因為之前同大家討論意大利佬响二戰時期既一款 75/18 自走炮時,提及早期車上作戰部係插左支 Breda M30 機槍,於是就開張帖傾下墨大口先生呢支好野.

第一次識得 M30 係响打 game 時見到,當時好鍾意打 Call of Duty ,而家都唔記得係邊集勒,因為集集都有打勻,但記憶所及好似係 Big Red One .果時既場景係登陸意大利打墨大口班靚,打打下見到有支叫做 Breda M30 咁既野跌响地,於是就執起佢試兩野,因為平時都係 likey 用 M1 多 d ,貪佢力猛彈多.

呢支 M30 屬於未睇真覺得佢好索,睇真就會頭岳岳果隻,打得幾飛都無咩心機再用,於是就黎手丟左佢.

二戰初期意大利陸軍裝備的單兵武器基本上都是手動的 Carcano 91 手動步槍,可以提供密集火力的機槍很少,於是陸軍就打算開發一支班用輕機槍,也就是 M30 .早期每兩個班才配給一支 M30 ,後來再提升為每班一支.不過 M30 為意大利皇家陸軍帶來的,就只有啼笑皆非這一回事.


看看 M30 規格再說 :

淨重 : 10.60kg
槍長 : 1,230mm
管長 : 450mm (可換槍管)
口徑 : 6.5 x 52mm
動力 : 反沖式 Blowback
射速 : 500 發 / 分
初速 : 630m / s
射程   3,000m (有效射程 800m)
供彈 : 20 發 (固家掛槍彈夾)

M30 最抵死的一個賣點就是它的供彈系統,如果看過意大利其他國產軍工,比如係戰車大炮等,好難想像出意大利既名槍廠 Breda 竟然會為 M30 作出如此設計,或者係意大利人的另一個文藝復興偉大構思.

M30 採用由槍身右側橫向供彈,彈夾係用一隻較連在槍身上,裝彈時先鬆開彈夾鎖,然後逆時針向前水平 fing 90 度,再插入一個專用的 20 發裝彈器 (Charger) ,插到底時彈夾內有個機關仔會把子彈勾實,再拉出空裝彈器,然後將彈夾 fing 番原位,好勒,可以開火勒 ------- 如果冇 jam 彈既話.


打開左彈夾同插上 20 發裝彈器既 M30 ------- 真係冇眼睇,唉!

M30 使用既子彈同當時意大利制式步槍 Carcano 91 一樣,都係 6.5 x 52mm ,於是在後勤補給上就方便左好多,上到戰場求其拿揸通地都可以執得到,或者呢個就係佢唯一既優點.

中間個粒就係 6.5 x 52mm 子彈.

M30 既 20 發裝彈器,睇落又好似幾 good 咁播!

不過睇真 dd 隻 charger 前面四支勾仔每次上彈都要俾子彈拉直,如果唔係子彈出唔到黎,咁拉法拉得幾野金屬疲勞甩勾又點算呢?

呢張相可以等各位睇清楚果隻 charger 同彈夾既關係.當隻 charger 插到底之後,子彈俾彈夾入便有隻機關仔扣住 (我唔知佢個機關仔係點樣既,唔好問我,唔該!), charger 功成身退就輪到下家庄,啪番好隻彈夾就由彈夾自身既之字彈弓提供動推力供彈勒.




彈夾左面槍身上方有個長條野有粒啲又有一橫橫既,前面重有條 "恤" 既野,唔好誤會佢係表尺.佢其實係 M30 另一偉大發明.

咁果個有粒啲既長條野又有一橫橫既,前面重有條 "恤" 既野,唔係表尺又係乜 Q ?

原來表尺响後便,既然佢有條 "恤" 既就應該可以打得開卦?等我打開佢睇睇先,哦,原來係油壺蓋!

M30 响機身加油壺既原因,係為左可以為每發子彈在上膛前潤滑外皮,以便較易退空彈殼,至於點解 M30 會有難退殼既情形出現我就查唔到料勒.而由於 M30 係用閉鎖槍機,加上油料會令機膛更易發熱,於是 M30 不時就會出現 cook-off ,即係子彈上左膛埋左位而撞針仍在後退或者到左尾位,正準備前沖再度撞擊子彈,而停留在槍膛既子彈就因為過熱而自己先行爆漿出野勒!

M30 既油壺重有多一個唔它黎既野,就係油料會另槍膛帶來塵埃,呢樣野就令到 M30 就算唔 cook-off 都會 jam 彈,你話死未?

另外好多資料都話 M30 換槍管係一件好 Q 麻煩既事, Wiki 就話佢支槍管係冇抽手既,當條槍管打到紅晒要換既時候,意大利佬只除條老底出黎墊住至拆得甩!

之不過著名槍械網網主俄羅斯佬 Maxim Popenker 就話冇咁既事,佢重話 :

"The barrel can be quickly replaced in the field, using the integral carrying handle."

所以呢個世界既野,真係冇話有咩係一面倒既,有人唱好亦有人唱衰,咁就靠各位大家自己客觀 d 去睇件事勒.而我諗 Popenker 口中所講既抽手,可能就係槍管上呢個小 T 狀物體,你地話呢?

不過點都好啦,以在下不才門外漢既睇法,如果佢要咁多避忌野又怕塵又怕熱既,再加上裝彈方式重麻煩過何非凡既,咁就唔會係一支好槍.

到左德國同意大利反面之後,德國佬將充公既 M30 改名叫做 MG 099(i).

意大利佬在使用 M30 .

意大利傘兵用 M30 .

意大利海軍陸戰隊都用 M30 .睇真 d 槍管上真係好似有個 T 抽手,上面張傘兵相都係.

時地人不詳.

M30 最威的一張相 ------- 一個意大利摩托兵騎著他的 Moto Guzzi 500 ,車頭插了一支 M30 .真係重英過梁振英!

其實如果意大利佬係有心為 M30 設計成可更換槍管的功能,就好應該放多少少心機响槍管抽手上.同是歐洲國家的比利時,獲授權在 1930 年生產美國佬的 BAR ,就落左唔少心機响度.先為 BAR 加上握把,然後又設計了可換槍管,而人家那個槍管上做了個木柄把手,好用又隔熱,幾時換都得.而意大利佬就冇呢種諗頭,真係唔明解?


比利時 FN 公司製做的 FN BAR Model D ,槍管上有個大手柄用來做提把或者係拆槍管都得.