前往落馬洲支線管制站，坐狗鐵太貴，還是到元朗西鐵站坐九巴B1，或到元朗(福康街)坐75號小巴著數，詳情可看以下正苦網頁：

前往落馬洲支線管制站

坐75號專線小巴只須6蚊，一定有座位，唔駛罰企，而且相信總站開出已經坐滿，應該唔會再停站兜路，估計是快靚正的交通工具，但要待明天開通後試坐過才能下定論。

B1大巴會停站兜路，車程因此可能較長，但有多重優惠，包括轉乘優惠(減$3.5)、即日偷跳優惠(9折)等，價錢都平過狗鐵好多，詳情可以瀏覽以下九巴網頁：

九巴 B1 線

狗鐵坐一個站依然企硬¥18.8，太搶錢了！建議大家罷坐，以示抗議！

從落馬洲支線管制站行過條天橋，就到福田口岸，好方便！唔駛好似過舊皇崗口岸咁，又要落車再上車再落車。

這就是福田口岸的聯檢大樓(大陸關)，無須步出大樓，坐扶手電梯到地下便是皇崗地鐵站。

樓下的皇崗地鐵站大堂新淨企理，暫時乘客唔多，相信明天下午開始會多人。

從皇崗坐地鐵到華強北要¥3，到世界之窗¥4，去其他地鐵站幾多錢？自己睇啦！

不過皇崗地鐵站屬於4號線，轉1號線要先坐兩個站到會展。

福田口岸大樓外就有巴士站，現時有：
241 開往紫薇閣
203、52 開往東昌

明天會新開一條91號線往會展。

也可選擇步行至附近的漁農村巴士總站上車，咁就保證有靚位坐。

小弟覺得生果報的「過境交通部份車費比較」真係誇張，資料有偏幫狗鐵之嫌，莫非個記者收咗狗鐵錢？

初初睇到啲資料，真係嚇親，由旺角出發，坐巴士轉B1或75號小巴，竟然要100至110分鐘！真係有無搞錯呀！

經小弟試撘及分析過後，認為生果報的坐巴士/小巴車程，一定是包括了最長的等車時間，假設了道路不太暢順的情況，更可能假設乘客到元朗後，都會慢慢行去買幾個老婆餅食下先，然後至轉車，所以全程要接近兩粒鐘。

生果報的坐火車車程，一定是假設在旺角可以毋須行路上天橋便到火車站，毋須行路及乘搭扶手電梯便到月台，毋須等火車便可以上車，毋須先讓「不停站列車」經過而等餐懵，而且一上火車一定是去落馬洲，毋須等下架，所以可以快到37分鐘就到。

其實，由旺角坐68X，車程只須約50分鐘便到元朗，而B1大巴或75號小巴，行車時間均只須約25分鐘，加起來只須約75分鐘，當然，實際上都要等下車，所以全程大約90分鐘吧！

至於坐火車，由旺角最中心位置行路到旺角火車站，都要15分鐘啦！入閘坐扶手電梯到月台等下車，都要5分鐘啦！一個唔好采，到站列車是去羅湖的，仲要等多幾分鐘添，加上37分鐘行車時間，總共都要60分鐘。

換過話講，罷坐狗鐵，會用多15至30分鐘，但可省回$12.8 ($31.3-18.5)！

B1巴士由元朗西鐵站地下的巴士總站開出，穿過元朗大馬路(青山公路元朗段)才會上高速路，兜路約花了10分鐘，過了元朗公園，再行車15分鐘到落馬洲支線管制站，全程約25分鐘。

如果想坐75號小巴到落馬洲支線管制站，可以到開心廣場後面的福康街小巴站，由老麥旁邊條路行入去就係，好易搵。

呢個就係75號小巴總站，由於價錢平，所以好多人坐，繁忙時間要排隊等車，但班次都幾密，每幾分鐘就開出一班。

75號小巴由明偉小巴有限公司經營，全程只須6蚊，仲有分段收費，認真抵坐。

如果由旺角坐68X，想快的話其實不要在元朗西鐵站上B1，可在元朗大馬路任一個站落68X，然後同站上B1，唔駛行，方便直接，回程也可以這樣。

68X和B1的站，都是一齊的。

如果想多慳1蚊，由旺角坐68X，直到水邊村才落車，這樣再上B1，八達通只會扣$5.5！

B1巴士好少人坐，座位又多，可以坐得好舒服，小弟試坐的時候，全車只得十幾個客。

落馬洲支線管制站範圍屬於禁區，巴士到達時，要待閘口打開後才能進入。

這些都是沿路的風景照片：

到了落馬洲支線管制站，這就是巴士、小巴的總站。

小弟到達總站，發覺回程無乜人等車，不論B1或75，都無乜客。

旁邊有的士站，有市區的士，又有新界的士，但都乏人問津。

要過關必須經此梯登上二樓。

這是登上二樓的風景，可以望到對面的福田口岸。

對面新建的高樓，就是漁農村。

一上二樓，超快過關，冷冷清清，唔駛1分鐘搞掂，但跟住要過橋，條橋都幾長。

用了大約3分鐘過橋，到達福田口岸，又係冷冷清清，唔駛排隊，超快速過關，好快就步出口岸大樓。