攞咗個諾貝爾物理獎,仲要個港大名譽博士學位做咩?

高錕獲港大頒博士銜

香港大學噚日頒名譽博士學位畀諾貝爾獎得主、「光纖之父」高錕，係破天荒頒名譽博士畀一位前中大校長。患腦退化症嘅高錕喺台上好淡定，儀式順利完成，港大校長徐立之其實喺背後做咗唔少工夫。
原來徐校長驚高錕一時間唔適應陌生環境，諗出一條好橋，就係將頒獎禮各位嘉賓嘅相片，喺之前一晚交畀高錕太太黃美芸，高錕就可以事先認人，預早有心理準備。據高太講，高錕其實未至於話唔認得啲舊朋友，只係佢認得人哋個樣，但未必講得出人哋個名。
高錕噚日早 10分鐘已到達港大陸佑堂，熟人同佢打招呼，佢都有微笑點頭，但只會回應單字「 yes」或者「 good」。佢上台出席頒授儀式，徐校長亦一直喺隔籬倍住佢。儀式上港大介紹高錕生平及光纖方面貢獻，徐校長就一路覆述畀佢知。對於港大嘅頌揚，八方見高錕冇特別反應，但當主持提到高太黃美芸時，佢即時東張西望，似乎想望吓太太坐喺邊，可見高太喺佢心目中嘅地位。