單身部落觀後感

前幾日抽到D時間，一條友去左睇單身部落。

廣告攞大丈夫做比較，話會好笑過大丈夫。其實雖然大家都講性，但係都唔係同類片，比較黎無說服力，而且講好笑，大丈夫反而更好笑。與其話自己似大丈夫，我覺得本片反而似晚九朝五。

睇報紙雜誌D介紹，以為套戲會好似以前D陰陽路咁將三個細故事串埋做一個。結果唔係，但係一次過將三個女仔既故事一次過講晒，就好似有D顧此失彼，結果有D地方好似唔係好完整。

李彩華個段係成套戲最完整既，講李彩華本身係個好傳統既女仔，對性比較含蓄。一晚發現條仔曾國祥偷食，結果就分左手。李彩華諗住報復，於是拋個身出黎玩，後尾遇到連凱，先至令自己係性方面開竅。但係連凱都係個愛蒲之人，結果撞破佢偷食之後，又分手收場。於是李彩華晚晚蒲晚晚搵仔搞野，直到遇番曾國祥。曾國祥叫不如係番埋一齊，但係李彩華唔肯。

因為依條係主線掛，比較完整。最尾李彩華拒絕曾國祥個句，比起以前提人吊膽驚你比人搶走，依家我可以隨時搶走你，我無咁辛苦，個人覺得幾精采。

谷祖琳個段自己就覺得怪怪地。講谷係個愛蒲既人，一次因為搞野搞到失聲，係陳輝虹照顧之下，變番個普通人。個故事實在好多漏洞，明明依家先講谷對陳有少少好感，轉個頭二人己經叫情侶，喂，無交代過兩個係埋一齊就一跳跳到搞掂晒?快少少喎....

而董敏俐個段時間就應該係最短。講董因為條仔唔錫自己，於是同女上司慢慢發生感情。可能個人偏見，又或者我係男人，唔多理解女人心理，所以我覺得有少少反駁。一直都講董條仔好衰，有一次仲撞到佢叫雞，成班女人捉住佢打，個陣董因為同女上司有野，唔再鐘意個男人，所以無唔開心。但係最後條仔SEND個SMS叫佢出黎爆房，佢又肯瞞住女上司去喎，點解既呢?

演員表現方面由於係女性戲，女演員表演明較令人留下印像。谷祖琳做得好，不過屬預期之內，反而李彩華同之前一直好花瓶既表演進步好多，值得讚揚。董敏俐雖然表現機會唔多，但都夠反映佢可愛一面。幾位女角既大膽表演亦做得好放。反之男角方面，除左黃浩然外，其他幾個主要男角好似可有可無咁，印像亦唔夠D友情客串同咖哩啡深。

總體黎講，雖然劇情唔夠完整，但依覺已經係近期好多港產片既通病。幾十蚊，咁熱天時涼個半鐘冷氣，有笑料有靚女有上床戲，我就覺得睇得過。

睇完套戲，有兩個概嘆。第一個係玉女無野撈時原來可以搏過好多性感女星。谷祖琳係性女唔好講啦，董敏俐係人渣渣抄抄都係俾個女人搞啫，李彩華半裸露背都仲有得話戲情需要，總之都叫做女主角吖。陳苑淇友情客串，反而去到咁搏，為乜呢?係咪上床就一定要擺對腳係條仔膊頭條仔係咁鋤時交代到劇情?第二，是晚戲院半滿，係魔盜王效應下，作座率應算唔錯。散場時發現觀眾中大多為年青男女拍住拖睇，不其然想，咁多人有女，點解我無女.....