舊日的香港樂壇

我在八十年代開始聽歌. 當年的樂壇可說是十分蓬勃, 巨星亦唔少 -- 有阿倫, 哥哥, 阿梅, 小鳳姐, 羅文, 甄妮, Sam Hui, 林子祥, 陳百強...... 真係十隻手指都未必數得完. 記得當年學友出道時, 佢話見到以上人物時, 自己都會嘩嘩聲!

除咗巨星之外, 就算其他半紅不黑的人, 例如露雲娜, 林志美, 雷安娜, 鮑翠薇等人, 都有一定的實力, 而且亦有一些膾炙人口的歌曲.

另外, 當年仲有唔少樂隊組合 -- Beyond, 太極, 草蜢, 達明, Raidas以至夢劇院, 有才華之餘亦有自己獨特的風格.

仲有一點不得不提, 就係歌詞了! 當年的詞真係好出色, 唔少歌曲都有人生哲理, 就算普通的情歌, 亦起碼文辭暢順.

反觀今日的樂壇, 好似沒有什麼巨星. 陳奕迅同容祖兒雖然好多獎攞, 但他們好像沒有巨星的感覺. 容祖兒雖然平了阿梅的紀錄, 但相信沒有人會將佢同阿梅相提並論. 樂隊組合好像少了, 能令人留下印象的, 就恐怕更少. 至於歌詞...... 好老實講, 我好多時都唔知up乜.

當年讀書年代, 零用錢唔多, 但係都好樂意捱肚餓儲錢買唱片. 今日一舊水買隻cd, 我絕對負擔得起, 但真係好少買了.

上一次買的cd係邊隻? 係劉美君! 又是八十年代的歌手.