識得老友多真係好,特別係身為高層既老友,昨晚就係因為識得高層老友既關係,所以去咗會展睇咗[武俠梁祝]既首映…

先講番部戲…由於本來8月中公映,但映期一推再推, 直至到了現在. 內心對此戲寄望不高加上導演之前作品成績麻麻, 所以有免費飛就一於入場睇啦. 言歸正傳, 好多人都想知部戲到底好唔好睇…老實講比想像中好睇. 起碼片中選角有新鮮感, 除咗吳尊之外, 仲有國內新一代[郭靖]胡歌, 台灣音樂教父哈林, 同好耐冇見既[鬼腳七]熊欣欣都客串, 比起一般港片既秋生,志偉,詹sir之類既熟口熟面…都算有驚喜.同時亦證明香港真係冇乜演員可以用. 有關片中主角, 阿sa就好阿sa,時裝feel到不得了, 話佢可以扮男仔就真搵人信, 不過吳尊就幾眼前一亮,佢幾乎靚到可以扮女仔(如果佢唔係咁大隻), 其他演員就不過不失…
故事方面, 其實係傳統梁祝既變奏,結尾方面就溶合咗[羅密歐與茱麗葉]既ending,我覺得起碼有用過腦.武俠方面,本人覺得程小東導演非常交行貨,佢上次[江山美人]已經冇野睇,今次就好少少啦, 因為都冇乜特別打鬥場面出現.可能另一個原因係阿sa拍戲之前受咗傷,所以佢本來識武功都改成唔識. 美術係奚仲文既高徒黃炳耀(唔係20年既奪命較剪腳,唔好誤會)出手,所以粗中有細,知道冇錢搞;不過都有野睇(如果你識睇的話),影像就因為導演馬楚成係攝影師出身,所以唔差得晒, 不過我就覺得拍得唔夠氣派, 話晒武俠片點都有幾吓條氣勢shoot,但睇完又唔覺有.

總括而論,全片文戲好大路,忠奸分明, 唔使用腦都睇到明.開頭一個鐘都算可以,開開心心啦,但覺得男女主角既感情發展來得唔自然. 到尾段就唔係好掂,特別係個ending就真係失敗之作. 其實本片有唔少好元素,但又係捉到鹿唔識脫角. 不過都比前一排既港片好睇…入唔入場就你地自己決定. 坊間聽聞月底有勁片會上映..............[奪師 2], 問你驚未????

= =

引用:

原帖由 runaway 於 2008-10-6 02:35 發表
...

Seems boring.