又講白兄啦
一 生 中 最 愛
上星期日早上，天未光就爬起床，做了一件快兩年沒做過的事情。行晨運？差唔多，不過唔係用我對腳行，而係用個轆行！我所講的係SUNDAY MORNING DRIVE。
有幾種人很喜歡SUNDAY MORNING DRIVE，第一種係有錢佬，有錢買靚車，無時間、無機會揸，所以約埋一班「上等人」一邊晒車之餘，順便仲傾下生意股票；第二種人，啱啱相反，是很想借機會睇到或近距離接觸到一些很罕有、價值數以百萬甚至千萬計的SUPERCAR；第三種是喜歡開快車，一大班車友連雞都未啼，趁交通冷清就齊齊飛返轉，唔係真係為咗睇下邊個手車快啲，純粹係為了醫下手腳㾗癢；第四種，係平時工作壓力好大、又怕老婆、又中意車，所以唔理天南地北，個個星期為咗同班車友吹水，就算唔叫都到、逢到又必早。
因為我的工作天天對著汽車，生命早已經與汽車融為一體，很少可能性能挑得起我的興趣，更何況山長水遠揸車去鹿頸吔個二十文一碗的餐蛋麵。今天能讓我動身的原因只有一個，朋友預備了一部日產SKYLINE GT-R (BNR-32)給我慢慢玩。
話說回來，近二十年的玩車經驗 ，MIDNIGHT RUN就試得多，踩到天光亦時時有，但 MORNING DRIVE的次數一對手數得晒，兼且諗返轉頭，原來從未用過自已車去DRVIE過，次次都係幫朋友試車。好似今次咁，如果唔係又為咗部R32，真係唔會通宵寫完稿都死去MORNING DRIVE！
認識我的朋友，都知我很愛R32 GT-R，以前亦曾經擁有過，當中有一分情意結。朋友年紀和我相約，大家都是在日本超級跑車成長期中長大，對於大概二十年前的日本跑車相當痴迷，佢響女兒心目中是個管接送的好爸爸，老婆眼中斯文又勤力的好老公，但駕駛老餅「大牛龜」的背後，原來收埋好多經典老爺跑車！部部都係棍波，兼有TURBO或SUPERCHARGER，一上車就好似車手上身，身上發出一股很強的「氣」，一下子好似回復到初出茅蘆、下下地板油波波盡的小伙子。
R32也是他的最愛，從日本搵一部原裝直板碳灰色前期型返來，再購入大量零件將引擎重新 REBUILD和改裝，投資落去的錢差不多係二手車價的三倍，而且工程繼續進行中。雖然朋友口口聲聲嗌肉痛，嗌整到窮，但係隱藏在眼神後面的滿足感，一路駕駛一路從嘴角漏出來的笑意，那種仿如第一次泡到妞的甜蜜，就好肯定R32畀到佢真正的快樂，就算而家畀三十萬或搵R34 GT-R同佢換都唔會制。
R32真的有咁大魔力？若果你都係響那個年代成長，而又喜歡駕駛、享受駕駛的話，GT-R的確是一部極品。那副天下無雙的直六TWIN-TURBO機器，改裝潛力無限，將其推至400匹馬力左右，加上日產獨創的四驅與四輪轉向系統，你握著軚盤，那真切到不能再好的風油軚，把人與汽車合成一體，愈踩愈有的中尾段力量，把甚麼「露荀」甚麼「掃把佬」推埋一邊，那種不能掩蓋的快樂，不由自主地從臉部肌肉呈現出來。人地形容女人眉梢眼角盡帶笑，原來麻甩佬都可以有咁嘅表情的。
你覺得我講得好誇張？唔信唔緊要，有機會試一試就知我有無吹水。如果你都想成為R32的俘虜，係就要快手，二十年老爺車入口廢氣免檢計劃就快到期，以後想響日本返部好嘢返嚟都好難！
ALEX TAM
imotor.me 總編輯
相關搜索目錄: 投資 二手車 工程 引擎 汽車
