淫媒裝胸又作勢　餘孽夠膽就亂嚟

淫媒裝胸又作勢　餘孽夠膽就亂嚟

壹淫媒旗下網站再次因為發放短片宣淫販賤，家陣畀淫褻物品審裁處正式評為第二類不雅物品。正所謂，除淫未盡，後患無窮，如果當局呢次又再玩包庇，阿芝阿佐唔執法，一定逃唔過市民雪亮嘅眼睛。
爛果報網站動新聞上月廿六日上載咗一段名為「大咪俾人 平胸亦自信」嘅短片，話就話勸喻女性唔好因為胸細而自卑，但介紹乳房杯型嗰陣，條片快速播出多幅女性胸部特寫性感相，期間突然快閃出一幅外國女人嘅裸胸露點相，乳房、乳頭清晰可見，直到今個月十三日淫審處將短片暫評為第二類不雅物品之後，露點相至被爛果報網站刪除。

又嚟？查實，呢次已經係壹淫媒喺短短三個月內第二次因網上短片宣淫被淫審處評為第二類不雅物品。舊年十月，壹淫媒旗下網站一段名為「如何自行檢查乳房」嘅短片，打住教人如何預防乳癌嘅招牌，拍攝女子裸胸檢查乳房，四分鐘片段幾乎全部係乳房大特寫，連格仔都冇打。

淫審處將短片正式評為第二類不雅物品，但影視處居然話唔會採取進一步執法行動，理由係網站已經加咗適當警告字句，合乎業務守則要求喎。壹淫媒擺到明衝擊法律底線，而且淫審處亦有咗裁決，影視處以網站事後加番警告字眼為理由唔檢控玩放生，等於縱容淫媒為禍社會。

影視處護淫護到出晒面，唔怪得淫媒淫過翻尋味咯。之不過，多行不義必自斃，如果淫賤黎以為有港英餘孽照住就可以為所欲為，咁就想創佢個心咯。避得上次避唔得今次，更加避唔過市民銳利嘅眼睛。

正如身兼淫審處審裁員嘅執業大律師龔靜儀話齋，即使呢次爛果報網站將裸胸相抽起，但唔等於影視處唔使執法，因為幅相被抽起之前，經已有市民睇咗，唔可以刪咗就當冇事。

冇錯嘞，如果抽起幅相就可以過骨，豈不是冇畀人踢爆就可以繼續宣淫？如果影視處今鋪又係有法唔執，唔檢控淫媒，就等於人為製造灰色地帶，等人有樣學樣，導致不良資訊喺網上暢通無阻，令愈來愈多青少年淪為淫媒嘅陪葬品。

呢，城市大學專業進修學院學術統籌宋立功就講得啱嘞，喺網上一而再、再而三咁發放不良資訊，係意圖測試淫審處嘅底線，影視處要跟足法律指引執法，對重犯嘅傳媒加強監察，如果當局手軟，法律就如同虛設。

影視處發言人話，會就今次被正式評為第二類不雅物品嘅短片作出適當跟進喎。咪再畀功夫茶講中，所謂適當跟進隨時可能變為公然放縱。講真，如果唔係港英餘孽一再放生，縱淫為禍，影視處既幫兇又幫「胸」，淫賤黎點可以裝腔作勢，肆無忌憚咁喺網上裝「胸」作勢吖。

再講吖，壹淫媒旗下刊物違反《淫褻及不雅物品管制條例》過百次，但係所謂刑罰輕到冇人信，一次罰款幾千蚊，最多亦不過罰幾萬。罰款當成本，梗係愈淫賤愈快樂，愈淫賤愈猖狂啦。

影視處要跟進吖嘛，嗱，等功夫茶提醒吓班官老爺，根據本港法例，發放不雅物品係刑事罪行，初犯者最高罰款四十萬元及監禁一年，再犯者最高罰款八十萬元及監禁一年。法律唔係兒戲，影視處係咪依例執法，市民一定到實，夠膽就亂嚟啦！

http://orientaldaily.on.cc/cnt/news/20110123/00190_001.html