都唔明捉老邪神有什麼用？諗住迫佢默寫易筋經？如果用來要脅火雲邪神攞着數，便無須隱瞞啦，反正火雲邪神遲早都會知道，定要殺上通天教。另外，黃生似乎不記得通天教又要應付元始門，又要應付廣法堂，加上文殊新任冇幾耐，基本上唔應該捉老邪神倒自己米，自己都自顧不暇。仲有，黃生還記不記得一年前講過既得通天教百年大典這件呢？

編劇舖排劇情唔該小心d,好似今期「鐵令如山 通天棄相」,鐵心竟然估中白骨件事同老邪神有關,但睇番之前一、兩期,都冇任何蛛絲馬跡可以聯想到老邪神身上,唔好用一、兩句對白交待過骨先得架,前車可鑑,銀聖老有冇死到已經令到讀者看得一頭霧水,要黃生在讀者信箱證實已經死咗,咁就無癮啦。

前幾期劇情講四龍元帥同黑龍初次交手,四龍竟然知道對手有六關功力,天啊,四龍都冇練過金鐘罩,黑龍又冇大聲嗌,何來知道出第幾關功力?龍珠都要靠儀器先測到孫悟空實力有幾高.四龍最多只憑感覺,覺得勁抑或唔勁。跟住鐵心話石黑龍除非練到第九關,根本沒可能敵得過二十六層天的功力,四龍估佢要催上二十四層天功力,換言之黑龍的金鐘罩已練至第八關,唉...之前冰火七重天事件,編劇仲未得到教訓,仲要用這種方式表達武功強弱,日後又攪到亂哂龍,拍得住九陽神功及易筋經既冰火七重天,竟唔及金鐘罩十關功力的尷尬情況。
其實編劇根本唔需要為武功強弱定下框框,主角去到第幾級數,只不過是讓讀者知道佢又幾勁,敵人唔夠抽自然提升功力,唔駛刻意說明某某功夫第幾級可以win某某功夫第幾關,令到主筆縛手縛腳,雖知道比併內力之餘,還可以用招式搭夠,以弱勝強。
還有,唔好再定什麼至尊級,什麼級去分類武功高低,肯定仲亂,這是看了超過廿年的龍迷的意見.

舊著中,通天教元始門廣法堂一脈相承,三大組織的絕學源自道經這套武功,後來因事分裂成三大勢力,但以廣法堂實力最弱,通天教最勁。有次白骨捉了廣法堂少堂主白俊,搵鬼醫洗腦,供出廣法堂竇口,當時廣法堂派人協助黑龍從監獄救小虎及戒仔,因此實力弱左,而通天教差不多精銳盡出,堂主白無涯仲俾白骨契仔陳傲雲執死雞,一招刻骨爪的分肩式廢了武功,好彩四小將及時出來,救了出來,在高速公路與小虎黑龍重聚(當時寫得好感人),後來投靠元始門,有次小虎撞見殺王小龍仇人陳傲雲,而大奸仔當時諗住報串俾文殊知,白骨有意作反,於是大家打起來,當時陳傲雲偷襲獨眼龍得手,四小將少了一將,小虎非常憤怒.加上文殊錫身,結果小虎迫到文殊要落荒而逃。

小虎可謂禍不單行,龍虎群英俾白骨全部捉晒,仲要脅小虎幫佢造反。白骨一早知陳傲雲養唔熟,於是做場戲,等佢以為小虎痴咗,黑龍被燒死。白骨聯同四龍作反,二郎神親手弑弟,而文殊俾小虎黑龍聯手打到一卜一碌,後來三小將及戒仔走甩,當然唔會繼續幫落去,攪到白骨叛變失敗,難逃一死。
由於蚩尤個妹銀鈴落在通天教手上，文殊迫蚩尤殺龍虎群英及廣法堂，龍虎群英雖然走得甩，但小虎一個人折返元始門，而白俊回復正常人後，諗住救佢阿叔白無涯等人，點知俾元始門圍剿，好彩小虎及時相救，並且以一敵眾，最後成個人功力虛脫咁滯，好彩黑龍等人又趕到，救走小虎及白俊，但廣法堂已徹底滅了。
文殊女朋友美姬送了玉佛令俾小虎等人在金佛寺（連通天教都要俾面）暫避，道經傳人龍貫天，即白俊師父，送本道經俾廣法堂護法小虎，但黑龍已覺得此人不可信。
有一晚，黑龍撞見老天尊到金佛寺拜祭，兩人一見如故，老天尊仲幫黑龍提升金鐘罩至第九關，黑龍於是許下承諾，會幫老天尊做野，種下日後禍根。
龍貫天為了要回白無涯等人屍體，到元始門，蚩尤要龍貫天陪佢到金塔，與老天尊見證蚩尤大戰文殊，ｗｉｎ咗就接收對方，結果蚩尤以無窮戰意打敗文殊。另一方面，黑龍有感銀鈴因他而被捉，於是根據線報救銀鈴，點知連同陳傲雲及銀鈴流落荒島
，陳傲雲諗住對銀鈴霸王硬上弓時，黑龍趕到，兩人打起上來，黑龍仲奪走陳傲雲一隻眼。以上50至６０期劇情緊湊刺激，同現在比簡直差天共地。

龍虎門是我第一套接觸的港產漫畫,當時劇情講緊泰國通天教,十分精彩,令到我開始成為龍虎門長期讀者。仲記得睇果期書名叫古來征戰幾人回(671期),由於蚩尤會派人搵黑龍,但條件是要求小虎做特使,接收通天教,戒仔、黑仔傑、龍貫天同元始門去到通天教總壇,老天尊點會咁順攤,又要打餐飽,小虎、龍貫天及火狐被困金庫,要面對二郎神、陳傲雲、卓不凡、雷勁(老天尊手下)及老天尊等高手,龍貫天陣前袖手旁觀,火狐俾陳傲雲用黑煞奇毒殺死,得返小虎一個孤軍作戰,但小虎冇有怕,仲用裂頭腳殺死二郎神,老天尊看見個仔被人殺,當然唔放過小虎,好彩小虎都頂得住,之後螳螂捕蟬,黃雀在後,蚩尤殺到,仲同老天尊開片,另一方面,小虎任務完成,要搵陳傲雲祭旗,一招電光毒龍鑽,將陳傲雲手臂及丹田動創,一身功力無晒,而小虎俾佢噴的毒霧整傷對眼,俾佢從秘道走甩,至於蚩尤憑着無窮戰意,竟然同老天尊打成平手,最後為免玉石俱焚,老天尊俾蚩尤等人走。

陳傲雲知道武功盡失,自行請辭通天教丞相一職,諗住搵閉關的文殊幫手,叫知被拒,仲俾卓不凡捉去,打斷手手腳腳,棄置荒山野嶺,陳傲雲諗住死得啦,點知被神秘人救走,而神秘人就是天下無敵老祖宗,仲收陳傲雲為徒,要佢成為天下第四(當時另一賣座書的醉拳,仲係以小劍仙擔正,魔童逆天唯我都未成氣候,加上醉拳最初劇情背景是民初時期,所以好多人認為老祖宗就是小劍仙,天下第二指王靈,第三就是魔童)

黑龍返到去金佛寺,幫小虎辟毒,醫番隻眼,而蚩尤希望小虎同廣法堂一齊合作,消滅通天教,仲話白俊是廣法堂覆滅的元凶,信譽已經破產,無人會投靠佢,加上龍貫天被老天尊封為通天教丞相,一朝得志的模樣,令白俊好痛心,勸唔到師父放棄榮華富貴,白俊於是寫下遺書,自刎收場。

廣法堂管家愁眉睇完封遺書,向龍貫天大興問罪之師,俾龍貫天殺死,點知俾四眼仔見到,慘遭殺人滅口(四眼明死咗好唔開心),小虎黑龍眼白白俾龍貫天走甩咗。金佛寺絕不容許有死人事件發生,雖然不關小虎事,但小虎自動自覺將玉佛令交番俾住持雲鶴大師,成班兄弟暫避黑狗村,點知小虎等人俾易一飛出賣，攪到黑仔傑落入通天教都靈上人（卓不凡師父）手上，仲硬硬生俾都靈切咗個頭落黎，小虎非常悲憤，同都靈打到日月無光，但用了霹靂狂龍都打唔死對方，俾佢負傷逃走。當時短短六期，龍虎群英已死咗兩件，對劇情非常震撼，張萬有寫得好有感染力，對比而家，三百多期，正派一件都冇死到真係有分別。始終一些角色與其做閒角，不如俾佢死得壯烈，令劇情有張力之餘，亦更加懷念有關角色。（當時讀者覺得四小將死剩光頭星，希望主編唔好做瓜佢，結果光頭星從此獲得免死金牌。）

老祖宗諗住飛昇做神仙，但首先要返老還童，於是陳傲雲叫老祖宗去通天教，可能有收獲，去到後，見老天尊返老還童，變成四十歲模樣，而老天尊一心諗住利用老祖宗，願意教佢如何返老還童。後來，老祖宗見到美姬（即係文殊女朋友，小虎對佢又有意思），覺得佢似醉拳女主角醉娃，對美姬有好感。
另外，文殊重掌通天教，封陳傲雲及龍貫天為左右丞相。金佛寺舉行佛誕，雲鶴邀請通天教、元始門及龍虎門到聖地，各路人馬聚集。銀鈴撞番黑龍，話佢有咗，叫黑龍依附元始門被拒，令銀鈴好傷心，偷聽佢地對話的蚩尤出現，黑龍以為是蚩尤做的好事，點叫被蚩尤鬧番轉頭，唔會利用細妹，叫黑龍好自為之。此時，鐵令公出現，黑龍知道佢係通天教老天尊，即時準備散去一關金鐘罩功力，費時領佢情（對比新著，東方無敵問小虎攞番九陽神功，小虎唔制，仲問番老豆筆帳點計，真係看得好冇耐，破壞小虎形象，令人覺得好小家，其實編劇只須幫小虎度句對白：還未還，好稀罕白蓮教九陽神功！跟住無敵話：傻啦，你係雪蓮的未婚夫，當係入門嫁妝啦，咁就攪掂）

鐵令公話當日傳功只是興之所致，冇諗過要攞番著數，仲諗住取消當日承諾，點知黑龍小人之心度君子之腹，令到鐵令公好唔開心，仲話許下諾言的是黑龍，唔係佢，承諾永遠有效，兩件事令到黑龍好煩惱。跟住劇情講戒仔幫老祖宗超渡神兵，兩人一見如故，做了朋友，後來老祖宗對戒仔多番手下留情。

不過，老祖宗見小虎同美姬好ｃｌｏｓｅ，呷哂醋，老祖宗決戰王小虎成為700期的故事內容，當然小虎唔夠打，但小虎堅毅不屆的眼神，同某個人（應該指醉拳王無忌）好相似。

舊著600至700期的一百期劇情情節豐富，人物眾多，

舊著600至700期的一百期劇情，情節豐富，人物眾多，劇力緊湊，打得精彩，角色鮮明，應死的角色就應該去死，不會苟延殘喘，封面期期邱福龍手筆，靚到俾，情節主要圍住小虎黑龍發展，旁引其他邪派角色 ，不似得新著過去一百期，剩係講白蓮教叛變、邪神身世，偶而加插幾場無聊打鬥戲俾二．三線發揮，劇情進展極度緩慢．仲要龍虎三皇無什麼戲份，閒閒企企，唔知做什麼，外國人未睇過龍虎門，仲以為是東方無敵及火雲邪神做主角添！

新著去到３００幾期，仲未整場龍虎三皇大戰火雲邪神、東方無敵，作為讀者，好希望看到這些經典場面，好可惜，到現在沒什麼跡象會出現，唔通諗住可以寫長ｄ？反而對火雲邪神及東方無敵幾厚待，火雲邪神同蚩尤及聖上打過，聖上又同邪神兩父子打過，遲些火雲邪神又可以大戰文殊兩父子，文殊又同蚩尤隻抽隻，甚至白蓮聖上與文殊及蚩尤來一場友誼波又得，唔好語記得還有老祖宗啊，所以話編龍虎門好容易，手執咁多經典角色，只要細心鋪排，一年整番幾場世紀大戰（好似英超咁，車仔對利記，曼聯對阿仙奴），肯定期期升書，兼夾有話題，唔似現在劇情死氣沉沉，話羅刹教準備大反擊，拖到咁耐仲未有聲氣，老細已經落左order,果班外援好似金如來、烈火祖師、星宿仲未郁，話明大反擊，就係要食住個勢出動啦!

引用:

原帖由 micphone1979 於 2006-9-9 12:09 PM 發表
我今期發覺最攪笑係鐵心同老天尊講全個刑部都知,
乜唔係兵部咩, 果度全部觀眾都應該係兵部既人

以前看龍虎門,都唔會捉小微小節,諗住玉皇朝咁具規模,咁多人參與製作,應該唔會錯啦,點知今期竟然出現咁既無可原諒的錯誤,其實這些問題存在已久,龍虎門話晒是黃玉郎盛名作,當年話過無得畫好無奈,後來攞到版權重新編著,諗住失而復得,應該好重視,搵最勁班底省靚招牌,點知愈畫愈每況愈下,幕後主筆起稿又唔掂,分鏡累贅,畫面又大大格,打鬥打幾下就算,一期書話咁快看完,再這樣下去,又會重現98,99年玉皇朝低朝時期,流氓天子及龍虎五世w銷情慘淡,被迫摺書的情況.

新著210期《大挪移的秘密》,講日聖使輸給韋陀,日聖使心諗:若非不能再用陰陽大挪移,這小子必定死在我手上,只怪自己太大意...旁白話陰陽大挪移可沒限制,因何日聖使只用了一次便不能再施展?箇中必定存在著什麼秘密?大挪移破綻上的秘密?

該期出版日期為2004年6月4日,事隔兩年多,編劇及黃生似乎仲未有意思解答這條問題?唔通唔記得左?

記得未展開澳門羅白大戰,編劇話通天教百年大典還有半年舉行,到新著273期《五大世家盟主劍》,p10講盟主之戰尚有8個月,希望編劇攪好時序,如果唔係又成為另一笑話。
仲有,唔好唔記得要安排一段劇情,講羅刹教要幫南宮一指料理西門狗賊.因為南宮一指答應老邪神醫棍妖的條件。

引用:

原帖由 Mika 於 2006-9-10 03:12 PM 發表


果期的確冇講過《大挪移的秘密》,但之後老王系月聖使同雙聖打果時借月聖使把口講話如果有左傷口之後再出大挪移就會流血不止!!

抱歉!我錯怪黃生及編劇,的確在新著230期,黃生用一句對白去交代大挪移秘密。不過,為何之前神神秘秘,到揭曉答案就輕輕帶過?真係唔明。

新著值得讚賞的,就是尊重女性,唔會好似舊著咁,女角被人施暴收場,例子有玉兒、靈芝、金詩詩,所以當年馬小靈失踪唔係一件壞事

舊著前期都幾唔尊重女性

今期講老天尊覺得白骨丞相恃老賣老,自把自為,如安安份份尚可安享晚年....其實鐵令公可嘗不是,既然退了位,就好應該交由文殊處理,包括如何迫白骨落台,雖然鐵令公愛子心切,但在兒子鐵五郎眼中,這個太上皇垂簾聽政,心中肯定有條刺,或許日後埋下父子決裂的伏線。

大家覺唔覺得火雲邪神要郁龍虎門都講咗幾耐吓，但仲未成事？出征白蓮就話要部署耐Ｄ啫，要消滅日本龍虎門話都冇咁易，羅剎教假假地都是日本第一大派，要踢館駛擇日子？

為了加強火雲邪神與龍虎門之間的血海深仇，劇情不妨大膽些，來一場血洗龍虎門，殺死一些正派角色，以加強故事的張力，掀起高潮。

劇情可以講老邪神生死未卜，作為兒子的火雲邪神非常不耐煩，思前想後，覺得龍虎門亦是罪魁禍首，遂將心底這股鬱氣發泄出來，單挑龍虎門，屠殺龍虎群英，石鐵、青天不敵，身受重傷，而趕回日本的阿柴、老妖、林氏兄弟更加慘遭毒手，王飛鷹一人之力，保護徒弟石鐵，火雲邪神眼見王飛鷹愛徒弟猶如老邪神愛自己一樣，身同感受，一念之仁，放過其他人，而王飛鷹最後傷重不治，從此，龍虎三皇與火雲邪神之間的仇怨更深。

因為舊著中，火雲邪神曾經假扮狂僧，屠殺東照宮，劍魔及媚娘成為劍下亡魄。新著不妨重新演繹一次。

要解決韋陀,風雷功力問題,好簡單,盡快出星宿老怪,一招化功大法,就可以拆掂。

以老天尊的智慧,無理由要捉老邪神,令到通天教樹立多一個敵人,由得白蓮與羅剎兩幫比併,通天教坐收漁人之利,是否最好呢?若果是文殊決定,因他好大喜功,捉老邪神樹立自己威望還合情合理,希望黃生日後要好好度一度故仔,解釋要捉老邪神的原因。

引用:

原帖由 喜歡足球 於 2006-9-28 11:46 PM 發表

首先捉老邪神不是老天尊的主意，白骨丞相只是「冷手執個熱煎堆」，順手捉老邪神回泰國
有一期有講過老天尊一心要救番老邪神，第一在私人感情上二人鬥了半生，可說是「惺惺相惜」，老天尊唔捨得老朋友就咁走０左 ...

捉老邪神肯定是老天尊的旨意,因為是老天尊吩咐白骨丞相到白蓮教,看看有沒有得著,其中當然包括捉老邪神這件事,只不過白骨丞相沒想過老邪神有一口自絕的真氣,要勞動老人家運功救醒變成植物人的老邪神!

從戰略上來看,讓白蓮教生擒老邪神,羅刹教必定大舉進攻白蓮教,無論邊教贏都好,肯定元氣大傷,通天教就可坐收漁人之利,現在火雲邪神估到老父落在通天教手上,於是暗助元始門,侵略通天教地盤,是否得不償失呢?

其次,老邪神說到底曾是一教之主,捉了人家的教主,對組織來說是一種恥辱,即使火雲邪神就範,救出老邪神後,你估火雲邪神會否就此算數?何來對通天教好呢?金鵬給予贖金白蓮教,救了老豆蔘聖後,決定與羅剎教勾結,對付白蓮教,就是最好例子。

假設老天尊有一日被蚩尤捉了,文殊也要救他出來,不為什麼,只是關乎面子問題。

大家覺不覺得黃生對新著奸角好有心機描寫,例如老天尊鐵令公,明明已經俾文殊上位,還要在背後做這麼多事情,兼且不讓文殊知道,例如捉老邪神,廢白骨丞相一職,還代白骨蓋印文件,反映到老天尊對兒子的工作能力不太信任,種下日後兒子反他的伏線....

相反,看看我們長青主角王小虎,近排又冇戲做,而且性格婆婆媽媽,難登大雅之堂。好似小龍,明明白紙黑字話要到羅剎教總壇掃場,點知打完瘋妖後就算,如何向對著讀者交代?其實,編劇只要話真弓受了傷,打消小龍到羅刹教的念頭,總好過現在般,予人搵戲做的感覺。