旅遊分享 海南海鮮之旅
旅遊分享 海南海鮮之旅
高考放榜後，為獎勵自己，於是相約左4個朋友仔去旅行relax下。本來打算去布吉島玩下，但最後因旅費問題選擇了去海南島享受陽光與海灘，全程5日4夜自由行，一個字free。
話說我們一行5人早機到三亞海口機場.，在酒店小休後，我地就去左同陽光與海灘玩遊戲；水上電單車、香蕉船、滑浪同滑長傘梗係要玩喇！一玩就一個下午，個個玩到 「 軟奶奶 」。之後在酒店小休後再出去食晚飯，去到海南島，一定係食海鮮喇。夜晚7點幾，一行幾人搭的士去網上有人介紹過的河西路春園海鮮廣場。
當我地諗住入去廣場時，突然有一個聲如虹鐘呀姐叫我地去佢間大排檔試下，香港人比較重招呼，好招呼自然好自願咁試下呀姐間大排檔喇！間大排檔對正春園海鮮廣場，叫雪姐海鮮，而且價錢相對廣場較平，我地班學生哥最佳選擇。在雪姐介紹下，我地首先叫幾個椰青解下渴，再來每人一隻蛋蒸海膽食下，感覺就好似食蒸水蛋，但底部有海膽肉可以用匙刮來食，都幾鮮甜，由於第一次原故，朋友仔都有比針針到幾次，食時要格外小心。海膽頭盤完畢後再經雪姐介紹下，點左香葱炒魷魚、蒜蓉蒸蜆、蒜蓉蒸青口、粉絲蒸扇貝、一條青蒸福壽魚，一個白焯蝦，一個香葱炒蟹同一個蟹粥，嘩！！！正到丫，而且碟碟都夠曬份量。碟炒魷魚啖啖鬆化唔「痴」牙，碟蒜蓉蜆同青口，好似好大同小異，但食落都好大分別，蜆就夠曬味重，而青口就一D都唔「銀」，無渣，好有咬口。青蒸魚仲正，啖啖肉夠曬鮮味且無腥味，不過如果係唔食葱就要一早講聲，免得到時有排煩，事關佢好多都會放葱點綴下D色。至於個炒蟹就有D特別，佢炒到好乾身，但D肉好多汁又好厚肉地，而個白焯蝦就好大件下，但唔會「鞋」，女士們食4 , 5 隻都夠曬數，可以唔洗再食其他野。最後到本人最誠意推介的蟹粥，相比起澳門陸記的水蟹粥，今次鍋蟹粥蟹味更濃，而且粥又滑，最正就係D蟹唔會淨得個殼，好多蟹肉食。食完咁多野，價錢合理，抵食！食完雪姐仲好好人咁同我講去邊潛水好同去邊買手信抵，好好人。仲同我地講，搭的士要堅持目的地，唔好聽的士司機講去邊好，因佢地會有回佣。而我地第二日都按佢指示去左玩潛水同買手信，果然無介紹錯。值得一提是，我地無一個人有肚子唔舒服。超乎意料之外。
由於洗費問題，唔可以晚晚食海鮮咁奢侈，我地都係到臨飛前一晚先再食多次雪姐海鮮，難得係呀雪姐認到我地，仲好豪咁請我地飲佢新返的紅酒，而同一樣的食物我地食第二次都係一樣咁正，保持水準。雪姐仲同我地講佢以前間鋪都是在海鮮廣場裡面，但因租金太貴，所以租左而家間鋪，雪姐仲話而家好多旅遊熟客去錯廣場舊鋪搵佢，分簿左現有生意，好唔抵同會比人做壞個名，叫我地下次來海南要識路搵佢。咁識做生意，而食物又夠水準，好難唔介紹比大家試試。
地址 : 三亞市河西路285號 (春園海鮮廣場對面)
電話 : 138 769 45668 / 0898 881 81102 (雪姐)
相關搜索目錄: 自由行 電單車 酒店 旅遊 紅酒
