大家都知道我講邊個
同艾未未唔同﹐拉登叔晌香港知名度大得多
可能連賣菜阿嬸都知道拉登係乜水
但拉登叔做過 d 乜 ?  據講話美國911壇嘢係佢策劃 ....
話就係咁話﹐但所有關於  911 嘅事都只係美國佬一面之詞


拉登點樣策劃 ? 佢又點樣參與具體行動 ? 其實佢有冇參與 ?

二次世界大戰結束後
戰勝國成立兩個軍事法庭 - 紐倫堡軍事法庭﹐遠東軍事法庭
將戰敗國軍官同政要押上軍事法庭審判
按罪名同罪行輕重判刑﹐或判死刑或判監禁
本來勝者為王﹐戰勝國可以下令軍隊一見到戰敗國軍官或者政要就就地正法﹐當場格殺
不過現代社會大家都話自己係文明人
冇理由好似幾千年前果種野蠻人﹐或者好似成吉思汗屠城又或者美國打紅番年代咁野蠻血腥
二戰後和平時期一樣有被西方指控犯戰爭罪行 - 如南斯拉夫總統米洛舍維奇、波黑塞族領袖卡拉季奇...
就係被拉上海牙法庭
最近一單個案就係薩達姆晌自己伊拉克受審後被判死刑

拉登唔係國家政要﹐又唔係軍人
所以冇理由捉佢去海牙法庭受審
指控佢犯嘅罪行係恐怖襲擊 -  最主要係指 911搵飛機撞美國世貿雙子塔
所以佢完全係一個刑事罪行疑犯
就算將佢罪行提升到軍事襲擊層面﹐最多係拉佢去美國軍事法庭受審
一個開口人權埋口人權﹐每年仲厚起面皮出個各國人權報告嘅國家
就係咁未審就就地行刑
其實就算晌戰場﹐對住一個手無寸鐵嘅俘虜就地正法
都可以被告上軍事法庭控以謀殺罪行

撇開狗噏人權唔講
一個活拉登價值非同小可
唔係開口埋口反恐咩？
阿爾蓋達頂頭領袖知道哂組織結構﹐點樣跟各地分組聯絡﹐點樣執行計劃…
資金從何而來﹐點樣分配到各地分組去營運….
當年點樣策劃911 ？有幾多人執行計劃？行動細節係點？今日潛伏晌美國嘅成員有幾多…..
捉到個分組二線頭目你都如獲至寶去套取資料
何況捉到最高層第一號頭子？
當然拉登唔會輕易招供﹐冇問題﹐拉返去關塔那摩基地慢慢審
用盡所有催眠法﹐高科技腦電波刺激大腦﹐迷糊人嘅神智嘅藥物諸如此類
有乜衣郁重手過頭阿登叔頂唔順香咗
發個公佈話登叔重病 -例如急性腎衰竭﹐急救無效....

睇吓美國佬自己公佈嘅訊息 :

引用:

美國時間 5月 2日零晨奧黑宣佈擊斃拉登 ( 爛果報 5月3日新聞 )

“ 於巴基斯坦時間周日凌晨展開，主力是世界上最精銳的美國海軍海豹突擊隊，派出了三架直升機突襲拉登所在大宅，拉登反抗開火，在駁火中頭部中槍死亡。拉登兩名信差和一名兒子亦被擊斃，一名女子遭屋內人推出來擋子彈身亡，另有兩名女子受傷，拉登另外六名兒子也被殺。”

美國時間 5月2日白宮發言人出嚟答記者提問 ( 爛果報 5月5日新聞 )

引用:

“白宮發言人卡尼（ Jay Carney）前日在記者會上堅稱美軍「在可能情況下都希望生擒拉登」，但轉頭又說拉登當時其實手無寸鐵，只是突擊隊遇到重大反抗才將他擊斃。
這個說法跟白宮之前宣稱拉登持 AK47跟突擊隊駁火、找妻子作人盾有很大出入，記者即質疑：「他當時沒有武器呀。」卡尼回答：「但大宅內很多人有武器，也發生激烈駁火。」記者再施壓： 「但那些人都不在那房間（大宅三樓的睡房）內。」卡尼不肯透露手無寸鐵的拉登到底作出怎樣的重大反抗，只說「反抗不一定要有武器」。卡尼無法自圓其說，竟叫記者向國防部查問。”

跟住國防部同白宮發言人講嘅嘢唔夾嘴型﹐你一句我一句互相矛盾
5月6日爛果報就咁講 :

引用:

“美軍海豹突擊隊成功擒殺美國頭號公敵拉登，本是奧巴馬政府一大成就，但官員對擒殺過程前言不對後語，由突擊隊員遭遇激烈反抗爆發槍戰，到原來拉登大 宅內根本沒有人開過一槍，突擊隊員槍殺拉登只因他不是赤裸，可能在睡衣下穿着炸藥背心才開槍。說法天天不同，為免講多錯多，白宮前天（周三）決定封嘴，但此舉令外界思疑當局有所隱瞞的陰謀論更加沸騰，引爆白宮一場公關大災難。”

而英國《泰晤士報》就爆出 :

引用:

“白宮口口聲聲指海軍海豹突擊隊是遇到拉登反抗，才將他殺掉，但親眼目擊父親被殺的拉登 12歲女兒薩菲亞（ Safia）向巴基斯坦情報員供出另一版本，指美軍是先制服了父親後，再將他殺死。
拉登被殺死後，由於美軍直升機不敷應用，只載走拉登遺體和大宅內的男子，薩菲亞跟母親被巴基斯坦軍警帶到首都伊斯蘭堡附近城鎮拉瓦爾品第（ Rawalpindi），接受治療和情報機構人員的問話。她是事後留在大宅內的八名婦孺之一。
指拉登並非身在頂樓
阿拉比亞電視台引述薩菲亞的供詞說，美軍攻入大宅，沒多久就制服了拉登，然後在家人前將他殺死。報道又指，拉登當時身在地下，而非美軍所指的在頂樓。而且巴方亦質疑美國指大宅發生過槍戰的說 法，指沒有一顆子彈曾經由大宅射向美軍或他們的直升機，是機械故障導致其中一架直升機墜毀。”

經過呢幾日 d 料陸續抖出嚟
可以肯定嘅係拉登冇武器冇反抗﹐但海豹接到嘅命令係格殺物論 –唔留活口
我上面都分析過一個活拉登嘅情報價值非同小可
點解唔留活口 ？ 係咪唔可以俾佢上美國法庭受審？
上到法庭佢講乜都制止唔到佢﹐怕佢講 d外間人根本諗都諗唔到嘅秘密？
總之一句講哂, 唔可以俾佢講嘢！

我算你係有難言之忍﹐唔可以留拉登活口
但如果真係為咗反恐
一個死拉登一樣好有利用價值
對於一個經驗豐富嘅法醫﹐可以由屍體搵出好多有用資料


( 講住咁多﹐暫停﹐遲 d 再講... )   

美國佬真係無恥到絕頂
做低拉登掟條屍落海後 -  不過我對呢點有保留
呢兩日就搏命屈阿登叔
話晌佢個豪宅搜出嚟嘅電腦硬碟內有資料顯示登叔計劃緊一連串大龍鳳
包括炸美國境內鐵路﹐又計劃晌洛杉磯、紐約、芝加哥發動襲擊....
一句講哂 - 死無對證﹐你點砌佢生豬肉佢都冇得辯駁
都話架啦﹐幾十個精良裝備嘅海豹特擊隊殺手面對一班婦孺
同埋一個只著住睡衣嘅拉登大叔  ( 咪睇佢滿面鬍鬚﹐其實佢仲後生過成龍 )
咁擒青非要攞佢命為乜 ?
家下就你話乜都得
真係要反恐﹐留佢活口攞資料唔好咩 ?
就算條屍一樣查出好多資料
比如話 - 成日有傳言拉登有腎病﹐呢 10年佢靠咩藥物維持 ? 有冇洗腎 ?
佢有冇補過牙 ? 有冇做過其他手術 ?
法醫檢查條屍就知道
一路謠傳佢晌阿富汗山區逃避追捕
但山區冇可能有合資格醫療條件去醫治佢
順籐摸瓜﹐就可以查出好多跟拉登有關連嘅人物地點

當然﹐最詭異就係毫無必要地做瓜佢
跟住又毫無必要地幾小時內用直昇機運去航空母艦
跟住掟條屍落海餵魚
一個自稱世界警察嘅超級大國
做 d 嘢好似弱智咁 - 或者佢以為世界所有人都係弱智
總之啋你哋都昂九

你話拳頭夠大係咪爽呢 ? 鐘意點都得   


講開又講﹐運拉登條屍去掟落海果首航空母艦卡爾文森號
話呢個月要嚟香港
話唔定美國佬有心關照港燦
透過維基解密爆料原來登叔條鹹魚被靜雞雞掟落維多利亞港
以後班真主黨乜黨物黨要憑弔登叔就嚟香港啦   

引用:

原帖由 全軍盡 於 2011-5-8 01:42 發表


比你係拉登都會想到會出賣/被圍捕既一日....

受過美國特訓既人都應該知吞鎗/服毒係最主動最有尊嚴地死去既方法....

我話拉叔多數係被人出賣而臨場自殺/他殺，班海狗去到都係收屍/買屍唧.....

美國或巴國 ...

拉登唔係間諜或者特工
而且﹐雖然我唔係好清楚回教教義
但似乎吞鎗/服毒呢 類自殺行為唔會符合回教教義 -  可能被視為懦夫行為
同攬住個炸彈跟敵人同歸於盡性質唔同

美國製造的戰士

仲記唔記得本來中國大陸剛恢復奧運會參賽資格
準備以中華人民共和國名義首次參加 1980年莫斯科奧運會
因為抗議蘇聯入侵阿富汗﹐美國連同大多數西方國家、中國杯葛莫斯科奧運
所以要到 1984年洛杉磯奧運時中國先首次攞到奧運金牌 – 零的突破
而 1979年初中國對越南嘅 “自衛反擊戰”
替越南撐腰嘅後台老細就係蘇聯
其實成個 60 ~ 80年代﹐對中國威脅最大就係蘇聯
蘇聯晌中國北方陳兵百萬虎視眈眈
老毛甚至做好蘇聯軍殺到入北京城打巷戰嘅準備
果時係冷戰高峰時期﹐美國最大對手又係蘇聯
所以中美兩國利益交集就係對付蘇聯呢個共同敵人


1979年聖誕節前夕﹐蘇聯派大軍進入阿富汗佔領首都喀布爾
阿拉伯世界 (當然仲有美國為首嘅西方國家﹐同埋中國 ) 強烈不滿蘇聯嘅入侵
當時只有廿幾歲嘅憤青拉登 – 佢同其他憤青唔同﹐佢家族 (主要係佢阿哥) 係成功嘅富商
拉登就搵埋一幫阿拉伯志同道合者去阿富汗對抗蘇聯
憑住有錢﹐佢建立起一個叫 “服務營” 嘅組織
號召阿拉伯勇士為阿富汗難民服務同埋武力對抗蘇聯
呢個服務營就係後來改稱為阿爾蓋達 (基地組織)
美國佬難得見有班死士肯做砲灰去同蘇聯軍搏命﹐當然嗒哂糖
為咗提高呢班死士嘅戰鬥力 – 可以襟捱 d 襟打d ﹐去拖住蘇聯軍後腳
於是派軍事顧問幫佢哋培訓戰士﹐又出錢買武器俾佢哋
用買美國貨同樣嘅價錢轉買中國貨﹐大件夾抵食﹐又唔駛正面同蘇聯擘面
( 蘇軍撿獲游擊隊嘅武器係山寨貨唔係美國貨﹐雖然明知係咩一回事卻又吹唔脹美國佬 )
而中國有軍火生意做﹐又可以提高生產技術﹐兼拖住蘇聯軍力去減輕中國北方壓力
一家便宜兩家著﹐中美雙方一拍即合﹐所以有中美蜜月期呢回事
當時有 d 軍火技術洩露咗俾中國﹐美國佬都隻眼開隻眼閉
橫掂當時中國技術落後美國幾十年﹐拍馬都追唔上
拉登佢哋呢﹐有人撐腰提供武器﹐咁就不至於跟蘇軍對比實力太懸殊
就係咁﹐一打就打成十年﹐拉登實戰經驗不斷累積
最後蘇聯打呢場仗打到殘﹐頂唔順終於鬆人
而拉登仲生勾勾﹐成為一個經驗豐富戰士

打完阿富汗戰爭﹐拉登就返回沙地阿拉伯
呢頭坐定冇耐﹐1991年就由老布殊發動海灣戰爭去打伊拉克
拉登向沙地國王提議用佢哋嘅阿爾蓋達組織嚟保衛沙地
沙地國王梗係唔刮佢﹐甚至同意俾美國晌利雅德建立美軍基地去打薩達姆
拉登就寫信指責沙地國王背叛回教教義﹐仲引西方軍隊進駐沙地去打自己阿拉伯兄弟
沙地國王谷到爆就踢佢出國﹐並剝奪佢嘅沙地阿拉伯國藉
就係咁﹐拉登就由一個反蘇戰士變成反美戰士

真係有 二五仔就絕唔會唔俾花紅
因為你美國佬失信一次後﹐以後邊個敢信你 ?
以後美國佬 d 情報工作食自己 ?
而新聞講嘅花紅係咁講 :

引用:

拉登伏法後，誰會獲得 2,500萬美元（ 1.95億港元）懸紅，相信永遠是個謎，因為美國國務院旗下外交安全局為了保密，不會披露得主名稱，連是否有人有資格領取也不公開。國務院自 1984年成立懸紅制度以來，總共支付逾 7.8億港元給 60多名線人，當中大部份是與 911襲擊有關。
美國廣播公司

只係話邊個係二五仔或者線人( 對公眾嚟講 )  永遠係個謎

香港5月3日所有新聞都頭條報導拉登被擊殺呢1單嘢
同時亦講佢係匿藏晌巴基斯坦一間價值 100萬美龍嘅豪宅
就係呢間豪宅 :

一間位於巴基斯坦接近阿富汗邊境山旮旯市鎮
外殼仲衰過香港新界村屋
值 700幾萬港銀 ?
就算連埋地皮﹐半價賣俾你﹐你肯唔肯買 ?
莫講香港﹐呢間屋就算係晌美國加州
100萬美龍有人肯買的話
美國根本就唔會有次貸危機而引起金融海嘯

我唔知為乜美國傳媒要車天車地話咩百萬美元豪宅
我覺得疑惑嘅係以拉登呢個跟蘇聯打游擊戰打足十年
又可以逃避美國佬全球追殺避足十年嘅人 - 跟兩個地球上國力最強嘅超級強國鬥智鬥力
佢嘅警覺性根本就非一般人可比﹐唔係早就瓜咗十次都得啦
既然匿藏晌呢間屋就預咗隨時會俾人追殺到嚟
點解唔晌間屋挖個地下迷宮 ?
有乜衣郁隨時由地下通道走到冇雷公咁遠

有冇睇過 007 鐵金剛套勇破間諜網 ( From Russia with love) ?
戲裡面伊斯坦堡有條土耳其線人好似拉登咁幾個老婆﹐無數仔女
佢間屋下面就係有迷宮一樣嘅水道
有人追殺時一跳入地下水道轉來轉去
外人根本暈頭轉向唔知點追你
以拉登間屋嘅環境
建一個地下迷宮根本易如反掌

有一個現成樣辦 "狡兔有三窟" -  就係卡達菲
列根當總統時派戰機偷襲的黎波里﹐發射導彈炸死卡達菲個養女
今次北約又用導彈狂轟卡達菲﹐只炸死卡達菲個仔
卡達菲影都唔見
卡達菲當年一班年輕軍官發動政變﹐兵不血刃就搞掂
而拉登就跟蘇軍、美軍晌阿富汗鬥智鬥力﹐刀頭舐血過日子
拉登戰鬥力比卡達菲高幾班
今次反而俾美國佬甕中捉鱉 ?   

連日嚟美國陸續放 d 料
下面就睇到拉登間豪宅裡面嘅情況 :

間所謂值 100萬美龍嘅豪宅
內籠同外殼一樣咁簡陋
睇吓最後個幅相 - 美國佬話晌屋內搜到嘅影片
檯頭 d 電線左駁右搭
仲衰過香港 d 籠屋或者天台潛建
美國佬就話佢家爺仔乸住晌度﹐住咗五年咁話

而我左睇右睇都唔覺佢似晌度安居或者當固定住所
我只覺得佢好似係俾人軟禁咁款 ！

冇你嘅事
你去玩賓州啦   

引用:

原帖由 KMY89 於 2011-5-13 08:06 發表


可能是大隱隱於市吧 ...
至於地道，當地侯塞恩兩個仔就是在地道被擒

計我話 ... 最好剪髮剪鬚，藏在廣州   

中隱隱於市﹐大隱隱於朝   
李登輝就係大隱嘅典範

最危險的地方就是最安全的地方 - 古龍

如果拉登睇過古龍 d 書或者電視劇
佢應該剪髮染金毛﹐又留返好似林子祥果種鬚  ( 據說男回教徒到某一年紀一定要留鬚)
潛去華盛頓住或者索性去紐約唐人街開間蘭州拉麵館
呢 d 就係所謂 " 燈下黑"