郁吓抿佢出嚟去修理人，咁就死得人多咯！

引用:

原帖由 維圓阿伯 於 2012-4-8 15:36 發表
大佬
士姑尼個番文
好敏感喎
D金絲貓會誤為我系色情狂架
更正:楂左一世起子 ok

早啲講清楚吖，大佬！

引用:

原帖由 維圓阿伯 於 2012-4-8 15:36 發表

士姑尼個番文好敏感喎,D金絲貓會誤為我系色情狂架

有某種職業嘅金絲貓望都望得你係色情狂喇，例如灣仔區一啲特別塲所。因為screw親嘢就列入特殊服務一欄，屬大額成交業務。

因此若果唔係好順眼，切忌對佢哋亂用此字眼。若一時貪口爽話screw人，到時原來只係口惠而實不至，令人良好期望落空，佢實掉轉頭screw番你！

開錯口又被人焗住㩒，更係嘥彈藥，故老兄話此字好敏感係啱嘅！

引用:

原帖由 維圓阿伯 於 2012-4-7 12:10 發表

西洋仔我估澳門街叫葡萄牙後生仔,咸蝦撐尼我估係中葡混血兒eurosiean ...

維圓Sir所述雖不中亦不遠矣！

我再加補充，可能葡萄牙人位處大西洋嗰邊，佢哋最早來華，我哋叫首批鬼佬做西洋鬼。


至於鹹蝦燦，點解叫做阿燦，可能真係一如老兄所述，乃Eurasian最尾個發音 ”sian” 好近 ”燦” 之發音。


我1953 至1955細細個時曾住响澳門，嗰度啲食水真係鹹鹹哋嘅。皆因那些年澳葡政府冇錢起水塘，是鬼旦抽啲珠江水上岸飲用就算數，雨季河水足及潮退，啲水就淡啲，反之就鹹啲。所以見到啲中葡打亂種就侮辱性稱之為「鹹蝦燦」嘞。

引用:

原帖由 維圓阿伯 於 2012-4-10 13:10 發表

咸濕野在此科林唔敢講

請問維圓Sir有否聽過「阿坤買水」？

引用:

原帖由 dw194711 於 2012-4-10 14:07 發表

當時紙水低，一盅兩件，都係幾毫子。但其他銀碼如三毫、九毫...係點叫法，我就唔記得咗，阿伯能否告我知? ...

開嚟揦住個伯父！