1#
大 中
小 發表於 2014-1-19 00:05 只看該作者
不打•短評72：惡戰 (有內容)
不打評價：正場價 $57
不打總評：伏王黃精甫令人刮目相看之作
睇開我影評都知，我雖自稱港產不打，但有3位極品我會破例：葉念琛、黃精甫、杜緻朗
葉念琛打佢歪曲愛情，可返看我點評【溝女不離三兄弟】
黃精甫打佢虎頭蛇尾，可返看我點評【江湖】
杜緻朗打佢自以為是，可返看我點評【大追捕】
蝕完一套又一套，伏王黃精甫竟然仲有傻佬搵佢開戲，原來係爛片教主晶哥
嘩！王晶X 黃精甫！呢個組合，絕對係一個爛片既最佳品牌
繼王晶X葉念琛既【猛鬼愛情故事】、王晶X詹瑞文既【潮性辦公室】之後
可以堪稱史上三大最糜爛電影組合
所以我衝入戲院睇，純為第一時間可以出影評插到佢反轉，拯救眾生
抱住咁既心態入場，一路睇一路搵位插，睇完，發現真心冇咩位好插，條氣chok住！
以戲論戲，以動作片黎考量，撇除個人對王黃配既反感，呢套【惡戰】又真心okay好睇！
我條氣而家都未順，想打而冇得打，谷到生腎石！！！
如果係行內人，其實一早係Filmart見過套戲，以前叫【馬永貞】，個名係膠底
而家食過戰字，暗戰逆戰寒戰毒戰激戰之後，改為【惡戰】都唔見得唔膠
頭場係船艙為細路女抱不平，一拳打落壞人度加下chok樣，係膠左，諗住仲唔係爛片而沾沾自喜
越睇越發現套戲有紋有路，以動作片黎評，打得精彩，劇情唔拖，角色塑造亦唔錯
友情線、兩條愛情線都係動作片既框架下恰到好處，動作分鏡燈光場面調度都睇得出係有心思製作
情況同麥浚龍【殭屍】一樣，你可以唔鍾意，你可以話片種唔啱睇，但點都冇得插佢係爛片
劇情鋪排其實層層有序，先見龍七一人殺四大黑幫之一，再到馬永貞拗手瓜show off，交代兩人實力
一個偷野轉折位，斧頭幫殺到，先襯托出洪金寶既實力
再到馬永貞一打十，差佬包庇先搶鴉片車，馬永貞和龍七先會遇上，同時辣韾日本仔埋伏線
兩人較量不分上下，馬永貞燒鴉片，龍七識英雄重英雄，再鋪排兩人既兄弟情
日本佬招安，再塑造出龍七既江湖道義，四大黑幫之三招攬馬永貞，再帶出洪金寶既大義
龍七被暗算，馬永貞救人，同時日本佬滅村挾女，再襯出飛鏢佬，龍七捨身成仁，洪金寶救女犧牲
最後【死亡遊戲】式覆桌，一個打到尾，明顯係致敬野，而且打得精彩濃縮
動作設計、分鏡及構圖應歸功於武術指導八爺同動作導演洪金寶
但燈光、場面調度、配合武打既CG效果、懷舊味重既色調，應該要讚下黃精甫，效果唔錯
當然黃精甫式濫用慢鏡依然存在，但今次多得黎配合，快慢交替得宜，可以話係導演風格
亦睇得出佢堅持拍出老上海既情懷，剛到上海情侶倚牆果幕係有d感覺
當然動作片既成敗往往取決於演員本身，今次大膽起用伍允龍配安志杰，演得落力出色
兩人身型、身手、演技其實也不錯，應該歸功於晶哥慧眼識英雄
而晶哥又確實醒，江湖傳聞場景係用返【大上海】一景兩拍
有晶哥對主流商業片既計算，剛剛控制到黃精甫自以為是既失控、虎頭蛇尾既壞習慣
某程度上係絕配，互補不足，撞出火花
伍允龍本身個樣帶點傻勁，導演亦拍出佢單純率直自信既一面，獨愛佢呢段對白：
「傳聞話上海冇人接到你十招，我覺得我可以播」拍到佢真心型
而描述兩人惺惺相惜切磋武藝果幾場戲，配樂及攝影亦真心讚，拍出玩味亦塑造出兄弟情
同係動作掛帥，同期垃圾【冬蔭公II】推砌沉悶特技假場面差敵人打極唔死悶到Hi Hi
【惡戰】明顯高出幾班，你自會明白，動作片始終係港產片珍貴資產之一，珍惜！
p.s. 港漫神作【火鳳燎原】既FANS留意，戲入面你會見到某大人^_^
Youtube：港產不打
http://www.youtube.com/cheungsecond
Facebook：港產
http://www.facebook.com/cheungsecond
Weibo：港產不打_微博
http://weibo.com/cheungsecond
************************
港產不打
全職非牟利網絡打手
100%支持本地製作
乜戲都打，淨係唔打港產
************************
相關搜索目錄: 武術
www.youtube.com/cheungsecond
www.facebook.com/cheungsecond
|
