香港 Xocat Forum 討論區 - Powered by Discuz! Board

標題: [灌水] 點解無人講最低工資呢個話題? [打印本頁]

作者: Manics 時間: 2010-7-15 14:06 標題: 點解無人講最低工資呢個話題?

睇見呢2日各民選政棍(尤以工聯會黃國健, 職工盟李卓鬼為甚) 七情上面出賣眼淚咁聲嘶力竭爭取最低工資$33 (法例過就過硬, 係差在勞資雙方最後係邊個水位妥協者), 作為冷眼旁觀者真係覺得呢班政棍好賤. 最低高資對基層黎講根本就係糖衣毒藥, 睇落好似好著數, 但埋單最蝕底既依然係同一班人. 無恥政棍淨係講所謂好處, 對最低工資負面影響一概封咀不談, 可憐基層工友重要將呢D人當做人民英雄勞工救星, 講到尾政棍純粹為票而要全香港勞動人口受罪. 一日呢班低質可恥政棍依然夠票當選 (可見將來佢地票源唔會跌...), 香港車毀人亡只會係時間問題...

*梁耀忠重夠膽死建議政府行租金管制...不如簡單D以後香港行大鑊飯, 均貧好過!!!!*

作者: 無神論狂徒 時間: 2010-7-15 17:44

引用:

原帖由 Manics 於 2010-7-15 14:06 發表
睇見呢2日各民選政棍(尤以工聯會黃國健, 職工盟李卓鬼為甚) 七情上面出賣眼淚咁聲嘶力竭爭取最低工資$33 (法例過就過硬, 係差在勞資雙方最後係邊個水位妥協者), 作為冷眼旁觀者真係覺得呢班政棍好賤. 最低高資對基層 ...

唔係冇人講最低工資，只係之前已經有題講過～～
我都有立題吹呢件事
其實立法唔係唔好，其實好睇佢點樣立，如果三十三銀一個鐘，以大家樂時薪計，加人工成四成，雖然實際都係加千多元左右，好似好少，但實際加四成，對工商界係一個致命打擊～三十三銀一個鐘我一定反對，死硬！唔單止有盈利警告，應該會有好多公司執笠～大公司進一步壟斷市場，而且羊毛出在羊身上，加價～引發通賬，人工加咗～但係購買力差咗，最後可能盞搞～仲多咗班人失業；仲有工開的一批人可能會一個頂兩個人工作量，做唔哂都要做，超時冇補水～
我個人認為要立法，贊成立法，但係唔係一刀切～香港的確有批賤格唔死冇春用的奸商，新聞都有講七蚊一個鐘～好明顯係剝削，呢班死賤種係睇到有班人生活迫人，幾平都肯做，所以出招請呢班人做嘢～呢班賤種判上判都冇問題，因為佢剝削得甘，仲有大把水位，佢哋搵ｏ既係暴利；立法係要嚴打呢啲唔死都冇用的死賤種～
立法最低工資未必係廿四，或者廿六蚊試下先～試吓環境如何再決定如何跟進～
香港貧富差距係一個大問題，係要解決，立法有一定效用，但係未見其利，會先見其弊，勞資在立法後一定出現調整，一定好多問題出現，在調整過後或者會大家開心咗，但在調整好前，窮人只會愈扶愈貧，是草根人士的大災難～希望草根頂得著～希望佢哋唔好口旱旱亂咁講，要知道立法的結果，立杆見影的最大輸家係窮人，過了痛苦期之後係咪大家開心咗，真係冇人知，但係我覺得都係要試～
我結論係：法一定要立，但要由低價試起，要打壓死賤種奸商，而草根人士要有心理準備，立法將會出現一場草根大災難，頂得著先好～

作者: khadafy 時間: 2010-7-16 09:33

引用:

原帖由 無神論狂徒 於 2010-7-15 17:44 發表

唔係冇人講最低工資，只係之前已經有題講過～～
我都有立題吹呢件事
其實立法唔係唔好，其實好睇佢點樣立，如果三十三銀一個鐘，以大家樂時薪計，加人工成四成，雖然實際都係加千多元左右，好似好少，但實際加四 ...

錯誤了......狂徒兄！
一間食物連鎖店其最大成本係租金及上層人工,
例如,
在一般燒臘茶餐廳食個叉燒飯送凍飲,約需24-28,(外賣18-24)
其時薪工作人員约26-30圓一小時。
但在大家樂叫一個叉燒飯要28蚊(一般份量會少過茶餐廳),另飲品加5蚊,(外賣同價)
其時薪員工約19-24圓一小時。
其食物又貴左,人工又少左.....咁中間 D 差價去左邊呀？

就係租金及一層一層的高級員工.....動不動幾萬蚊一個..
(分店經理~細分區經理~大分區經理(例:19區,中西區)~總區經理(例:港島區)~總經理)
各級經理,均有寫字樓用(又要租金,又要office員工)
同時各級大廚也一樣,有數級分區,又有寫子樓...(全都要錢養的).../.

咁阿狂徒兄你慢慢計下啦！

作者: ivan99 時間: 2010-7-16 09:46

"點解無人講最低工資呢個話題?"
因為Xocat好似煲呔，廢廢地，自從風月版謝左之後，成個forum謝哂。

作者: 無神論狂徒 時間: 2010-7-16 10:33

引用:

原帖由 khadafy 於 2010-7-16 09:33 發表

錯誤了......狂徒兄！
一間食物連鎖店其最大成本係租金及上層人工,
例如,
在一般燒臘茶餐廳食個叉燒飯送凍飲,約需24-28,(外賣18-24)
其時薪工作人員约26-30圓一小時。
但在大家樂叫一個叉燒飯要28蚊( ...

我做開零售管理工作，香港租金有幾高，我絕對明白，旺角一間人流夠的舖，唔洗大三百呎，六年前左右要租金十萬，家陣除時要十五萬或者廿萬～~~香港地價貴出哂名世界都知~從商要用舖，舖永遠係最大問題，香港人有仇商心理，可以理解，但係商人其實都有仇商心理，但係仇視地產商，可以理解～
至於上層人工，其實唔係最大問題，我唔係做飲食舖，但呢行的管理結構及人工結構同零售差不多，因為上層管理人工係高啲啲，但係唔係高好多，而且管理人數少，一個區域經理可以管五至十多間舖（視乎上層點安排），但係一個區域經理都係兩皮嘢左右，分返開一間舖孭幾千，以五六十間舖去估，大約要五至十個左右，人數唔多，計埋人工唔算甘，一個店舖經理人工都係得一萬銀左右，唔係好高～再上去係一個GM或者Operations Man，約二萬五至三萬左右（當然會有啲公司肯出更多或更少），但係得一個，而管理五六十間舖，後勤唔洗好多，其實五至八個左右搞掂～而且佢地有主任，文員或會計，人工唔係好高，而且人數少～把上層人的人工攤分開，一間舖孭幾千銀左右最多萬多元～
計返比重，前線人工係佔最多，一間舖大快樂，閑閑地請十五個人，人人收你五千，七萬五呀～加四成人工即係十萬五呀～仲唔嘔血～～突咗成三萬，十間舖突三十萬，五十間舖就一百五十萬～
我唔係做飲食，我資料未必完全合用於飲食，但係個核心精神係，前線人手多，山大斬埋有柴，上層人工稍高，但人數少，斬極都係老鼠尾生瘡，租金不變，但係前線人工加四成～～打擊唔好話細～
不過我估最低工資應該唔會三十三，因為一定死人～廿六左右機會大～

作者: Jeff9394 時間: 2010-7-16 14:59

引用:

原帖由 無神論狂徒 於 2010-7-16 10:33 發表

我做開零售管理工作，香港租金有幾高，我絕對明白，旺角一間人流夠的舖，唔洗大三百呎，六年前左右要租金十萬，家陣除時要十五萬或者廿萬～~~香港地價貴出哂名世界都知~從商要用舖，舖永遠係最大問題，香港人有仇商 ...

香港既最低工資同大陸新近攪既工資反一反都係經濟自殺既力作

作者: 理魯竇 時間: 2010-7-16 18:47

若果最低時薪三十三，
個個都走去做看更。

作者: Manics 時間: 2010-7-16 22:16

引用:

原帖由 ivan99 於 2010-7-16 09:46 發表
"點解無人講最低工資呢個話題?"
因為Xocat好似煲呔，廢廢地，自從風月版謝左之後，成個forum謝哂。

xocat同香港夜場一樣。。。。。。。死晒！！

唯一好處係個場死成咁，大陸都費時河蟹。。令我地呢D在深港燦可以光明正大上到黎。：D

[ 本帖最後由 Manics 於 2010-7-16 22:18 編輯 ]

作者: Manics 時間: 2010-7-16 23:30

引用:

原帖由 khadafy 於 2010-7-16 09:33 發表

錯誤了......狂徒兄！
一間食物連鎖店其最大成本係租金及上層人工,
例如,
在一般燒臘茶餐廳食個叉燒飯送凍飲,約需24-28,(外賣18-24)
其時薪工作人員约26-30圓一小時。
但在大家樂叫一個叉燒飯要28蚊( ...

哥哥，咁香港使唔使引入租金管制呀？
做生意班人唔係傻，地方舖租貴中高管理層人工高，呢D都係市場決定，無合理回報商家佬會同你捱貴租貴人工？
正如依家基層工友時薪低一樣，根本係低技術工種僧多粥少，人太多頂爛個市，根本唔係商家佬剝削問題。依家社會流行既風氣純粹係出於仇商心態多於理性看待勞動市場既困境。
一句講晒，唔抵得商家佬咁有錢咪索性靠立法要佢地嘔返D出黎，食大鑊飯囉！

作者: ali 時間: 2010-7-17 03:41

引用:

原帖由 無神論狂徒 於 2010-7-16 10:33 發表

我做開零售管理工作，香港租金有幾高，我絕對明白，旺角一間人流夠的舖，唔洗大三百呎，六年前左右要租金十萬，家陣除時要十五萬或者廿萬～~~香港地價貴出哂名世界都知~從商要用舖，舖永遠係最大問題，香港人有仇商 ...
計返比重，前線人工係佔最多，一間舖大快樂，閑閑地請十五個人，人人收你五千，七萬五呀～加四成人工即係十萬五呀～仲唔嘔血～～突咗成三萬，十間舖突三十萬，五十間舖就一百五十萬～

睇你咁寫就知你夠刻薄！人流多的地區，舖租當然貴。
做飲食業或服務行業的前線人員一般工作時間長，早、午、晚飯時間，假期、節日等做到踢晒腳，收你個五千銀做到隻狗咁，仲講到好似比多o左！你今年放o左大假未，未o既話就利用假期去老麥或大乜樂做幾日part time，親身體驗下。
仲有，你篇野寫來寫去都冇提到最重要個樣 ---------- 營業額。
間間公司，10個有8個做老闆年年嗌生意唔好，係呀生意唔好又會有分紅入自己袋！

作者: 無神論狂徒 時間: 2010-7-17 10:17

引用:

原帖由 ali 於 2010-7-17 03:41 發表

睇你咁寫就知你夠刻薄！人流多的地區，舖租當然貴。
做飲食業或服務行業的前線人員一般工作時間長，早、午、晚飯時間，假期、節日等做到踢晒腳，收你個五千銀做到隻狗咁，仲講到好似比多o左！你今年放o左大假未， ...

先恭喜你剛發夠二千篇文章！
我以前十七歲時暑期，以長工身份做過酒家企堂，我仲記得係在美心屬下一間酒家做，我點會唔知惡頂吖～果啲傢俬（行語，唔好以為係Furniture），一大籃，真係重到拿不起，當時年紀細，唔夠力都係頂硬上～不過當年薪水都算幾好～都有好似七八千左右（唔係好記得）
後尾我中七個年又做暑期工，唔係老麥一類出名快餐，但我都係做快餐，有啲似低級版的Super Sanwhich，月薪四千～所以我識換汽水糖漿，唔識換，會噴到一身糖漿～
我都只係暑期工，唔係做十幾年，唔敢講完全感受到，但係我都知道飲食係辛苦錢，當時真係做得好辛苦

我唔係反對立法，但係我是站在中間去睇呢件事，當你話我只會從營業額去睇呢件事的時侯，你又有冇想過以商人的身份去睇呢～商人都係人，窮人都係人，點解我哋只許以窮人身份去睇事情呢？唔好以為商人個個大富大貴，洗腳唔抹腳，好多商人都係搵朝唔得晚，今日唔知天日事，係真係好多呢啲商人，所以每年先有咁多公司執～你迫佢比高四成人工，咪一樣叫佢去死～所以我主張立法，但唔係一嘢加盡佢大家攬住一齊死一鑊熟死就死齋老味幾大就幾大啦，我主張中間落墨，要打壓奸商剝削，但亦要顧及商人的處境～
當你只顧窮人生活處境時，有沒有想過有多少商人會被你迫死～我主張平衡雙方利益～

作者: 無神論狂徒 時間: 2010-7-17 10:28

仲有喎～商人分紅冇問題喎～唔通你要迫到佢分哂啲紅比前線做人工？
咁做生意嚟做乜呀～
唔好以為做商人好過癮～佢哋都有付出架～而且冒的係風險，你打工賺硬，生意可以白做～仲要蝕入肉破產，出返嚟做都唔易搵工作～你想吓對工人是否公平吖～風險就商人冒，錢就冇得分，做勞工，險就唔洗冒首要係要打壓剝削的奸商～窮人幫得幾多就幾多～

作者: 無神論狂徒 時間: 2010-7-17 10:45

引用:

原帖由 Manics 於 2010-7-16 23:30 發表

哥哥，咁香港使唔使引入租金管制呀？
做生意班人唔係傻，地方舖租貴中高管理層人工高，呢D都係市場決定，無合理回報商家佬會同你捱貴租貴人工？
正如依家基層工友時薪低一樣，根本係低技術工種僧多粥少，人太多 ...

七蚊一個鐘你都話唔係剝削？咁乜叫剝削～～

作者: 無神論狂徒 時間: 2010-7-17 11:12

最近又有人話，制訂最低工資委員之中有人是某快餐品牌的核心人員，質疑有角色衝突～
我又好想問～係咪成個最低工資委員的成員全部來自窮人或為窮人爭權的人士，才叫好呢～你叫何禧華做，佢一定同你講，時薪五百蚊叫合理，總之愈高愈好啦～
窮人一定話時薪一千啦～
曾特首講得正確～爭取利益者及既得利益者都要有發言權才能平衡各方利益～
李卓仁要求三十三蚊時薪，其實明眼人都睇到，佢只係出賣港人利益～佛口蛇心～仲有個可能性，佢冇腦～

作者: khadafy 時間: 2010-7-17 12:04

做得過就做,做唔過就唔做...
你唔做,自有人做..
呢句同樣適合商人的...

唔做商人咪出黎打工囉......有乜問題呀？(我都係其中一個)
我現時不知幾自由自在,叫我再開業都咪攪我！
記得幾年前由朝做到晚,無假期年终無休,所有心力腦力體力,諗交租,諗出糧,諗餐牌...樣樣到達極點..
真係前世......

作者: Manics 時間: 2010-7-17 15:21

引用:

原帖由 無神論狂徒 於 2010-7-17 10:45 發表

七蚊一個鐘你都話唔係剝削？咁乜叫剝削～～

傳媒搵7蚊一個鐘呢D極端例子出黎抺黑為商者不仁, 衰D講句唔用腦既人先會將個別事件當作成整個勞動市場既標準囉.
掉返轉頭我都唔可以用基層公務員普遍高過市場既人工水平黎一刀切同人講香港勞動市場好好境。工種時薪高低有別完全取決
於市場，點解要將責任全部推落僱主身上？依家有人用槍指住你個頭去做廿蚊一個既工呀？低技術工種僧多粥少，應徵者無明顯技術
優顯咪唯有靠自降身價去爭份工返黎囉，邊個叫大環境唔好？最低工資真係可以改善到僧多粥少呢個情況咩？

重有, 我從來無講過支持僱主7蚊一粒鐘請人, 唔好姓屈。

作者: Manics 時間: 2010-7-17 15:25

引用:

原帖由 khadafy 於 2010-7-17 12:04 發表
做得過就做,做唔過就唔做...
你唔做,自有人做..
呢句同樣適合商人的...

唔做商人咪出黎打工囉......有乜問題呀？(我都係其中一個)
我現時不知幾自由自在,叫我再開業都咪攪我！
記得幾年前由朝做到晚,無假期年 ...

所以咪話己所不欲，勿施於人囉。與其強行推出最低工資將責任推落商家佬度，政棍同政府點解又唔諗下點解自己唔可以諗D措施出黎搞返生勞動市場減低僧多粥少既就業情況?

作者: 無神論狂徒 時間: 2010-7-18 10:22

引用:

原帖由 khadafy 於 2010-7-17 12:04 發表
做得過就做,做唔過就唔做...
你唔做,自有人做..
呢句同樣適合商人的...

唔做商人咪出黎打工囉......有乜問題呀？(我都係其中一個)
我現時不知幾自由自在,叫我再開業都咪攪我！
記得幾年前由朝做到晚,無假期年 ...

最低工資立法，仲有一個功能就係消弭貧富差距，我雖懷疑其成效，但唔做嘢，呢個炸彈遲早爆～我承認有其他方法可以去消弭呢個問題，但係每個解決方法都唔係免費飯餐，總有人嘈～做乜都會有人嘈，而且成效也是未知，如果裹足不前，問題只會惡化～

你話：再者你唔做，自有人做；但係最低工資會打擊營商環境，只有大企業才能生存，自有人做係真，咪係大企業食大啲個餅囉～單身出嚟隻揪大企業？在最低工資立法後咪等做大企業點心囉～

我撐立法消減貧富問題打擊剝削，又撐商界唔好立法過硬，發現我行中間路線，要多網友回覆我（炮轟我？）

作者: 無神論狂徒 時間: 2010-7-18 10:31

引用:

原帖由 Manics 於 2010-7-17 15:21 發表

傳媒搵7蚊一個鐘呢D極端例子出黎抺黑為商者不仁, 衰D講句唔用腦既人先會將個別事件當作成整個勞動市場既標準囉.
掉返轉頭我都唔可以用基層公務員普遍高過市場既人工水平黎一刀切同人講香港勞動市場好好境 ...

咁諗有問題，你即係眼見有一個漏洞，唔去理佢～立法就係要管制商人的剝削行為
一單醉駕死人，唔可以話一單啫，唔好抹黑醉駕人，有人運用漏洞去從事不道德行為，政府有責任填好漏洞～
一單過別事件如果肯定發生機會微，而且又唔係法例漏洞，可以唔去理，呢劑係有漏洞，呢單唔係個別事件，係一個缺口～你睇唔睇到？
最低工資立法，還有一個作用，係嘗試消弭貧富問題～

市場係有無形之手，讀經濟的人都知，但係自由市場唔係代表可以解決社會問題～只用經濟角度去經營社會，有好嚴重問題～我哋唔洗有慈善組織啦～政府只需白食啦～基建全由商人去搞囉～警察都唔洗有啦～唔好笑呀～絕對資本主義經濟理論真係一個無政府主義呀～如果無政府主義行得通～當年金融風暴，香港唔洗入市托港紙啦～如果唔托市，你啲血汗錢咪入哂索羅斯可包囉～

唔好只以經濟角度睇嘢～貧富差距係個問題～部份商人有心剝削係一個問題；你唔可以視而不見～政府成日比人嘈，因為佢要平衡經濟社會民生國防．．．．．．．無數問題～只以一角度去睇，呢個政府只會出大頭佛～
一孔之見死無全屍～

[ 本帖最後由無神論狂徒於 2010-7-18 10:41 編輯 ]

作者: 無神論狂徒 時間: 2010-7-18 10:51

引用:

原帖由 Manics 於 2010-7-17 15:21 發表

優顯咪唯有靠自降身價去爭份工返黎囉，邊個叫大環境唔好？最低工資真係可以改善到僧多粥少呢個情況咩？

我都承認，最低工資唔一定解決到問題，我也很懷疑其成效～
但係乜都唔做，個問題只會惡化，總會爆炸～你應該知香港係全球貧富差距最大的城市～要去試，所以我主張立法，由細銀碼試起，睇睇個營商環境如何再作決定～
而且最好加入可加可減機制，一旦又嚟金融大災難～營商環境差，最低工資都要減～

作者: Manics 時間: 2010-7-18 16:39

引用:

原帖由 無神論狂徒 於 2010-7-18 10:31 發表

咁諗有問題，你即係眼見有一個漏洞，唔去理佢～立法就係要管制商人的剝削行為
一單醉駕死人，唔可以話一單啫，唔好抹黑醉駕人，有人運用漏洞去從事不道德行為，政府有責任填好漏洞～
一單過別事件如果肯定 ...

你覺得最低工資立法成功後呢個賺7蚊既阿伯以後就有好日子過? 係呀, 名義上佢以後出黎打工時薪會多過依家, 但我可以好肯定咁講, 呢條
法例會直接剝削左佢日後既工作機會. 所謂最低工資法係填補漏洞根本係多餘, 所謂填埔漏洞只不過係將老細可以揀既勞動力個POOL收窄左,
令原先有年齡優勢既低技術工人競爭少左容易D搵工, 但同時將原本靠低人工無年齡體力優勢既人直接排除出勞動市場, 最終連賺呢D[可恥]既時薪既
機會都無埋, 一係訓街, 一係咬老綜. 咁樣叫填補左漏洞? 掩耳盜鈴左D囉!

作者: 無神論狂徒 時間: 2010-7-18 17:10

引用:

原帖由 Manics 於 2010-7-18 16:39 發表

你覺得最低工資立法成功後呢個賺7蚊既阿伯以後就有好日子過? 係呀, 名義上佢以後出黎打工時薪會多過依家, 但我可以好肯定咁講, 呢條
法例會直接剝削左佢日後既工作機會. 所謂最低工資法係填補漏洞根本係多餘, ...

所以我話草根勞工界在最低工資立法後，會經歷一場大災難～災難過後會係咪好咗冇人知～但係唔做嘢堅尼系數炸彈就爆硬～草根勞動人口在高呼要設立最低工資，我只希望佢哋真係了解最低工資的後果，唔好咁膚淺睇到眼前蠅頭小利就以為係好政策～係咪好咗，真係要試過先知～
立法後有幾多人失業，即管睇睇，失業就預咗～有人做政策下的炮灰冇所謂～要睇睇整個社會的福祉係咪好咗～堅尼系數有冇改善～對經濟打擊有幾大，多方面去評估成效～
都係果句，法要立，但係要保守去試，一嘢三十三，只有出賣港人利益的人才講得出～三十三？死硬～

作者: khadafy 時間: 2010-7-19 07:34

任何政策都唔會有好似果 D上面執政人仕話的双贏三贏的局面,
現立法只在要幫到一班弱勢人仕為目的,因為是首次常試,如在其執行間若碰到有其它問題....應可作修正改善為之上策。

作者: Manics 時間: 2010-7-19 12:07

引用:

原帖由 無神論狂徒 於 2010-7-18 17:10 發表

所以我話草根勞工界在最低工資立法後，會經歷一場大災難～災難過後會係咪好咗冇人知～但係唔做嘢堅尼系數炸彈就爆硬～草根勞動人口在高呼要設立最低工資，我只希望佢哋真係了解最低工資的後果 ...

如果咁講即係以犧牲一班人既生計去成就另一班人既鐵飯碗, 比起依家靠市場調節, 邊樣偽善D?

作者: louisyum 時間: 2010-7-20 10:11

thank you very much

作者: 無神論狂徒 時間: 2010-7-20 10:56

引用:

原帖由 Manics 於 2010-7-19 12:07 發表

如果咁講即係以犧牲一班人既生計去成就另一班人既鐵飯碗, 比起依家靠市場調節, 邊樣偽善D?

成就另一班人既飯碗係真，但係如果計返條數，綜合民生經濟的結果，成個社會都係好咗～點解唔立法呢？
唔好叉我立法後係咪一定好咗～我唔知係咪一定會好咗，我有講過，大家要去試要去行，裹足不前就貧富問題一定爆煲～試咗都叫做知～
只係用經濟角度睇事咯～都講過，一孔之見死無全屍～民生問題唔係單純以經濟角度可以解決～

歡迎光臨香港 Xocat Forum 討論區 (http://p.xocat.com/p/)