[MAR 27]
唔好跟我買！
3月26日，周一。恒生指數升73.21，收19765.85；成交三百九十八億六千零八十三萬八千元。3月期指升61點，收19760點。
油價上升，令中石油（857）升1.8％，報八元九角四仙；中海油（883）升0.9％，報六元五角三仙。《金融時報》報道，中芯國際（981）可能向策略投資者出售股權，集資五億美元，令股價上升11％，報一元一角四仙。
花旗推介富力地產（2777），目標價十九元三角八仙，估計今年每股獲利一元零四點五仙，純利再升50.8％，未來O十五點七倍；同時推介國浩（053），目標價一百一十三元。股市繼續流行炒個別發展。
OPEC成功令油價止跌
OPEC 2月份減產一百萬桶一天，係近十年內減幅最大嘅一次，令油價由二十個月低位反彈25％，由五十美元重返六十美元之上，達到OPEC嘅要求。3月15日會議後，OPEC決定維持現水平石油產量，六個月後再開會。亞洲金融風暴後，油價喺1998年12月21日一度跌至十二年低位十點三五美元，其後OPEC一再減產去阻止油價跌穿十美元，油價開始爬升。今年OPEC成功阻止油價低於五十美元，至於能否長期保持油價响六十美元之上？有待觀察。有一點可以肯定嘅係，低能源時代已離我我地好遠好遠矣！
1971年美元同黃金脫鈎後，整個七十年代投資大方向係炒美元貶值；1979年年底雪茄伏上台，將利率提升至CPI增長率二厘以上，才成功控制住通脹。1978年中國政府開始背離共產主義制度，走自由經濟路線，上述情況為全球經濟帶來近二十年繁榮期。小插曲係亞洲其他國家因競爭力唔及中國，喺1997年7月起紛紛宣布貨幣貶值，引發1997年8月亞洲金融風暴，其後亦由聯儲局減息應付過去。2000年美國經濟盛極而衰，格老透過減息創造信貸，阻止經濟衰退响美國出現。因世界資源已無法應付資金泛濫所產生嘅新需求，令資源價格上升。去年係咪另一改變？雖然中國「十一．五」規劃決定走節約型經濟，但至今未見成效。至於今年2月美國次級按揭債券市場惡化，亦係另一令人心驚驚嘅隱憂。 全球生產力過剩，令各行各業毛利率下降（甚至消失），金融市場則由信貸泛濫支持，喺高位牛皮，最後何去何從？真係木宰羊。商品牛市已完成咩？美國物業市場會點？中國經濟轉型成功咩？一連串問題都冇肯定答案。此所以踏入2007年股市咁波動，2007年亦係我老曹最睇唔清方向嘅一年。
升市莫估頂又一明證
滬深A股指數再創新高，但今年1月起已同RSI走勢背馳【圖】，代表呢次滬深A股升市唔會持久，或遲或早出現另一次拋售潮（會否出現三浪背馳？喺唔成熟嘅股票市場，走勢準確性較成熟股票市場高）。升市莫估頂又一明證，嗰D認為滬深A股指數見頂者，近日又不知如何解釋。今天A股指數受惠於中移動採購3G板塊，令相關股份有良好表現，其後係北京奧運板塊亦因奧運進入倒數五百天而上升；唔係咁，四元以下股價者都成為炒賣對象，好多垃圾股皆出現雞犬皆升現象。上述情況極之唔合理，唔少股份業績根本上無法支持依家嘅股價。作為精明投資者，响選股之時不應忽視公司業績，例如公司經營狀況、係咪行業龍頭股等；反之，所謂3G概念、奧運概念所引發嘅股價刺激，相信好短暫。 1978年中國實施改革開放政策後，中國走上工業化之路，一如香港由1950至80年嘅情況一樣。呢段日子已漸漸完成，中國經濟已進入「後工業化」之路，即由投資及消費漸取代工業及出口，成為帶動經濟繼續增長嘅動力。八十年代香港喺轉型方面得天獨厚，令1984至97年香港經濟進入由內部消費帶動嘅另一次繁榮期。去年中國「十一．五」規劃嘅目的係協助中國經濟由前工業化轉入後工業化時代，但中國嘅道路崎嶇好多。
今年中國外貿盈餘估計高達二千億美元，資金泛濫情況超過1984至97年嘅香港。去年中國GDP增長率高達10.7％，係1995年以來最快；外貿盈餘高達一千七百七十五億美元。人行雖然一再加息兼提升銀行存款保證金率，似乎一D效用都冇。2月份L貨幣供應增長率仍高達17.8％，L2增長率17.2％。中國七十個主要城市2月份樓價較去年同期升5.3％（深圳升9.9％）；滬深指數今年3月較去年同期升160％！估計人民幣6月前仍會再加息，但作用有幾大？中國會否一如八十年代日本經濟，要經歷一次boom & bust？上述係好多專家提出嘅問題，但冇人可以有肯定答案。 中國樓市漸漸兩極化。今年2月底止北京朝陽區現樓平均價一萬三千一百三十三元一平方米，較去年同期升三千九百零八元，漲幅達42.4％！全球豪宅皆愈來愈貴，上述已非香港特有現象。
內地亦掀起移民潮
1996年前移民加拿大及澳洲者，以港人及台灣人為主；1996年之後，中國人漸成主流。來自大陸嘅移民，大部分係學歷低、年齡大、地域性強嘅新發財，屬來路不明嘅有錢階層。呢批移民過去以中國東南沿海一帶為主，尤其係福建人，大多喺五十歲左右、學歷普遍偏低但敢於冒險，唔少靠倒賣或承包嘅經營方式賺取財富；近年移民潮開始蔓延到上海、江浙甚至中國中西部。過去移民以個體戶及小企業主為主，近年多咗大企業股東甚至CEO群體，學歷開始向上移，年齡開始往下走。大部分移民喺國內所做嘅生意唔大，一般先把妻子及子女安排到海外，响嗰度買屋買車，子女接受當地教育，自己回國做生意，賺到蚊年到海外去。一如八、九十年代香港嗰批移民一樣，呢批小企業主只能响兩國之間游走，飛來又飛去，有時亦帶自己孩子及妻子回國度假，更多時候係傾電話同e-mail。
過去發生喺香港移民身上嘅事，依家同樣喺中國移民身上發生，就係當家庭生活及事業開始分裂後，漸漸一家團聚日子減少，問題便出現。呢批移民，無論喺加拿大或喺中國境內都算較富裕嘅一群，雖然資金來源不盡相同。港人當時移民理由係怕九七回歸，呢批中國人則認為中國政府對私有產權嘅保護仲係好脆弱，覺得擁有一定資產後，都係移民海外更有保障，移民後再唔使擔心政治事件。另一個現實係自己嘅事業仲喺內地，如離開內地，自己嘅事業便完蛋，結果大部分家庭都係妻子及子女先入籍，自己仍保留中國人身份，留响中國做生意。形成一個家庭成員分別喺兩個國家境內，許多家庭悲劇亦由此發生！2005年移民加拿大嘅中國人共三萬六千四百一十人（包括經濟移民及家庭團聚移民兩大類，係加拿大各國移民人數之首！），最近中國政府通過《物權法》，會否減少國人「經濟移民」出國？家吓最多人移民海外係浙江溫州市，人口七百五十萬，其中有五十萬人已移民海外（相信1997年香港亦好厲害，只係冇準確數字，估計亦有唔少於五十萬移民海外）。
中國人要移民外國？此乃中國人嘅悲哀。但願有一天中國人毋須再因為擔心政治問題而移居海外。
不管你做乜嘢事，良好習慣都係決定你成敗嘅重要因素。理財亦一樣，好多人認為富向險中求，其實係一個足以致命嘅錯誤觀念。1974年我老曹亦相信上述觀念，差D被害死，依家明白逃避風險才最重要。例如1997年逃避香港物業大跌市、2000年冇沾手TMT股泡沫。我老曹認為，保本永遠較增值重要；失敗嘅投資較唔投資損失更大！
糊糊塗塗賺錢跌市輸突
投資成敗並非由你擁有幾多蚊年去決定，而係取決於你嘅智慧同眼光。少賺糊塗錢！好多人糊糊塗塗地投資，喺牛市中糊糊塗塗地賺錢者絕不少數，只係一旦面對跌市，通常都係輸突。跟風最唔好，我老曹討厭別人連諗都唔諗便信你。例如去年年中我老曹喺研討會上公開睇好內地金融股，至於買邊隻？投資者應自行決定。仍然有唔少散戶要求我老曹畀個冧巴便信晒你！通常我老曹都唔回應，因為責任太大也，有邊個知道未來風險係點？我老曹連自己亦唔信，你地咁信我，我跳樓都唔掂。唔好跟我買，應睇完本欄文章後自己去思考分析，做自己金錢嘅主人，承擔自己必須承擔嘅風險。萬一形勢不利便行使止蝕盤保護，絕對不可跟我買！
養成良好習慣，一生受用。如果跟我買，我老曹睇錯怎麼辦？入市之前未諗止蝕位响邊嘅人，遲早損失慘重離場。唔好奢望自己一天暴富，如你能令資本每年增值15-20％，已經十分了不起（每年升值20％，以十萬元開始，三十年後你已擁有二千三百七十多萬元）。
雅高企業（8022）、中國資源開發（661）、駿新集團（091）、泰山石化（1192）、利君國際（2005）、富聯國際（369）、康健國際（8138）、香港體檢（397）、恒基地產（012）、恒基發展（097）、南聯地產（1036）、金匡企業（286）停牌。
中石化冠德（934）3月29日；利基控股（240）、中富控股（1191）、華能國電（902）4月3日；華潤創業（291）、中國地產（1838）、順誠（531）4日；新宇亨得利（3389）、悅達控股（629）10日；新灃集團（1223）11日；招商局國際（144）12日；陸氏實業（366）16日；Incutech Invest（356）18日公布業績。
相關搜索目錄: 投資 銀行 採購
