香港 Xocat Forum 討論區 - Powered by Discuz! Board

標題: [原創] 廟街 [打印本頁]

作者: mygo 時間: 2010-6-17 20:20 標題: 廟街

細個時好鍾意行廟街，好多野睇，有人賣藝，有人變魔術，有野食。而家，根本冇晒興趣。一來，樣樣規範化，個個檔口都畫一大小，全條街，只有某部分有野食，二來食物同以前差好遠，三來所賣既野已經今非昔比，周圍都有，上大陸仲平。

作者: hkgalbert 時間: 2010-6-17 21:09 標題: 回復 1# 的帖子

全因港府(特區)管太多：沒有劏蛇表演、沒有粵劇！……失色的廟街！

作者: bobbystar2100 時間: 2010-6-17 21:34

伯伯，聽講以前老廟有挖「貓眼酒」表演，有否聽聞？還有什麼獵奇？後輩願聞其詳！

作者: 上大人 時間: 2010-6-17 22:45

大傻賣頭腊已是逛廟街必圍觀之檔口

作者: mygo 時間: 2010-6-18 03:22

引用:

原帖由 bobbystar2100 於 2010-6-17 21:34 發表伯伯，聽講以前老廟有挖「貓眼酒」表演，有否聽聞？還有什麼獵奇？後輩願聞其詳！

「貓眼酒」？乜野黎呢？唔好話睇，聽都未聽過。以前有刀插美人，不過，未睇過，有個女仔走入個箱度，外面拮滿劍，一毫子埋去望一望，但冇錢，從未望過。翻新電池水，真係傻傻地，響舊舊電池底下拮個窿，用支棉花棒醮D翻新電池水塞入去，據說舊電明明點住個燈胆仔冇乜光，點完呢D水後即刻光晒，好似新電池咁樣。但點解話傻傻地呢？拮個窿響電池底，碳有毒物質走晒出黎，好易中毒，居然賣三毫子一支，後來讀書，阿SIR話係呃人既，搵鹽水就可做到呢個效果，但只限一次。晒相水，五毫子兩樽，先將第一支搽左落張紙度，再搽第二支，搽完在陰既地方等乾，再將張相底用玻璃及木夾夾住放響太陽下晒，晒一陣沖水洗淨，再掠乾就成為一張相，但相底咁大就係咁大，冇放大功能。

[ 本帖最後由 mygo 於 2010-6-18 10:30 編輯 ]

作者: mygo 時間: 2010-6-18 03:28

仲有一樣比較古怪，到今日仍係一個謎，有些好似一個一安士金幣咁大既圓形物體，淺金色或銀色，外面有個透明膠盒裝住，賣五毫子，幾次好奇，問人地係乜野，十次十次俾人鬧：細路仔，問呢D野黎做乜，唔好咁多事！
到底有冇師兄知呢D到底乜野？我懷疑係避孕套等物品，如果唔係唔會俾人鬧，但諗番，個時有呢D咁既野咩？

作者: 維圓阿伯 時間: 2010-6-18 15:22 標題: 回復 6# 的帖子

以前社會封閉保守
你說的金仔朱古力物體
如你所猜.... 正是避孕套
當年D小販大叔叫 '金袋'
我都莫明其妙以為是聖旦禮物

作者: mygo 時間: 2010-6-18 18:38

引用:

原帖由 維圓阿伯 於 2010-6-18 15:22 發表以前社會封閉保守你說的金仔朱古力物體如你所猜.... 正是避孕套當年D小販大叔叫 '金袋'我都莫明其妙以為是聖旦禮物

呵呵，多謝解答，原來那時已有避孕套，點解咁既形狀既？入面得一個定點？
我大左後曾經諗過，會唔會係花士苓之類既潤滑劑添。

作者: meijik622 時間: 2010-6-18 19:24

廟街（Temple Street）

位於香港九龍油尖旺區中的油麻地，是香港一條富有特色的街道。街道南北走向，連接文明里及佐敦道。曾有不少電影以廟街取景。廟街以售賣平價貨的夜市而聞名，被喻為香港的平民夜總會。

名稱由來
清朝時期，廟街的中段建有一座天后廟，即油麻地天后廟，廟街因而得名。另一方面，由於廟街的性質與旺角的女人街相似，而到訪的人則以男性為主，故亦有男人街的稱號。香港年輕一輩，多以「老廟」作為廟街的俗稱。

歷史

1950年的廟街。
廟街早於1887年的九龍地圖上已有紀錄。當時廟街分為兩段，以油麻地天后廟為界，以北一段被稱為「廟北街」，以南一段則稱為「廟南街」[1]。由1920年代開始，天后廟對出的廣場（俗稱「榕樹頭」），開始發展成大笪地式的休憩場地，帶動了廟街附近不少販賣雜物及小食攤檔的存在。廣場對出一帶的街道眾坊街（英文為 PUBLIC SQUARE 以前曾譯為「公眾四方街」），也是由這個廣場得名的。

1968年，香港政府擬在天后廟的廣場的附近興建梁顯利社區服務中心，引起該處經營的200多個流動小販對搬遷安排的不滿。在油麻地街坊會及香港警方協調後，政府決定在廟街及上海街近榕樹頭一帶劃出面積3呎乖4呎的攤位作安置之用，但須經過抽籤分配。

1975年3月，當時的香港市政局在廟街劃出「小販認可區」，使廟街原有的小販得到有系統的管理。廟街的小販認可區包括文明里至眾坊街一段，以及甘肅街至南京街一段，共有近600多個劃定位置供小販擺賣。攤位本來在傍晚開始營業，1998年中部份的營業時間更改由中午開始。

[ 本帖最後由 meijik622 於 2010-6-18 19:49 編輯 ]

作者: meijik622 時間: 2010-6-18 19:26

特色

用來做特色煲仔飯的炭爐
每天從傍晚時份開始，廟街路邊的攤檔便會陸續開始營業。攤檔售賣的物品相當多元化，包括男性服裝、手工藝品、茶具、玉器、古董、廉價電子產品，以至是成人用品(condum)都有。而在天后廟外有不少看相算命的攤檔，有時候附近還會有傳統粵劇表演。早年更曾有一些武師在此表演賣藝及賣藥。

除此之外，廟街內也有不少富有香港本土特色小食的攤檔，包括海鮮、煲仔飯及各類麵食等等。由於價錢大眾化，而且口碑不俗，深受居民以及外地遊客歡迎。
廟街亦開設有一些麻雀館，部份已有數十年歷史，甚有傳統文化特色，光顧多屬老一輩人士

對媒體的影響
廟街在不少香港電影和一些有香港作為場景的外地電影均會出現，通常被描寫成為一個龍蛇混雜、充滿犯罪行為的地方。此外，無綫電視的電視劇集《廟街·媽·兄弟》，也以該條街道作為故事場景香港有一些歌手在廟街特別受歡迎，其中包括尹光和夏金城。他們唱作出廟街的地道文化和庶民心聲。

[ 本帖最後由 meijik622 於 2010-6-18 19:31 編輯 ]

作者: meijik622 時間: 2010-6-18 19:32

將於明年五月落成的廟街牌樓，設計古色古香。
區議會設計圖片

【SUN特搜小組記者朱先儒、李嘉怡報道】在金融海嘯和豬流感雙重夾擊下，訪港旅客首當其衝下跌，以夜市聞名、為本港一大旅遊景點的油麻地廟街，商販生意暴跌六成。政府無力救市，廟街惟有自救。油尖旺區議會為重振廟街聲威，撥款逾三百萬元，破天荒為廟街興建永久地標——逾十米高的中式牌樓，預計明年五月落成。連串活動亦強勢出擊，包括年底舉行的廟街節及出版介紹廟街的旅遊天書，而玉器市場更會搬入廟街，務求將廟街打造成全球首屈一指的夜市。

曾被旅遊天書選為全球最佳市集之一的油麻地廟街，受金融海嘯和豬流感打擊，顧客銳減，約二百三十檔商販生意暴跌六成。為重振昔日風光，油尖旺區議會今年撥款三百零八萬元，為廟街南北兩端入口，各建一個牌樓，成為全港首個地標式的建築物。

受金融海嘯和豬流感打擊，廟街商販生意暴跌六成。朱先儒攝

牌樓高十點五米、闊八點九米，分別建於甘肅街和佐敦道與廟街的交界，將於下月中動工，預計明年五月落成。牌樓採中式設計，有中式青瓦、龍鳳形捲尾飛簷，飛簷下方鋪有「龍鳳呈祥」和「松鶴延年」之意的特製花板磚，古意盎然。至於「廟街」兩字，則由民政事務總署署長陳甘美華的書法老師戚谷華所題。

廟街布滿不少睇相、占卜的檔口，成為一大特色。資料圖片
玉器市場遷入添吸引力

「好多遊客去到廟街，想搵個地標影張相都冇，牌樓落成後，對遊客有吸引力。」油尖旺區議會推動本土經濟及旅遊業工作小組主席葉傲冬指出，廟街是本港最有本土特色的地方，興建牌樓只是推廣廟街的第一步，區議會還有很多計劃配合，例如聖誕節將推出油尖旺區旅遊天書，重點介紹廟街，預計印刷四萬二千本，免費向旅客派發。

此外，政府為配合中九龍幹線工程，油麻地停車場大廈將會在明年收地拆卸，在重建之後，玉器市場將會搬到上址，有關工程預計二○一四至一五年完成。葉說：「油麻地停車場大廈將廟街南北分開，拆卸後成條廟街將更加連貫，玉器市場搬埋入嚟，令廟街更豐富。」
復辦廟街節主打懷舊Feel

停辦四年的廟街節亦將在今年十二月復辦，廟街販商商會主席陳錦榮表示，商會已向區議會申請撥款十萬元，計劃在今年十二月一日至三日在行人專用區舉行廟街節，現正待審批。他說，廟街當年與大笪地並稱「平民夜總會」，六、七十年代的榕樹頭唱曲、講古、睇相、賣武、賣藥、鬥蟋蟀、馳名的「大傻髮蠟」、特色小食等，都令人難忘，今年廟街節亦以懷舊為主題，重現當年風貌。

陳錦榮坦言，去年金融海嘯已令訪港旅客大減，今年又有豬流感，令主力做歐美旅客生意的商販「冇啖好食」。「內地個人遊客覺得廟街貨品內地都有得賣，根本唔會幫襯；以前東南亞或非洲商務客，會去廟街入貨，但佢哋依家可自由進出內地，已經唔會再嚟廟街；歐美遊客係廟街最大客源，商販都寄望牌樓落成及連串活動帶旺廟街。」

[ 本帖最後由 meijik622 於 2010-6-18 19:49 編輯 ]

作者: meijik622 時間: 2010-6-18 19:34

廟街所以得名，是因為該處有一座天后古廟，至今已有過百年歷史。相傳為了讓善信有樹蔭乘涼，廟前空地種了多棵榕樹，後來人群漸多，開始有人在榕樹頭賣唱、玩樂器、講古、睇相、賣武等，小販也來擺賣食物、藥油、衣服等，平民夜總會式的「榕樹頭」逐漸形成，並向兩旁街道擴展，成為廟街。

五十年代末已在廟街榕樹頭擺檔的甘錦良，是廟街販商商會會長，可謂是最老資格的「廟街人」，見證了廟街興衰變遷。良哥表示：「五、六十年代最興旺，當時正值電台啟播初期，我賣原子粒收音機，三十蚊一部，係高檔貨，買得起好架勢o架！」

說起最膾炙人口的廟街事物，良哥不假思索：「『大傻髮蠟』好出名，係山寨廠做嘅，好多住新界嘅人都會特登出嚟買；仲有『花天七心口碎大石』，睇到人嘩嘩聲o架！」炒蜆、煎蠔餅、炒粉麵等小食，亦令人回味無窮。

八十年代的廟街十分熱鬧。黑白資料圖片

作者: meijik622 時間: 2010-6-18 19:38

廟街煲仔飯,蠔餅
原來現在的煲仔飯賣得好鬼平，一個窩蛋牛肉飯都係18元，一個臘腸雞飯都係25元正，加個20元細蠔餅，每位40元有找，食得又飽，感覺份外滿足！

在早來的冬天，係廟街露天被寒風吹到口水鼻涕流，兩條傻佬對住個熱辣辣的煲仔飯，筷子篤住蠔飯，湯匙括著飯蕉，大口大口吃下去，「一句點滴在心頭」，都咪話唔過癮。

超級好味就未至於，總算貨得對辦吧，28元個的季節食品，每年至少吃一次就唔好太多要求囉，風味行先！

[ 本帖最後由 meijik622 於 2010-6-18 19:39 編輯 ]

作者: meijik622 時間: 2010-6-18 19:41

吳松街熟食市場---大牌檔

[ 本帖最後由 meijik622 於 2010-6-18 19:44 編輯 ]

作者: mygo 時間: 2010-6-18 19:44

引用:

原帖由 meijik622 於 2010-6-18 19:26 發表特色用來做特色煲仔飯的炭爐每天從傍晚時份開始，廟街路邊的攤檔便會陸續開始營業。攤檔售賣的物品相當多元化，包括男性服裝、手工藝品、茶具、玉器、古董、廉價電子產品，以至是成人用品(condum)都有。而在天 ...

多謝資料。

以前廟街仲有太多太多和現在唔同的地方。
廟街分南北，以榕樹頭為界，現在北面街檔仍有飲食熟食之類，而南面則已沒有食的攤檔了，代之而起的是兩面的街舖才作飲食。
廟街以往五時多開檔，落雨一定冇人開檔，冇人爭位，個個擺檔理所當然，亦唔使霸位，有一條不成文的規例，不知何時開始，要劃位管理欏牌。
最初的廟街除了街道馬路兩旁擺滿攤檔外，中間馬路都一樣有攤檔，甚至行人路近馬路邊，一樣有攤檔。而行人路邊攤檔多是售賣手表、唱片及訂造洋服等。
時至今日，廟街似已失去了原有特色，很多攤檔行業都冇左，最少見的，就是度身訂造洋服或恤衫西褲了。其他變魔術、賣武等更是絕跡。
所謂特色冇左原因之一是管得緊，其次是這類的認可區在港九已有不少，再加上大陸開放，所賣的各類物品格亦不便宜，很多人都會到大陸購買，本地人買之甚少，代之的是外來遊客為主要銷售對象。

作者: meijik622 時間: 2010-6-18 19:46

单眼佬凉茶鋪

作者: meijik622 時間: 2010-6-18 19:47

资料,,,爆貼,,,完了

作者: meijik622 時間: 2010-6-18 19:51

引用:

原帖由 mygo 於 2010-6-18 19:44 發表

多謝資料。

以前廟街仲有太多太多和現在唔同的地方。
廟街分南北，以榕樹頭為界，現在北面街檔仍有飲食熟食之類，而南面則已沒有食的攤檔了，代之而起的是兩面的街舖才作飲食。
廟街以往五時多開檔，落雨一 ...

唔好客氣 !

作者: hkgalbert 時間: 2010-6-18 21:18

引用:

原帖由 bobbystar2100 於 2010-6-17 01:34 PM 發表
伯伯，聽講以前老廟有挖「貓眼酒」表演，有否聽聞？還有什麼獵奇？後輩願聞其詳！

你指生劏雄貓取其腦槳及一雙「虎眼」來浸眼睛孖蒸，醫治遠年癆疾的表演嗎？
如前所述連人見人憎的「蛇」；97後都不能生劏取其「蛇膽」來浸燒酒，何況是寵物貓！

作者: mygo 時間: 2010-6-19 03:27

引用:

原帖由 meijik622 於 2010-6-18 19:24 發表廟街（Temple Street）位於香港九龍油尖旺區中的油麻地，是香港一條富有特色的街道。街道南北走向，連接文明里及佐敦道。曾有不少電影以廟街取景。廟街以售賣平價貨的夜市而聞名，被喻為香港的平民夜總會。 ...

師兄張相有相當年份了，大發麻雀館已不在多時了！雖未入過麻雀館，也懷念中。

[ 本帖最後由 mygo 於 2010-6-19 03:30 編輯 ]

作者: mygo 時間: 2010-6-19 03:35

引用:

原帖由 meijik622 於 2010-6-18 19:38 發表廟街煲仔飯,蠔餅原來現在的煲仔飯賣得好鬼平，一個窩蛋牛肉飯都係18元，一個臘腸雞飯都係25元正，加個20元細蠔餅，每位40元有找，食得又飽，感覺份外滿足！在早來的冬天，係廟街露天被寒風吹到口水鼻涕流，兩條 ...

蠔餅睇見好想食。

以前一毫子一碟烚蜆，靚仔時成日企響車仔檔度食，小販用一個鍋煮了一鍋醬汁，橙紅色，酸酸甜甜，食時每個人拿蜆自己去鍋中醮醬汁而食，風味猶勝現今之炒蜆，唔知有冇師兄試過？

作者: mygo 時間: 2010-6-19 03:38

引用:

原帖由 meijik622 於 2010-6-18 19:34 發表廟街所以得名，是因為該處有一座天后古廟，至今已有過百年歷史。相傳為了讓善信有樹蔭乘涼，廟前空地種了多棵榕樹，後來人群漸多，開始有人在榕樹頭賣唱、玩樂器、講古、睇相、賣武等，小販也來擺賣食物、藥油、衣服 ...

師兄張相，影者應站在廣智戲院及恭和堂間的馬路拍攝，懷舊，實至名歸！

作者: mygo 時間: 2010-6-19 10:34

引用:

原帖由 meijik622 於 2010-6-18 19:32 發表將於明年五月落成的廟街牌樓，設計古色古香。區議會設計圖片【SUN特搜小組記者朱先儒、李嘉怡報道】在金融海嘯和豬流感雙重夾擊下，訪港旅客首當其衝下跌，以夜市聞名、為本港一大旅遊景點的油麻地廟街，商販 ...

唉，其實真係好難做得番以前相似架啦。
有好多行業，式微就式微，冇再復活，唔通大傻賣頭臘，仲會有人買？
講番其他，賣武、講古都好難有搵到人黎做了。

作者: pantyjoe 時間: 2010-6-19 17:14

提示: 作者被禁止或刪除內容自動屏蔽

作者: suewong 時間: 2010-6-19 17:31

引用:

原帖由 pantyjoe 於 2010-6-19 17:14 發表
記得細個 (80年代初)，老豆老母耐不耐就帶我地一家五口去 "老廟" 食野，細路仔好開心。蠔餅隔離以前好似有檔賣鹹書；另外有一檔係食 "豬紅蘿蔔"，係由一對老公公老婆婆主理，推車仔，車仔上有支氣燈，好好味。大果仔 ...

男女大不同, 唔只爸媽冇帶我去, 20 多歲時, 聽到廟街 d "蛇更" 好味. 亞哥都唔肯陪我去. 話品流複雜....

作者: mygo 時間: 2010-6-19 18:53

引用:

原帖由 suewong 於 2010-6-19 17:31 發表男女大不同, 唔只爸媽冇帶我去, 20 多歲時, 聽到廟街 d "蛇更" 好味. 亞哥都唔肯陪我去. 話品流複雜....

呵呵，我五六歳就響廟街蒲，十歲未夠，問老媽子欏兩毫子自己走去廣智戲院睇黃飛鴻了。

作者: mygo 時間: 2010-6-19 19:00

引用:

原帖由 pantyjoe 於 2010-6-19 17:14 發表記得細個 (80年代初)，老豆老母耐不耐就帶我地一家五口去 "老廟" 食野，細路仔好開心。蠔餅隔離以前好似有檔賣鹹書；另外有一檔係食 "豬紅蘿蔔"，係由一對老公公老婆婆主理，推車仔，車仔上有支氣燈，好好味。大果仔 ...

呵呵，整完好新淨架，但聽聞話會整壞隻表既喎。

講起公公婆婆。廟街以前有一對公公婆婆，推車仔賣玩具，一般都係一元以下的玩具而已。靚仔時冇錢買，公公婆婆就搞D「潛籌」D野出黎，所謂「潛籌」，就係抽獎，開出既牌仔對到號碼就可欏到個份獎品。
「潛籌」如果抽唔到冇晒。「豆零」就咁冇左。細路仔好可憐。一般「潛籌」既都係咁。但呢對公公婆婆好好人，一樣收「豆零」潛唔到都俾番一粒糖，當你儲夠四粒糖，又可番去抽多次。
呢對公公婆婆十分慈祥，只能在記憶中回憶佢地笑容。

作者: manxcat 時間: 2010-6-19 22:57

上年上油麻地停車場影廟街，兩間麻雀館都摺埋，
昔日兩個大招牌變得暗淡無光，好冇癮。

作者: bobbystar2100 時間: 2010-6-20 04:44

引用:

原帖由 hkgalbert 於 2010-6-18 21:18 發表

你指生劏雄貓取其腦槳及一雙「虎眼」來浸眼睛孖蒸，醫治遠年癆疾的表演嗎？
如前所述連人見人憎的「蛇」；97後都不能生劏取其「蛇膽」來浸燒酒，何況是寵物貓！

伯伯，這是聽我家父回憶的事情來的…
聽講老廟的確曾有人生殺貓公，即場用貓眼浸酒給客人享用，聽講可以明目…
且有取老貓作「龍虎鳳」野味，未知伯伯可有親聞？

（小弟本是愛貓之人，罪過罪過）

作者: hkgalbert 時間: 2010-6-20 09:54 標題: 回復 29# 的帖子

九龍城的「三六」(黑狗肉)較合老人口味；不過都是當年廣州市的較惹味！
「龍處鳳」指「飯剷頭毒蛇、老貓、烏雞」，當眾劏之，剁成幼絲，滾成一煲，成火山孝子的補藥湯也。當年老人尚算年青，黃臉婆亦比那些廟街阿姑省鏡，老人當然沒有幫趁過，所以不能答您是甚麼味，不過蛇肉與雞肉都是甜的，那種湯應當也是鮮甜的。順帶一提，「龍處鳳」與「貓眼酒」、「蛇膽酒」皆是同一幫人做也，絕不浪費。特區政府若真想推廣觀光事業，就發出容許在廟街制造「龍處鳳」、「貓眼酒」、「蛇膽酒」、「三六」的牌照吧！

再發些「廟街阿姑」牌，讓那些雙失的 MM，有「工」可返，更要作21世紀大革新，新發「廟街姑爺」牌，讓一眾年青力壯的學生哥遁合法手段賺取零用，發洩「精」力，實行趁暹羅病，擺佢命，盡搶它的觀光客！

[youtube]2jo4MRyV40w[/youtube]

[youtube]rysUspSUetY[/youtube]

[youtube]CW9S6Kz82bA[/youtube]

[ 本帖最後由 hkgalbert 於 2010-6-20 02:05 編輯 ]

作者: suewong 時間: 2010-6-20 17:13

引用:

原帖由 mygo 於 2010-6-19 19:00 發表

呵呵，整完好新淨架，但聽聞話會整壞隻表既喎。

講起公公婆婆。廟街以前有一對公公婆婆，推車仔賣玩具，一般都係一元以下的玩具而已。靚仔時冇錢買，公公婆婆就搞D「潛籌」D野出黎，所謂「潛籌」，就係抽獎，開 ...

1 向覺得 mygo 粵語片知識豐富. 而家知道係因為你記性好...

作者: mygo 時間: 2010-6-20 18:22

引用:

原帖由 suewong 於 2010-6-20 17:13 發表 1 向覺得 mygo 粵語片知識豐富. 而家知道係因為你記性好...

哈哈， Sue姐過獎了，不過細個D 野真記得好清楚。

作者: 36D 時間: 2010-6-21 12:38

最鐘意去老廟做"校服褲"。仲有一條麻甩佬坐在地上，身旁放個喼仔賣春藥。又有一個講故佬，成日話爆明星秘聞，講到緊張處，唔該幫襯買粒和順欖先啦！

作者: ces 時間: 2010-6-21 16:40

..................

作者: ces 時間: 2010-6-21 16:41

.....................

作者: ces 時間: 2010-6-21 16:42

....................

作者: mygo 時間: 2010-6-21 23:27

Ces兄：謝謝資料。第二張廟街 1974真的是 1974年嗎？望告知。背景看到有南園酒家，此酒家應於1970年前已拆卸，即是說圖片應比1974年還要早拍。南園酒家現為廟街及吳松街間的熟食市場。上面一張彩圖，有幾個穿白衣女人合照的，相信是那時的理髮店的洗頭/修甲員工，後面的應是廣利理髮店。再後一點，有間森陰可怖的店舖，是花轎./死人燈籠/抬亭的租賃店，樓底十分高，好黑，有點陰森，兒時很怕經過那裡。

[ 本帖最後由 mygo 於 2010-6-21 23:29 編輯 ]

作者: ces 時間: 2010-6-22 01:57 標題: 回復 37# 的帖子

第二張廟街 1974真的是 1974年嗎？
Sorry not sure. Photo found in the internet

作者: mygo 時間: 2010-6-23 19:56

引用:

原帖由 ces 於 2010-6-22 01:57 發表第二張廟街 1974真的是 1974年嗎？Sorry not sure. Photo found in the internet

謝謝，這些料已很難得了。

作者: u540 時間: 2010-7-2 11:59

http://forum.timway.com/f/images/smilies/default/loveliness.gif

歡迎光臨香港 Xocat Forum 討論區 (http://p.xocat.com/p/)