過馬路
我同 我前女朋友，本來係同事，我地一齊差唔多兩年，
分左手，兩個月島啦；大家慢慢對對方無曬感覺，然後分開嘅。
其實，喺分開之前，我地直頭已經係 ...
人住埋一齊！但係個心 ... 已經慢慢當對方透明。
終於，差唔多兩個月前島啦，佢搬走左。
我地都明白，咁落去，係無結果。所以，唔需要開口講；
佢搬走、而我無留佢 ... 大家心照、大家仲係朋友！
大家變番同事，亦係朋友嘅關係，好似兩年前、未拍拖嗰陣咁。
直到 ... 早幾日，佢突然間話要辭職！
咁都唔係問題，但係，我忽然間，有一種 ... 好奇怪嘅感覺！
係好似 ... 就尼要失去一樣好重要嘅野嘅感覺；
但係，我係好肯定自己唔會再對佢有朋友以外嘅感覺嘅。
咁，在私，我同佢只係朋友。在公，一個咁普通嘅文員、
通街都可以請到嘅文員，走咪走囉！佢唔做，大把人等住做！
但係唔知點解，我竟然會諗：大家係同事，日日返工都會見到，
咁如果佢唔做呢？
我先重申：我係好肯定自己唔會再對佢有朋友以外嘅感覺！
咁但係，我又忽然間有一種 ... 幻得幻失嘅感覺 ...
覺得，會失去一樣好重要嘅野咁；但係我真係唔再愛佢㗎喇喎！
咁我有乜野失去吖、有乜唔妥吖，我唔知！
我係覺得唔妥！但係有乜唔妥連我自己都唔知！
最後，我無問到佢可唔可以唔走；我只係同佢講，
出到去，如果唔慣嘅，隨時可以番尼。
點知，佢突然間好似唔知受左乜刺激咁，勁激動咁同我講：
「我以後都唔想見到你！」
嗰一刻，我都唔知點解，竟然會有，好似「失戀」咁嘅感覺。
個感覺係，除左用「失戀」尼形容，我諗唔到其他用詞形容囉。
咁！「失戀」！對住一個已經唔愛嘅人，覺得自己「失戀」？
就算係！分左手成兩個月！先覺得自己「失戀」？
......
呢幾日，我工又唔番、淨係係咁聽 鄭融 首「過馬路」，
( 即係國語嘅「紅綠燈」)
一路聽、一路飲酒。醉！就訓！醒左，再一路聽、一路飲！
( 當然，中途亦唔會唔記得 0630 睇「香港早晨」)
我唔知自己點解會唔開心、點解會有失去左某樣野嘅感覺，
點解會係咁聽「過馬路」！我唔知！
我淨係知道飲！醉！訓！醒！之後再重復 ...
失去乜野、有乜唔妥，我唔知！總之！飲！
