振英演講　句句寸唐唐

下屆特首候選人梁振英（ CY）噚日為中大領袖系列講座演講。
CY演講內容大談自己過去喺特區籌委會如何向中央獻計，令中央落實唔少至今對香港整體社會都有深遠影響嘅政策，包括對駐港解放軍施以封閉式管理；唔准內地人來港做女傭等，暗寸唐唐。
經常搭電車地鐵關心基層嘅 CY話，擔任政治職務係要為人民謀福祉，「唔係為自己留名後世，更唔係為咗光宗耀祖」。唔少人聽到，即時諗起唐唐家臣林大輝早排講過，唐唐搞關愛基金，「可以光宗耀祖，又可以一敗塗地」呢番說話，認為 CY矛頭指向。
CY自己經常搭電車、搭地鐵，中午又去快餐店買飯盒，「三年前當我開始提貧窮問題時，社會上有話事權嘅人，好多唔信貧窮問題嘅普遍性，更有人認為唔需要有最低工資」，有先見之明。
有位女大學生發問：「我想問吓梁生，從 2007年 11月起，你開始發表關注基層嘅言論，唔知背後有乜原因？」。CY臉不紅耳不熱答：「原因好簡單，因為香港貧窮問題越來越嚴重。」
不時插政府嘅 CY，噚日大讚煲呔「係一個完全稱職嘅特首、一個負責任嘅特首」；臨尾仲要加句「我唔係個隨便肯定一個人嘅人，亦唔係一個隨便去擦鞋嘅人」。

[ 本帖最後由 志專 於 2010-11-13 07:44 編輯 ]