大學生傷風敗俗 淫賤黎教壞細路
嘩嘩嘩！搞乜鬼家陣嘅大學生咁傷風敗俗o架！大學之道唔係應該「明明德」嘅咩，點解會變咗「淫淫得」o架？
唉，大學生荒淫事件唔止一單，幾乎每間學術殿堂都春色無邊。有自稱理工大學宿生嘅學生爆料，宿舍不時有男女學生喺多用途活動室開狂歡派對。前一排之嘛，宿舍慶祝萬聖節，學生穿上奇裝異服扮鬼扮馬，愈玩愈癲之下居然做出不少意淫動作。有男生女生當眾嘴對嘴熱吻，有男生除低長褲露出底褲，又有女生被人將頭部推向男生下體位置模仿「口部交流」，亦有人夾硬將同學壓落地下除衫剝褲，至於向鏡頭豎起粗鄙中指，相對嚟講算係小兒科咯。
理大係咁，身為最高學府嘅香港大學又係咁。本報記者喺港大陸佑堂目擊一對癡纏男女，光天化日下濕吻都嫌未夠激，竟然放蕩到喺一條開揚走廊埋身肉搏，男生掀起女生衣服，伸手入內又摸又摷。由於過程相當兒童不宜，請恕功夫茶唔為大家詳細描述嘞，總而言之事後男生幫女生整理胸圍。
喂，唔好怪功夫茶細膽，唔敢講兒童不宜嘅鹹濕細節。你知啦，影視處同淫審處好鍾意玩選擇性檢控o架，一個唔覺意有警察叔叔踩上門拉人封舖，控告功夫茶「發放不雅物品」，根據《淫褻及不雅物品管制條例》最高刑罰收監法辦，咁咪無辜辜加個箍？大家要記住，功夫茶唔係淫賤黎，係冇辦法得到港英餘孽縱容包庇嘅。
嗱嗱嗱，大學生嘅荒淫行為未講完o架。網上討論區有人轉載一班相信係就讀城市大學嘅大學生，狂玩拔恥毛餵食遊戲。短片顯示有一班男女大學生飯局過後，有男生突然伸手入褲內拔恥毛塞入一名四眼男生嘅口，受害嘅四眼男生初時狂笑，後來不甘示弱亦伸手入褲內拔自己嘅恥毛回敬對方，全場哈哈大笑，女生大叫黐線。
問你服未？問你死未？父母辛辛苦苦養到自己心肝寶貝入讀大學，原來唔係正正經經讀書，而係醉心於淫賤遊戲甚至係情到濃時真人表演，嗰種恨鐵不成鋼嘅痛心疾首，應該同你見到亞運足球中國隊慘吞日本隊三隻光蛋差不多。
大家可能會問，點解今時今日後生仔女喪得咁交關嘅呢？功夫茶唔想形容為「自甘墮落」，不過如果你話係「不知所謂」應該都唔會有錯。功夫茶唔係上知天文、下知地理嘅大學教授，冇辦法為大家提供一個學術性答案，只可以根據經驗常識講一講社會現象，三個字：淫賤黎。
冇錯，又係淫賤黎教壞細路。道理其實非常顯淺，淫賤黎率領壹淫媒日日誨淫誨盜，違反《淫褻及不雅物品管制條例》已經過百次嘞，餐餐都冇得到應有嘅懲罰，大家認為會有乜嘢後果呢？正所謂，近朱者赤，近墨者黑，香港呢一個社會長期受到淫賤傳媒薰陶，心靈脆弱嘅小朋友想唔學壞都難啦！
大學之道在淫淫得，在胸圍，在除衫剝褲，吾不欲觀之矣！
http://orientaldaily.on.cc/cnt/news/20101110/00190_001.html
