香港 Xocat Forum 討論區 - Powered by Discuz! Board

標題: [疑難] 關於"馮強樹膠厰"的一切 [打印本頁]

作者: yfmark 時間: 2008-9-9 01:14 標題: 關於"馮強樹膠厰"的一切

在「懷舊圖片大放送」標題中的有"馮強樹膠厰"一圖,因為家母年輕時在此工作,所以想加深認識. Thank you for your help.

作者: 西南風 時間: 2008-9-9 16:29 標題: 回復 1# 的帖子

Hi！你好，
我試試就我兒時所見和家母些少回憶，描述50's~60's的"馮強樹膠厰"，希望可以幫到你。

工廠座落在今日的筲箕灣道與工廠街交界，卽今日的筲箕灣中心/廣場(？)，正門開在筲箕灣道那邊，對正聖馬可中學。開辨年份不詳，不過戰前就已經有了。樓高六層(外加一層潛建，當時很普遍丫)，已製做各式布面膠(生/熟)底運動鞋和水鞋為主，外銷、內銷都有。惟60年代中，在大陸貨的衝擊下(當時佷流行一款黑色布面薄塑膠底，俗稱較脚鞋的，就是大陸貨的佼佼者)，業務已大走下坡，其後更改變生產方式，以塑膠取代樹膠，轉為生產各類塑膠容器（含水桶、塑料袋等），但都不多見起色。當時紅A（亦是在筲箕灣起家的企業）起步在先，飲咗頭啖湯（大制水），亦搶佔了大部份市場佔有率。

女工則多在三、四樓工作，工種可分為車鞋面（長工/外發）、成品包裝、啤鞋帶、上鞋底(很費力又要接觸化學品的工序，只有少數為賺多三個仙一對鞋的女工做)和什工等。

家母是個車鞋面女工（未有我之前是長工，我出世之後轉為外發工），就她的口述、講講當時女工的收入：
多數的工種都是按件計薪，以車鞋皮面為例，50s'時由六涸仙至一亳子一對不等，視乎鞋款同尺碼而定（外發工比長工多二個仙至三個仙，因為要自置工具，長工則有優先開工權）。如果够野做、長工可以揾五、六拾蚊一個月。60s'件票已加至八個仙至亳三子不等。

該相片應攝於60s;早期，從望隆街向聖馬可中學方向影的

作者: ccooww 時間: 2008-9-9 17:54

香港博物館發現呢張廣告畫,總廠地址只列出筲箕灣道,
莫非"馮強樹膠廠"係筲箕灣當年地標？

作者: 老搜 時間: 2008-9-9 23:13

引用:

原帖由 西南風 於 2008-9-9 16:29 發表
Hi！你好，
我試試就我兒時所見和家母些少回憶，描述50's~60's的"馮強樹膠厰"，希望可以幫到你。

工廠座落在今日的筲箕灣道與工廠街交界，卽今日的筲箕灣中心/廣場(？)，正門開在筲箕灣道那邊，對正 ...

西南風兄, 十分欣賞你的憶述, 夠晒清析細緻兼懷舊.

作者: 西南風 時間: 2008-9-10 09:29

老兄，言重了，只是些兒時見聞，記得幾多就寫幾多吧了，錯就唔會錯得去邊，不過遺漏就在所難免（不竟這是半個世紀之前的事物了）。
寫到那兒，諗起當年幫家母托架衣車(工業用)去維修，個車頭成廾斤重、三尖八角、由筲箕灣坐電車到上環，再托著個車頭行上嚤囉街，少D功夫、氣力都唔掂㗎。修理好..........再托多一次lor。

ccooww兄，地標就唔講得係，不過就字号老，係筲箕灣冇人唔識咁解啫。

作者: ccooww 時間: 2008-9-11 00:51

西南風果然利害,托住咁重既車頭坐電車仲要托咁遠路,真係超高難度,
筲箕灣冠男酒樓對面唔係有間"馬有記"衣車公司麼?做咩要托得咁辛苦?

作者: 西南風 時間: 2008-9-11 09:59 標題: "馬有記"

"馬有記"
一个好熟悉的名字，五、六拾年代已存在，原本開在西灣河舊街市對面馬路，唔知幾時搬咗落冠男果頭。"BUTTERFLY"的分銷之一，亦做其它牌子衣車二手買賣，兼出售各樣衣車配件(註；唔係零件丫)及制做各式縫紉机專用附件。

家母用的是架"SINGER"，如果去"馬有記"修理，起碼四日后方可取回個車頭（卽係要停工五日，攞命咋），就算係"BUTTERFLY"都要三日（問你死未），原來"馬有記"只係幫你拎返代理度整。如果自已托去代理度修理，一般都可以卽日有取，頂多都是第二日下晝就得。

當年家母對呢間野就印象麻麻：「買包針都貴人地幾亳子」

作者: ccooww 時間: 2008-9-12 01:04

多謝西南風提供咁精彩既生活往事,不禁令我想起我們上一代果種"為生活,什麼艱辛都不怕"既精神,
西南風兄肯為母親做出如此壯"舉"，真的令小弟十分敬佩，現今新一代，相信已再無年青人肯為父母這樣付出了．
西南風兄，有空請講多些筲箕灣故事啊，我總覺得70s之前筲箕灣，同現在既筲箕灣，其實係兩個唔同既世界

作者: choihung 時間: 2008-9-12 11:26

引用:

原帖由 西南風 於 2008-9-11 09:59 AM 發表
"馬有記"
一个好熟悉的名字，五、六拾年代已存在，原本開在西灣河舊街市對面馬路，唔知幾時搬咗落冠男果頭。"BUTTERFLY"的分銷之一，亦做其它牌子衣車二手買賣，兼出售各樣衣車配件(註；唔係零件丫)及制 ...

原來馬有記有這麽悠久的歷史，謝謝西南風兄的介紹。

歡迎光臨香港 Xocat Forum 討論區 (http://p.xocat.com/p/)