香港 Xocat Forum 討論區 - Powered by Discuz! Board

標題: 有冇興趣傾下舊時的配音電視片集 [打印本頁]

作者: LouisLee 時間: 2006-8-13 21:09 標題: 有冇興趣傾下舊時的配音電視片集

悲劇英雄七星俠 (超人七號)

七星俠係歷來最受歡迎嘅超人, 人氣比吉田有過之而無不及, 亦係唯一多次開拍續集 (1994, 1998, 1999 & 2002) 嘅超人, 但係呢位英雄就認真命苦:

前言:

七星俠同其他超人唔同, 吉田、阿鄉原本係普通地球人, 因為意外受傷 (吉田)、死亡(阿鄉), 俾超人救返兼上左佢地身(呢兩個超人要搵地球人做「適能者」至可以喺地球作戰), 但係七星俠唔同, 佢唔駛搵替身一樣可以喺地球自由活動, 佢可以隨意變成任何地球人嘅樣。

話說七星俠第一次飛到地球, 見到一對爬山朋友遇到意外, 其中一位為左唔想兩個一齊死, 於是割斷條繩, 諗住犧牲自己救老友, 就喺跌落懸崖嘅時候俾七星俠救返, 七星俠深受佢嘅捨己為人精神感動, 於是將自己變成同佢一模一樣, 將力量藏喺變身眼鏡裏面, 平時就以地球人諸星丹身份出現。喺超人吉田最後一集超人臨走之前同吉田分身, 吉田從此留喺地球做返普通人。如果有睇「牙擦超人」嘅話, 其中一幕就係白髮蒼蒼嘅吉田見到怪獸, 佢話「如果我後生 D, 就一定同你搏過!」於是舉起一支匙羹, 模倣昔日變身動作。但係阿丹本人就係七星俠, 要面對嘅係不死之身同埋永無休止嘅戰鬥。

戰鬥篇:

1. 喺最後兩集, 講到七星俠阿丹因為長年戰鬥搞到元氣大傷病到七彩, 仲要帶病作戰, 佢個生得同佢一樣樣嘅上司, 淨係識叫佢返光之國療傷, 同埋唔好變身, 但係見到七星俠俾怪獸打到仆街都唔幫手!!! 到最後七星俠用最後力量消滅怪獸, 佢上師連睇都唔睇下佢, 七星俠要自己飛返鄉下, 之前超人吉田俾怪獸打到重傷, 都有個佐菲隊長用太空船接佢返光之國呀, 呢個上司認真無良!!!

2.係 1974 年第一集超人 Leo, 一開始就講七星俠以一敵三, 俾外星人同怪獸打到重傷, 好彩俾 Leo及時救番條命, 但係就跛左腳, 連變身器都壞埋, 唯有做超人 Leo 嘅上司兼私人教練, 有時仲要用僅存嘅「超人念力」幫 Leo, 每次都大傷元氣, 壽命亦會縮短!!! (純屬煽情, 超人一族壽命可以超過二十萬歲, 七星俠只係得一萬九千歲, 點折壽其實都仲有排玩

)

3. 1994 年七星俠再次回歸地球, 但係一開場又係講佢長年征戰搞到重傷昏迷, 好似殞石咁撞落地球。

4. 1999 年 OVA 最後一集, 講到地球原居民由外太空嚟要搶番地球 (原來我地嘅祖先係外星人, N 年前侵略地球, 將原居民趕盡殺絕!!!

), 七星俠同地球人, 即係我地, 有深厚感情, 不惜違反宇宙法律, 殺死地球原居民嘅怪獸, 最後黯然飛返 M78 星雲受審, 之後被封印喺殞石直至2002年 OVA 第三集。

愛情篇

七星俠呢位超級「黑仔」英雄嘅愛情生活, 簡直係聞者心酸, 見者流淚, 活咗一萬九千年, 先至遇到心中至愛, 但係可惜有緣無份, 仲慘過牛郎織女!!!

七星俠阿丹0既至愛, 當然就係友里安妮隊員啦!

安妮一向好 "Lum" 阿丹, 每次出動一定係同阿丹拍住上, 仲有呢集一開始就係阿丹同安妮兩個一齊去遊樂場坐「咖啡杯」, 食棉花糖兼睇戲, 正所謂「兩心相邀, 影相照，願化海鷗輕唱悅情調」。

0係最後一集阿丹因為長期戰鬥搞到身受重創, 向安妮話別, 安妮知道阿丹嘅身份之後, 泣不成聲, 但係就話唔介意阿丹係唔係宇宙人。

最後七星俠負傷打敗怪獸之後, 一個人飛返光之國, 黯然離開一生至愛......

1974 年超人 Leo 片集, 被怪獸打跛腳, 變唔到身嘅落難超人阿丹, 其實對安妮念念不忘, 返0黎地球之後一直想搵返安妮, 但係一直無佢消息, 直至有一次阿丹偶然見到一個同安妮生得一模一樣嘅女人帶住個細路, 阿丹見到非常震驚, 仲問佢「乜你結左婚啦!?」但係該女子矢口否認佢係安妮, 個細路係佢收養嘅外星小朋友, 但係個細路因為要長期縮細身體變得脾氣暴臊, 之後變回原形大肆破壞, 最後被超人Leo收服, 由嗰個同安妮一模一樣嘅女人帶返宇宙, 個女人始終否認佢係安妮, 但係到最後佢係遠處自言自語講左句:「再見啦, 阿丹!」究竟佢係唔係安妮, 始終係一個謎。呢個時候傷心落寞嘅跛腳阿丹, 流晒眼淚發「吽豆」......

直到1994年, 七星俠隻腳好返, 但係重傷昏迷跌落地球。係另一邊, 47 歲嘅安妮(演員菱見百合子當年嘅真實年齡)已經有個六、七歲大嘅仔 (高齡產婦!!!

) 但係片中已退役多年嘅安妮同佢阿哥一齊住, 無提佢老公, 似係離左婚, 細路個名叫「阿丹」, 改呢個名係為左對七星俠諸星丹嘅思念 (呢樣野試問有邊個男人可以忍!!!

:@)。但係佢地始終都無再見過面 (之後直至 2002 年嘅新版七星俠, 安妮再無蒲頭)......

你地話慘唔慘!?

後話:

超人 Leo 嘅大結局, 講到 Leo 打敗最後一隻怪獸之後, 就除低變身戒指, 實行做個真正嘅地球人, 同好友話別之後, 就一個人出海暢遊, 享受人生。我都希望佢師父七星俠一樣可以有個 happy ending。

喺 2002年嘅七星俠新傳 Evolution, 阿丹已經將變身任務完全交俾年青嘅前 Ultra 警備隊員風森(喺 98 同 99 年阿丹間中都有借風森嘅身體變身, 到02年阿丹就無再出現), 所以我好希望圓谷可以再拍七星俠, 並且安排個大團圓結局俾年邁嘅阿丹同安妮, 等佢地可以有情人終成眷屬。

[ 本帖最後由 LouisLee 於 2006-8-13 01:12 PM 編輯 ]

作者: Super-K 時間: 2006-8-17 09:26

引用:

原帖由 LouisLee 於 2006-8-13 22:39 發表
悲劇英雄七星俠 (超人七號)

七星俠係歷來最受歡迎嘅超人, 人氣比吉田有過之而無不及, 亦係唯一多次開拍續集 (1994, 1998, 1999 & 2002) 嘅超人, 但係 ...

咁長細...............勁

作者: kooks 時間: 2006-8-23 04:42

Seven..Seven..Seven.......

作者: jimmyboy2102 時間: 2006-8-27 03:11

作者: uknowzip 時間: 2006-8-27 12:21

服左你

作者: 娛樂萬歲爺 時間: 2006-8-29 22:00 標題: 鐵翼柔情, 香港播的是那一套?

A interesting question from a TV Forum!

鐵翼柔情, 香港播的是那一套? (1970)? (1974)?

(1974)?

(1970)?

作者: SilverJack 時間: 2006-8-30 18:33

仲有無人記得︰

「神偷碟影」入面既「文迪」

「Six Million Dollar Man」入面既「岳史迪」

「功夫」入面既「草猛仔」

作者: 周五一次郎 時間: 2006-8-30 19:51

非常感動！

歡迎光臨香港 Xocat Forum 討論區 (http://p.xocat.com/p/)