紅蕉

今晚三個人七點多去到，老闆話樓下清潔緊叫我地坐響近門口張二人檯邊坐邊等，隔離張檯已有兩名幼齒坐低左．
等左數分鐘，老闆帶我地落去“樓下雅座”，地方真係幾細下，落樓梯要小心撞頭．
叫左幾個十幾個字長既焗飯同意粉，三個湯，三杯野飲同一客炸雞翼薯條．
個湯係clam chowder，好明顯係金寶湯(等緊位果陣食老闆娘岩岩響百佳入貨）．雖然只係罐頭湯，不過已經覺得好有誠意，出面好多餐廳ｄ忌廉湯都係俾麵粉水你飲架咋．
炸雞翼薯條冇乜特別，你同我都整到既水準．
三個焗野都唔錯，特別係個墨魚汁fettuccine，個白汁造得幾好，如果杰ｄ同多ｄ芝士會更好．
錯在我地叫左三樣都係白汁既野，食完好滯．
最後飲品係唯一我覺得唔合格既一項．我叫左iced mocha，杯野黎到ｄ冰已經溶得七七八八，好明顯係用好多熱水去開完再加冰．咁樣既凍飲響邊度飲都係唔pass．
老闆兩公婆招呼親切，唯一要彈既係地方窄左ｄ同冷氣唔夠．
價格合理，食物都有一定水準，值得一試．