有句話 : 野火燒不盡, 春風吹又生
毒品就係其中一樣
好多人都識講 " 治標不如治本" , 治本當然要由切斷毒品源頭做起
毒品源頭係邊度 ?
以海洛英為例
眾所周知泰緬邊境金三角係重要源頭之一
罌粟種植區係緬甸境內
咪以為緬甸軍政府有心包庇毒販, 軍政府都受國際壓力耐不耐要去清剿
但種植區同白粉加工區係叛軍, 游擊隊控制區內
政府官兵係打份工, 掃蕩一輪後就收工返歸
而叛軍, 游擊隊就靠種植, 加工毒品賺錢而生存, 維持經費
打起上嚟你話邊一方會博老命 ?
另一源頭係金新月 - 即阿富汗, 巴基斯坦邊境一帶
以往仲要多費唇舌講解阿富汗地勢崎嶇複雜
但今時今日就唔駛多講, 睇吓美軍帶頭嘅北約, 2001年殺入阿富汗打到今日
喊捉拉登, 生要見人, 死要見屍, 結果呢 ?
塔利班執政時曾經禁絕種罌粟
正係呢個時期世界供應量減少, 而美國可卡因熱潮有所減退
哥倫比亞毒販把握時機將業務多元化
開始加入種植罌粟同加工泡製海洛英, 以美國市場為目標
而 2001年後塔利班政權俾美國佬打倒淪為山區流寇
於是又重新種植罌粟同加工白粉賺取經費
呢兩大毒品源頭唔係單純製毒販毒咁簡單
摻入複雜民族武裝戰鬥, 國際政治勢力較量等複雜因素
除非把心一橫掟兩個核彈落去, 令成個地區變成幅射污染無人區
否則想禁絕呢兩大源頭係妄想
哥倫比亞以往以可卡因, 大麻為主
90年代初開始沾手玩埋海洛英
咪以為毒梟就一定好似港產片所見咁孭住機槍, 沖鋒槍當街當巷火拼爭地盤
南美毒梟當盤毒品生意係現代企業咁管理
以物流, 價格, 市場佔有率等各方面埋手
南美地理上靠近美國, 透過空運海運以外又可以通過墨西哥邊境入美國
而亞洲貨 (阿富汗、金三角)則要經過六七個國家地區轉運又轉運入美國
所以南美貨物流上佔優勢
以往墨西哥海洛英品質差, 被稱為 MexicanMud (墨西哥泥), 好難同亞洲貨競爭
但哥倫比亞印進亞洲罌粟種, 招兵買馬引入高技術提煉人員
終於 90年中開始產出高品質高純度海洛英
跟住落嚟就係打一場價格戰去攻佔市場
當時美國東岸高純度海洛英批發價約 16 ~ 18萬美元一公斤
哥倫比亞人要價係 8萬美元一公斤 !
而且首先發放免費樣品俾可卡因大拆家試試市場同推廣
同時運送毒品手法上又加大力度以螞蟻搬家方式減少失手被擒嘅損失
哥倫比亞毒梟有幾大勢力 ?
多年前毒梟 試圖跟政府講數達成協議
話如果哥倫比亞政府釋放幾個被捕頭目
毒梟可以攞 100億美元幫政府還外債 !
相關搜索目錄: 物流
