【華爾街狼人】係美國和香港都贏盡口碑票房
無他既，一流導演加一流演員，傳奇人物加批判議題
紅黑紅紅黑，就係咁簡單！
好多人驚套戲3小時會唔會好拖好悶？
我偶像新派武俠小說第一人【武道狂之詩】喬靖夫屌得啱
幾時開始衡量套戲悶唔悶，係用片長而唔係內容？！
要悶既一場戲無聊鬆散已經令人瞓著，精彩既3小時牽住情緒唔會睇錶
況且【魔戒】【哈比人】大把人都接受到
商業片黎講冇咩邊套你地仲會覺悶架啦
大家十萬個放心
呢套導演功力爐火純青，絕無冷場
淨係Martin Scorsese，已經係實力既保證
如果連佢都唔識，淨係識得唔睇港產片合拍片
咁你都係適合睇【雷神奇俠】【美國隊長】既青蛙
呢套我驚你一心當鹹片咁睇，再教你都無能謂
【華爾街狼人】的而且確係三級片
而且絕對應該係三級，粗口橫飛、濫藥吸毒、召妓、性交場面不絕
仲有毒駕、車震、滴蠟、混P、搞人妻、掟侏儒、走私洗黑錢
片中更出現超過500次Fuxk
為史上最多Fuxk字既非記錄片
再加上脆過葉翠翠、23歲澳洲女星Margot Robbie誘惑演出
兩點盡露，又擔又抬，又砌又叫
真正重口味
當然總有衛道之士跑出黎屌套戲教壞人
屌你，That’s why 電影要分三級制囉
18歲仲會俾一套戲教壞？！佢本身唔壞都係廢青啦
我承認，套戲係俗，而且係低俗、粗鄙、腐敗
但事實係果班基金佬投資經紀真係咁低俗、粗鄙、腐敗
真人真事改篇，導演如實拍返出黎，有乜錯？！
正式黎講，【華爾街狼人】應該係一套傳記式既劇情片
敘述80年代叱吒華爾街真實人物綽號華爾街之狼Jordon Belfort既一生
但睇落你會慢慢發現，套戲似笑片多過劇情片
表面係真人真事改篇，實際導演安排左好多精準既場口去達到喜劇效果
管家基佬淫亂派對、遊艇沉沒生死關頭都要拍丸、拍過期迷幻藥腦痴呆、走私黑錢等等
而且文戲和三級場面經計算咁間斷出現，娛樂性非常夠
如果抱住寫實心態入場，記錄片既角度去看，可能會大失所望
導演神就神在，保持商業片既元素和娛樂性，但又不失記錄片既視野
好多觀眾入場可能想一睹當年華爾街既風采、金融市場既瘋狂、從業員既眾生相
導演夠薑3小時既戲，一開波就入直路，只用頭3個字就清楚交代晒
自述再加一幕入職飯局，刻劃細膩突出
拍心口唱歌加一段新仔與上司既精彩對話
直截了當道破金融市場既醜惡：
你嬴錢，引你繼續玩；你輸錢，叫你繼續搏
總之不停投資，輸蝕關人春事，每次佣金袋袋平安
Wall Street rule no. 1: Put the money from your client pocket into your pocket
你話遊戲規則係咁，願者上釣，但導演再下一城，俾多一場電話直銷垃圾股既示範教學
對住電話sell客雄辯滔滔，背後成班經紀笑緊個客傻仔，一邊sell一邊做粗口手勢
垃圾股講到潛力無限，用盡方法呃人落叠；對客恭敬誠懇，背後笑佢傻能
一場戲將基金佬投資經紀既醜惡表露無遺
正常既導演會著墨描述Jordon Belfort既致富經過
偏偏導演藝高人膽大，不合常理地草草交代
好簡單咁交代靠口才、靠說話技巧、靠說服力去遊說對方
再好粗糙咁交代訓練一班牛鬼蛇神叫人買仙股
坦白講投資cold call，從來唔係靠口才
大拿拿幾十個，你吹到天花龍鳳，冇人會信
能夠成功，一定係可以幫到client錢搵錢
你為求佣金高，虛假陳述，誘騙client去買仙股
呃到一次，都冇下次，冇奶油可以成功
到公司漸大，遊說美國最有錢果1%人去買仙股
仲能離譜，你估果1%有錢人致富係靠六合彩？！
你有錢，大把投資顧問跟你搵食，唔會信你把口囉
而且如果呢條橋得，一晚華爾街間間經紀行都跟風啦
你又唔係獨市，又唔係有內幕消息，又唔係有內部認購
憑口才冇背景冇字頭冇人脈，根本冇可能係華爾街立足
所以呢段我會定義為導演係刻意既反諷
寸緊當時美國人熱炒股市既瘋狂同無知
更足證導演夠薑，係真人真事既框架下都夠膽拍自己野
導演冇著墨Jordon Belfort搵錢既過程
反而著墨描述佢搵到錢後既奢華生活
有錢，拋妻溝索女，吸毒召妓開豪P，買車買樓買遊艇
一餐食$26,000美金，當時黎講等於一餐食$30萬港紙
除左物質上既敘述，更著墨佢既心理變化
由第一次吸毒到第一次偷食，逐步塑造出佢持財傲物、目空一切既敗壞
公司派對可以俾錢女星，叫佢當眾剃頭，可以俾錢侏儒做人肉飛鏢
突出華爾街既荒謬、對人既侮辱、有錢乜能都得既腐敗
之前既佈局，要墮落有墮落；要迷幻有迷幻；要縱慾有縱慾
照計有咁耐風流就有咁耐折墮，反差先大，先有批判性
導演理應拍返Jordon Belfort點樣折墮點樣眾叛親離點樣妻離子散點樣一無所有點樣身敗名裂入獄
反而選擇好務實既拍法，冇誇張，亦冇咩大篇幅既描述
只係以第三者既立場，拍返佢被捕既下場，回復記錄片既風格
呢點觀眾毀譽參半，但我自己就好喜歡
導演只係以Jordon Belfort為切入，拍出金融世界既紫醉金迷
呢種咁縱慾放蕩既生活方式，呢種極端金錢至上既價值觀
由觀眾自行選擇、自行判斷
綜觀Jordon Belfort窮一生追求金錢，錢多到駛幾代都駛唔晒
但套戲好成功咁刻劃出佢既膚淺和空虛
有錢，又點，只係物質上既享受
有索女，又點，只係洩慾既工具
Jordon Belfort既一生，從來冇愛過人，亦冇人愛過佢
佢既快樂要靠濫藥，佢既滿足要靠不停佔有
唔懂得感恩，亦唔懂得珍惜
只有利用、計算、輸贏、虛榮、無窮無盡佔有慾既生活
導演巨細無遺、好有層次咁拍晒出黎
先係佢最神既地方
套戲既成功，除左導演之外
最關鍵都係一流演員既精湛演出
當然主角Leonardo功不可沒，演出細膩感染力強之餘，亦有強烈喜劇效果
至於肥佬Jonah Hill，冇佢Leonardo又未必撞出咁好既火花
不過最搶戲一定係開場主角既上司Matthew McConaughey
眼神凌厲、霸氣內歛，比Leonardo更能演出果份瘋狂同敗壞
唔好睇少佢，佢係剛剛出爐金球獎最佳戲劇類電影男主角
其實同樣表達紫醉金迷，上年有套【大亨小傳】
我出長文【大亨小傳拍不出原著味道卻拍出3D效果】插到佢反轉
同樣用Leonardo做主角，但票房及評價天淵之別
自然明白Martin Scorsese既功力
至於同樣批判金融系統，2011年有我偶像杜琪峰既【奪命金】
我出長文【奪命金已經凌駕好不好看的境界】激讚
唔同角度，唔同風格，港產片一樣有誠意佳作
投資投機，冇人揸支鎗逼你買
你買都係想賺多D，說穿了都係貪，願者上釣，怪不了誰
但強積金呢！？政府逼你入市播，你唔想賭，都要賭
錢就養肥左一班投資經紀、顧問、基金佬
睇見班仆X其實冇生產冇勞動冇貢獻，但又可以夜夜笙歌
錢係你，風險又係你，但買入沽出都要俾錢養住呢班仆X，仲有行政費同倉租
睇完【華爾街狼人】，你自會反思
點解自己既血汗錢，仲要俾班冚家鏟投資！？
Youtube：港產不打
http://www.youtube.com/cheungsecond
Facebook：港產
http://www.facebook.com/cheungsecond
Weibo：港產不打_微博
http://weibo.com/cheungsecond
************************
港產不打
全職非牟利網絡打手
100%支持本地製作
乜戲都打，淨係唔打港產
************************
