http://www.sharpdaily.hk/article/news/20130923/233384
專題人物：ATV前主播自爆7.1劈炮內幕
亞視近日正值多事之秋，亂局影響新聞部，元老陸續請辭，其中亞視主播兼副採主吳秀華也被波及。
吳秀華劈炮，就是因為心淡，有高層叫她封口避談敏感的政治新聞，「呢啲留返畀報紙做咪得囉」，言論逐漸被蠶食，新聞部變成如富士康的民工般工作，失去靈魂。
她向《爽報》怒爆亞視新聞部受政治干預而自我審查，最後她在7月1日決定抽身離去的過程，「主播唔只係花瓶，同樣要有思想有內涵判斷是非，乜都唔報得咁仲做嚟做乜？」
記者：羅鈺歡
吳秀華在2000年9月入職亞視，2007年離開，四年後再回歸。似是故人來，離開前仍記得亞視新聞部工作熱誠，重歸後雖人面依舊，但自己卻變成了陌路人，高層忌諱她，同事也嫌她多事。
剛進入亞視那些年，她仍覺是最美好的年代，「嗰陣只得23歲，仲記得第一次直播喺會展做立法會大選，我冇做大show經驗，竟然唔記得攞稿，仲對住鏡頭話『冇稿㖭』！之後被全行人恥笑，真係好大打擊，但上司伍健強不停鼓勵，叫我唔好因少少挫折就唔做」，她說當時亞視新聞部比現在積極得多。
2007年10月，因病辭職，那次是她第一次離開亞視。之後做過各類公關工作，包括到澳門漁人碼頭替前香港高官鄺其志做公關，又在盧子健的顧問公司工作，主力做公共事務宣傳。世事多變，2011年亞視找她回去做副採主，料不到竟成一場噩夢。
梁粉投訴 採訪臨時被取消
她剛回巢，就遇到新聞部地震，而自己一直奉行的採訪方式，在新的潛規則下，變成了自己的絆腳石，「我返去嗰陣啱啱係錯報江澤民死訊後，內部地震，換咗老闆兼主管，而呢啲人明顯有大陸背景」。這種背景開始發生影響，今年1月的施政報告答問大會後就開始出事，「我當時只係要求特首畀個指標和承諾香港人，而唔係講廢話蹉跎歲月，否則唔再爭取連任」。
平淡的發問，想不到卻觸動了梁粉神經，有人暗地向亞視高層投訴，「上司同我講有人投訴我答問大會中問題唔專業，言詞尖酸刻薄」。投訴後，有關政府事務的活動一概不讓她出席，「2月時新聞處追攞財政預算案出席記者人名，會係我去開，上司亦叫我出席，但到答問會當日，突然冇任何解釋下叫我放假唔使去，上司仲死撐冇人阻撓採訪自由，但就承認係我寸咗啲」，她明查暗訪找真相，結果不出所料，「有位智庫朋友透露，投訴確實係梁粉所為」。她感覺公司文化變得消極，往往避開報道敏感政治新聞，少做少錯，新聞人有我有就算。
新聞被刪剪 即日憤而辭職
她的不滿終於在7.1回歸時爆發，當日梁振英授勳，頒授大紫荊勳章給譚惠珠，「我記得梁競選特首時，譚惠珠任榮譽會長的現代化協會，曾經捐過100百萬畀佢，我就用呢啲公開資料解釋二人關係」，當日早上及午間新聞仍有報道相關內容，但六點新聞後，老闆竟以片段過長為由，刪剪捐錢內容，「嗰段交代片得十幾秒，晚間新聞成45分鐘，根本冇可能唔夠時間」，擺到明被河蟹，還有甚麼好說，她就在當日辭職。
眼見奉行的新聞自由每日被打壓，社會也越來越撕裂，吳秀華感到痛心無奈，「呢兩年喺梁振英領導下嘅香港走向兩個極端，歸邊或者對抗，一係支持一係反對，仲經常發生打鬥吵鬧，咁樣只會撕裂香港，對社會一啲好處都冇」，她沒有意欲倒梁，只強調凡事該有灰色地帶，「倒梁係不設實際，佢唔做，咁邊個做呢？反而要佢對香港人承諾先實際，特首與其日日俾人鬧，點解唔做啲成績畀大家睇！」
人人都說主播只是花瓶，何必如此動真格？她對此完全不認同，「人人都想見到個靚仔靚女報新聞，但唔係人哋叫你做乜嘢就做乜嘢，要有內涵同專業智識判斷」，她說新聞從業員的質素，也同樣影響新聞自由，「如果記者質素低，你根本唔知佢講乜，又點知要爭取乜嘢民主自由呢？呢啲核心價值遲早都冇，所以新聞小花只係小問題，記者嘅心態、能耐同熱誠先係最重要」。
