濫權自毀形象 香港唔唱都衰
2008-07-13
【東方日報專訊】好事不出門，壞事傳千里。最近聽講有人唱衰香港，仲專門開咗一個網頁添，功夫茶上網一查，真有其事。不過，人哋唔係生安白造專登唱衰，而係香港確實羞家。
原來網主就係澳洲華僑譚先生，佢上月底喺澳洲返香港，帶咗一公斤生牛柳準備孝敬外父，佢主動向海關申報，點知仍然被扣查咗足足十粒鐘，仲被檢控，罰款一千蚊。
無喇喇畀人整鑊甘，譚先生條氣梗係唔順啦，佢話要向全世界揭露香港政府苛刻執法，搪塞卸責。佢仲話，對政府部門辦事效率好失望，食環署話人手唔夠，就將佢喺機場禁區扣留六、七粒鐘，送去機場警署，又關咗三粒鐘，當正犯人咁。大佬，人哋帶少少牛肉啫，又唔係殺人放火，使唔使咁呀！
最令譚先生火滾嘅係，呢班執法人員錯咗唔肯認，佢事後唔知有冇留案底，去問食環署、海關同警方，佢哋都當佢乒乓波咁推嚟推去，始終冇人講得清楚。譚先生直斥海關同警方帶佢坐旋轉木馬。
正如譚先生話齋，喺澳洲絕對唔會發生呢種事，入境之前，澳洲政府會提供指引，講清楚乜嘢物品唔可以帶入境，如果旅客帶咗而有申報，最多叫你丟咗佢。總之絕對唔會當你係罪犯咁審。其實，又點止澳洲，走勻全世界都唔會有咁騎呢嘅事發生啦。
講開又講啦，呢幾年香港旅遊業受周邊地區威脅，走緊下坡，政府高官吹水唔抹嘴，口講冇有怕，其實好心虛。煲呔曾早排仲「閃咗去」美國三藩市主持香港日，旅遊發展局仲攞咗三千幾萬出嚟，舉辦二○○八香港盛夏魅力活動，想爭取多啲客源。
嘥氣啦，掟多多錢宣傳都唔夠政府自己倒米。譚先生將件事原原本本寫出嚟，仲話對香港法律制度已失望，對香港印象大打折扣。睇嚟香港今次想唔出名都幾難喇，外地遊客睇見譚先生咁嘅遭遇，對香港點會仲有好感。好人好姐都無情白事惹官非，除非有被虐待狂，否則想搵人嚟香港都幾難。
其實海關濫權嘅事，簡直多籮籮。早排有個女士北上返港，帶咗一包喺香港買嘅煙，剩番七支，過關時無端端被罰咗二千蚊。但係佢以前有次過關，亦帶咗五支煙，海關人員就話唔使申報，一時一樣，令人無所適從。呢件事被本報踢爆，海關上周四開始補鑊，喺關口派單張，提醒市民出境未夠二十四小時必須申報所攜帶的香煙。唉，早知今日，何必當初？
照功夫茶話齋，海關同食環署咁玩法實在離晒大譜，直情係幫香港趕客。機場等口岸係香港嘅大門，依家等於喺門口放咗幾隻惡狗喺度亂吠，邊個敢入嚟吖。
話時話，香港呢排唔知撞咗乜嘢邪，班執法人員好似食錯藥咁，警方成日要市民無理剝光豬搜身，仲要離譜到一日剝五次，海關同食環署又隨意留難外地遊客。政府咁樣濫權，香港唔使人唱，自己都衰到貼地啦，仲講乜嘢盛夏魅力，「嚴冬霉港」就真。
