--------------------------------------------------------------------------------
http://www.infidels.org/library/modern/mark_vuletic/five.html
前言：
十二個對罪惡「坐視不理」、對受害者「見死不救」o既警員，
十二個似曾相識o既「理由」。
原文：
The Tale of the Twelve Officers
Mark I. Vuletic
處女譯文：
十二個警員告白
Ｋ女士被一個惡棍強姦，然後慢慢虐殺，當然令人難過。
其實當時有十二個有足夠裝備G休班警員在場,
佢地忽略Ｋ女士驚叫求助, 而且袖手旁觀到虐殺結束。
十二個警員都係我老友，我面臨一場信心危機。
我稍後問佢地,點解明明可以輕易救到Ｋ女士都唔出手。
1st 警員：
「我考慮過干涉，但我認為畀兇手行使佢o既自由意志
明顯比遏抑佢o既意志好。我為佢o既選擇難過, 不過咁亦係為有自由意志o既世界要付出o既代價。
唔通你寧願大家都只係機器人?
仲有，我唔能夠控制佢o既選擇，
所以亦唔能夠為佢o既行動負責。」
2nd 警員：
「我o既動機稍為唔同。幾乎向兇手拔槍o既時候，
我諗：『今次係個畀一般人展示無私英勇行為o既好機會，
如果我下下都介入，咁佢地就永遠無法自發實踐道德。
人人可能越來越只顧自己。』
所以我退下。雖然等唔到英雄出現, 不過咁亦係畀世人有機會展現良知o既代價。
唔通你寧願全世界淨係得愛、和平、薔薇?」
3rd 警員：
「我甚至無考慮過要插手。
如果唔係因為我有豐富全面o既生活經驗，
我大概會插手。
Ｋ女士被姦殺，單獨睇似乎相當可怕。
但當將呢件事拼入人生拼圖之後，
會發現佢令生命更有整體美。
Ｋ女士o既尖叫猶如幾個唔和諧o既音符令樂章生色。
實際上, 我忍唔住揮舞雙手，
想像自己正指揮呢幕歌劇。」
4th 警員：
「當我初到場，我的確拔槍指向強姦犯。」
第四個警員非常羞愧咁話：
「你知唔知我差少少就毀滅世上o既「善」?
我係話，我地都知道無「惡」就無「善」。
當我醒悟到我幾乎做左D咩，
強烈o既噁心感覺令我手腳無力，
好在我及時停止，真係只差少少。」
5th 警員：
「聽住，我無理由嘗試向你解釋細節。」
第五個警員，綽號「腦魔」，幾乎無所不曉，
而且智商高到超乎尋常。
「我有無懈可擊o既理由唔去干涉，
但係對你黎講太高深莫測，
所以我亦懶得去解。
我係話，你都認你連我些少淵博都唔及，
咁你有咩權利去判斷? 不過唔好誤解，
我要指出無人比我更關心Ｋ女士，
仲有，我實際上係個大好人。搞掂。」
6th 警員：
「我夠想保護Ｋ女士咯，」
第六名警員小心咁避開公眾目光，
「不過就係唔得呢。你明唔明呀，
我要畀大家自由選擇信我或者唔信我。
如果但凡有罪惡我都大顯身手──「有我頂住!」
咁做實在太明顯，人人自然唔信我都唔得。
你可唔可以想像比咁做更損害自由意志G事?
好明顯，我應該退下，由得Ｋ女士被姦殺，
人人可以自由選擇信唔信有我呢個愛民如子G警員。」
7th 警員：
「你究竟想投訴乜野!」
第七名警員大喝，眉毛又怒又不屑咁弓起。
「我上星期先至救番個幾乎被姦殺G女人，
係咪要我次次見到有事可能發生就彈出黎? 無更多G婦女被害，已經證明我G「善」。」
8th 警員，睇起來同樣氣餒：
「我做乜野都係未夠好! 你知唔知道情況可能更壞? 惡棍原本有一枝小型噴火槍，
係我由佢手上奪走，
當然，我畀佢保留番棍、鉗、酸液，
但試想如果佢有埋噴火槍會更可怕! Ｋ女士應該感謝有幸運星眷顧，
令佢免於火險。」
9th 警員：
「我私底下話你知，
Ｋ女士已由我暗中救回，
飛往一個熱帶勝地體驗極樂生活，
佢受過o既考驗已經係前塵往事。
你會同意佢得到既報償足夠抵銷痛苦有餘,
即使袖手旁觀，到頭來我依然善良。」
10th 警員披露有關Ｋ女士o既驚人秘密，
令我地要重新理解整件事：
「佢由遺傳工程從頭設計過。
佢係我造o既，所以佢屬於我私產，
而且我想對佢點就點。
我可以親自姦殺佢，
而且咁做唔會比你撕爛一張屬於你o既紙更壞。
就算我係壞人唔幫佢亦無問題……」
11th 警員插嘴……
11th 警員指向 10th 警員：
「係我請佢為我創造Ｋ女士，
因為我要有人愛我、敬拜我。
但當我向Ｋ女士說明緣由，
佢竟然背離我，
以為無左我仲可以搵到人生意義、幸福!
我愛o既安排就係要惡棍姦殺佢，
等佢吃足苦頭、迷途知返，
實現創造佢o既目的。
佢死前幾秒, 終於說服自己佢係愛我o既，
因為佢知道只有我能夠赦免佢o既罪。
我唔會忘記佢喉嚨被割開前，乞求寬恕，
最後一次望向我眼中o既愛意，
淒美感動到我喊。
而家佢就等緊我去……」
12 th 警員發笑……
12 th 警員話中帶笑：
「咦，又會咁o岩都有?
睇來個惡棍出兩份糧，
因為我亦買兇請佢殺Ｋ女士!
為乜? 想試一試佢o者。
我同Ｋ女士拖左手仔一排，
一夕良宵，佢終於講佢愛我。
好自然，我想確定佢係咪真係愛我──
我指：即使佢渾身浴血，而我坐視不理，
佢仍然咁崇拜我。」
最後 1st 警員毫無保留咁話：
「當我地目睹Ｋ女士被強姦再被刀狂插，
我地感同身受，甚至比佢更痛苦。」
所有人，包括我自己，都點頭同意。
後話：
我發現教徒慣於接受對苦難o既陳腐辯解， 而單靠枯燥分析幾乎唔可能動搖呢種慣性。
派發印上「上帝」名義o既道德空頭支票，
o係宗教圈子有壓倒性o既吸引力。
所以，我撇開分析，用寓言故事說明，
當中無侮辱或傷害任何人o既意圖。
而可能指向我個人（作為一個前教徒）o既事，我未提隻字。
