引用:

原帖由 kathywonder 於 2009-2-12 23:24 發表


Hey!!  Come on, please carry on ur story, it's funny!!     

多謝捧場

暫時個賭局都係悶戰
冇乜驚心動魄對賭大曬冷局面出現
所以冇乜好講
四月份在大笨鐘城再有一個 G20世界沙蟹局
到時睇吓有乜睇頭

不過, 你喜歡聽故仔囉喎

我就再講個上世紀一個江湖驚天大豪賭故事大家聽吓   

但對住個電腦屏幕逐隻字打
眼花又手痛
所以, 要俾 D 耐性   

世紀江湖大賭局

話說上世紀 (20世紀) 江湖上有兩家超級大豪客, 一家係牛仔幫, 一家係熊幫
表面睇兩家財大氣粗不特止, 最得人驚係兩家人馬個個都手瓜起展
出出入入成棚馬仔跟尾, 個個全副武裝, 真係唔打得都嚇得
呢兩家超級豪客對賭已經賭咗幾十年, 賭到飛砂走石
其他小散戶根本連坐低一齊賭嘅機會都冇

牛仔幫身家豐厚, 連班馬仔個個都身光頸靚
而熊幫雖然睇唔出點疊水, 但從來冇話向邊個度水, 卻又長賭長有咁款
熊幫最煞食係上上下下個個殺氣騰騰, 一言不合就攞傢生要打要殺
牛仔幫人馬好食好住, 財源滾滾, 免得過都唔想跟熊幫搏命
牛仔幫費盡心思諗計點樣陰熊幫, 陰到佢地暴斃又好, 殘廢又好, 以去心頭大患
70年代中, 牛仔幫掌門人尼黑蟲諗出條絕計 – 拉龍幫一齊夾手夾腳打殘熊幫 !  

其時龍幫爛身爛勢, 係人都知佢地係窮幫一個,
但佢地人馬眾多, 又個個打得兩吓
試過有次牛仔幫拉大隊去泡菜幫個地頭掃場
掃吓掃吓, 側側膊掃到龍幫門口
龍幫眼見要連自己都掃埋, 得了 ?
於時派出一班打手, 幫泡菜幫去同牛仔幫砌過
牛仔幫雖然傢生先進, 人強馬壯, 卻完全冇半點甜頭
自此龍幫保住自己江湖大幫地位
但咪睇龍幫其時窮過鬼, 佢地本來來頭卻不小
好多好多年前, 牛仔幫都未成立, 而熊幫仲係喺鄉下養羊養馬執馬屎時
龍幫已經係江湖上超級大哥, 一路過嘅係江湖上最頂級最優哉悠哉生活
點知上幾代掌門人好日子過得耐咗, 就不知天高地厚兼腦殘
上咗米字幫當, 聽米字幫班白粉佬講話食鴉片可以延年益壽喎
咁就開始福街喇, 幫中馬仔有 D 做咗道友, 從此幫運中落, 卒之搞到一沉不起
幫中人馬個個皮黃骨瘦, 行路打倒褪, 莫講出去打天下, 連保自己地頭都無能為力
所以其他幫會人恥笑佢地係 “ 江湖病夫”

江湖上最信奉就係弱肉強食
眾幫會見佢半死不活, 於是一沉百踩, 個個湧入佢地頭搶地盤
其中搶地盤搶得最兇殘係太陽幫
一入龍幫地頭見人就斬, 搞到血流成河, 屍堆如山
同時間龍幫人自己又唔爭氣, 眼見家道衰落, 幾個當家兄弟都想做掌門人
卻你唔服我, 我唔服你, 於是話要分家
話分家又講唔掂數, 就不停內哄, 大打出手開大片
就係咁, 內憂外患, 曾經係江湖第一大幫龍幫就四分五裂, 半死不活
離亡幫陷包散只係一步之遙...

欲知後事如何, 下回分解  

樓上果件
我寫嘢唔係俾你呢亭人睇架
你走入嚟賴屎賴尿, 影響其他網友心情, 降低呢條 thread 格調
你都係過主啦

又爆一煲

去古狗打入 Sir Allen Stanford 就可以見到呢位爵爺幾咁猛料
但正如巴菲特話齋 : 退潮之後你就見到邊個係裸泳
香港個賊仔階攞住件 8號電刑玩財技
玩到變過街老鼠, 人人喊打  
但呢個爵爺德高望重, 身份顯赫, 金融界巨頭
今日被揭穿原來係金融寶藥黨 - 係真正靠呃嘅寶藥黨, 唔係玩財技
我地香港稱之為 "種金公司 " :

SEC statement on Sir Allen Stanford 'fraud' charge

Full statement from the United States' Securities and Exchange Commission after
Sir Allen Stanford was charged in relation to 'a fraud of shocking magnitude'.

詳情去睇 英國 sky news　或者 yahoo uk

東歐骨牌幾時倒 ?

北極熊真係到咗賣血階段
扭扭擰擰咗幾隻月都係要走嚟同大陸借 250億美龍
抵押品係 20年期三億噸石油 !
北極熊夠兇又打得, 仲有豐厚石油天然氣身家
可惜俾江湖老大牛仔玩到殘, 紐約石油期貨鋤到得卅幾蚊美龍一桶
幾乎平過礦泉水  
呢舖血海深仇, 北極熊實唔會俾牛仔有安樂日子過   
大陸借 250億出去
攞到近路程石油供應, 又有個大隻佬去擋牛仔子彈 .... 正

但歐羅兄弟幫班窮兄弟就冇咁好家底 , 又唔打得
以為玩顏色革命可以跟住班財主佬搵食
前幾年好景時大借特借, 玩吓錢搵錢高層次產業
家陣老歐洲班財主自身難保
而班窮兄弟最大債主正係老歐班落難財主
是但東歐邊個窮兄弟頂唔住有一個瞓低 , 咁就慘喇
骨牌效應連班落難財主都趴到直
米字國屋漏偏逢連夜雨, 放俾東歐 d 數就凍過水....
橙色乜色革命終於變成黑色 !

有人話 :如果經濟危機係老虎, 成班人俾老虎追...
你唔駛跑得快過隻老虎, 你只需要跑得快過其他人, 那怕只快過一兩個人.....
所以....
牛仔幫老大陰陰笑望住班歐羅兄弟一個接一個仆低
適當時候, 自己有幾間企業瞓低, 債務化為烏有  (好似雷曼沙煲咁)
歐羅兄弟立即要抬入深切治療病房.....話唔埋係入殮房 !   

所以各位要小心 d 歐羅草紙

世紀江湖大賭局

繼續講故仔.......

上次講到龍幫自己兩兄弟爭當家打個你死我活
而太陽幫就殺入龍幫地頭霸佔地盤
初時牛仔幫悶聲發大財, 搏命賣傢生物資俾太陽幫, 大發特發戰爭財
牛仔幫同米字幫原本心思係等太陽幫霸佔龍幫北面地頭去頂住熊幫勢力擴張
但太陽幫殺得性起, 地盤越霸越多
牛仔同米字於事喝住太陽幫咪越霸越多, 太陽幫貪勝不知輸, 啋你都傻
於是牛仔, 米字就要抵制太陽幫, 唔賣傢生唔賣油俾佢
太陽幫早就對米字幫霸住嘅地盤起痰,
索性一不做二不休, 殺到去米字幫地頭搶地盤
不特只咁, 更好似食咗興奮劑一樣靜雞雞去牛仔幫個祠堂放火燒牛仔幫傢生庫
如此這般就連牛仔幫都拉落水一齊廝殺
成個江湖一便大混戰, 殺聲震天 , 血流成河

足足打咗幾年, 首先歐羅果邊牛仔幫米字幫同熊幫聯手打低納稅幫
仲將納稅幫地盤瓜分
而另一邊太陽幫雖然五癆七傷,
但呢幫人生出命賤, 慣於死纏爛打, 爛命一條兼唔見棺材唔流淚
牛仔幫喺歐羅地盤大把世界等佢去搵, 唔多耐煩同太陽幫繼續糾纏
於是攞出獨門秘製武器 – 沖天砲
出重手連掟兩個沖天砲落太陽幫地頭
只見太陽幫地頭好似火山爆發咁天崩地裂
太陽幫終於頂唔順, 立即跪地求饒
牛仔就將太陽幫眾頭目當狗咁鎖上狗鏈, 戴上口罩 – 連吠都唔俾佢地吠
呢個處置方式一直到今日都係咁
講返果種沖天砲, 殺傷力驚人, 各路人馬聞所未聞
後來有人咬耳仔傳話, 當沖天砲爆時, 太陽幫馬仔即時剩低一個人影曬喺地面
人就化為烏有, 骨灰都搵唔到
更有人傳言, 就算遠距離避得到爆炸, 都一樣中招,
醫番都殘廢不特止, 仲後來生仔都冇 seafood 咁話
江湖上各路人馬眼見呢件武器咁利害, 以後有乜糾紛咪俾牛仔幫撳住打 ?
於是熊幫唔聲唔聲返歸去閉門研究，死都要做番件看門口咁話

江湖大廝殺完結後，江湖基本上分為兩派人馬
以牛仔幫為首認錢唔認人一派 - 有 d 讀過書嘅人話呢種叫資本主義喎
而熊幫為首帶領一幫歐羅兄弟稱為大鑊飯派, 宗旨係同撈同煲, 有飯大家吃咁話喎
而龍幫兩兄弟爭分家亦分出勝負
有熊幫撐腰嘅一路人得勝, 頭目係無賊公 – 佢話要殺哂d 有錢佬分身家, 咁就天下無賊公喇
另一派係牛仔幫撐腰, 卻不敵大敗, 逃到一離島自立為王, 頭目係 " 搶塊石 "
打輸走路, 所以金要搶銀亦搶連石都要搶
兩路人馬勢不兩立, 連顏色都要有分別以示道不同不相為謀
無賊公以紅色為主, 搶塊石以藍色為主, 兩路人馬都話自己先係龍幫正統

風平浪整日子過得冇幾年
紅色龍幫突然同熊幫反面, 幾乎大打出手
無賊公知道熊幫閉門研製成功沖天砲
有乜衣郁熊幫隨時掟幾個過嚟咁就陷包散
所以老無下令馬仔們, 當咗條褲都要搵錢泡製出沖天砲坐鎮
果然冇幾年時間, 龍幫亦成功造出沖天砲
如是江湖中幾大幫人都有沖天砲坐鎮
由於沖天砲殺傷力太大, 幾路人馬投鼠忌器, 驚一打就惹出大禍
反而大家都唔敢好似以往一樣郁 d 就開大片, 世事就係咁吊詭
江湖傳聞, 有次熊幫想偷襲龍幫, 靜雞雞搵大班人馬攞齊傢生
潛入龍幫偏遠地頭等機會發起突擊
點知無賊公早有預備, 故佈空城計, 等熊幫入到地頭後
無賊公扮乜都唔知, 一嘢試爆沖天砲, 潛入嘅熊幫人馬全部一鑊熟,
但熊幫自己暗算在先, 唯有暗啞抵唔出得聲, 連收屍都冇人敢去收
從此熊幫唔敢再對龍幫阿支阿左, 總之河水不犯井水就算云云
但江湖傳聞嘅事, 可能永遠係謎


欲知後事如何, 下回分解....

冧女普世價值   

唔理佢係少女, 熟女, 阿姑...
亦唔理係街市賣菜嬸, 律政女強人, 定係猛到超級強國大姐大.......
總之有讚錯, 冇放過.........係啱嘅  

國務委員戴秉國 : 妳靚過同後生過上電視喎....
克太 : ....(面紅) ...嗯, 我地會相處得好好.....  

冇錯, 希拉莉都會面紅  !

華盛頓郵報:
http://www.washingtonpost.com/wp-dyn/content/article/2009/02/21/AR2009022100485.html?hpid=moreheadlines

When State Councilor Dai Bingguo greeted Clinton, heexclaimed,
"You look younger and more beautiful than you look on TV."Clinton seemed to blush in reaction,
and she raised her left hand to herright shoulder in a gesture of thanks. "Well, we will get along verywell," she said.

克太可能仲記住萊溫斯基壇嘢...
克淫頓想嘴一啖, 點知....

水龍頭價值 2,800萬歐元

其實果兩隻只不個係水龍頭 - 不過比普通水龍大得多之嘛
歷史得果 百幾年,
又唔講得上咩代表性藝術品, 根本就唔同唐三彩之類一個等級
水龍頭來自圓明園, 圓明園係慈禧太后搞出嚟
慈禧喺中國歷史評價有幾低, 中國人應該好清楚
無論邊個層面去評價, 獸頭水龍頭都冇資格達到 " 國寶 " 級別
求其兩三百年以上歷史, 跟宮庭沾上關係就話係國寶
我睇中國境內閒閒地有一千幾百萬件國寶
所謂國寶只不過係吹水炒作, 吸引注意力
呢兩件嘢最大意義係代表嘅歷史 - 中國近代屈辱史
亦係西方國家強盜行為證物
擺喺佢地果度就係明乎其實 " 賊贓 "

前幾次拍賣另外幾隻水龍頭屢創天價
北京保利集團, 賭王不惜豪掟幾千萬勢要 " 國寶" 歸家
家陣西方世界水緊到喊救命
有人見中國佬大把水頭, 可能心生一計....
佈定個天仙局, 圍威喂自己友車輪戰搶高拍賣價
睇死你班中國佬死要面跟住出價, 唔肯俾哎吔國寶流落外國人手...
狠狠斬你一刀幫補吓身家縮水
點知大陸佬就你精我都精
預先高調反應, 擺明唔肯俾人勒索
"愛國商人" 們眉精眼企, 知道北京態度, 點會昂九九抬錢去搶水龍頭 ?

兩隻爛鬼水龍頭藝術價值既唔高
歷史價值又不堪 - 對中國而言係屈辱, 對西方而言係賊贓
市場極度狹窄
竟有傻佬花 2,800萬歐羅去買 ??   
都唔係咪做媒.....  

睇得到係做媒引人入局，睬佢都傻！

引用:

原帖由 masuk 於 2009-2-26 13:56 發表
睇得到係做媒引人入局，睬佢都傻！

佳士德話 : 佢地代一個不透露身份買家出價買渦....

They were bought by Thomas Seydoux, Christie’s international co-head ofImpressionist and modern art, on behalf of an unidentified telephonebidder.