見大家傾萬友傾得咁happy,小弟都講下記憶中舊著d經典戰役啦
小弟資歷唔算深(400期先開始睇),有錯各位大佬唔好笑呀
小弟都唔清楚幾時係萬友開始執筆,所以由500期開始講
經典1--群英vs烈火祖師,霹靂火,
地點--北海蛟龍修練山洞
當時老烈火都可以話係勁到無論,盟主山莊輕易打低陳傲天,青天都比佢兩招收皮,烈火金身小虎踢極都唔入(我覺得當時烈火功力應該係狂僧之上),個陣同小虎打都仲佔到上風,攪到小虎要係咁搵佢罩門.....
題外話,個陣港漫好似好興搵罩門,如果冇記錯中華英雄又係打緊金太保,又係搵罩門,之後好多漫畫都緊有一兩個奸角練硬功,係要打中罩門先死
小虎幾經辛苦先搵到老烈火個(假)罩門係人中(個期個名仲大大隻字叫破金身,全世界比佢呃哂)一野毒龍鑽落去,仲以為死得,點知原來係老烈火既苦肉計(因為佢知道活彿一早係度想執死雞,於是炸死,黎一招其人之道....)可憐既活彿仲要扮有型話咩反震力特別強既地方附近緊係罩門,真係瘀爆.....
老烈火戰術成功,活彿現身同小虎打,點知又係比佢d死人哮喘累鬼死,攪到要較腳,仲要衰到學人放火,話哂都叫做一代宗師......
群英避開完火劫老烈火先施施然走番出黎,群英又傷又皮疲,西門蕭佢地仲要中埋毒,三皇+北海圍抽都打佢唔掂(烈火金身真係好勁)
最後如果唔係老洪用毒針吉中烈火背脊,再加小虎毒龍鑽鑽中先破到金身,唔係實全軍玩完...
其實以上上係5-6期既故事,都要打咁耐,可見當時既故事係幾咁好睇,呢段小弟都返睇左幾次,真係好精彩
有咩錯漏麻煩各位大哥幫手執正呀
下次再講另一場