香港 finially 有人引入銀鏡技

閃足一世　妙銀回春
一向覺得電鍍飾件可以令汽車妙手回春，無論座駕年份有幾高，加件電鍍飾件，即時成個 Look都 Young晒！最近有人引入銀鏡技，利用獨家技術，就可以如噴油般，將車身不同部份噴成猶如電鍍鏡面的閃爆銀效果，顏色更加唔係獨沽一味得銀色！不過如果想將座駕變成閃爆之車，就要先過運輸署嗰關。
查詢： 2793 3389（ JPG Motor）


今時今日車主想幫座駕搵件電鍍飾件，除非原廠提供，否則只可去汽車用品店搵現成貨，或者搵電鍍廠為自己件飾件重新翻新，不過汽車用品店選擇唔多，遇着口味腌尖的車主，隨時撲勻港九新界都係得個吉！講到電鍍廠，有無諗過香港乜都講環保，電鍍廠屬污染行業，已經買少見少，想搵佢哋幫手都唔容易。不過科技日新月異，總有一些代替品出現。

近年有香港汽車公司引入日本一種名為「銀鏡技」的技術，是一種無毒塗層的水溶性物質，利用特製噴槍，將物料直接噴到飾件上，工序與噴油差不多。與拍檔獨家代理這種技術的 Gavin更講到明：「銀鏡技唔單止可以處理金屬物料，一些非金屬物料同樣上到色，例如玻璃、塑膠、鋁質甚至皮料都可以造到電鍍鏡面效果，而且除了電鍍銀色外，現時技術已經可以做到調配不同色系的電鍍效果，將架車搞到電鍍金、電鍍藍、電鍍紅一樣得！」聽落都覺得神奇！ Gavin話雖然銀鏡技靈活性強，可處理三尖八角的刁鑽位置，甚至全車轉為鏡面，不過現時大部份人都選擇為胎軨及側鏡等大路位置，反而外國車主玩得較癲，會將全車轉色。



電單車頭唇神奇變色
雖然講到好似噴層油咁簡單，其實 Gavin話整個技術花了過百萬元，更要派師傅到日本實習，學習調校藥水及相關技術，事關只要一小步驟出錯，所有工序就功虧一簣！至於箇中的化學原理及原料， Gavin就話屬高度機密，恕難奉告。

銀鏡技收費不會較電鍍便宜，但勝在靈活性強，最低收費$1,500，普通一件飾件約千元，如果全車身轉色，車主要有心理準備，隨時要近$100,000。

保養清潔好簡單
鏡面基本有保護劑，一般手指甲刮花都不會留明顯痕迹，且銀鏡技可承受攝氏 300度高溫，就算座駕曝曬，都唔使擔心「甩色」。如果想 Keep住閃，亦毋須花太多工夫，只要用普通車用清潔劑清理便可，保養得宜，甚至可以閃足一世。

Step 1 與處理一般噴油配件差不多， 先要清理飾件表面的瑕疵及污穢， 再進行跣灰，飾件滑滑溜溜， 出來效果至夠靚， 然後就塗上含有化學藥水的白色底油， 放在焗油房風乾一晚。

Step 2 可以開始噴色程序， 用藥水及純水進行清潔。 （百分百清純水，不能含雜質）

Step 3 將藥水噴上飾件後， 可見飾件顏色由啞啡慢慢漸變成銀， 並出現電鍍效果。

Step 4 用純水清洗藥水後再吹乾， 擺放數小時後噴上保護鏡劑即可。

成架車玩電鍍，只是特別，不過唔覺得亮.....

用 來 整 D 飾 件 真 係 幾 好
不 過 成 架 車 整 真 係 得 個 DRY 字