睇咗[見龍卸甲]國內版

上週末國內小黃金週, 上咗去玩幾日,本來諗住同女友睇[黃金羅盤],點知miss咗時間, 淨係有得[見龍卸甲]睇, 唯有死就死, 抱著大不了入場瞓一餐既心態去睇戲, 結果……講都唔信, 不單冇瞓到仲眼光光睇到散場.

[見龍卸甲]係講三國時代蜀國五虎將排名第三既趙子龍一生故事. 不過李仁港就用折子式選了趙子龍幾個高潮位及最後既一戰來講故事, 當然戲同史實有幾多出入, 作為觀眾既我一d都唔關心. 但戲既節奏緊湊,一浪浪既事件令人好投入. 由[入伍],[立功],[救阿斗],[回常山],[封將],[最後一戰],六個大段落組織而成, 導演手法浪漫有氣勢, 劇本出色有力, 言之有物而唔婆媽, 但係我覺得回常山那一段太草草了事, 不過世事難完美…算吧啦. 演員挑選有用心思, 幾個主角唔講啦, side cast如狄龍做關雲長, 劉松仁係曹操, 岳華係劉備, 佢地戲唔多但非常入戲, 其他人好似安志杰,吳健豪之類就等入場既人自己去發現… 美術方面, 我自己就唔鍾意d戲服, 似近代野又似日本野, 不過口味人人唔同, 不過小道具同景方面就very good, 由兵符師印,各人武器至皮影公仔都造得好仔細,有設計…而拍攝方面,張東亮水準一向唔多定, 不過今次就真係見得人拜得神…

至於武打方面係元德做武指, 佢係武行中既老師傅, 同元華,元秋算係同一輩, 不過年紀就後生d啦. 部戲既武打部份以戰陣為主, 主力係馬上戰, 港片中比較少見, 搞出來絕對好睇唔差有新意.

部戲講真唔係咁完美, 依有不足之處, 不過相比近日既港片,已經係好唔錯, 起碼認真…同時結局趙子龍既死因亦好有討論之餘地. 依d就等其他人睇完再chat.

最後…李仁港既戲,自從[猛龍]之後都唔想再睇, 就算睇亦估唔到會有讚佢既一日, 不過明顯今次真係有進步, 自從13年既[95獨臂刀]之後,都好似冇乜好野,包括[阿虎]我都係麻麻…或者人真係會進步…唔知幾時輪到其他導演…???