1#
大 中
小 發表於 2014-1-15 01:50 只看該作者
不打•短評71：救火英雄 (有內容)
不打評價：3D價 $79
不打總評：郭子健導演成功駕馭商業片既試範作，真心推！
上次一上畫就出【風暴】影評，估唔到成為主流影評中唯一稱讚該片既影評
網友插到套戲反轉，再插到我篇文反轉，我痛定思痛，仍然堅持想還【風暴】一個公道
綠幕重塑中環特技真心唔差，中段警匪追逐加白鴿橫飛場口設計有heart，偏偏冇人提過
剩係聚焦於結局爆炸地陷爛天橋誇張失實，我認同係over左，但不至於要判死刑永不超生
坦白講，劉德華比美超人鋼鐵之軀，相對荷里活一籃子槍戰片簡直九牛一毛
你話衰結局，大把荷里活戲結局爛到不堪
如果【風暴】係荷里活拍，角色換晒外國人，相信負評一定唔會咁多
呢個就係我經常指出：香港人對外語片既盲目及對港產片既雙重標準
同樣情況發生係【救火英雄】，未上畫，戲先打
我明白消防員冇可能可以戴眼鏡、我明白塵爆唔係亂灑包麵粉就得、我明白最後應該一點煙就爆
但【救火英雄】明顯唔係一套求真既寫實片，一直宣傳都係透過救火去講友情講人性
而郭子健導演呢方面係做得好成功，大家可唔可以有D量度，唔好再帶有色眼鏡去看港產片？
霆鋒、余文樂、安志杰三人既矛盾前設，一件往事三人不同取態及發展，個頭開得很好
之後加入胡軍及任達華，五個角色互撞，演技、角色刻劃、人性矛盾都撞出火花
唔計佢個場火災一曲十三折既連鎖反應誇張失實，以戲論戲，確實係拍出戲味！
另一新鮮嘗試係一開頭已開宗明義用煙instead of火作為切入，用煙去交代火災既真正恐怖
亦順理成章帶出任達華仲爭你兩打啤酒既名場面，效果出色，印象深刻！
而煙亦唔單止畫面上既描述，亦成功借喻為心理上既陰霾、人性上既迷失，緊扣返三人條友情線
比起粗糙不堪既【逃出生天】高低立見，另有更高層次既視野和深度
有人插安志杰死得兒戲，但我就話佢係劇本上起到「起承轉合」轉既作用，承上啟下
先營造出結局塵爆果幕三人傳煙既名場面，燈光場面調度一流，相信將成港產片經典場面之一
郭子健導演成名作係與鄭思傑合編合導既【打擂台】，但其實佢前作【野良犬】【青苔】已經響晒朵
足見佢編與導既功力，擅長人性刻劃，亦具大膽及創新既角度，絕對係本地新生代出色導演之一
希望大家支持，港產片未來就係靠佢地撐住！
P.S. 如果喜歡塵爆三人傳煙既名場面，我推介你睇銀河神作之一：游達志既【暗花】
P.S. 成龍果段鑑粗廣告真心膠，人膠，戲也膠，好唔想睇【公安故事2013】
Youtube：港產不打
http://www.youtube.com/cheungsecond
Facebook：港產
http://www.facebook.com/cheungsecond
Weibo：港產不打_微博
http://weibo.com/cheungsecond
************************
港產不打
全職非牟利網絡打手
100%支持本地製作
乜戲都打，淨係唔打港產
************************
相關搜索目錄: 廣告 外語 啤酒
www.youtube.com/cheungsecond
www.facebook.com/cheungsecond
|
