我係呢間教堂領洗領堅振 記得陳伯良神父 重有好多狼狗 我姑姐住光明街 我成日係下面玩

麥神父是陳神父之前的本堂神父，記憶中佢幾惡下.我讀中國兒童書院,係萬茂台,我表哥表弟讀基立,大概66,67左右,表弟可能69畢業,佢叫梁世榮,你識吾識？你細個又去邊度玩？有咩開心事？

在灣仔長大有一種奇特的感覺,唔知大家有冇,我搬離二十幾年,隔一個月度都會回來行下,尤其大道東,太原街,春園街一帶,邊走邊看,見到不少上年紀的人,熟口熟面,舊鋪頭愈來愈少,真令人感慨.光明街,進教圍等地方,大群細路在街上嬉戲,街坊互相關照的日子已一去不返了。還記得光明街頂的理髮檔叫”余祥理髮”,街口有間”偉倫士多”,大牌檔有幾檔,當時重用炭爐炕多士,細時覺得暑假很長,每天都在萬茂台,活水,東都（兩位知否？即秀華坊）玩餐飽,十幾個細路,非常開心冇煩惱.有一種忘命遊戲唔知兩位玩過未,就係坐係塊薄板上由光明街滑下大道東,當時交通不繁忙,未出過意外,如果係現在,肯定嚇死哂d家長。

我記得基立旁邊的海陸豐公學,d學生兩個人抬住一大桶水清潔課室,搞衛生,係我地眼中好神秘,好特別.以前教堂的聖像而加放在門口,新教堂當然唔及舊的甘有規模,不過時代演變,拆左都無話可說.唔拆又點有舊可懷呢？細時最興奮係去望子夜彌撒,細路仔冇幾可出夜街,在教堂外的空曠處遠望夜空,遙想渺茫的將來,這種情懷現在已沒有了.彌撒後老豆帶我地去波士頓鋸扖,係一年一度大事.聖堂當年傳說有神父被刧殺,唔知真定假呢？

吾怪得d人話聖堂養狼狗防賊啦,好多天主教神父都係惠州海豐人,我都係,我阿爺個代在鄉下已經入教,有邊個知點解海豐特別多人信天主教？兩位記吾記得電氣街口的康寧士多？細時都花左好多錢買零食.對面有個公廁,當時光明街d屋冇私家廁所,要去公廁,打風落雨的日子都幾摻......

好懷念春園街同星街既車仔面, 一毫子一個面餅,其他配料都係一毫,加腩汁,好好味.正過而加d車仔面好多.60年代太原街口有間賣雜食鋪頭一毫子一條春卷吾知有冇人有印象？重有以前去大戲院睇戲有零食賣,d女仔一邊捧住一盤食物,有波羅,雞腳,老味等,一手拿電筒照住叫賣,真令人懷念.

有冇人讀中國兒童書院？入黎吹下水啦.我68年畢業既.