果條舊主題 thread 已經變成垃圾桶
我又唔係追求咩點擊率﹐無謂繼續晌個垃圾桶左避右避 d 垃圾
索性開條新 thread 繼續講 ﹐空氣都清新 d
有網友話中日交惡﹐日資從中國全面撤資的話﹐大陸會頂唔順
架佬做生意唔會死錯人
佢嚟你度設廠﹐主要係昅實你個本土市場
你架佬撤走﹐馬上有其他國家仆到嚟填補你個空位﹐尤其是你個市場夠大
其實我哋平時去逛電器影音店舖﹐已經察覺到市場起咗好大變化﹐比如話常用嘅家庭電器
以前無論雪櫃、電視、洗衣機、冷氣機...等
幾乎都係 sony、樂聲、日立、東芝、聲寶、三洋等霸佔大部份陳列品位置﹐其他就係少量歐洲牌子
家陣就日本品牌反而成為少數牌子﹐三洋呢個牌子仲好耐都唔多覺見到
冷氣機就見多咗好多美國牌子﹐大陸都有
最神奇係電視機﹐見到一個好耐未見過嘅老名牌﹐我以為早就打柴 - 德律風根
其他手機、電子產品就唔好講嘞﹐日本品牌好似變成小眾產品
但呢d 只係個人所見
順便晌度講一個個人經驗俾吓大家參考
前年 seafood 痕﹐花咗 三仟幾銀買咗一個所謂高科技電飯煲 - induction heat 電飯煲
唔係巨型大鑊飯煲﹐只係普通家庭幾個人用嘅 size﹐係飯煲中名牌﹐唔係雜嘜
佢話用 induction heat 將熱力傳透米心﹐軟硬隨意﹐咬落彈牙...份外正斗咁話
諗住廣東佬口頭禪話辛苦搵埋自在食﹐可能普通米都煮到好似皇帝御膳咁正...
買咗返去﹐洗米後按著電制﹐佢要先浸米一段時間再加熱煮﹐全程約 45分鐘
煮好後﹐滿心期待幻想中嘅皇帝御膳....咦﹐係軟熟 d 啫﹐冇乜特別
唔通自己 d 米 cheap﹐煮唔到靚飯？
其後換過泰國頂級米 ( 佢話)、日本米、東北米....
話你知﹐我試過去泰國順便買包兩公斤重全超市最貴嘅米返嚟試..
終於有一次﹐洗完米唔記得撳個電制﹐想開飯時先發覺未撳著電飯煲..
冇理由再等 45分鐘先有飯吃架﹐於是焗冷氣將 d 米倒落個湯碗 ( 連水)
開著個鑊加水 - 隔水蒸飯﹐20分鐘搞掂
食落...覺得同高科技電飯煲煮出嚟差唔多
為求證﹐於是反反覆覆試過好多次
結論真係差唔多....
所以一分錢一分貨唔係真理
前幾個月﹐晌某大電器舖又見到某大日本名牌推出新產品 - 更高科電飯煲
盛惠八仟幾銀 ！
唉﹐今次你唔好預我
[
本帖最後由 飛毛腿 於 2012-9-19 09:52 編輯 ]
