前面講開德國二戰 <看高> 虎式坦克的生產過程,現在再討論一下令它可以隨意走動的腳,就是車輪和履帶.

第一架虎式坦克在 1942 年 8 月面世,到 1944 年 8 月合共生產了 1,347 架.由於期間不斷為老虎更新和改良配件,所以老虎基本上可以分為前中後三期產品.而現在要討論的老虎腳,在三期產品中是沒多大分別,唯一的分別就是前中期老虎的路輪是有橡膠邊,後期老虎就取消了膠圈只用光身鐵轆,當中主要原因在於物資缺乏,正是非不為也蓋不能也!

老虎腳的履帶原來設計是分為運輸帶和作戰帶兩種不同闊度的履帶,即是每架老虎都一出世就配給兩套履帶,都可謂矜貴架勢.不過履帶打孖上呢支歌仔好快又同膠邊路輪一樣冇得唱要收皮,原因又係資源問題啦!

下面先了解一下老虎兩款履帶的規格,每條履帶由 96 節 (link) 連成 .
運輸帶 : 闊 521mm / 每節重 21.09kg / 接地壓力 1.43kg/cm2
作戰帶 : 闊 725mm / 每節重 30.11kg / 接地壓力 1.04kg/cm2


其實德國佬都唔想响老虎腳上搞咁多花臣,不過由於老虎出廠送貨係要坐平板火車,而如果老虎裝好作戰帶就會比平板卡車更闊,咁樣火車行駛時就會出現一定的風險.為左迎合平板車既闊度,只好將老虎每邊拆去兩行路輪,而又因為考慮老虎到站要落地,同埋可能要即刻同敵人隻抽,於是就只好又整條窄 d 既履帶出黎頂檔,咁就形成老虎有孖履帶既來由勒.


下面呢張老虎坐响平板車上既正面照,可以見到右便既運輸帶已經緊貼車邊,而响車底就放左兩條作戰帶,一眼就睇得出兩種履帶响闊度上既差異.




[ 本帖最後由 jj2jr 於 2010-12-25 13:26 編輯 ]

下便張相可以更清楚咁睇到放在平板車上既甩轆老虎究竟係點既樣.好明顯係老虎既運輸履帶已經同平板車既車斗齊邊,而老虎尾後放左一堆路輪.



[ 本帖最後由 jj2jr 於 2010-12-24 07:50 編輯 ]

老虎履帶打孖上呢支歌仔到左 1943 年中就已經開始唔唱勒,原因係德國的軍用物資開始吃緊有 d 唔夠使,如果整架老虎要準備多套履帶實在係浪費.於是由後期老虎出廠開始,所有老虎都只配給一套運輸履帶,咁做重可以慳番兩邊夾埋成 16 隻路輪既資源.小數怕長計,呢下舉動實情係慳番唔少!

下面整張老虎車轆示意圖,圖中由上望落去車頭向右,黑色既就係當裝上運輸履帶時要拆下既路輪.

下面有兩張裝有不同闊度履帶的老虎車轆特寫.二者都是車頭向左,因此易於比較路輪和不同履帶的關係.

上面是裝上運輸履帶的後期老虎,它的路輪係全鐵製做,留意第一個驅動輪係齊履帶邊.而下便既就係上齊晒所有路輪同裝上加闊履帶既老虎,路輪同上面有好大分別,只有近中心有 6 口螺絲,因為佢係舊式封上膠圈既前中期設計,而驅動輪更因為履帶闊而睇起上黎好似縮左入去咁.







[ 本帖最後由 jj2jr 於 2010-12-25 13:49 編輯 ]

點解唔見晒我 upload 果 d 公仔既?

成日斷鈴睇唔到公仔,用附件上傳又得半截,真係激差氣,睇怕未到除夕就會激到爆缸係咁先勒.

老虎腳仔的佈局係前面一個驅動牙輪 (drive sproket) ,之後跟住係 8 行路輪 (road wheel),最拉屎就係尾牙輪 (idler).

路輪連同避震機的結構係由一支橫穿兩邊車殼的高強度金屬杆作為扭力避震杆,叫做 <扭力杆 torsion bar> ,杆的一頭固定鑲在車殼一側內籠,另一頭就穿過對面車殼,再套在一個之字形的避震臂上,避震臂再穿上三個路輪,於是就組成左一套有獨立避震的路輪腳仔系統勒.

下面有張公仔表示出老虎腳仔路輪部份既扭力杆同鐵餅路輪既關係.車殼內籠闊 1,800mm ,扭力杆長 1,890mm,因為有 90mm 係藏左响右面既車身度.扭力杆中點離地 590mm ,左面固定在車體內壁一個可拆的佛蘭 (flange) 內,而右面就套左响一條之字形既避震臂度,避震臂伸出車外向下微微傾斜再穿上路輪.呢張公仔入面冇畫出車外的部份避震臂,希望大家睇得明.不過以各位既天份再加上時為聖誕再近新年,肯定各位一定會話 no problem, right?







當老虎行經不平地面時,路輪會因應地面的起伏而向上下做出垂直移動,避震臂就會以扭力杆為圓心做出順時針或逆時針擺動,而作為避震系統的主要角式扭力杆就擔當一個 "扭繩" 任務,為路輪和避震臂提供往復和緩沖.據說在所有坦克之中,坐在老虎里是最舒服,行駛時很平穩,就算係叫個馬拉佬响入面拉茶撞咖啡都唔會打瀉咁話.

下面再整張扭力杆既三 D 圖補充一下.

老虎路輪組由扭力杆加避震臂和一組三個路輪組成,路輪是交疊壓在履帶上,形成強大的承托力.德國佬在設計上真是花盡心思,為了節省空間,左右兩邊的之字形避震臂的曲向不同,左面的避震臂向前曲,而右面的就向後,而左右兩套路輪的軸心仍保持同一直線.不過在後期的老虎因為希先生的身家少了,出廠時就直頭取消了下圖中黑色部份的路輪,唉,真係床頭金盡壯士無顏.

另外由於恐防最前和最後的路輪在擺動時會撞到驅動輪和尾轆,於是就在這兩個避震臂上加上了一個液壓筒,用作控制這些頭尾避震臂的位移行程,即是無論點震都好,都唔會 fing 過頭打到驅動輪或者係尾輪.

下面有張三 D 圖可以清楚標示出呢抽扶翅既模樣.

下面張公仔可以睇到老虎右面的驅動輪和第一同第二擔路輪既交疊佈局,留意驅動輪上面果個有 20 齒既牙圈,係用螺絲另外上落去,而唔係成隻鑄出黎既..

呢架老虎條履帶打左柴,班大哥又要落手落腳去整,一條履帶有成兩噸重,唔怪得背向鏡頭果位阿哥話 : 妖 ~~~ 又斷!

這是在西西里島上的一頭老虎,時為 1943 年 8 月 2 日.老虎的右面少了第一擔路輪的最外面兩個,但還可以繼續上路,也可以清楚看到它換上了作戰履帶.

呢隻老虎要換右面前排路輪,睇見果 d 泥辦就真係頭都痕埋.

呢個重大劑,直頭要換驅動輪添.留意驅動輪分為有疏勒同密實兩邊,有疏勒既向外,密實果邊就向內,即係貼實個車殼,因為入面有套波牙,用黎轉郁驅動輪再帶動履帶既.



[ 本帖最後由 jj2jr 於 2010-12-26 15:28 編輯 ]

如果大家有留意一 d 老虎既戰場實照,有時會發現好多老虎都係冇左第一排路輪最外面果隻,於是會諗到係未老虎真係咁易就甩轆呢?

原來誰不知好多老虎,尤其係响東線既老虎,佢地既坦克兵都會專登拆低自己架坦克前排第一行最外面隻路輪.原因係响零下氣溫地方,大雪同冰凍既泥漿好容易响短時間內,會將停低既老虎既驅動輪同第一隻路輪 "痴" 死,當坦克再次開動時,就會夾硬拉斷履帶,於是又要出黎再講 ~~~ 妖,又斷!

找到兩隻現存在世的老虎照片,可以好好的再次觀察和了解老虎使用的兩種不同履帶.


現存在英國的第 131 號老虎,由它的路輪可以知道它屬於早期虎,它換上了一套作戰履帶,也掛上了所有的路輪,左面第一軸路輪的最外一隻路輪是覆蓋在驅動輪和第二行路輪之上.





另外一隻老虎現在養在法國.這是一隻後期虎,身上塗上了防磁裝甲和使用沒有膠圈的路輪.由它的驅動輪牙平齊履帶所見,於是可以肯定這是一套運輸履帶了.而由於履帶窄了,所以就沒有裝上最外層的路輪,輪子佈局和上面 131 虎的完全不同,現在變成是第一軸路輪反過來躲在驅動輪和第三軸路輪之後了.

來一張老虎腳的大特寫,看到履帶上那些突起的牙齒,令人有點毛骨悚然的感覺.

引用:

原帖由 dealerboy 於 2010-12-30 17:16 發表
#14#15#16又睇唔到 巴打

呢隻老虎要換右面前排路輪,睇見果 d 泥辦就真係頭都痕埋.

引用:

原帖由 dealerboy 於 2010-12-30 17:16 發表
#14#15#16又睇唔到 巴打

呢個重大劑,直頭要換驅動輪添.留意驅動輪分為有疏勒同密實兩邊,有疏勒既向外,密實果邊就向內,即係貼實個車殼,因為入面有套波牙,用黎轉郁驅動輪再帶動履帶既.