[原創] 一位史上最雷人的武聖 一套看後令人非常憤怒的電影---「關雲長」

改歷史，我冇問題，理得佢點改，最緊要係好唔好睇！

問題係呢套關雲長真係一套騙觀眾錢的垃圾！美其名甚麼現代觀點新角度去演譯歷史，其實論調幼稚、膚淺、陳舊，最新的觀點就係曹操愛上關公，搞一輪基情，擺明嘩眾取寵，又想可以好似李安咁呃到鬼佬！最衰係搞基又搞得鬼鬼鼠鼠，兩個導演仲要唔敢公開承認！簡直不知所謂！

本來曹操係一個梟雄，因為敬佩關雲長忠肝義膽，才放他一馬，點知麥、莊兩條粉腸竟然改到曹操因為愛上關雲長，所以放佢走，令曹操由一個梟雄變成爛基，關雲長本來以義服人，點知變成因為有點「姿色」所以執番條命仔！撤底把關公的形像矮化！

天啊！呢d唔係叫顛覆，呢d叫癲能左！仲有，成套戲d對白古靈精怪，不古不今，連一開場的佛經都寫錯，咁o既文學修養都敢拍古裝大片，唔係投資o個個傻左，就係有人以為觀眾個個都係文盲！

仲有仲有，唔該愛護動物協會出下聲，佢地咁樣虐待拍戲d馬，真係唔人道！

p.s.三國玩搞基，關雲長都唔係第一部，之前仲有套超時空要愛，相比之下，超時空要愛好睇得多！