1#
大 中
小 發表於 2013-12-31 09:31 只看該作者
不打•短評67：風起了 (有內容)
不打評價：星期二特惠 $43
不打總評：日本人看自我感覺良好、拍俾大人睇既卡通電影
作為日本國寶級動畫泰斗，退休前最後一部動畫電影
選擇日本民族題材無可厚非，不過你要預左外國人睇會唔多順眼
套戲的而且確一D都冇宣揚軍國主義，但明顯有美化戰爭
選擇用二次大戰日本關鍵戰力、零式戰機既設計師堀越二郎既一生為本
好明目張膽咁描述佢一生追尋既所謂夢想──「我唯一想做的事情就是打造一台美麗的飛機」
仆X，飛咩機姐！？根本就係戰鬥機！係殺人武器！
將打造軍事武器既設計者，用糖衣包裝，用夢想去掩飾，塑造成實踐夢想既青年才俊咁能樣
最大獲佢係卡通片，而且係國寶級動畫，係預左會有小朋友睇，仲唔能係潛而默化思想改造？！
你可能反問我有冇咁誇張？但你試下幻想一下，套戲主角係負責發明原子彈既科學家
佢一生追求科學研究，想找出世上所有元素既特性，最後發現鈾元素製成原子彈
結局遠境睇住廣島核爆後既蘑菇雲，係遼闊既草原上與逝去既嬌妻神交，再夢會愛因斯坦
你話日本人睇返，會唔會燥底先！？易地而處，大家明未？
宮崎駿醉心飛行係事實，但搵堀越二郎做主角，將咁敏感既歷史人物，斷章取義去美化亦係事實
我理九得佢係果個時代有冇得揀，我淨係知道從來做武器既唔值得歌頌！唔值得表揚！
宮崎駿有冇心去扭曲冇人知，但明顯用一兩句對話「太重唔駛帶機關槍就好」去交代係一廂情願
作為退休之作，有大義凜然既環保、反戰等議題唔講，選擇設計零式，都係一廂情願
撇除故事主題唔評論，淨睇套戲都唔算係佳作，宮崎駿明顯老馬冇火，力不從心
動畫既定位好尷尬，你話係個人傳記又唔似，根本冇篇幅去描述佢成長，飛機既設計過程亦好簡略
重心反而放係段韓式姻緣，火車偶遇地震見患難事隔多年輕井澤再偶遇之後絕症生離死別
其實條橋好行，巧合既巧合，你話係真人真事冇人會信，唯一亮點係亂世佳人式既臨時婚禮
拍出日本味道，至於兩次接帽既推砌，我老婆話好浪漫，我就話好虛假！
你話索性當愛情片睇呢套又唔掂播，兩人第二次偶遇後完全冇鋪排冇蘊釀就一生一世
兩人感情既營造質和量係愛情片既角度都完全唔合格，導致婚後妻子為丈夫夢想而犧牲冇晒感動位
談夢想唔夠說服力，談愛情唔夠感染力，兩頭唔到岸
至於回顧日本歷史既描述，包括地震、經濟蕭條、二戰前的人民生活等
坦白講關我地咩事？！我地唔會有共鳴，亦唔會同情
藍天白雲係畫得壯麗，飛機視點係畫得壯觀
但作為國寶級動畫泰斗既最後一作，絕對談唔上劃出完美既句號
只能期待宮崎吾朗既脫胎換骨
Youtube：港產不打
http://www.youtube.com/cheungsecond
Facebook：港產
http://www.facebook.com/cheungsecond
Weibo：港產不打_微博
http://weibo.com/cheungsecond
************************
港產不打
全職非牟利網絡打手
100%支持本地製作
乜戲都打，淨係唔打港產
************************
www.youtube.com/cheungsecond
www.facebook.com/cheungsecond
|
