響藥材舖就有，吊響度賣，一排排，錫紙包裝，要買時一包一包搣落黎。
印象中有一男一女 Model 洗緊頭，但唔使六七毛子咁貴，2毛子一包啫。

引用:

原帖由 meijik622 於 2010-3-15 23:30 發表 兒時用過一種,洗手紙,約2吋X3吋左右是紅色包裝,中國出品用時撕掉少少加水,,便起泡,,,,非常好用,,最衰冇留種 !到日本見到類似買了一包,至今,,約八年了,,付圖參考

美加淨番梘紙。每包3毛，有成20張。

引用:

原帖由 suewong 於 2010-3-18 22:08 發表 講起有印象, 但會唔會當時藥房 / 雜貨店, 係吊起野黎買?

高級野先至會吊起黎賣架，老實講，2毛子洗一次頭算係高級消費，仲要自己洗喎，細路仔時老媽子拉去巷飛髮，都係6毛子咋。
雜貨舖仲有D茶仔粉賣添，六七十年代那時已沒有後生仔用茶仔粉黎洗頭了，買既都係伯爺婆，一毛子四包，聽講用黎洗頭好好既。

引用:

原帖由 suewong 於 2010-3-20 17:25 發表 攤凍少少, 但都係熱. 而家你明點解我鐘意亞爸多過亞媽啦. 冼親都喊, 人地生頭虱, 累埋我. 問唔問得, b 哥 / k 哥 / 何老大 / Mr. Wong 細個, 有冇生過 ?

嘻，好彩由細到大都未見過同學生過。自己更加未。所以茶仔粉只係見過，但從未用過，乜原來好難聞架？

引用:

原帖由 大隻西 於 2010-3-19 23:53 發表 我也要買[茶仔粉]試試  中藥店有吧  怎樣使用的呢

茶仔粉係已經加工過的了。方便D人用，以前雜貨店才有。不過現在好難搵了。正確係用「茶仔頭」，乜野叫「茶仔頭」呢？
有冇見過茶仔餅？亦叫「茶仔頭」，好似而家D普洱茶餅咁，但仲要大個好多，約莫有一張大牌檔坐既圓摺「Dun」咁上下大，約有半寸厚。外表粗糙，深啡色，外層痴滿禾桿草，買時用鐵槌敲碎一塊塊，學似Sue姐話，再番去用黎煲水。

引用:

原帖由 suewong 於 2010-3-19 20:57 發表 平時用洗頭膏 / 水, 但1有同學生頭虱, 亞媽就用茶仔粉幫我洗頭. 印象中 d 味道好難聞, 唔同洗頭膏 / 水 (香噴噴).

最早前我係用番梘洗頭，就咁沖涼用乜就洗頭用乜野梘，記得係用「蜂花壇香梘」，好香，但用幾日後就冇晒味。
後來高級左，就用「加信士」。


邊有而家咁幸福，咁多野用。

引用:

原帖由 suewong 於 2010-3-20 23:44 發表 你係 80 後 ？因為睇書，當時 60 / 70 前期，d 細路 2 行鼻涕，生頭虱，屋企有老鼠 / 蝨，好普遍。

唔係呀，我都唔後生，但真係未見過有同學生過蝨。自己都冇。但老媽子講就話我細個生過「大瘡」，仲要搞到去割添。印像中頭蝨冇生過，亦未見過人生過。但瘡呢D野就成日生，那時乜鬼野都搽上去，藍藥水又有，紅藥水又有，最頂唔既係老媽子成日去藥材舖買D一毛子塊既膏藥黎「廉」，真係好肉酸架！

引用:

原帖由 suewong 於 2010-3-20 23:58 發表 係啦。亞媽日日都咁做，痛死人。 而且 1 見我搔頭，有殺錯，無放過。 其實香港人當時係貧，所以污糟，定係中國人污糟 ？

居住環境同衛生係一個好大問題。當時人多，住既方稠密，成七八人塞埋一間房，有些房仲長年不見陽光。水，又係一個問題，制水就慘，就算唔制水，一條水喉，成七八伙人用，好多人用好多容器盛水留用，自然衣服及個人衛生差。Sue姐見過「鎖水喉」未？原因係制水，水壓唔夠，令高層住戶無法接到水，於是有人諗出「鎖水喉」呢個方法，就係為保每層樓都可接到水，每層樓只接一個小時，當時間一過，第二層樓既人就會黎「鎖水喉」，用一個鐡罐兩個孔用把鎖鎖住，等其他人用唔到。再其次，就係六十年代好多樓根本冇廁所，廚房又係佢，廁所又係佢，十分不衛生，加上冇水廁，用馬桶、倒夜香，真係惡劣頂透。
而家我地會鬧D姪仔姪女將D食物拿入洗手間，以前個個都係響那個「洗手間/廚房」煮飯，諗起都噁心。

[ 本帖最後由 mygo 於 2010-3-21 17:11 編輯 ]

引用:

原帖由 suewong 於 2010-3-21 18:13 發表 嘩! 聽到都驚。 "而家我地會鬧D姪仔姪女將D食物拿入洗手間" - 佢地幾大？將D食物拿入洗手間，做乜 ？

呢D都係幾年前既事了，而家我最細個姪女都十歲了。
有時佢地食野整污糟隻手，就好多時連食物都一齊拿入洗手間洗手。