1#
大 中
小 發表於 2014-7-13 17:51 只看該作者
不打•短評93：馴龍記２ (有內容)
不打評價：正場價 $65
不打總評：立體動感，熱鬧開心，娛樂性高亦不失教育意義，家長帶小朋友必看之作
上集係香港票房麻麻，但其實係美國既神話
勇奪5 億全球票房，以一套唔係續集又唔係古典名著改篇既動畫黎講，係好神
今集香港上畫，係唯一一套夠膽硬撼【變形金剛4 】既外語片
發行商其實都預左做炮灰，冇乜宣傳，自生自滅
但我敢講，其實呢套係近呢3 年最好睇既CG 動畫電影！
比【無敵破壞王】【魔雪奇緣】【怪獸大學】【壞蛋獎門人2 】和我上年至愛【綠國奇兵】
更加好看，更有電影感，大家唔好錯過
當然睇動畫電影，要有睇動畫電影既覺悟
始終取向係合家歡，畫面追求立體動感，情節追求熱鬧開心
呢套【馴龍記2 】絕對符合以上要求
論畫面，賽龍搶羊、主角與龍仔天空翱翔、再加百幾條龍連場空戰
善用CG 動畫的多角度視點，再與主觀鏡交替使用，突出空間感及速度感，壯觀浩瀚
神秘龍騎士登場、母親空中換龍、主角滑翔飛行、巨龍噴魚群龍搶食等等，幾幕令人印象深刻
加上唔同品種既龍，大大話話都有幾百條，有大有細各具特色，造型生動，場面熱鬧豐富
仲有兩條巨龍哥斯拉式對決，畫面景深、比例、遠近對比處理出色，層次分明更顯立體效果
今集男主角戰甲造型實而不華，龍甲頭盔背鰭定風翼，左手短刀右腳火焰劍，十分討好
不過最型莫過於母親大人，神秘龍騎士造型霸氣十足
論情節，維京人、龍獵人、大奸角Eret 三方角力，你追我逐，左攻右守，動作連場
中間殺出神秘龍騎士，身份令觀眾眼前一亮，補完失去既母子情外，更有一幕鐵漢柔情
主角父親事隔廿年重遇失蹤妻子一幕，唔浮誇唔老土，一句說話一個擁抱甚為感人
友情、親情、愛情樣樣都有刻劃，主角與黑龍之間由出生入死、一個斷翼一個斷腳既情義
冷不防到最後夠膽玩埋殺父矛盾，人與龍既感情有多層次既表述
最後當然大團圓，主角既真誠及器量打破催眠操縱
一隻手指咁大既龍仔堅持以弱鬥強，一夫當關硬撼成座山咁大既巨龍
結局一呼百應，感動百幾條龍反操縱合力圍攻巨龍，大化人心，場面壯觀
當然動畫電影總會講些硬道理，帶點教育味
呢套主旨一向明確，屠龍與馴龍之間，帶出強烈反戰信息
殺戮報復只會因果循環沒完沒了，唯有寬恕、接納、包容才可止戈，人龍共處世界大同
而今集主角既成長，由逍遙浪子到族群領袖，青年叛逆獨斷獨行，到最後肩負保護族人既責任
重情重義、勇氣無懼既英雄形像雖然好行，但以今時今日往往由壞孩子或亦正亦邪角色做主角既潮流下
我覺得反而係一條清泉，睇得舒服，睇得開心
其實識睇3D ，一定係睇3D CG
因為全部都係電腦圖像，3D 景深可以任較，光源位可以任調
可以做到最突出、最aggressive 既3D 效果，而且畫面唔會太暗
而呢套【馴龍記2 】一樣，值得入場一看，亦值得入場睇3D
Youtube：港產不打
http://www.youtube.com/cheungsecond
Facebook：港產
http://www.facebook.com/cheungsecond
Weibo：港產不打_微博
http://weibo.com/cheungsecond
************************
港產不打
全職非牟利網絡打手
100%支持本地製作
乜戲都打，淨係唔打港產
************************
相關搜索目錄: 電腦 外語 娛樂
www.youtube.com/cheungsecond
www.facebook.com/cheungsecond
|
