今期FACE
最索實習記者起底 浸大新人王變粉紅救兵
無綫新聞主播黃紫盈直播時的一滴淚，揭露了新聞主播界爭上位是非多多。你偷用我粉底、我篤你車震，暗箭四圍飛！
主播互片爭上位之際，又有一班傳理系同學實習期準備接棒。眾多實習記者中，以浸大 Yr.2的梁凱寧（ Maggie）最突出，受 TVB重用之餘，更深得一班網友歡心，更因她常穿粉紅衫，更獲宅男封做 Pinky女神。Maggie上鏡掂，原來在校內亦是風頭躉。 TVB新聞部依家亂晒龍，唔通真係要靠小師妹做粉紅救兵轉移視線？
Maggie雖然只是實習，但報道時淡定之餘又多花招，又揸槍又舉六四 tee，網友讚佢生動兼有型。
除明星受網友追捧，新聞主播粉絲一樣不少。而近日不少網友都熱烈討論無綫新聞實習記者 Maggie，更封她為新紮新聞女神！除激讚她樣子甜美又專業外，心水清的網友更發現 Maggie短短十幾日已經出鏡 5、 6次，出鏡率之高屬實習記者少有，因 Maggie經常穿養眼粉紅色衫，網友幫她改花名 Pinky，人氣跟當紅女主播有得揮！
梁凱寧被網友封做 Pinky BB，全因她上鏡經常穿粉紅色衫。加上她身材標青，難怪會被宅男留意。
主動受歡迎
據知 Maggie深得無綫高層及同事歡心，有無綫新聞部員工爆料：「 Maggie好識大體，有禮貌之餘，上至高層、下至 PA都哥前哥後，加上佢又唔怕蝕底，放咗工都留喺公司跟頭跟尾，又主動肯跟前輩出外景學嘢，咁好學，自然人人肯教佢嘢，好多男攝影師抽中同佢出外景都好開心， Maggie直頭係無綫新聞部新寵！」不只無綫，原來 Maggie在校內都好活躍，一名與 Maggie的同班同學亦爆料說：「上年佢主動加入浸大的傳理電台做客席主持，想多啲出鏡經驗，拍片時又識騷自己跳舞勁同化妝叻，佢好清楚自己做緊咩，所以校內亦有不少男同學及老師欣賞！」
浸大系花貴為校內風頭躉，未實習前 Maggie本來留咗一頭長髮好少女，但由於 TVB要求出鏡記者要短頭髮感覺清爽，故 Maggie不惜長髮為 TVB剪，夠晒誠意。
化妝達人 靚靚Maggie原來是化妝達人，她亦曾在傳理電台片中示範化妝技巧，相信她在電視台出鏡要化妝絕無難度。
舞林高手化妝了得， Maggie跳舞一樣耍家，她曾拍片騷一字馬舞功，更親身教授男同學跳舞，男仔點會唔鍾意！
金融男友Maggie原來一早已經俾任職英皇金融的男友封盤，更不時在 fb大晒與男友恩愛照，男友就冧住稱對方做 BB，仲連家長都見埋，似乎有主播目標都無阻愛情！
無綫主播黃紫盈在直播時突然眼紅落淚，揭露了新聞部中的明爭暗鬥。一班新聞小花咁鬥法，小心小師妹後來居上呀！
唔夠靚？棄無綫入有線
無綫新聞部近年是非多，很多同學都知道想入無綫必暢通無阻，靚樣永遠係先訣，難怪同是浸大傳理系的鍾筱嫻（ Denize）雖與 Maggie一樣同樣得到無綫實習 offer，最終卻棄入無綫，轉戰有線。有 Denize同學爆料：「 Denize學校成績同人緣都好好。但 TVB好睇樣，人事又煩，要上位真係唔輪到佢，反而有線更重視採訪技巧同時事觸覺，樣子係其次，所以 Denize最後都揀有線。」
雖然樣子不算突出，但 Denize一樣靠實力搭夠。鏡頭前 Denize表現淡定，瘦小的身形亦無阻她拼搏上前採訪！
雖然與 Maggie緣慳一面，冇機會做同事，但兩人同愛在 facebook晒恩愛。而 Denize男友亦是報紙攝影記者，同圈子唔知會唔會更多話題？
