政情：阿涂捉蟲 點人數釀流會

政情：阿涂捉蟲 點人數釀流會
民主黨（白鴿黨）耐唔耐就爆出醜聞或做出醜事，好似該黨講明唔主張流會、唔主張拉布，但偏偏尋日就搞到立法會流會。話說白鴿黨四隻老鴿張文光、李華明、黃成智及主席何俊仁尋日中午靜靜雞出咗去做私務，點知黨友涂謹申喺午飯後復會開始時突然要求點人數，四隻老鴿當然趕唔切返去開會啦，最終搞到流會不特止，仲累街坊要喺周六、日通宵開會趕議程，真係累人累物

尋日建制派算係齊腳，民建聯同工聯會坐晒喺度，經濟動力同專業會議都有派人坐低，只係自由黨三個議員就唔見咗。反而泛民主派就只得小貓三幾隻，好似白鴿黨有四人、公民黨有兩人，而工黨、社民連同人民力量就全部唔見影。原本唔夠人開會都未至於流會，只要無議員出聲就得，可惜尋日審議嘅規管機構將客戶個人資料作直銷用途，阿涂提出多項修訂，自然想多啲人在場開會，因而要求點人數。

殺個措手不及 搞出大頭佛
不過，問題係白鴿黨聲言唔支持流會，二來佢班黨友走晒，點解阿涂仲會要求點人數呢？阿涂舉手後，班政府官員即刻騰晒雞周圍搵議員開會，特首辦特別助理陳岳鵬仲掹住大舊衫尾求佢入去，但最終都流會收場。今次阿涂搞出個大頭佛，白鴿黨即時召開緊急會議，諗計向傳媒解畫，最後副主席劉慧卿就捉咗其中一隻失蹤老鴿肥仔明出嚟道歉兼解釋。

究竟四隻老鴿去咗邊呢？肥仔明先自爆一早約咗傳媒訪問，所以開唔到會，而黃成智就去咗同規劃署開會、張文光就去咗醫院探望癌症兒童、何俊仁就同律師商討選舉呈請一事喎，總之講到樣樣嘢都緊要過開會咁。其實班議員去咗邊唔係最大問題，反而係點解阿涂無評估出席人數就亂舉手要求點人數，殺到班黨友措手不及，事後阿涂又無出嚟解釋事件。

肥仔明仲死撐話，事前完全唔知阿涂會咁做，如果一早知阿涂咁搞，佢哋晏晝就唔會走去第二度做嘢喎，真係有早知，無乞兒，如果有早知，阿涂就唔會要求點人數啦！

http://orientaldaily.on.cc/cnt/news/20120626/00176_121.html

仲係到聲大大話俾人知"我哋白鴿叫鷄黨唔玩拉佈..."