香港 Xocat Forum 討論區 - Powered by Discuz! Board

標題: O L 貓爪記 [打印本頁]

作者: 只因我太痴 時間: 2007-6-28 16:19 標題: O L 貓爪記

愛 Map 袋的惡魔

數下重有個多星期，我就係呢間公司做左三個月！

日子，真勁難過！但！又覺得驚喜交雜，心情就好似玩過山車一樣，因為，每日都有唔同的挑戰或剌激！假如，心血少的，都會頂唔住！！所以，我都唔知自己可以捱得幾耐！

因為，我個部門主管，係一個要求勁高又情緒化的人！我每日返工的心情，就好似上刑場一樣！唔到最後一刻，都唔死得住！

但！我相信，難捱的日子會好快過去，因為，六月中我個主管，將會離開香港出差！所以，我現在只好等待呢個大日子，因為，自由的感覺，已經離開我勁遠！！

[ 本帖最後由只因我太痴於 2007-6-28 16:56 編輯 ]
作者: 只因我太痴 時間: 2007-6-28 16:39

做人下屬甚艱難

今日唔知行左乜野運，唉！總之，就勁慘，勁無奈啦！

因為，我阿頭唔知抽起邊條根！無情情同我講，你幾時得閒呀？當時，我心諗，唔知又有乜茶煲野啦？結果係，她想我陪她去買個地圖袋！

原來係，她想我幫她講價囉！我心諗，我又唔係格價專家？做乜係要揾我幫手！唔通，她真係咁睇得起我！還是，她怕瘀呢？！
作者: 只因我太痴 時間: 2007-6-28 16:54

上司與下屬、小姐與婢女

唔知係咪我條命生成，好似唔俾人勞役，就唔得安樂！

每個星期，總有機會俾我阿頭差遣！唔係陪她去行街入貨，就係陪她睇戲或食飯！連自己既私人時間都無晒，真係攞命！

但，為咗自己個飯碗，無辦法啦，為兩餐乜都肯制...前世！

作者: 只因我太痴 時間: 2007-6-29 17:14

總算平穏過渡、三個月試用期已滿

有驚無險，話咁快就過咗三個月試用期！

感覺係，終於可以鬆一口氣！因為，我呢個職位，前前後後已經有幾個女仔頂唔住，或被人炒咗！可能，係我個絶頂上司，功德無量吧！又或者係，個幾個女仔自覺資質高、學識高？！所以，無需睇我上司的面口做人吧！

總之，我已經習慣咗，係呢個無間地獄生活！我諗，我應該可以捱得住掛！！

作者: 只因我太痴 時間: 2007-6-29 17:24

重有一個星期、悠閒工作期

我個茶煲上司唔係公司，所以，我真係勁開心！

因為她出咗差，行程都幾緊密！呢幾日去咗北京，今晚夜機返香港。之後，再去日本開會，一個星期後才回港！所以，我唔係咁大壓力！但，唔好諗我會好清閒！因為，我阿頭已經安排好成個星期既工作給我！

唉！人唔係香港，都有咁多野留底給我做，真係無奈，冇計！好醜命生成，受人二分四，我唔做！邊個做？

作者: 只因我太痴 時間: 2007-7-2 21:01

日日都係作戰日

我係呢間公司已經做咗約三個，感覺真係又驚又喜！心情就好似坐係過山車度！

但，我怕有朝一日會出事！因為，我個心臟唔係幾好，未必頂得住勁多的剌激！雖然，我唔介意接受無限的挑戰或難題！但，我只係個普通人呀！唔係每分每刻都可以，接受工作之外的茶煲事！總之，現在每日返工，就好似置身於戰場，輕則萬箭穿心，重則飯碗不保！

因為，我公司有個可以操控所有生殺大權的人，但，她唔係老闆，亦唔係皇親國戚，她，只係我老闆最信任的人啫！呢個人就係我個部門主管，愛 Map 袋的惡魔，嗚嗚！！

作者: 只因我太痴 時間: 2007-7-2 21:08

如果，可以日日有運行，就發達啦！

今日唔知點解咁有運，我阿頭今日唔揾我出氣呀？

可能，她今日有少少病，傷風囉！所以，她今日講野都比平時細聲咗、温柔咗！如果，她日日都可以咁，我就唔駛愁啦！因為，她啲脾氣，勁似天氣！唔知幾時好天，幾時落雨，甚至係幾時打風！所以，我唯有小心的工作，希望她高抬貴手，放過我啦！

唉！做人下屬甚艱難呀！！

作者: 只因我太痴 時間: 2007-7-2 21:14

唔知會唔會，飯碗不保？

唔經唔覺，已經係呢間公司做咗三個月！感覺真係百感交雜！

當中，真係驚多過喜。因為，日日都有新鮮新奇又剌激既事，等住我去面對！再者，我個人既資質又比較蠢，所以我上司對我真係....寵愛有加！日日要我加班，又或時不時對我訓話，真係好到加零一！

所以，我係呢間公司，必定命不久存，我估，都係時候，要睇定報紙啦！

作者: 只因我太痴 時間: 2007-7-2 21:21

我諗，我需要心理輔導！

我怕有朝一日，我要見心理醫生！原因係，驚恐症！

因為，呢幾個月，我晚晚都瞓得唔好；又或時不時發惡夢！真係唔知點算好？我好明白，係因為工作既人事問題！可能，係我個人唔識講嘢又或少講嘢，所以，令到我上司對我有所懷疑吧！

但，點都好，我都好多謝我阿頭！因為，無她比機會我，我係無機會留低呀！

作者: 普通香港人乙名 時間: 2007-7-3 18:42

~~~~~~~~~~~~~~~~~~~~~
作者: 只因我太痴 時間: 2007-7-3 18:49

好悶呀！日日都落雨...唉!

可能，天氣影響！又可能係，公司大部份同事出晒差？所以，唔係好想做嘢！搞到個人好懨悶，唔知想點？

但，又唔可唔返工！因為，公司唔可以真空，否則，有乜嘢事，揾邊個黎頂？所以，只好向現實低頭，返工/工作/放工！繼續過著，呢的刻版式生活，真係無癮！

但，撫心自問，我係咪真係可以唔駛做？相信，只可係夢中實現！唉！生活迫人無計！

作者: 只因我太痴 時間: 2007-7-3 18:56

現在，連放假都要被人咬住，慘！

我真係好服我個主管。

因為她係個超級工作狂，平時係公司，由返工做到放工；跟住返到屋企，又再處理公司既賬目！連放假都要返公司，繼續做公司內部文件！真係難以想像，她好似打不死既機械人？！或者，呢的係她生活中既一部份？但，都唔駛揾埋我一齊受呀？我現在連放假，都要被我主管佔用埋的私人時間！

唉！真係慘絕人寰！一個月，總有兩或三劑；點算呀？！救命呀！有冇人幫手呀？！

作者: 只因我太痴 時間: 2007-7-5 16:54

點算好呀！仲未達到主管的要求？！

每日，我都要學習公司既所有運作模式！話難唔難，話易唔易！但，最難係，唔知幾時；才可以滿足到我上司既要求！

因為她係個要求勁高又小心眼既女人！她教人的工作方式，真係好特別，她每次教我處理所有公司事務；只會教一次！係呀，係一次，她既理由係，你自己要用個心與腦記住！之後，你自己慢慢去摸去做，必定記得！

唉！日日都要對住個非常上司？！想唔精神有問題都難啦，唉！！

作者: 只因我太痴 時間: 2007-7-5 17:01

悠閒工作日，即將結束，慘！慘！

星期五，係最後一日的悠閒工作日！因為我個茶煲上司會係星期一返工！

惡夢又再開始，我的受難日亦即將開始！我又要面對，無啖好食，無覺好瞓的日子；唔知幾時，再有好日子過？一個月？兩個月？真係好懷念，這個美好星期！

可能，開心的日子，總係過得特別快！真係好想，我阿頭長期放逐，或長註海外！但，相信係我痴心妄想！唉，算吧！做人都係要面對現實，係咪？！

作者: 只因我太痴 時間: 2007-7-9 12:16

惡魔回歸，救命呀，點算呀？！

星期一開始，又係我的高度戒備日！

點解？因為我個難頂阿頭返咗嚟香港，所以我將要面對重大考驗！重有呀，每當她出完差，返嚟開工的時候，必定送大禮比我！她會將所有出差的賬項，送咗比我做手信；好等我從中學習！她，真係對我非常愛護有加，簡直係再生父母！或者，我上司係希望，我可以盡快學會她的工作方式；好等她自己以後可輕鬆上路！

唉！黑暗的日子，又再來臨；我幾時先可以脫離魔掌？！

作者: 只因我太痴 時間: 2007-7-10 15:50

虛驚一場，想嚇死人咩！

今日，狀態好差！因為，我孭住個藥煲返工！唉！冇計啦，請假又要被人插，又多多嘢聽，所以只有死頂返工。

唉！唔知係咪我啲菌勁？還是我阿頭開始老人痴呆？她竟然問我，本銀行簿仔係咪係我度？我當時都嚇到呆咗?！吓，唔好玩啦，呢啲咁重要既嘢；點會係我保管？跟住，她用好懷疑既眼光...盯實我，你揾清楚啲！如果真係冇，麻煩你返屋企再揾，因為你可能會搞錯，當咗係自己個本簿仔！

唉！真係勁無奈！但我又可以點？咪翻箱倒櫃係咁揾，揾咗大半個鐘，都揾唔到！心諗，今次死梗啦！點知，她自己話，原來係她自己唔小心，將本薄仔翻轉咗！

嘩！！想嚇死人咩？！
作者: 只因我太痴 時間: 2007-7-10 16:01

好驚呀！有乜嘢唔見咗，又關我事？！

我發覺，我阿頭啲依賴性與失憶症，開始唔停發作；甚至有增無減或越來越嚴重！

可能她過兩日要返國內公幹，所以她要趕工吧！但，都唔駛次次有乜唔見或揾唔到，就咬住我，話我收埋咗或攞咗返屋企？！直係唔明，她係咪有妄想症？還是有思覺失調？她又唔諗諗，她自己鍾意將啲文件四處放！搞到個位勁似亂葬崗！唉，好心啦！她自己又唔執；我又點敢掂喎？想死咩！有乜事，咪又係我受！我唔嚇得呀，心血少嘛！

唉！點算呀？鑊鑊新鮮，鑊鑊金........救命呀！
作者: 只因我太痴 時間: 2007-7-11 13:42

妹仔唔易做，唔知頂得幾耐？

唔知係咪食藥食得多？還是啲菌實在勁到爆？

今日，我幫襯咗大口仔，足足十幾次；搞到勁飽！唉！真係腳都軟埋，但我個掃把，對我真係好到暈！她用咗幾個鐘頭，教我點樣令個腦啲轉數快啲？！善用個腦去記住所有工作？！又苦口婆心，教我點樣去做好公司所有細微細眼既文件或工序？！她真係用心良苦，我都好明白她既肺腑之言；她希望我唔好衰比其他人睇嘛！

但，她有冇諗過，她比咗幾多時間我去做？！她又花咗幾多心機去教？！可能她覺得我應該學似她一樣，凡事用心用腦，又要眼明手快既好助手！但，她又知唔知，她做咗兩年有多？！我只係做咗幾個月？！

試問，點樣可以相提並論呀？！

作者: 只因我太痴 時間: 2007-7-11 13:52

女人心、海底針，真係冇錯！

我好唔明白，我個掃把究竟想點？

揾嘢做又哦，做錯嘢又插，唔出聲又話我唔講嘢！出聲又話我多嘢講！唉！都唔知她想點？有嘢唔明或唔清楚，問她都要睇她面口或心情？！唉，真惡頂！係咪女人冇人要；就會有呢啲不良反應？還是個別例証？有冇人可以解答？

或者有冇人，會心口掛個勇字要咗她？！等我可以脫離魔掌，早登人間仙境！希望有位有心人，出手相幫，阿門！
作者: 只因我太痴 時間: 2007-7-13 12:48

究竟，我有冇做錯決定呢？

今日，唔知係咪我阿頭有心失踪？還是，她老人痴呆；玩失憶？

她個老友今日咬住我，問我個香港 -- 馬來西亞訂位，出得機票未？因為今日係死線，唔出機票即取消！於是，我即時打個手機短訊給阿頭，點知！唔覆？打電話給她，轉駁到遺言信箱！上去熱郵搵她，她又冇上線！唉！駛唔駛玩潛水呀？雖然我又唔想喧賓奪主，因為點都要知會她嘛！但，好可惜，她好似人間蒸發？結果，我只有冒險一次，自把自為與她老友講，機票照出！

希望我今次既決定，係啱？！否則，只有死路一條！阿門！

作者: 只因我太痴 時間: 2007-7-13 13:04

好多謝阿頭，訓練我成材。唉！

今日，我要多謝一個人，我同事！

因為他令我知道，如果，我再唔插手去處理他既機票訂位問題？！好可能我又再次孭鑊，或製造咗另一個大茶煲！因為我阿頭做咗個機位，今日到期要出機票；但她人又唔係香港！我已經打鑼打鼓搵她，又發手機短訊，又留咗遺言！可惜她就係影都冇隻？結果我只有孤注一擲，冒住會被炒既危險，與她老死講，張機票照出！

雖然，我係有少少過份，但，總算需死猶榮呀！有乜事都好，最少都有個，將要在下星期二出差公幹既同事，會幫我講出真相嘛！係咪！

作者: 只因我太痴 時間: 2007-7-16 17:36

奪命鈴聲，又再出現，小心！

昨晚，失驚無神，收到我阿頭個追魂電話！

心諗，死啦！唔係又有乜事發生呀？斷估唔係想我蒲頭陪她呀？還是詐我型，話我唔知會她一聲，就自把自為出咗張機票呀？但，結果係出乎我意料之外！她唔係怪我無通知她，因為我事前已經用盡所有方法去聯絡她；包括，打手機、發手機短訊、遺言！但，她要玩失踪，我都無計！

她只係問我有冇出到張機票？我答：有。跟住她話：小事係唔需要問我；你自己可以做決定！

小姐，唔問妳又插！問妳又話我煩？妳究竟想我點？係咪我每次做任何事；都可以唔需要通知妳？唉，好難頂呀！

作者: 只因我太痴 時間: 2007-7-17 19:30

仲要捱多八個月，先有大假放，唉！

都唔知係邊個既規則？唔做夠一年，係唔可以放大假？

唉，想收買人命咩！有病！睇完醫生都仲要返工？想話請病假，唔係唔得！但阿頭就多多說話，她會苦心婆心，你要醫好個病，唔好時不時請病假！知道嗎！唉，咁你話；我又點敢請病假呀？！

最近，公司其他同事又唔停放大假；搞到唔夠人，又踢腳！我就算病到半死，都要返工死頂，勁無奈！真係唔知，我可以頂得幾耐！

作者: 只因我太痴 時間: 2007-7-18 16:12

唉！又做錯嘢，死得啦！

唔知係咪個腦有事？還是個心有事？呢兩個星期，爆咗幾隻鑊！

唉！真係失敗，都唔知自己搞乜鬼？可能怕咗個地圖阿頭啦！應該係話，勁抗拒就真！因為她份人講嘢又好；做嘢都好，次次都要睇心情！講真個句，真係唔知點與她溝通好？工作上有唔識或唔明，梗係會問問她！點知她一句撻埋嚟！你自己用個腦諗諗點做，唔可以時時依賴我或其他人呀？！個腦唔用，就會退化或生锈，遲啲會變老人痴呆！你自己諗諗，應該要做啲乜或唔好做啲乜！知未？

我心諗，我識就唔駛問你啦！錯咗或唔啱；結果咪又係比你插？真係唔知點先可以滿足你既要求？！

作者: bgfantasy 時間: 2007-7-18 16:23

you're quite interesting.
what sort of things do you think are "positive" in your life?
作者: 只因我太痴 時間: 2007-7-18 17:56

引用:
原帖由 bgfantasy 於 2007-7-18 16:23 發表
you're quite interesting.
what sort of things do you think are "positive" in your life?
my life is quite special and wonderful...sometimes is very trouble.

if you have time...you may chat me at the net .

作者: 只因我太痴 時間: 2007-7-19 16:49

總算冇驚冇險，補番隻鑊...^_^

昨晚，收工後被些粉小姐咬住，她話有事要與我詳談！

唉...今次死得啦！因為我上個星期又做灟嘢，搞到有鑊氣嘛！我心諗，今次唔被她插死，都會被她哦死！可能，分分鐘要我速速消失都未定？！唉...總之就大鑊；我睇怕都要揾定後路！雖則，唔死都有排煩！唉！冇計，係自己唔小心，搞到又爆鑊，抵死呀！所以我抱住視死如歸既心情，去見些粉小姐！

但！結果...真係出乎意料？！些粉小姐，她...竟然冇比個大信封我呢個妹仔？！嘩！簡直係奇跡呀！因為我個隻鑊，令公司有錢銀上既損失！雖然唔係好大條數，但都係有關公司利益嘛！所以我覺得好意外！

不過我都冇好下場！因為我被些粉小姐既索命梵音，哦咗半個鐘！仲要係，企係條街度被她狂插...唉！算啦，保得住個飯碗，都已經有運；唔好再苛求！不如比啲心機去為自己未來打算咪仲好！
作者: 只因我太痴 時間: 2007-7-20 17:33

莫非，每個上司都係惡魔？！

究竟係命運既安排？還是我個人既問題？

唔知點解，每次都會比我遇到人間極品或絶世奇人，做我阿頭？！無論男又好女都好，唔係疑心大或鍾意鬧人；就係把口密過密實袋！仲有就係又小氣又長氣，十足十個婆仔款！可能係我條命生得特別好！所以，總有機會與呢類奇人異士，結下不解縁！總會在工作既地方碰上，之後就會成為我既上司或老闆！相信，每個人都有機會撞到，呢種超級上司或老闆？問題係，自己會唔會沉得住氣或頂得住？！如果自己有條件既話，更係冇問題！但，又有幾個多人，真係可以有呢種本事或勇氣？！

唉，面對現實吧！阿門！
作者: newsswen 時間: 2007-7-23 09:12

提示: 作者被禁止或刪除內容自動屏蔽
作者: newsswen 時間: 2007-7-23 09:12

提示: 作者被禁止或刪除內容自動屏蔽
作者: newsswen 時間: 2007-7-23 09:13

提示: 作者被禁止或刪除內容自動屏蔽
作者: newsswen 時間: 2007-7-23 09:13

提示: 作者被禁止或刪除內容自動屏蔽
作者: newsswen 時間: 2007-7-23 09:14

提示: 作者被禁止或刪除內容自動屏蔽
作者: newsswen 時間: 2007-7-23 09:14

提示: 作者被禁止或刪除內容自動屏蔽
作者: ※京子※ 時間: 2007-7-23 10:09

引用:
原帖由 newsswen 於 2007-7-23 09:14 發表
alked to mom early this morning......surprised to know that mom and daddy are planning to come over here for my birthday this year.......... ..............i guess they know that im unhappy these da ...
使唔使出6個post貢多丫
作者: 只因我太痴 時間: 2007-7-23 14:40

引用:
原帖由 newsswen 於 2007-7-23 09:14 發表
alked to mom early this morning......surprised to know that mom and daddy are planning to come over here for my birthday this year.......... ..............i guess they know that im unhappy these da ...
Thanks for your free back and if you don't care to share your experience whit me.....let we chat at net

作者: 只因我太痴 時間: 2007-7-23 14:44

引用:
原帖由 ※京子※ 於 2007-7-23 10:09 發表

使唔使出6個post貢多丫
京子姐姐... 人地係"新版友"黎架，要"多多支持和特別關懷"，係咪
作者: 只因我太痴 時間: 2007-7-23 14:55

有排都冇好日子過...唉！

今日公司發生咗七級半地震！震央波及所有同事；睇怕有排捱啦！

唉！睇嚟呢個星期做任何事，都要打醒萬二分精神！否則，只有死路一條！

事原 --- 係我個些粉阿頭，被我大老闆與電腦部阿頭咬住咗，要她做兩個大麻甩既傳聲筒！！唉...兩個火氣勁鑤既大男人，加埋個脾氣勁絶頂既女人；結果又點會有好收場呀？！所以，今日下午開始，我阿頭個面口；已經掛咗個黑色暴雨警告！相信，要到下個星期，先有機會過番啲好日子或透透氣！因為她下個星期有幾日出埠，所以，我就可以輕輕鬆鬆過日子！

但！唔知幾時，又會再出現世紀大災難？！真係勁無奈...唉！

作者: diaoyudashi 時間: 2007-7-23 22:17

提示: 作者被禁止或刪除內容自動屏蔽
作者: diaoyudashi 時間: 2007-7-23 22:18

提示: 作者被禁止或刪除內容自動屏蔽
作者: diaoyudashi 時間: 2007-7-23 22:18

提示: 作者被禁止或刪除內容自動屏蔽
作者: diaoyudashi 時間: 2007-7-23 22:18

提示: 作者被禁止或刪除內容自動屏蔽
作者: diaoyudashi 時間: 2007-7-23 22:19

提示: 作者被禁止或刪除內容自動屏蔽
作者: ~@chrissie@~ 時間: 2007-7-23 22:21

引用:
Originally posted by diaoyudashi at 7-23-07 10:18 PM
怎樣回帖才滿意alked to mom early this morning......surprised to know that mom and daddy are planning to come over here for my birthday this year.......... ..............i guess they know that im un ...
你係咪黐線ga................

咁鍾意copy 人地d 野係咪有病ga..................
作者: kenny01 時間: 2007-7-23 22:36

引用:
原帖由 diaoyudashi 於 2007-7-23 22:19 發表
alked to mom early this morning......surprised to know that mom and daddy are planning to come over here for my birthday this year.......... ..............i guess they know that im unhappy these da ...
這位網友,如發現再發無聊post,將會被ban account,請多加留意.

謝謝
作者: 只因我太痴 時間: 2007-7-24 14:21

無間地獄生涯，正式開始，唉！

今日，我將要面對人生中，最慘無人道既事實！我個些粉阿頭，她，限我一年內，學識與跟熟她所做既工作！

嘩 ... 簡直收賣人命！因為，她教我工作上既任何事，都要視乎她既心情而定！唉，等如將我送上斷頭台或攪刑台一樣！結果，都係等死！

因為，她心情靚爆時！就會教多點或講得詳細點；但如果她心情差勁，就只有死路一條！其實，她對我都諸多不滿；我對她又膽顫心驚，唉！坦白講，彼此都在互相折磨對方；真係好無謂？！但她係個要面子既女強人，所以她係唔會補錢踢我走！不過，我又唔會自動消失！因為，我要為自己爭啖氣！

結果，就只有一直延續落去，直到任何一方頂唔住，宣佈離開！！阿門！

作者: 只因我太痴 時間: 2007-7-26 20:10

八月份，將會有大挑戰，好驚呀！

我真係好擔心，唔知自己會唔會又爆鑊？！又或者，搞到一鑊泡？！

因為，我個地圖阿頭，她將會係八月份放大假；去曼谷旅行一星期！我都唔知，替她開心！定係替自己憂心！因為地圖阿頭金口已開；她講明，她係唔會帯手機或電腦去旅行，即係與外界斷絶聯絡？！仲有，地圖阿頭落咗封殺令；如果有咩嘢行差踏錯！一切後果，由我獨力承擔！

唉，總之今次真係人生大考驗，係沒人幫拖，沒人理你既情況下！唔知會唔會出事？！坦白講，無事就好地地，有事就死狠梗；唔駛等！希望今次可以無風無浪，平隠過渡八月份啦！否則必死無疑，唔被阿頭炳到反晒肚，都被大老闆插狠死啦！可能分分鐘要做埋量地官呀！

唉！請問有冇奇人異士或大俠，伸出同情既手...幫幫忙呀！救救我好嗎！否則，只有等神打救我，或真主點救我！阿門！

作者: 只因我太痴 時間: 2007-7-27 17:03

惡魔上司又玩賴皮 ... 點搞呀？！

今日，失驚無神咁，收到茶煲亞阿頭的奪命追魂電話？！心諗，又發生咗乜事呀？莫非我又搞出個大頭佛！還是又想我幫她做甚麼？！但，結果係 ... 無理取鬧兼強詞理既控訴！

原來，她係今日的零晨四點鐘，用手機炸咗個短訊給我；內容大致係，她想我今早返公司，幫她處理好件貨後，跟手寄給客戶！好可惜，我沒有代她處理好個件事！因為，我已轉用了新手機號碼！但她仍然將所有短訊，寄去舊有的號碼中！試問，我又點可以完成她的心願呢？！結果，我只默言承受，所有無理的怨言或惡咒！

唉！我真係好唔明，點解阿頭永遠係對的！做靚或妹仔的，永遠係錯的！有冇人，可以話比我知，究竟點做先啱老闆胃口呀？

作者: 只因我太痴 時間: 2007-7-27 17:18

些粉小姐，無理七宗罪，正式宣判！

現在，我正式被落案起訴 ...

(煩)人妹仔；所犯了以下的七宗罪！希望大家俾俾面，或幫幫手，睇睇本(煩)人，是否罪該萬死？！還是有某人，存心賴皮或靠害！盼望各位有心人，請個金牌大狀，幫我洗脫罪名，又或幫我祈禱，多謝！！

罪証一：原來我是個老雜(便裝警探或掃地)，需要廿四小時工作，不眠不休！

罪証二：為何不接收舊手機號的短訊？(我現在用了新號碼，已經三個月)！

罪証三：為何不將新手機號碼，親手傳送給阿頭的手機內？！

罪証四：零晨四點，接收了短訊，為何沒回到公司照做！

罪証五：為何沒有依照阿頭的指示！(有鬼人知咩！)

罪証六：為何公司所有大小事務，都要我一力承擔！(鑊氣！)

罪証七：為何公司有任何錢銀上的問題，都要我自己貼？！(罰款！)

以上所有罪証，實屬死罪！如各方好友，有錢的話，請幫我辦理身後事；如手頭拮据，請早點休息！

作者: 只因我太痴 時間: 2007-7-30 19:28

兇鈴再現，索命追魂，救命呀！

昨晚，我個茶煲阿頭，再次用奪命瘋殺令嚟電死我！

唉 ... 又唔知衰乜？我用惶恐不安的心情，接聽她的來電，經過又長又悶又嘥氣的對答後，我終於知道答案！原來，她電死比我的原因，就係為咗解話！正確嚟講，應該係，她自圓其說先啱！

點解？理由好簡單，假如，你殺咗人或蓄意傷害他人身體！但，過後，你可能良心發現或覺得自己有點過火！於是，你就行出嚟話自己一時情緒失控，或神志不清下，做錯事或傷害咗其他人！

嘩！要幾好戲，就有幾好戲；唔去考藝訓班，真係嘥料！老實講，人誰無過？！衰咗咪認，打咪企定！但我個極品阿頭，竟然駛出她的獨門秘技，"太極無影手"！嘩 ... 此招一出，就將所有是非黑白，推得一乾二淨，不留痕跡！所以我都無話可說，就由得她一個人唱獨腳戲，繼續死撐到底！

但，我真係好想知道，究竟係咪，每個做老闆或上司既，都係勁鍾意死撐？！莫非，真係面子大過天！真係好難理解，阿門！

作者: 只因我太痴 時間: 2007-8-1 18:56

上司永遠是對的？下屬永遠是錯的？

前日，我個些粉上司又有新搞作！她又再次重複星期六之事件簿！

唉 ... 好心啦！件事都發生咗，唔錯都錯咗；要嘈要鬧要插，全部都做齊晒！無論誰是誰非，都已成過去，再講都冇意思？但她就係勁鍾意，時不時挑番出嚟講！都唔明點解？！講真，她唔煩我都悶！可能她覺得冇面？！(揾條靚幫拖，竟然揾唔到人！)或者，她有感得失公司客戶？！(件貨星期五晚，己經準備好，隨時寄得！)但最重要係，她覺得自己冇錯！(有錯，都係條靚錯！)唉 ... 有冇人會話自己，從來都冇行差踏錯呀？！我諗，除咗老闆之外(老闆有錯，都唔可以話錯！)...相信，就只有我公司的魔鬼上司！無計 ... 她係一人下，幾個人之上!！邊個會出聲話她半句呀？！除非，你想唔撈或另謀高就！否則，只有做忍者，死忍難忍，忍大忍小都要忍！！

估唔到，打份工，除咗要受老闆氣之外，重要受埋阿頭的無謂氣！唉 ... 揾食艱難，冇計！有冇人會伸出同情的手，幫幫我呀？！阿門！

作者: 只因我太痴 時間: 2007-8-3 01:15

一個難以忘懷的烙印

事隔...已經十年有多，
我已為自己可以淡忘一切；
原來...只是痴人說夢；

每當自己偶然看到某某...
因分手而傷人的消息；

令我在不知不覺間...
再次觸碰著我心深處的...
殘餘記憶，又或是結痂；

時間...可否令陰影徹底消失？！
情愛...會否令我再次卻步？！
生命...是否從始無聲無色？！

隨縁，惜縁...一切盡在不言中！

作者: 只因我太痴 時間: 2007-8-3 03:22

舊記憶

情變

沉重氣氛矛盾的心
霧裡的深沉黃色的晚燈
跟着你步行雖則始終不合襯
無奈假裝親暱也沒半點迫真

陪我心酸陪你抽煙
極了解感情難怎麼發展
誰說沒有直言貪戀多點温暧
非不得已聽你親口說改變也繼續欺騙

沉默已久心中多麼不情願
偏聽見實實在在是情變
你的聲線如遺落了的星之碎片
然而留在我心一聲一聲的迴響
心深處遂漸遂漸地傳遍
讓我終於發現沒法再改變

讓我終於發現沒法再欺騙

[ 本帖最後由只因我太痴於 2007-8-4 20:16 編輯 ]
作者: 只因我太痴 時間: 2007-8-4 20:29

唉！又有鑊氣，係生係死都未知？！

其實，呢個星期應該可以過得勁輕鬆！因為，我個些粉阿頭，唔係香港！但，好衰唔衰，自己又唔小心；搞到爆咗鑊！

唉 ... 真係好鬼死討厭自己！如果唔係自己眼大睇過界，就唔會打錯地址！唔打錯地址，就唔會寄錯貨比人！結果，我用咗大半日時間，加埋我條三吋不爛之脷，去追番批貨返公司！雖然，到最後都比我追番批貨；而批貨亦送咗返公司，但，因為人為出錯(係我唔小心)；所以，速遞公司要收番手續費 ... 一千大元！

講真，要收錢唔係問題(因為，批貨已經上咗貨機)；就算要我自掏腰包，都唔係問題(因為我令公司有所損失)！但，最煩既係，唔可以比我個茶煲上司知？！因為她知既話，我只有死路一條！就係被她嗰啲索命煩聲，煩死！最少煩足一個月！重要係常哦嗰種；想唔死都難！坦白講，我已經聯絡好速遞公司既有關部門；並要求他們幫手，將套單分開出數！但他們講明冇十足把握，只可以盡量去做；如有任何消息，再通知我！他們話最快都要星期一或二先知結果！

唉 ... 睇怕都要揾定後路，否則，多多錢都未夠賠！阿門！

作者: 只因我太痴 時間: 2007-8-6 10:18

終於，可以放下心頭大石 ... 哈哈！

今早，終於收到速遞公司的電話！她們通知我，張單已經獨立分開並寄出，應該會係呢兩日收到！

嘩！真係還得神落！最少，都算無驚無險，補番隻鑊！雖然自己要自掏腰包填番條數；但總算拆掂件事！再者，今晚可以安安樂樂，瞓番個靚覺，正呀！我相信，我再無機會犯同樣的錯誤！因為，代價實在勁大勁大勁大，簡直係肉痛到爆，成千蚊喎？！正正一千大元呀！！

所以，我今後會，非常非常非常之小心做任何事；無論係公事或私事都好，我都有必要打醒萬二分神精，加千二分細心，再加十二分小心！真講個句，幸運唔係必然，唔係次次都有機會比自己補到鑊！總之，小心駛得萬年船，凡事細心加小心，應該無錯！但，會唔會太遲？！如果早點發現，可能會避免不必要的損失或咒罵！唉 ... 有早知，無乞兒！

嗚嗚 ... 今個月又要節衣縮食，點算呀！好窮呀 ... 有冇人仗義疏財，借少少錢接濟接濟？！

作者: 只因我太痴 時間: 2007-8-10 14:40

我諗 ... 我好快會離開，無間地獄！

這個星期，我個些粉阿頭又發神經！她足足咬住咗我兩個鐘，重要係，唔停口狂插、死插、爛插！！簡直好似想插爆我為止！！

可能，她又週期性唔舒服？！(我斷估！)又或者，因為公司要埋大數？！(應該係導火線！)所以，間接令她情緒失控！正確嚟講，應該係發花瘋先啱！！(因為，如果有其他雄性動物在場的話，情況會完全改觀！)

我真係好唔明，點解，她可以唔駛回氣？！(一條氣喪鬧，把口唔睏！)重有，她可以唔駛飲水？！(鬧足兩個鐘，個口唔乾？)我覺得，她真係好犀利，十足十一台風炮！(可以開足廿四個鐘，不停發出躁音！)所以，有她的存在就無安樂日子過；簡直比死梗難受！！

再者，我呢個鍾意玩國粹的上司，已經落咗封殺令，比多一個月時間我，之後再作決定？！坦白講，她既然覺得；我係她的眼中釘，點解唔引刀一快？！點解要搞埋呢啲少動作！莫非，怕交待唔到？(她要跟大老闆匯報！)還是，怕自己地位不保？(我之前已經有幾個女仔唔做！)相信，答案只有她自己最清楚！！

但，我真係好想問一句！做人，若然真係做到，左手信唔過右手！生存，又有乜嘢意思？！日日都要擔驚受怕或疑神疑鬼，值得嗎！！

作者: 只因我太痴 時間: 2007-8-13 17:18

原來，些粉小姐係 ... 國粹之霸！！

今日，唔知係乜嘢日子？！我個地圖上司竟然 ... 勁風騷(四處辣人吹水！)又懶可愛(扮得意妹！)兼懶好人(好聲好氣！)！究竟她係咪有病？！(她自己話作病！)還是 ... 她玩失憶？！

上個星期既事件簿，她完全當無事發生過！或者，公司有其他同事在場？！(三隻福祿壽係齊到！)總之，她就好似一個精通玩國粹的賣藝者(變臉！)係短短幾個鐘頭內；變咗廿零個面口！！

嘩 ... 簡直令我大開眼戒，我簡直唔相信自己對眼(我以為自己近視加深！)；我呢個茶煲阿頭，竟然會陰聲細氣兼笑笑口對我？！(可能，她心有鬼！)可惜！呢個情況，只係維持咗短短一個鐘；之後，一切都打回原形！！(原來之前的假象，係她未瞓醒！)唉！無計，同人唔同命嘛！(她對異性會特別好！)做妹仔都預咗受氣，但，都唔駛次次出盡力或搏命踩低我！(莫非，她覺得我有威脅？！)其實，做人留番少少厚度，積番啲口德，總好過刻簿成性呀！(講埋啲勁難聽既嘢！)再者，世界好細，他日唔知邊個會求邊個！(事實喎！)又何必要做到趕盡殺絶？(她已經迫走咗好多人！)

算啦 ... 我都自身難保，不如留番啖氣，努力啲揾工好過！(隨時有被炒危機！)唔知 ... 有邊位好人可以幫幫手？(我講真！)神啊！救救我吧！(打救我或點救我！)阿門 ... 安息吧！

作者: 只因我太痴 時間: 2007-8-20 17:15

辦公室之戀

不知不覺間 ... 又再次憶起往事，
每個下雨天 ... 總令我心深深處，
慢慢在凝聚 ... 裊裊傷感的氣味！

相識於公司 ... 可算是日夕相對，
相處的感受 ... 可說是百感交雜，
相戀的感覺 ... 實在是虛無飄渺！

爭執與淚水 ... 確實令我感疲累，
糾纏與冷戰 ... 已令我日漸麻木！

別離的嘴臉 ... 已令我如墮冰川，
心痛與無奈 ... 又再烙印於我心！

結束於公司 ... 盼望自由正開始，
事隔於多年 ... 為何仍舊在我心？
作者: 只因我太痴 時間: 2007-8-20 17:26

有強權、無公理！唉！

我個些粉上司，又發神經啦！

因為她要埋數兼入機，所以，她好自然要查單！當她見到速遞公司條數多咗千幾蚊的時候，就開始發瘋狂插我！一直勁插半個鐘！！之後，她再掁掁有詞話：如果她自己犯錯或爆鑊，肯定唔會推莊或怕孭鑊！再者，更加唔會比藉口或逃避責任！更重要係，無須要解釋！！(若然全屬事實，又何需要我陪葬或硬食！)

坦白講，事實的真相與結果，重係未知之數！(因為，速遞公司的會計部，休星期六、日！)但我個茶煲阿頭，她已經判咗我死罪！！(她覺得，錯既肯定係我！重有，她唔會問原因或比個機會你解釋！因為，她時刻都強調，錯就係錯！無須要去解釋或砌詞掩飾！！(問心，她真係做到？)

我真係好唔明，點解每次有乜事發生，我梗係第一個被插？！係咪做妹仔既，梗係要受炳？！(可能，我有問題？)還是，做阿頭既，永遠有特權！(相信，係她自覺有呢個優惠！)或者，每間公司都會存在著同樣的人？！可能，他們唔會覺得自己有問題！(唔係個個上司或老闆，都會自我檢討！)

相信，公道自在人心，我問心無愧！阿門 ... 願我安息！！

作者: 中年地盤佬 時間: 2007-8-20 18:10

引用:
原帖由 只因我太痴 於 2007-8-20 17:26 發表
有強權、無公理！唉！

我個些粉上司，又發神經啦！

因為她要埋數兼入機，所以，她好自然要查單！當她見到速遞公司條數多咗千幾蚊的時候，就開始發瘋狂插我！一直勁插半個鐘！！之後，她再掁掁有詞話 ...
並不是每一個當上司的都是這樣的，我以前在地盤當管工的時候，下屬做錯了事，我在處理一切善後工作之後，只會叫他們下次小心一點，因為他們會因做錯了事而內疚，我不責罵他們，他們便會更用心的工作(妳的上司一定不懂得這道理)。

妳遇上這樣的上司是妳的不幸，但也不用覺得不開心或過份擔心，只要努力做好自己的工作，其他人的反應也不必理會(也不是妳能控制的)，今日的香港找工作並不困難，總有一天妳會遇到一個好上司的。
作者: 只因我太痴 時間: 2007-8-21 18:05

引用:
原帖由 中年地盤佬 於 2007-8-20 18:10 發表

並不是每一個當上司的都是這樣的，我以前在地盤當管工的時候，下屬做錯了事，我在處理一切善後工作之後，只會叫他們下次小心一點，因為他們會因做錯了事而內疚，我不責罵他們，他們便會更用心的工作(妳的上司 ...
好多謝你的支持！更多謝你的鼓勵！

有時間係網上交談
作者: 只因我太痴 時間: 2007-8-21 18:16

終於都真相大白！但，結果不變！！

今日，我返到公司，就即刻撥個輪比某速遞公司！因為，無情情收到張千幾蚊的單？！但又唔知係乜嘢費用？！所以，我要查清楚呢條數，比自己與公司一個交待！

當我與速遞公司聯絡後，結果出現 ... 原來個條數係某批貨的關稅(入口稅)！哈哈！終於真相大白，今日，我終於都可以還自己一個清白！

事實証明，唔到最後一刻，都未知結果！！但，好可惜，我已經硬食咗一餐無情麵！(我個些粉上司送比我的大禮！)坦白講，我知她心中已確定，若有任何過錯或鑊氣，肯定係我一手做成！(些粉阿頭勁強調！)坦白講，每個人總有機會犯錯；只係事後點樣去補救或拆掂件事！但我個茶煲上司；她唔會比時間去聽或理解整事件的經過！因為，係她心中已經判咗我死罪！(她時不時強調，錯就係錯，唔好解話！)或者，她真係好討厭我吧？！(我覺得！)可能，她覺得我幫唔到她吧？！(她好少放公事比我跟！)

算吧！我都已經四處揾工，希望早日可以脫離惡魔上司的範圍！(講真個句，若要互相仇視，不如早日解脫！)

作者: 中年地盤佬 時間: 2007-8-23 17:33

祝妳早日搵到新工作

不要仇視任何人，仇恨絕對是一種不必要的負擔

[ 本帖最後由中年地盤佬於 2007-8-23 17:44 編輯 ]
作者: 只因我太痴 時間: 2007-8-23 22:01

引用:
原帖由 中年地盤佬 於 2007-8-23 17:33 發表
祝妳早日搵到新工作

不要仇視任何人，仇恨絕對是一種不必要的負擔
多謝你的祝福與關心，我唔會為咗個惡魔上司搞到自己，要仇視其他人，我只係覺得我個惡魔上司好可憐，或者，她所做的一切...  都係為咗引人注意，所以，我會另一個角度去睇她，我諗我會好過啲！
作者: 只因我太痴 時間: 2007-8-24 02:46

非常上司之心底話！！令我勁感動 ...

今日，下午出街食飯的時候，發生咗一段小插曲！

話說，我、些粉阿頭、大蕃薯一齊落街食飯，(多數去我個茶煲上司鍾意個間茶仔！)入到去個間茶仔坐低後，就即時落柯打叫飯食！些粉阿頭叫咗個餛飩麵，大蕃薯叫咗個菜心，我就叫咗個雞胸米！之後就各自各睇雜誌或傾手提！

點知 ... 突然有個阿姐行埋來，向住我講：靚女，無胸呀！？跟住，全場即時爆笑！(當然，包括我阿頭與大蕃薯！)之後，重有個阿姐話：靚女不知幾有胸呀！(隻大蕃薯重笑到差啲噴茶！)個阿姐即時知自己講錯嘢！所以，她即時話：係無雞胸！只有雞翼或雞脾！我就話是但 ... 雞翼或雞脾都好，總之有飯開就係！(估唔到一餐飯，可以食得勁搞笑！)

由食飯到埋單，一直到返到公司，我個些粉阿頭個面口都麻麻！(可能，她覺得隻大蕃薯笑得衰！)當我與些粉阿頭入到公司後，她就即時話：你以後著衫要密實啲！假如隻大蕃薯係公司！你最好著多件外套或件衫個領口高啲！(救命呀 ......... 大熱天時，莫非要我著樽領衫！？！！)總之，些粉阿頭講的說話，永遠是對！所以，我做妹仔的，只可以講句，係！知道，明白！(問心，些粉阿頭介意 ...自己係赤立角呀！)

其實，我都好唔明？點解些粉阿頭，事事都鍾意與人比較？！(人比人，比死人！)再者，真係事事盡如人意，世界早就和平！(相信個日會係世界末日！)或者我消失咗，對些粉阿頭會好好多？！(應該係事實！)

阿門！安息吧！

作者: 只因我太痴 時間: 2007-8-29 17:13

些粉小姐之心情寫照 ... 陰/晴/雨！

前幾日，公司發生咗小小事故，引發起茶煲上司的情緒！唉！總之就頭痕，搞到我差啲做咗箭靶！

話說，公司現在要交盤數比會計師樓核樓；但 ... 當中有勁多數係來歷不明或亂過亂世佳人！所以，茶煲上司早早就吩付我 ... 將香港與國內的單，分開做存檔後；才好交比核數師做數！(其實，較早前我已經將香港的單分好，並送咗去會計師樓！)跟住，我即時著手開工；搞咗幾個鐘做好存檔兼排番好日期！(因為，之前啲日期/年份，位置亂到暈！)然後，我再三覆核 ... 檢查清楚有否錯漏？！(若有錯失，又要受插！)點知，個核數師突然來電 ... 話之前有勁多單無比他？！(他直接揾我阿頭！)吓！唔係吓話！(我心諗，死得啦！當時，我只好等阿頭傾完電話，再搵其他補救方法！(應該係等死！)過咗十分鐘後，結果出現 .... 茶煲上司要我即時揾清楚所有單；(包括上年的單，檢查清楚有無漏！)有漏就補番影印本之後再存檔，跟手送去會計師樓！

坦白講，茶煲上司係想發老脾！但又無藉口！！(她全程面燶燶！)因為，係她自己搞亂咗上年度的存檔資料；可惜她又無再通知我！結果咪要再搞過囉！(如果唔係她出錯，又點會唔出聲！)

今次係我有運，否則，又係死路一條！但，幸運唔係必然！我相信；我有必要早走走著，遲走瞓唔著！希望我可以早日脫離 ... 魔鬼的劫力範圍！

阿門 ... 安息吧！

作者: 只因我太痴 時間: 2007-8-31 18:24

莫非 ... 些粉小姐轉死性？有危機？！

唔知係咪，我個茶煲上司；下個星期開始放大假？(去旅行！)還是 ... 有其他原因？(可能踢我走！)近日心情勁靚，就好似驟雨中的陽光；簡直令人難以置信！

因為，我個茶煲上司，平時不拘言笑(但，若有其他雄性動物除外！)；甚至黑口黑面，直到放工一刻都無變！(不過，如果她與其他人傾電話就例外！)相信，這個應該是她的習慣？！(茶煲上司自己親口講，工作時要投入與認真！所以面口會超燶！)或者，茶煲上司，自我感覺良好？(勁有個樽鹽！)可能，茶煲上司想做個好榜樣？！(令我這個做妹仔，都要好好學習！)總之，茶煲上司，遠都有她自己的奶油(理由！)；所以，我這個做妹仔，只可以服從或沉默！(唔出聲，無人話自己啞！)坦白講，我覺得暴風雨的前夕，永遠都是風平浪靜！(因為，她這兩日做好人，對我特別關心！)

其實，我都預咗，遲早俾茶煲上司踢我出局；或要求我自動消失！(問心，我唔知點幫或可以點做！)

作者: 只因我太痴 時間: 2007-9-3 18:30

死亡工作日 ... 漸漸迫近 ... 唉！

下個星期一開始，將會係我的死亡工作之第一課！

因為，我個些粉阿頭，下個星期開始放大假嘛！(她真係幸福！)但，問題係 ... 我應該係開心？！(無王管，勁自由！)還是，超級擔心？！(有乜事，要食自己！)

坦白講，些粉阿頭的工作模式，從來唔會直接教我！(因為，她多數用口講一次！所以，我只有偷望！)假如，些粉阿頭放大假的時候；若然出咗甚麼差池！(如果爆鑊或有鑊氣！)我相信，我的下場只有死路一條！(因為，些粉阿頭講明，出咗事自己搞掂！)或者，些粉阿頭，已經等咗這個機會勁耐？！(她想我自動消失！)可能，些粉阿頭...已經心淡？！(對我極度失望！)也許，些粉阿頭，當做善事？！(俾個餐屎大家 ...唔駛再互相折磨！)

雖然，以上的觀點只係我妹仔的假設；(應該係些粉阿頭的心底話！)但，問心講！些粉阿頭的脾性，我真係唔知？！(我會扮失憶！)所以，我只有自求多福(希望上主會打救我！)；又或把心一橫 ... 放棄！(做個順水人情，還些粉阿頭心願！)我估，應該會係最好的選擇？！(些阿頭又唔駛煩，我又可以早啲甩難！)我深信，真主會點救吧？！(等我早日安息！)

作者: 只因我太痴 時間: 2007-9-3 18:46

真係難得 ... 竟然有半日清閒 ... 爽！

估唔到，今日會有半日自由 ... 哈哈！超爽！正 ... 正到爆！

但，對我個極品上司嚟講 ... 就真係唔多好！因為，我個極品上司的家人有事；所以，她要請半日假去處理！其實，極品上司，可以請一日假？但，她始終都唔放心公司的工作！(可能，她有勁多秘撈！)所以，極品上司勁早就返咗嚟開工；(平時無十一點，都唔見人！)跟住咪交待幾句遺言！(有人揾她，請留口訊！)之後就閃咗！

其實，我都好明白，每個人家人有事，都會勁擔心與煩躁；再者，當我見到極品上司個樣，超謝與殘兼面有難色！(與平日個惡死樣，簡直判若兩人！)刹那間，我就好同情我個極品上司！(只限今日，其他除外！)雖然，極品上司的為人唔多好！(對住我的時候，會時不時發老脾？)但 ... 極品上司始終都係個女人吧！(女人，點都會感性點！)我相信她係個超級孝順女！(因她家中有事發生，她必定係最早去處理的人！)所以，我覺得，我個極品上司；都唔係個勁差之人，最少都會顧及親情嘛！(坦白講，唔係個個人會做！)或者；她平時有勁多不滿！(公私兩煩！)可能，她怕被人看低？！(極品上司係個自我中心超強之人！)總之，極品上司只會係人前逞強或裝空作勢！(自我保護程式！)間直係 ...可憐！

雖然，極品上司對我極苛刻或勁嚴格！(她覺得係正常！)不過 ... 我係對事，唔係對人！所以，我真係好希望；她的家人平安無事！(真心話！)

作者: 只因我太痴 時間: 2007-9-4 02:59

真係一場歡喜 ... 一場空 ... 唉！

今日，我個惡魔上司，正式向全世界宣佈 ... 她取消休假！

吓！唔係嘛？搞乜呀？惡魔上司，唔係已經訂好咗機票？！重話落重本 ...識番個有錢人？！睇嚟，我個如意算盤打唔響！算吧，認命啦！做妹仔，好籌幾時輪到自己呀！衰嘢硬係一次過嚟 ... 唉！

其實，我都好明白，惡魔上司家人有事；所以，她咪無心機去旅行！坦白講，就算去玩都好，個心硬係掛住或擔憂；又邊玩得開心呀？！再者，旅行，幾時都可以安排；但 ... 家人有事；自己點都會緊張或心情煩燥！所以，我會超勁體諒，我個惡魔上司 ... 一個星期囉！

講真，若然倒轉身份，我都會好似惡魔上司一樣 ... 勁唔開心兼煩燥不安加無心工作！問心每個人，都唔想自己家有事！但，生老病死，係人生必經階段；所以，為人子女，好應該珍惜與家人相處的時光！總之，希望惡魔上司的家人，早日康服，身體健康！我唔想，日日對住個苦瓜乾，好攞命呀！

可能，我有啲被虐待狂？！或者，我唔多習慣，辦公室好似個死城！也許，我被惡魔上司，傳染咗？！搞到有啲心理唔平衡？！我諗，我係時候要見見心理醫生！希望，我唔會變咗第二個惡魔？！阿門！

[ 本帖最後由只因我太痴於 2007-9-4 22:32 編輯 ]
作者: 只因我太痴 時間: 2007-9-4 22:50

些粉上司之真情對話 ... 人性的弱點！

今日，都唔知行咗乜運？！無情白事，做咗大半日慰安婦！

其實，我可以行咗去，甚至唔理她！但，我無呢個膽量或本事 ... 因為，她係我個茶煲上司！所以，我只有借出我對耳仔與時間，比茶煲上司 ... 盡情發洩她內心的不滿與憤怒！

無計啦，做妹仔既，只有聽教聽話，先可以生存！否則，只有自取滅亡！坦白講，我都算有耐性，因為我個茶煲上司，由下午三四點就開始咬住我，直到七點為止！問心，換轉係其他 ... 理她都傻！

其實，我都好同情她，因為，茶煲上司份人，情緒化、小氣、脾氣臭、疑心大、鍾意死撐 ... 但，偏偏口硬心軟！(間歇性！)可能就係呢啲原因，令她好少向朋友傾訴？！也許，茶煲上司無男友分擔吧！又或者，茶煲上司，唔想向外人講公司之事？！總之茶煲上司一開口，就好似黃河決堤，一發不可收拾；停都停唔住！由對大老闆的不滿，與電腦部的經理之間是非，最後係其他同事之間的怨言！簡直如數家珍，勁呀！感覺，就好似某電台節目，盡訴心中情一樣 ... 爆大鑊！！

相信，茶煲上司己經谷咗勁耐！或到達無法忍受的地步？！若非，她又點會夾住我！但，唔夾住我，又有邊個被她夾呀？！(公司只有我與她！)

算吧！做妹仔，係要分擔小姐的不滿與不快！如果唔係，要個妹仔嚟做乜？！問心，老闆或上司與下屬的關係，咪又係一樣！(小姐、妹仔、少爺、書僮！)究竟，幾時先可以放低，所謂既階級觀念；阿門 ... 願我安息！

作者: 只因我太痴 時間: 2007-9-6 02:16

辦公室之政治遊戲 ... 正式開始 ... 唉！

唉！我又再次成為我個惡魔上司的傾訴對象！無情情由妹仔變咗做慰安婦？！都唔知係好事？還係壞事？！

但，照現時嚟睇！我個惡魔上司，應該都唔會殺我滅口住！因為，她身邊無幾多個人，可以比她依賴或詐嬌！(無計 ... 暫時要做埋保母個位，真攞命！)其實我都好明白，惡魔上司都係個女人；所以，她都好希望有人可以逗她開心或安慰！但現實生活，呢個人選重未出現！所以呢個責任 ... 就暫時由我呢個妹仔頂上！

不過，凡事都有兩面！惡魔上司現在對我都客氣咗好多；所以都算係好事！(相信我重有利用價值！)雖然，要借出自己對耳仔比她用；(聽她的肺腑之言 ...)但，總好過比她狂插，或令大家既關係越來越差呀？！唔知呢種關係以維持幾耐？！

因為，某部門的主管，又時不時搞搞小動作，或製造麻煩！結果又搞到惡魔上司，準備作出大反擊！睇嚟，好快會有一場腥風血雨，出現係辦公室！坦白講，公司人又唔係多，得幾條友；都唔知點解會發生呢啲事？！(可能，他們各懷鬼胎或互相推卸責任！)究竟係咪真係要互揭瘡疤？！(做人真係唔可以坦誠相對！)還是自覺蝕底或被人利用；繼而暗中報復或做金手指？！(做同事，都要事事計較或玩手段！)或者，權力與名利，往往令人失控吧！(互相仇視或謾罵！)

問心，我真係唔想介入或牽涉呢場遊戲中！但我又可否抽身而出？！(做妹仔既邊有得揀！)相信，我只有自求多福或做隻沉默的羔羊 ... 應該會長命啲？！(最少，唔會死咗都唔知乜事！)也許有人既地方，就有是非與權力鬥爭吧！(我估死咗就唔駛鬥！)

作者: 只因我太痴 時間: 2007-9-10 18:47

惡魔上司之真情剖白 ... 情感之禁區！

呢幾日，被我個些粉小姐捉住咗 ... 唉！無情情又做咗慰安婦，真係無奈！

或者，些粉小姐，真係太寂寞？！(感情生活交白卷！)可能，些粉小姐，勁苦悶？！(心靈空虛加煩燥不安！)總之，些粉小姐的情緒超低落！(完全死直，好似被人遺棄！)相信，些粉小姐 ... 自覺有怨無路訴？！(谷埋谷埋勁多氣，好易出事！)所以，咪咬住我呢個做妹仔既，出盡力勁爆心中情！(心底真情，堅呀！)

其實我都覺得勁意外，因為，些粉小姐從來唔提她的情感生活！(她好少信人！)也許，些粉小姐感到勁辛苦？！(估計，有特別個案，令她觸景傷情！)結果，咪揾咗個最就手既妹仔，咪即係我 ... 嚟個大控訴或大解放！雖然，全程我只係得個聽字！再者，呢啲係私人生活既點滴，她又點會隨便對人講？！(些粉小姐疑勁重！)我估，些粉小姐都係信得過我，先講比我知；即係話 ... 我又多個機會了解些粉小姐多一點！

但，都唔知係好事？！還是壞事？！如果，日後再有呢啲情況出現，我諗我有排都唔得閒？！(晚晚或日日都要借對耳仔出嚟 ... 唉！)

作者: 只因我太痴 時間: 2007-9-13 15:13

惡魔上司竟然做好人 ... 好擔心呀！

昨日，些粉小姐，做咗啲令我極之意外既事！！簡直係令人難以置信，甚至係出人之表！！

因為，些粉小姐早前要我處理某事；但，我自己又無清楚點做，結果咪又做錯！我心諗，今次又要被些粉小姐勁插或狂炳？！點知 ... 些粉小姐 ... 她竟然笑笑口話，有時間咪跟番好，之後揾人送出去！

嘩 ... 發生咗乜事？！(一句都無鬧過，奇怪！)究竟些粉小姐，係咪食錯藥？！(過期藥！)還是，些粉小姐轉性；！(有病，轉死性！)或者，些粉小姐，已經放棄？！(覺得鬧都係嘥氣！)可能些粉小姐，想做個好人？！(應該係扮好人！)總之，完全唔似她的平時既作風，簡直判若兩人！！重有，些粉小姐 ... 她無情情將自己部手機 ... 交比我？！跟住，她仲話 ... 如果有電話聽；就幫她聽！盡量要求對方，留低電話號碼！如果唔方便，就叫對方遲少少再打電話比她！因為些粉小姐要開會，唔方便聽手機！

嘩 ... 做乜呀？！些粉小姐，她竟然會信我呢個妹仔？！簡直係世界奇聞？！因為些粉小姐，從來都唔會相信任何人！就算把口話信，她個心都係抱住懷疑或試探態度！所以我覺得些粉小姐既轉變，應該係別有用心！！相信些粉小姐覺得，公司中，無人會唔揾她著數或利用她？！(事實係，他們鬼打鬼！)所以她希望有個人，可以幫她收風或替她分擔任何事；(應該係事實！)結果咪好順理成章，揾咗我呢個妹仔囉！(公司無其他選擇！)

問心，我真係唔想做 ... 但，我又無得揀！！(除非我唔撈！)所以，我只有面對現實 ... 唉！再者，人生如戲；戲如人生！難得有機會，可以改變彼此既關係，就算每日返工，都要刻意關心或安慰些粉小姐 ... 未嘗唔係一件好事？！坦白講，每個人都唔希望受埋勁多閒氣！若然可以搞搞小意思或小動作，去令上司或老闆笑口常開！試問，又有邊個會抗拒或攞苦嚟辛？！

無計啦 ... 現實係殘酷！做任何事都要付出代價，唉！為咗生存，有時係要向現實低頭 ... 唉！(勁無奈！)相信 ... 呢個係勁多打工既心情寫照？！(我估！)誰可改變！阿門！

作者: borteakyyy 時間: 2007-9-15 15:03

為左碗飯.................撐住呀!!!
作者: 只因我太痴 時間: 2007-9-15 21:33

引用:
原帖由 borteakyyy 於 2007-9-15 15:03 發表
為左碗飯.................撐住呀!!!
Thanks !  我會努力
作者: 只因我太痴 時間: 2007-9-15 21:41

今日無王管呀 ... 好正呀 ...  勁開心！

今日，唔駛對住個茶煲上司，簡直係人生一大樂事 ... 哈哈！

因為我個茶煲上司，屋企有事；所以，她咪將公司的文件帯返屋企做，唔返嚟囉！雖然只有一日悠閒工作天，總算好過無呀！講真呢啲日子，好耐都無出現過；所以，我會好好珍惜今日既清閒，呵呵！

不過，話分兩頭 ... 其實茶煲上司都好辛苦，又要照顧有病的父母；又要處公司的業務，真係 ... 少啲精神與身能都頂唔住呀！我覺得，茶煲上司，簡直係個超級女強人！問心，有幾多個人，可以放棄自己既空間或時間？！(工作狂除外！)再者，女人既保鮮期 ... 真係超短；隨住時間既流逝，好快會變質 ... 唉！坦白講，每個女人都希望有人關懷與愛護，無論她們有幾強與幾硬朗都好！始終，女人都係感情動物！！所以我都好希望，我個茶煲上司，可以早日揾返個好人家！最少，可以令她身心得到滋潤與安慰，唔駛搞到未老先衰呀！！(總好過時不時咬住我或揾我嚟出氣！)但，呢個人，唔知幾時會出現？！(會唔會，等到世界終結時？)

請問，有無人或善長人翁，肯捱義氣或做好心，幫幫我？！好人有好報呀！救人一命，勝做七級浮屠！！可唔可以 ... 伸出同情之手？！

作者: 只因我太痴 時間: 2007-9-15 21:56

究竟 ... 親密關係，是福？！是禍？！

唔知點解，些粉小姐對我越來越好？！好到，令我有啲驚或擔心既地步！！因為，我有時做錯或做漏公司的內部文件，她只係笑笑口，話我幾句就算！！

嘩 ... 發生咗乜事呀？！莫非 ... 暴風雨既前夕，總係風平浪靜？！(可能殺我滅口！)還是，些粉小姐 ... 想將我變做她既心腹？！(有利用價值？)但我覺得 ... 自己越來越似個奶媽！因為，些粉小姐越來越鍾意向我呻！無論係公事或私事！可能些粉小姐，實在勁苦悶或寂寞？！(生活平淡！)或者些粉小姐，抑壓得勁耐？！(無人傾訴！)也許些粉小姐，超鍾意扮強硬？！(唔衰得！)結果，咪搞到自己一鑊泡 ... 唉！(嚇走有心人！)所以些粉小姐，就但求就手，揾咗我嚟做替代品，唉！

總之，現在事無大少，些粉小姐都鍾意咬住我，唔停口勁講！假如些粉小姐受咗少少怨氣或委屈，她又會搞搞小動作，不停向我投訴這個那，又或扁扁嘴！唉 ... 扮到小朋友模樣，係都要人氹！！

坦白講，妹仔已經唔易做！現在，重要做埋奶媽？！(一人分飾兩角！)問心，我真係唔知頂得幾耐？！(我都想揾人氹！)講真個句，表面上，些粉小姐與我既關係，的確好咗好多！！但，問題係，些粉小姐既情緒病，唔知幾時會復發？！(講唔埋！)所以，唔到我唔擔驚受怕或憂心？！(心血少！)再者，自問未夠實力起她飛腳！！(無計！)唯有叠埋心水，做住個聽教聽話既妹仔保母混合體！！(好慘！)

究竟我幾時先可以甩難呢？！救命呀 ... 點算呀？！有無人可以，伸出同情之手 ... 幫幫我呀？！打救我或點救我都好呀 ... 吓？好心唔怕做呀！！

作者: 只因我太痴 時間: 2007-9-17 17:38

人生交叉點之 ... 何去何從？！

上個星期，已經收到確實消息 ... 公司正式被其他公司收購！！(上星期四晚，我個惡魔上司已經漏咗口風！)

講真，我都預咗自己無得留低 ... 因為，我真係唔夠料！(雖然，我不停進修 ... 但，大公司係汰弱留強！)再者，我真係唔想欠咗我個惡魔上司既人情！因為，我現在呢份工 ... 都係她介紹呀！！(惡魔上司勁強調，無她我無今日！)

所以，我覺得由零開始，都唔係件壞事 ... 最少，唔駛再面對我個惡魔上司！(事實！)重有，公司會賠償遣散費比所有員工呀！(可能唔多！)所以，我唔覺得有問題！或者，其他公司都會有惡魔上司 ... 但，我相信，我係唔需要買他/她怕！因為，我係靠自己既實力 ... 唔再係靠人事關係嘛！雖然，將會係未知之數 ... 但，我相信只要我比心機進修，出路會比現在好！不過，我唔知幾時會消失？！(惡魔上司話，公司頂多半年到？！)也許，我只可以用有限既時間，去爭取更多進修既機會！！

希望在明天，前路由我創！我會更加努力！因為，機會唔係時時出現！！錯過咗，可能會後悔莫及；所以 ... 應該珍惜每個機會，無論係工作或其他事項！！不竟，生命短暫，做人要活得精彩！！(真心話！)真神 ... 會幫我嗎？！阿門！

作者: 只因我太痴 時間: 2007-9-18 19:00

實在有勁多未明朗之因素 ... 唉！

昨日，總公司個大老闆飛咗嚟香港，因為，公司被其他公司收購，所以，他要向全世界交待公司所有業務問題！！

雖然，我做咗唔係好耐 ... 但都要留低開會！因為，我個些粉上司話，無論新舊員工，都要聽清楚或知道事件之始末！！所以我只有乖乖哋，留係公司等開會；真無奈！！坦白講，個會開完，都仲有勁多未清楚或未確實既因素！！例如：員工之遣散費/年假賠償？！日後係咪順利過度新公司？！總之，全部都係個謎 ...

唉！問心，所有大小事項，都未有任何聲明或答案？！(事實！)試問又點會有結果呢？！(齋吹！)講真，個會開嚟都唔知做乜？！可能，呢啲係辦公室之政治，做個樣出嚟安撫人心？！(我估！)或者，叫做象徵式，通知全體員工；公司將會點點點？！(事實！)也許，大老闆覺得，對自己與下屬；總算有個交待？！(應該係！)

坦白講，結果對我既影響唔大，因為，我都無發言權！(入職半年，無分別！)不過，對我個些粉上司與其他同事，影響勁大囉！因為，他們有話事權，決定自己既生死嘛；！(係咪過檔！)再者，過咗新公司，都唔知係咪好事：！(無乜自由！)

但，以上所有問題 ... 都與我無關！因為，我預咗被叮出局！(心照！)所以，我都係叠埋心水，等到公司收檔後；比埋條數我咪算囉！老實講，此處不留人，自有留人處；天大地大，豈無容身之地？！相信，離開對我嚟講；應該係件好事！最少 ... 放假都唔駛擔驚受怕嘛！(驚被人咬住！)

作者: borteakyyy 時間: 2007-9-18 22:37

來之，安之，不用想太多
作者: 只因我太痴 時間: 2007-9-19 17:24

引用:
原帖由 borteakyyy 於 2007-9-18 22:37 發表
來之，安之，不用想太多
Thanks ~ 我會用平常心去面對！
作者: 只因我太痴 時間: 2007-9-19 17:57

些粉小姐之舊病復發 ...  .. 謎！

我真係好唔明！點解次次有乜唔見，梗係入咗我數先？！可能，我係妹仔身份！所以，我個些粉上司，事無大小，就賴！總之，賴得就賴！唔會諗諗，係咪自己做錯或失憶？！

我好明白，些粉上司勁忙又多應酬 ... 但，唔代表可以習慣性，賴皮呀！！最近我個些粉上司，又玩失憶；搞到我梗死咗幾死貓！！問心，她枱面亂到反轉，又唔知自己記性差？！(相信係過份依賴！)有事就閙咗先 ... 又唔揾揾自己嗰堆文件或快勞？！重有，就算到最後，揾到份文件！原來係她自己度！！些粉上司，都唔會主動沙冧或認錯 ... 她只會扮到若無其事！！

嘩 ... 駛唔駛做到出面？！自己衰咗都唔認？！(事實！)重要覺得自己無做錯？！(事實喎！)就算錯都係我錯？！(都係事實！)或者係我呢個做妹仔，時不時唔出聲？！所以些粉上司覺得有問題，都係我既問題？！(理所當然！)可能,些粉上司既老人痴呆症 ... 日益嚴重？！(相信係真！)結果，她咪將所有責任推卸落我身上，因為,些粉上司覺得，妹仔最既用途莫過於此！硬食或受氣！

算吧 ... 我都唔捱得幾耐，公司已經被其他公司收購咗！！相信，我對住些粉上司都時日無多 ... 好好醜醜都捱到尾！無謂再搞惡大家既關係，無著數既事，做嚟都無用，係咪？！

希望些粉上司 ... 她自己日後多多保重！問心，有幾個多肯忍氣吞聲兼做埋慰安婦呀？！總之，祝些粉上司好運 ... 阿門！(因為，她信主耶穌！)神會保祐她 ... 哈哈！

作者: 只因我太痴 時間: 2007-9-20 14:57

又有幾日清閒工作日 ... 勁正呀！

今日，我個惡魔上司又出咗差 ... 所以，我又無王管！雖然，得幾日，但，好過無呀！

講真，呢個機會唔係時時有，所以，我會勁珍惜 ... 哈哈！再者，我個惡魔上司，都未必有時間搖控我工作；因為，今次呢個行程，係同埋我老闆及總公司個大老闆齊齊去！所以，惡魔上司都有排唔得閒 ... 她一條友要服待兩個大男人嘛！！

坦白講，我覺得惡魔上司勝任有如，因為，她好識得利用每個機會或空間去表現自己！！或者每個做主管，都希望自己，會被老闆重視？！(事實！)可能，每個做上司，都想有個機會發揮專長？！(問心！)也許，職位與權力，可以代表實力或自信？！(現實！)莫非，每個話事人，都鍾意玩手段？！(身不由己！)相信唔會有一個標準答案 .....

因為，每個人都有自己想要或得到；甚或渴求既事！！不過，若做任何事，都要左右逢源或諸多測試；係咪真係開心或好過呢？！試問有幾多個人，可以真正憑良心做事？！

作者: 只因我太痴 時間: 2007-9-30 14:46

假如，可以利順過檔新公司 ... 是否好事？

早幾日，我個些粉上司無情情問我 ... 如果，妳有機會過去新公司；妳願意跟我一齊工作嗎？！

嘩 ... 呢條問題，都幾難答吓？！問心，有機會過檔；梗係好啦！最少多個機會比自己學多點，其他工作崗位既運作或範疇！再者，新公司；新人事；新作風 ... 相信會更有規則或條理去工作！但，問題係 ... 如果真係要跟住些粉上司工作？！我又覺得幾頭痕？！因為，些粉上司表明立場，他日過檔；她必定要求調去管理部門工作！！

吓！咪即係有機會，與些粉上司朝夕相對？！唔好玩啦？！我會好大壓力呀？！坦白講，些粉上司時不時都會鬧情緒；無論係工作上或面對任何人都好 ... 她鍾意幾時發，就幾時發！真係無面比呀！！所以，我都唔知係咪應該開心？！

不過，過唔到新公司；都唔係壞事！因為，我覺得自己；會脫離咗無間地獄生涯！雖然要再揾工，可能會好茶煲或頻繁！但 ... 天下無不散之延席！！也許，新開始，將會係另一片新天地？！無人知將來會係點！但，只要自己肯出踏出第一步；相信會有好開始？！

總之，天無絶人之路；只有懶人才會行上絶路！！生命滿希望，前路由我創 ... 世上無難事，只怕有心人！！只要有信心，理想必達到！

作者: 只因我太痴 時間: 2007-10-3 21:50

總算有少少進步 ... 都值得安慰！

昨日，係我公司既坐館；留係香港既既最後一日！雖然，全公司上下都會與坐館食晚飯，但，我無去！

因為，我昨晚要考試，一個對我好重要既中期試！坦白講，錯過咗，可能會唔合格！因為個試要計分，百分之三十喎？！講真自己有去考，衰咗無得怨！！所以，我早早就通知咗我個些粉上司，話比她知，我唔去食飯！相信，今次應該都可以免疫？！

事關上個星期二晚，我都應酬咗全世界；齊齊去食晚飯！(包括坐館在內！)點知 ... 搞到濕身返歸！因為個晚飯局散後；出邊落大雨！！重要係無人有傘！唉！結果咪淋到濕漉漉囉！但點都好，始終都要交待一聲比坐館知，所以我個些粉上司就向坐館解話！(他係鬼佬！)再者，我自己都有親身向坐館沙冧，兼交待原因！(禮貌！)但，當我要起行之時，我個大老闆又搞搞震；他叫我與坐館 ... 抱抱！！

吓？！好似 ... 有少少造作？！不過為咗全世界既面子，或自己既前途(錢途！) ... 我點都要接受！所以，我用最快既速度與坐館 ... 抱一抱；跟住就閃！當我走既時候，我隠約聽到，坐館與我個大老闆係閒談中，提到我個名？！莫非 ... 我有乜地方做得唔好？！(我估！)還是有其他問題？！點知，結果係出人意表 ... 原來，坐館讚我個樣年輕；好似靚妹！(開心死！)重有，坐館話，今次呢個行程安排得好好！

嘩 ... 勁開心！！超開心！！因為我好少被人讚嘛！(事實！)而且以上對話，係出自我個些粉上司把口？！簡直係難以置信？！但事實歸事實，我覺得我受之無愧！問心，我硬食幾多與做幾多，大家係有目共睹！所以，我覺得呢個係奬勵；亦係個極大既鼓舞！因為我相信，我既努力係無白費 ...

哈哈！！我會再加油！！

作者: 只因我太痴 時間: 2007-10-8 18:38

莫非 ... 我是個隨傳隨到之妹仔？！

今日，無情情又冇咗幾百蚊，重要嚇餐飽兼虛驚一場！！都唔知，我係咪前世欠咗她？！還是，我與些粉上司，有隔世之仇？！總之，些粉上司次次都無好事益我 ...唉！

話說，公司將會係今個月中；搞個大型酒會嚟大宴全人類！但，地點唔係香港 ... 而是雅典！！無錯，係雅典！一個要坐十幾個鐘頭飛機之地方！問，,真係幾辛苦吓，要坐長途機又無得瞓？！重,屈住對腳，坐係個經濟客位；認真攞命！！

講真，自己去旅行，就無乜所謂；話晒第二日都有得休息！但現在與公司全人類齊齊去？！邊有得你回氣呀？！隨時去到個邊機場，就要趕頭趕命去酒店登記，之後又要趕去會場應酬兼開會；夜少少再食埋餐政治飯！跟住，過兩日，又要坐十幾個鐘頭飛機返香港；重要坐係經濟客位！噓 ... 簡直收賣人命！坦白講，都唔知去嚟做乜？！唔係咩？！得幾日時間，要開會；又要食飯；重要交流！嘩 ... 真係唔駛瞓？！所以非必要，真係唔多想去！除非，公司硬性規定，否則；可係香港返工好過！

講真，我好擔心自己走唔甩！因為，總公司出咗個電郵；要求全世界過去嘛！再者，我又未有特區護照；都唔知點好？！於是，我嘭嘭聲去咗郵局，攞咗份表格！跟住填好兼開埋支票；重影埋證件相，然後，係今早拿拿淋趕去就近之入境處；放低份文件！跟住，我咪趕住返公司，因為時間勁緊迫嘛！

點知，當我返到公司後，就被我發現咗個真相！原來呢個行程，係可以自由選擇去或唔去？！吓！乜唔早響呀！如果早響，我咪唔駛搞餐懵！剎那間 ...我真係好想打巴我個些粉上司！因為她係搞手之一；亦係好清楚，整個議程之其中一人！點解，她唔出通告話比全人類知；有得揀？！相信理由只有一個，就係些粉上司勁想咬住我，做她的廿四小時跟班！！

講真，我又唔係簽咗賣身契？！駛唔駛事事都要搞到我？！可能她想有個人...幫她打點一切？！(跟頭跟尾！)或者些粉上司怕，無人比她發洩？！(過到去,無得話事！)也許，她唔想做亞四？！(無機會識人！)

作者: 只因我太痴 時間: 2007-10-22 20:05

是否 ... 日日咬，時時吟！結果將會改變？

今日，我個極品上司又做咗 ... 常哦！因乜解究？！因為，極品上司勁想我做三陪妹仔... 陪開會、陪應酬、陪苦悶！可惜我個特區護照重未搞掂，所以她咪日日追殺我囉！

講真，我又唔係營業代表；梗加唔係高層人仕，我只係個，極低職位之文員仔！所以我去與唔去，跟本無分別！再者，唔去咪重好，可以幫公司慳番張機票錢！坦白講，條數都唔細，大約萬幾蚊一個人；假如，全世界齊齊去？！斷估都駛五萬幾六萬；重未計酒店錢呀？！所以，你都咪話唔甘呀？！若是可以折現比我就好啦 ... 哈！(講笑！)

老實講，有得比我揀，梗係揀唔去啦！因為，要長途跋涉坐廿個鐘飛機，又要轉機又要搭車；跟住又要趕去開會！之後，重要埋餐食政治飯；兼交換咭片及交流！但，全程要係四日時間內完成！！

嘩 ... 簡直係非人生活，等同收埋人命！試問我去又有乜為呢？！不如留係香港做支援好過啦？！反正多我一個唔多，少我一個唔少！而且，公司點都要有個人接聽電話或收信嘛！有乜事都有個人處理呀？！但，極品上司就唔多想！因為，她無咗個妹仔係身邊；始終唔多方便！所以，她就狂咬兼勁煩住我，追問証件之事；真係攞命！

問心，就算我勁煩入境處之職員；有用咩？！政府部門之處事方式，又豈可干涉？！算吧 ... 一切隨縁！阿門！

作者: 只因我太痴 時間: 2007-11-1 20:32

雅典之旅，另有內情；事實真相，令人心淡！

真係估唔到 ... 雅典之旅，竟然會發生，一屍兩命之事件簿！死者 ... 係無出現過之傻妹仔(我)；但，受害人竟然係極品上司！

嘩 ... 簡直係天下奇聞，講都無人信！因為，從來只有她攞人著數；她係唔會比機會人攞自己著數！所以，極品上司，今次真係受咗勁大打擊；我估，我再無好日子過！隨時要執埋包袱走人 ... 唉！事故呢段小插曲之誕生，完全出於人為因素；所以我自覺好人難做！

話說，極品上司由出發當日；一直忙到行程尾聲，因為回程機位未得；又要安排公司另一個行程！由於工作繁忙，令她錯失咗去觀光或參與其他活動之機會！原本行程將完之時，極品上司已約好全人類，齊齊去市集閒行；但，好可惜，由於她長時間工作，間接令她自己唔夠瞓；結果 ... 咪令她自己瞓過頭而遲到！雖然，她已經快手快腳去梳洗；兼嘭嘭聲走去與大家會合！但好不幸，大家無等埋極品上司，就自行出發去玩！唉 ... 簡直係過份，極品上司早早講明，當日她必定會出現，無論發生乜事，她點都會去！點解？！一場同事，竟然會做出如此行為？！若是唔想極品上司出現，又何必致電給她，相約酒店大堂等？！莫非 ...另有原因或問題？！

可惜，直到回程之時，所有問題仍未有答案；結果，極品上司咪面黑黑返香港！不過直到昨日，所有迷團終於解開；而真相亦都大白！因為一個電話，令所有事情爆光，答案亦隨之出現！原來，當日有人自把自為，做咗極品上司之代言人；將所有說話倒轉講，結果，咪令全世界賣甩她老人家！事到如今，已經水落石出！但彼此之關係，必定從此玩完！

其實滋事者，有無諗過他人感受？！可能到今時今日，生事人重未知自己衰乜？！或者始作俑者，未曾意識到事件之嚴重性？！總之，就煩！

作者: 只因我太痴 時間: 2007-11-22 03:34

終於 ...由大眾妹仔，變做近身侍婢 ~ 好！

最近我與些粉上司之關係 ... 簡直情同姊妹！

點解？因為自從她老人家由雅典返嚟香港後；就性情大變！相信，些粉上司，必定受咗極大剌激或超多怨氣？！否則以她之性格，極難在短時間內；有任何改變？！可能發生咗某件事，所以令些粉上司，間接擦亮自己雙眼，看清身邊一切？！或者因為個件事，變相令她老人家；更加明白自己之位置？！也許一切恩怨或情義，都會隨著那事；煙消雲散？！

其實，無人想發生不愉快之事！但，有好多事；總好似在冥冥之中自有安排！坦白講，冰封三尺，非一日之寒！相信問題早早就存在；只係無人願意企出嚟攤牌！再者，公司內，無個人可以話到事！結果，咪引發咗呢場悲劇之出現！間接亦令我呢個妹仔唔多好受！因為，現在晚晚都要做心理心輔導，我個些粉上司！

講真，究竟是好事；還是壞事？！連我自己都搞唔清楚！請問各位觀眾或網友；可否給我少少意見？！希望大家高抬貴手，幫幫我呢個妹仔！好心有心報！或者，當分享心得好嗎？！盼請賜教！

作者: 只因我太痴 時間: 2007-12-9 05:25

政治飯局！氣氛融洽，暗潮洶湧！

前兩晚，全世界都打扮得勁整齊！男仕恤衫西褲；女仕套裝西褲！因為當晚既約會，係非常之重要；唔可以得失！所以，個個都執得好正！總之，與平時返工個樣，完全唔同啦！如果唔知道，重估我地去飲或去雞尾酒會？！

坦白講，自己真係好唔慣，要裝身、又要化裝；重要扮到超女人 ... 唉！但我相信，今次係唯一一次；亦係最後一次，扮到熟女模樣去朝聖！因為我有自知之明，所以；我都預咗過埋農曆年揾工！雖然最後通碟重未出；但 ... 我自覺無望！

問心，我入行時間好短，對呢方面之學識有限；況且，大婆個邊係汰弱留強！種種因素結合之下，我有得留底既機會，真係好渺茫！總之，就讓一切隨縁吧！

作者: 只因我太痴 時間: 2007-12-9 05:31

平靜之日子，終於再次來臨；是禍是福！

今日，可以話係一生中最平靜之日子 ... 因為我無返工！點解？！我唔知，究竟係我啲腸有問題？！還是，上次個餐政治飯出咗問題？！又或者，我自己整個人都有問題？！總之，我由星期二晚開始，一直肚疴到今日；重要係，一日五或六次去餵大口仔！現在，搞到個八月十五要與大口仔相依為命 ... 真係超辛苦 ~~

唉！但，算啦 ... 咪當減肥兼修身囉！最少，唔駛益咗啲纖體公司或美容中心；不過 ... 變相益咗啲醫生囉！

作者: oifwmdvcwoe 時間: 2007-12-12 23:38

莫非，每個上司都係惡魔？！
每個上司都係惡魔！
作者: 只因我太痴 時間: 2007-12-21 22:55

下星期又有新分唇 ... 俾面派對又再出現！

今日，我依然好平靜地，享受著最後一日之自由工作天！因為，我知道，開心之日子；好快會隨著時間 ... 慢慢流逝！所以，我今日好比心機温書；上網與睇鬼故 ...

哈哈哈！點知 ... 正當我集中精神，與網友傾計之時，忽然；見到電腦之收件匣，彈出一個新電郵？！咦 ... 新公司丟過嚟喎？！唔係又有乜事呀？！於是我懷住顫慄之心情，去打開那個郵件；感覺既緊張又擔心！因為，唔知答案，係報喜？還是報憂？但，結果 ... 有少少令我恐懼；不過，都算係事開心事！點解？！因為，新公司又有新搞作，聖誕節之聯歡會~~人人有份，永不落空！

吓？！又嚟？！唔好啦？！上次個餐，已經搞到胃炎咗幾日！唔知 ... 今次可否玩失踪？！

作者: 只因我太痴 時間: 2008-1-4 15:16

高層會議，廢話籮籮；極品上司，好人難做！

昨日，極品上司返到公司之後；已即時煞有介事兼面帯苦惱 ... 對我講：亞貓，想與妳傾傾個人前途問題！當時我既反應係 ... 哦！然後她老人家，就開始詳述事件之始末！

由於上次與英國老總們開完會後，已得到初部之共識與結論！北京公司之同事們，情況唔多樂觀！其次，香港公司之同事們，大部份都安全！除了 ... 妳與另一個同事！！我 (上司) 已經極力替妳爭取，希望說服到大婆公司，將會安排到一個合適之職位給妳！亞貓，妳唔好唔開心！妳放心喎！我 (上司) 會繼續替妳跟住呢件事，直到有消息為止！不過，假如，大婆公司，真係替妳找到個合適之職位？！我 (上司) 都希望妳，唔好過檔，寧願妳收埋舊錢 (遣散費) 再作其他打算！我 (上司) 希望妳明白，就算妳過到檔，亦未必有機會生存！因為，大婆公司之政治因素，實在係無法估計與難以想像！況且，我 (上司) 過到去，唔知會做邊個職位？！再者，我 (上司) 真係無乜時間去照顧妳，亞貓，妳都知，妳平時之工作表現，真係唔太理想；甚或 ... 間歇性錯漏百出！我 (上司) 唔想看到妳，將來有機會，被他們趕妳出場既結局！如果，我 (上司) 真係親眼看到，我 (上司) 真係會好傷心與難受！但，最終決定權，都係喺妳身上；妳自己好好諗清楚！！

剎那間，我真係唔知，多謝極品上司好；！還是替她老人家擔心！點解？首先，我從頭到尾，都無諗過;自己會過到大婆公司！因為自己知自己事，無謂癡人說夢！其二，我係呢間公司工作，都係多得極品上司，無她老人家之提攜，就無今日既我！而且，我係呢段日子，真係賺取回來！問心，我真無乜呢方面工作經驗 (私人助理) ！其三，極品上司份人，真係死要面；平時有乜事都好，唔衰出街就無問題！若果~~出到去有乜差池；！她老人家塊面 ... 擺去邊呀？！所以，當我聽完極品上司，呢番肺腑之言後；真係連少少意外之感覺都無！反正，都係意料中事，有乜好愁？！

重有，此處不留人，自有留人處！反而，我會替極品上司憂心 ... 因為，她老人習慣咗無王管，日日返工唔準時；做任何事都要看心情！坦白講，現在呢間公司，還可以隻眼開，隻眼閉！但，大婆公司，係唔會容許任何人，用呢種方式工作！因為，對方係一間有規有矩之大公司，事事都有限制或範疇，我相信，極品上司 ... 未必頂得住！除非，她老人家肯改變自己之習慣！阿門！

作者: 只因我太痴 時間: 2008-1-15 16:07

死刑已判，即日執行；莫扮好人，苦口婆心！

昨日，我正式收到新公司之解僱信 ...

呵！感覺 ... 真係有少少輕鬆加快慰！因為，我知道我終於自由啦！再者，我唔駛再面對極品上司；甚或感到欠她老人家一個大人情！所以，我真係感到前所未有之興奮！

講真，從我入職到現在，真係未開心過；重有，日日都要擔驚受怕或做心理治療 ~ ~ 唉！有時，我會問問自己，點解要委屈或難為自己？！莫非，我真係前世欠咗她 ... 極品上司？！但，如果真係要還人情；我相信，我已經還清晒，可能隨時還凸？！

因為，極品上司之工作方式，真係超出想像；問心，我真係替她硬食或硬受咗唔少！所以，我真係問心無愧！可惜，極品上司直到此時此刻，仍然翻我舊帳；甚至，對我惡意批評！坦白講，我好清楚自己有幾多斤兩！所以，我不停爭取進修機會；希望可以盡力做到最好！

但，好不幸，我仍然唔能夠滿足她老人家之要求！！換來的，只有無限之控訴與失望之回應！！阿門！

作者: 只因我太痴 時間: 2008-1-16 17:12

塞翁失馬，焉知非福？塞翁得馬，焉知非禍？

今日，我照常返到公司；因為，我要交待身後事與公司鑰匙！再者，我重要清理與收拾自己之私人物品！所以，我比平時之返工時間，略為遲少少！因為，最高話事人 ... 些粉上司之返工時間；大約係十一點後十二點前！但，有時都會勁遲；大約十二點半先現身囉！

所以，假如 ... 我照平時返工時間出現 (九點)！我估 ... 我真係變咗做化石；因為，我唔會放置太多野係公司；所以就算真係收拾遺物？！我相信一個鐘，已經可以清空自己個位與櫃檯！因此，我將剩餘之時間，用嚟上網揾工或與網友傾計；甚或，致電朋友問近況！

正當我放低電話筒後，些粉上司就蒲頭；並快速行近我身邊話：亞貓，與妳傾幾計！吓？！死刑都判咗啦？！重有乜好傾呀？！況且，我交待一切後，就極速閃人！因為，我唔想被她老人家咬住陪食飯嘛！不過，些粉上司妳響咗口，話有事與我密談？！好啦 ... 反正又唔係忙？！咪嘥少少時間，看看妳老人家講乜！

點知 ... 結果真係出乎我意料之外！因為，些粉上司，竟然叫我做到一月尾！嘩 ..... 發生乜事呀？！我已經被新公司解僱咗！點解些粉上司，妳重留我係公司？！當時，我真係抓爆頭？！可能些粉上司，睇到我個傻樣？！所以，她老人家就解話：我個部門現在只得我一個！但，全公司所有大少雜項，必須係二月頭搬到新公司；所以，我想妳幫幫手，做到一月尾，好等我有多個人，齊齊處理所有運作！

嘻嘻嘻 ..... 真相大白啦！原來新公司，無打算派人過嚟幫手收拾殘局！所以些粉上司就咬住 ... 我呢個妹仔唔放啦！算啦，我又未揾到工！何況，重有錢袋落袋；何樂而不為呀！問心，無人會嫌錢腥呀！阿門！

作者: 只因我太痴 時間: 2008-1-24 17:39

雙喜臨門，好事齊來；終於行運，唔駛失業！

今日，我真係好合皮 ... 哈哈哈！因為，我再無後顧之憂 ... 嘻嘻！點解？！

事故，我已經找到新工作，呵呵！再者，薪金都唔錯；其次...重有第二份工，等緊我明日去見！所以，我有感幸運之神，再次綣顧我呢個傻妹仔！

坦白講，我都要多謝一個 ... 茶煲上司；因為，唔係她老人家比機會我去進修？！我相信我未必有今日之成績與進步！況且，我真係無諗過自己可以係短短十個月內；修讀到兩個短期課程！所以，我真係好感激茶煲上司囉！雖然，她老人家之脾氣，真係超級惡頂與難以估計；但，她始終都令我學識咗好多 ~~ 我未曾試過或見過之事！重有，如果無茶煲上司所寫之推薦信？！我估我真係無乜機會，找到份好工？！或者，可以話係即見即成！

問心，如果唔係茶煲上司寫得好？！我諗就算工作經驗勁多或年資長？！都未必會有好工！因為，長江後浪推前浪 ... 唉！所以唯有增值，才有更好前途與錢途！阿門！

作者: 只因我太痴 時間: 2008-2-12 21:22

新工作，新環境，新人事，新作風；悲喜交雜！

昨日，正式返新工啦！感覺 ... 真係有少少緊張加擔心；可能，一切由零開始？！或者，自己將要接受無限量挑戰？！

點解？！因為第一日返工，已經要開夜；重要係由早踩到晚，未停過手！講真，我無諗過會忙到反肚？！甚至連食飯時間都要開工！無計啦，新公司係專替人找工之公司；所以忙係理所當然之事！否則都唔駛請人返來幫手？！況且，公司間唔中，都會找幾個兼職返來開工！相信應該係人手唔夠？！問心，日日知返工；唔知收工？！有幾多個人頂得住？！

坦白講，我自己都怕 ... 有日會捱唔住！所以我會邊做邊搵，看看重有無其他機會？！現在未係旺季都忙到扑直！如果到暑假或放榜 ... 點死？！阿門！

作者: 只因我太痴 時間: 2008-3-7 18:17

日做夜做，自由消失；無得上網，失去聯絡！

我真係無諗過，我自己會變咗失踪人口組之一份子 .....

唉！相信，或多或少，都係與我返咗呢份工有關？！點解？！事故，新公司無安裝上網服務；所以，我咪無原無故消失！再者，呢份工勁困身，差唔多晚晚都要加班，搞到我無乜私人時間！總之，係公司既時間；多過係屋企 ...

唉！雖然加班有錢落袋；但，有時真係唔想開夜！問心，日日返朝九；收就晚九或十？！講真，點頂呀？！總之，你早收工就好似係罪人一樣！坦白講，我唔係簽咗賣身契？！我無義務日日直踩到尾？！再者，我唔係機械人！我只係個凡人，我都會累或要休息！

或者，公司某主管，身懷絶世武功？！可以日做夜做，唔駛休息？！又或者，她視財如命吧？！

歡迎光臨香港 Xocat Forum 討論區 (http://p.xocat.com/p/) Powered by Discuz! 6.0.0