袁彌明有口話人冇口話自己

袁彌明五十步笑百步

港台「城市論壇」噚日請咗選美出身嘅袁彌明擔任嘉賓，評論 o靚模現象。點知個節目一直播出街，片段就被網民放上網，唔少網民狂插袁小姐「五十步笑百步」、「有口話人冇口話自己」，仲摷番晒佢以往着三點式上節目、着低胸小背心烏低身玩平衡嘅玉（肉）照，話佢畀班 o靚模搶飯碗先激動。


唔係港姐會影嘅相
袁彌明喺論壇上話， o靚模風氣好差，又話係大眾傳媒造成，搞到啲女仔以為展示身體，就可以入娛樂圈。袁小姐即場仲多次拎起本周秀娜等 o靚模嘅寫真集，話有啲相極之淫褻不雅，「擘大兩隻腳影埋去，唔係一個港姐或者模特兒會影嘅相……不斷影同一個部位、篤波支波棍放喺心口條隙，本書絕對係意識不良！」
講到興起，袁彌明甚至話，若果香港繼續有咁嘅風氣，可能會發生越嚟越多社會問題，好似援交、拍 AV等等，將道德底線一層一層咁撕破，到時就返唔到轉頭。主持人都有問袁彌明，參選港姐時着比堅尼同 o靚模嘅分別何在，袁小姐就反駁話「選港姐着泳衣唔會趴喺地下烏低身！」