Board logo

標題: 香港茶餐廳演變 [打印本頁]
作者: 只因我太痴    時間: 2006-8-19 21:56     標題: 香港茶餐廳演變

茶餐廳，現時遍布港九新界，所供應的飲品和食物，中西兼備，包羅萬有，普羅大眾趨之若鶩，形成一新興的飲食文化和潮流。


但在 19 世紀，香港只有當時稱為「西菜館」的西餐廳，不少是位於酒店內。1895 年，一間由華人經營、位於皇后大道中 148 號的鹿角酒店，便提供每客 $1 的大餐。而一間位於擺花街與砵甸乍街交界的「杏讌樓西菜館」，更是孫中山先生會晤革命志士的地方。

更高級之餐廳則設於畢打街的「香港大酒店」（現中建大廈），在有證券交易所之前，該餐廳為眾所周知的股份交易場地。

自 1900 年代起，更多餐廳在港島開設，當中包括位於「交易行」（德輔道中連卡佛公司所在）的威士文（或譯作聰明人）、皇后大道中的勝斯、美都、占美，以及由菲律賓返港的華僑所經營的「馬玉山」等。此外亦有多間位於砵甸乍街、士丹利街和威靈頓街，供應全餐、常餐甚至散餐，各適其適。

同時，各大街小巷亦有不少冰室或稱飲冰室的設立，包括位於華人行的「美利權」，在德輔道中開設而有三四間分店、由張吉盛經營的「安樂園等」。

日佔時期，不少餐廳易名經營，如「艾菲餐室」改為「野竹飯店」、「威士文餐室」改為「富士食堂」、「加拿大餐室」改為「香島餐室」等。

經歷過這段黑暗時期，戰後，不少餐室和飲冰室又在港九各地開設。不少於戰前停業者重張旗鼓，除傳統西餐外，俄國餐室亦不少。除了戰前的「京滬」外，還有「雄雞」、「車厘哥夫」等。此外，亦有經營馬來食品及海南雞飯的餐室如「華人」。至於供應平民化的飲品如西冷紅茶、檀島咖啡、飲冰、雪糕的冰室，數量更多了。

自 1950 年代起，港九開始出現將餐室與冰室共冶一爐的「茶餐廳」。他們的業務，由傳統的西式餐飲逐漸「入侵」至中式飯店的範圍，由早期的「豉油西餐」一直發展至包括雲吞麵、魚蛋粉、燒鵝瀨以至乾炒牛河等。再進一步發展至晚飯小菜，包含了中西文化，成為香港最具特色的食肆。
作者: leoland    時間: 2006-8-20 09:10

多謝分享!!!!諗起已前的波蘿冰!!!
作者: busman    時間: 2006-8-20 11:57

我喜歡70,80年代的茶餐廳, 現在的集團式經營的茶餐廳的食物少了一些本身風味, 以前每間都有自己的招牌食物飲品, 新式的則少了這些
作者: lainick88    時間: 2006-8-20 16:10

以前讀書去"美而廉"食個午餐,有湯有飯有汽水都係９蚊 ,

而家茶餐廳貴左好多,尤其大集團如..

新X , 翠X
作者: ※京子※    時間: 2006-8-20 16:27

細細個已經成日去茶餐廳..幾歲人仔學人飲奶茶
作者: niki    時間: 2006-8-20 16:37

以前細個星期日朝早好多時都會去屋企附近間冰室食菠蘿油飲絲襪奶茶．
作者: 中式食肆有座位    時間: 2006-8-21 02:06

我都係好細個就跟姨丈去樓下間茶餐廳睇ｄ姐姐著絲襪同埋飲奶茶。
作者: dragonman    時間: 2006-8-23 19:00

so missing!
作者: mandy    時間: 2006-8-24 23:48

最懷念當年冰室的紅豆刨冰，蓮子刨冰，
還有那個早餐!!鮑魚湯通粉(有兩片鮑魚)+雞蛋三文治+茶=$4
作者: sodar1    時間: 2006-8-25 09:44     標題: 茶餐廳

提示: 作者被禁止或刪除 內容自動屏蔽
作者: shaper_r    時間: 2006-8-26 01:06

香港的茶餐聽係由冰室演變出黎的...
大家同意嗎?
作者: secure1998    時間: 2006-8-27 12:53

a typical gathering places for Hongkongese to hang out
作者: kuwabolo    時間: 2006-8-29 14:00

引用:
原帖由 shaper_r 於 2006-8-25 05:06 PM 發表
香港的茶餐聽係由冰室演變出黎的...
大家同意嗎?
我覺得都係,細細個時好似無乜邊間係叫茶餐廳的,都係叫冰室多
作者: SilverJack    時間: 2006-8-30 18:27

而家好多茶餐廳都進步到「攜單到櫃面」俾錢，
以前既茶餐廳同大排檔成日會聽到D伙記唱響口咁叫︰

「開黎拿住蚊兩....」
「禮拜蚊拿住....」
「三蚊又係...」
「開黎單收...」

唔知仲有無人聽過同埋知道哩幾句野講乜呢?  
同埋點解而家唔再用哩個方式呢?
作者: mandy    時間: 2006-8-30 18:34

引用:
原帖由 SilverJack 於 2006-8-30 06:27 PM 發表
而家好多茶餐廳都進步到「攜單到櫃面」俾錢，
以前既茶餐廳同大排檔成日會聽到D伙記唱響口咁叫︰

「開黎拿住蚊兩....」
「禮拜蚊拿住....」
「三蚊又係...」
「開黎單收...」

唔知仲有無人聽過同埋知道 ...
拿住=5
禮拜=7.....
答案好簡單...以前d人喜歡唱歌囉~~
作者: johncage    時間: 2006-8-30 18:44

冰室係細牌，唔可以用火煮食，所以得好小種類野食！
茶餐廳大牌，可以用火煮食！

「開黎拿住蚊兩....」===五個二，拿住係5！

「禮拜蚊拿住....」====7個半！
作者: SilverJack    時間: 2006-8-30 19:09

引用:
原帖由 mandy 於 2006-8-30 06:34 PM 發表

拿住=5
禮拜=7.....
答案好簡單...以前d人喜歡唱歌囉~~
對了~

咁而家d人唔鍾意唱歌咩?
作者: SilverJack    時間: 2006-8-30 19:10

引用:
原帖由 johncage 於 2006-8-30 06:44 PM 發表
冰室係細牌，唔可以用火煮食，所以得好小種類野食！
茶餐廳大牌，可以用火煮食！

「開黎拿住蚊兩....」===五個二，拿住係5！

「禮拜蚊拿住....」====7個半！
o岩呀~
咁?  「三蚊又係」同「開黎單收」呢?
作者: mandy    時間: 2006-8-30 19:12

引用:
原帖由 SilverJack 於 2006-8-30 07:10 PM 發表


o岩呀~
咁?  「三蚊又係」同「開黎單收」呢?
「三蚊又係」=$3.3
作者: SilverJack    時間: 2006-8-30 19:14

又o岩~~ hehe!!!

你知唔知點解而家唔用哩套方式?
作者: mandy    時間: 2006-8-30 19:16

你知因由??
作者: SilverJack    時間: 2006-8-30 19:24

「開黎單收」就係將價錢寫落張單度俾個客出去俾錢。
通常超過十蚊就好難用「唱」既方式表達，會寫單。

一來而家好多茶餐廳都進步左，會留單據收舖後埋數，而且，家陣仲邊有十蚊內就找到數丫，當然係要「開黎單收」喇。
作者: mandy    時間: 2006-8-30 19:30

開黎單收咪即照單全收囉..依個我知..不過留俾你講o者!

以前冰室係家庭式居多，收錢既多數係老細自已，
但依家係請伙記多，如果唔記落數簿你搵多多都冇！
作者: usnameless    時間: 2006-8-31 05:10

引用:
原帖由 mandy 於 8/24/2006 07:48 AM 發表
最懷念當年冰室的紅豆刨冰，蓮子刨冰，
還有那個早餐!!鮑魚湯通粉(有兩片鮑魚)+雞蛋三文治+茶=$4
小心露底比人知道你幾歲
作者: mandy    時間: 2006-8-31 08:20

引用:
原帖由 usnameless 於 2006-8-31 05:10 AM 發表


小心露底比人知道你幾歲
入得黎依度，唔會係細路！　
作者: SilverJack    時間: 2006-8-31 09:46

引用:
原帖由 mandy 於 2006-8-31 08:20 AM 發表

入得黎依度，唔會係細路！　
兒童不宜?
作者: SilverJack    時間: 2006-8-31 09:46

引用:
原帖由 mandy 於 2006-8-31 08:20 AM 發表

入得黎依度，唔會係細路！　
兒童不宜?
作者: mandy    時間: 2006-8-31 19:05

引用:
原帖由 SilverJack 於 2006-8-31 09:46 AM 發表

兒童不宜?
當然係兒童不宜啦!
佢地都未儲夠記憶分數埋位~~~哈哈
作者: billchan    時間: 2006-8-31 21:31

引用:
原帖由 只因我太痴 於 2006-8-19 09:56 PM 發表
茶餐廳，現時遍布港九新界，所供應的飲品和食物，中西兼備，包羅萬有，普羅大眾趨之若鶩，形成一新興的飲食文化和潮流 ... ...
... ... ...經歷過這段黑暗時期，戰後，不少餐室和飲冰室又在港九各地開設。不少於戰前停業者重張旗鼓，除傳統西餐外，俄國餐室亦不少。除了戰前的「京滬」外，還有「雄雞」、「車厘哥夫」等。
...
  我在飲食版敘述了一段個人年幼時在「車厘哥夫」的難忘經瞼，轉貼過黎分享下 :


太子道都有「雄雞」和「車厘哥夫」，我還記得當年有個有錢姨姨帶我去太子道「車厘哥夫」，問我食乜？

我當時衹是個細佬哥，點識得有乜野食，衹記得餐廳有火腿通粉叫，便答要火腿通粉，嘩！結果........印象深刻，景像至今難忘！

一個戴煲呔黑燕尾禮服白手套侍應慢慢推出餐車，車上銀托上放置另一銀盆，盆上罩着發着閃燦銀光明亮如鏡的圓形銀蓋，

禮服人恭步上前，穿白手套的手輕持銀蓋上端黃金把手，輕輕地把銀蓋揭起，

小標看得眼睛發亮，是什麽呢 ? 伸頸欲看盆中何物 !

說時遲那時快，白手套改持一中型銀夾，謹重地把盆中東西，夾到旁邊一亮白瓷碟上，端到小標面前.......


吓 ! 我的媽呀！小阿標面前碟內的，衹是茶餐廳大排檔賣一個幾毫的火腿通粉！

咁大陣仗，係咪好味過平時好多呀？


阿標而家已無記憶了，祇是那個排場陣象，那間「車厘哥夫」，以及太子道上天主教堂、明愛中心，

民房樓梯間的英文雜誌檔、街口的「山打皮鞋」、「西伯利亞皮草店」，以及跨過彌敦道的

「梅江飯店」及「源源牛奶公司」等，都令阿標終生難忘！

作者: SilverJack    時間: 2006-9-1 17:15

我對車厘哥夫既最深印象係佢地用一個銀色碟仔(定係白色既瓷碟仔)裝住D一粒一粒花形既牛油。
以前唔係好多餐廳將牛油同餐包分開上既....
唔知樓上位大大有無印象。
作者: billchan    時間: 2006-9-1 18:59     標題: 回復 #30 SilverJack 的帖子

   嘻..嘻.....我都記得當時 D 高級餐廳好姿整，D 牛油又刨花，又冰鎮，又銀碟，跟茶餐廳好唔同，

車厘哥夫應該都係咁，不過，隨着香港經濟起飛，各式新派或各地餐種餐廳引入，

在牛油上弄花款，加香草加蒜，配不同容器等 GIMMICK，在稍後各式餐室餐廳紛紛出現，

現在都見慣見熟了！
作者: vertex    時間: 2006-9-2 00:31

I like 冰室 more !
作者: billchan    時間: 2006-9-2 01:02     標題: 回復 #32 vertex 的帖子

  我做細路時，去冰室飲野，如果大人任我叫，我多數叫 : 雜果冰 ! 貪佢多花款，又夠甜 !

其次多叫是 波蘿冰及紅豆冰 !  可以叫雪糕紅豆冰是以後的事了 !


當時冰室水吧上通常有大塊冰，有塊懷鬼鹹菜咁既毛巾蓋眚，有人叫冰時，水吧仔就會拿個立體菱形金屬刨出來，

拿開塊布，係咁刨，刨夠就把刨內冰碎倒入杯雜果、波蘿粒或紅豆等度，完成杯 XX 冰，再拿給你 !


我做小孩時，叫完杯冰，一定金晴火眼，望實水吧，睇埋個刨冰表演 !  

[ 本帖最後由 billchan 於 2006-9-2 01:03 AM 編輯 ]
作者: richardbilliham    時間: 2006-9-2 16:25

引用:
原帖由 billchan 於 2006-8-31 21:31 發表
太子道都有「雄雞」和「車厘哥夫」，我還記得當年有個有錢姨姨帶我去太子道「車厘哥夫」，問我食乜？

「梅江飯店」及「源源牛奶公司」等，都令阿標終生難忘！
「車厘哥夫」「雄雞」..... 重有「紅寶石」「金馬車」「銀宮」「龍記」等。

以前佐敦西貢街果間「中英飯店」D客家菜都唔錯架。

咁七十年代尾八十年代，港島禮頓道「羅蘭餐廳」及老尖金巴利道尾「沙利文餐廳」，Li兩間港九最出位的夜店，你重記唔記得呀.....  
作者: johncage    時間: 2006-9-2 16:56

引用:
原帖由 billchan 於 2006-9-2 01:02 AM 發表
  我做細路時，去冰室飲野，如果大人任我叫，我多數叫 : 雜果冰 ! 貪佢多花款，又夠甜 !

其次多叫是 波蘿冰及紅豆冰 !  可以叫雪糕紅豆冰是以後的事了 !


當時冰室水吧上通常有大塊冰，有 ...
大家都忘記左呢幾種飲品！
牛肉茶，忌廉溝鮮奶！谷古！
作者: johncage    時間: 2006-9-2 18:17

冰室都好有殖民地色彩，
飲品全部都係英國既，華田，阿立克，牛肉茶等！
作者: richardbilliham    時間: 2006-9-2 18:22

引用:
原帖由 johncage 於 2006-9-2 18:17 發表
冰室都好有殖民地色彩，
飲品全部都係英國既，華田，阿立克，牛肉茶等！
咁牛肉茶個牌子系mud名呀.....
作者: johncage    時間: 2006-9-2 18:27

保衛爾牛肉茶！唔好考我！
作者: everydayqq    時間: 2006-9-2 19:25

见证了一个时代
作者: mandy    時間: 2006-9-2 21:46

引用:
原帖由 johncage 於 2006-9-2 04:56 PM 發表



大家都忘記左呢幾種飲品！
牛肉茶，忌廉溝鮮奶！谷古！
仲有滾水蛋...細個時最鍾意飲!!
作者: billchan    時間: 2006-9-3 04:23

引用:
原帖由 johncage 於 2006-9-2 04:56 PM 發表



大家都忘記左呢幾種飲品！
牛肉茶，忌廉溝鮮奶！谷古！
  ....其實點會唔記得丫，為食貓個腦係生係個嘴入面㗎 !  

我又問吓大家，有無人記得隻 "豐力奶" ?
作者: billchan    時間: 2006-9-3 04:27

引用:
原帖由 richardbilliham 於 2006-9-2 04:25 PM 發表
「車厘哥夫」「雄雞」..... 重有「紅寶石」「金馬車」「銀宮」「龍記」等。

以前佐敦西貢街果間「中英飯店」D客家菜都唔錯架。

咁七十年代尾八十年代，港島禮頓道「羅蘭餐廳」及老尖金巴利道尾「沙利文餐廳 ...
一講就知道在 "同一天空下" ， "一起走過的日子"  及  "我們是這樣長大的" !

佐敦果頭有無去食外江野 ---> 滿庭芳 呀 ?
作者: ※京子※    時間: 2006-9-3 08:23

引用:
原帖由 johncage 於 2006-9-2 16:56 發表



大家都忘記左呢幾種飲品！
牛肉茶，忌廉溝鮮奶！谷古！
喎記得..細個唔識叫..
試過叫牛肉茶..難飲到嘔
作者: johncage    時間: 2006-9-3 09:46

仲有自家做啫喱，
面包西餅！
最正係鮮忌廉蛋糕！
作者: billchan    時間: 2006-9-4 12:56

引用:
原帖由 johncage 於 2006-9-3 09:46 AM 發表
......最正係鮮忌廉蛋糕！
啊！  鮮忌廉蛋糕  ！ 記起了，最初由高級餅店引入時.........

使一向衹食慣奶油蛋糕的小標，驚為天物！祇覺得 鮮忌廉又香又甜又鬆泡泡的，吃極不膩，

不過也從此開始了賣蛋糕以磅計之風！   現在小孩已見慣不慣，沒大不了了！



歡迎光臨 香港 Xocat Forum 討論區 (http://p.xocat.com/p/) Powered by Discuz! 6.0.0