米芝蓮指南

個人認為呢本嘢的確有參考價值，不同人不同種族都會對口味有差異，但總不會有人喜愛食狗屎，我想講人人口味不同，但對於美味的定義，一定會有共通點，所以呢本書可以睇嚟參考吓！但係佢冇列出嚟的餐廳，都可以好好食！而我亦信佢列得出的食店，衰極有個譜，所以可以睇睇！唔洗咁抗拒！
有人話本港特色的茶餐廳入唔到圍，係鬼佬唔識貨，又話一本米芝蓮指南唔可以了解本土飲食文化；我又想講講，呢本飲食指南係指出邊到有好嘢食，服務如何，而唔係一本食飲文化指南，識飲識食同識飲食文化，係兩回事！講真茶餐廳的食品，好地道，但未多數唔會係一流，因為茶餐廳貝標顧客係一般普羅大眾，價錢一定不高，自然張貨就價，食物未必可以即叫即做，食物質素多數唔會好高，坦白講一碟楊州炒飯，茶餐廳多數係多油，有時炒得唔爽身，用啲乾身鞋口的叉燒粒炒，多數都比唔上一間酒家炒出嚟的貨色，干炒牛河又係，茶餐廳多數炒到勁油，肉有時un！一句到尾，講好食，茶餐廳多數唔入流，當然會有好食的茶餐廳，例如翠華，佢好出名係富豪茶餐廳，但係好貴！試問全港有幾多真係好食而又品質穩定的茶餐廳丫！茶餐廳純粹係香港人的情意結，也是香港地道的飲食文化，但係真係講好食，佢唔係好入流！
你話鬼佬因口味不同而唔識品嘗香港美食，我都信，街邊有不少出名勁好食的牛腩崩沙腩一串串咁食，山洞魚旦，北角雞旦仔，這些香港人深愛的美食，鬼佬基本唔識欣賞，所以冇入冊，我亦估計不少香港人深愛的煎蠔餅，鬼佬多數會唔特別鐘意！我以前工作同個鬼佬去食中菜，我老細挾了舊釀苦瓜比鬼佬食，同佢講Bitter melon，佢鬼佬食了一口，立即面露難色，即吐！雖然中國人也有少數人討厭苦瓜，但鬼佬多數唔鐘意，這是口味不同！
再講呢本指南，就算我們不認同，但的確有助香港搞起飲食業，成為更國際化的美食中心，有助香港提升地位及有助經濟，就算呢本嘢唔可以坤到我地本地人去食都好，起馬坤到鬼佬去食，亦未嘗不好！呢本書有其存在價值！