1#
大 中
小 發表於 2013-10-14 22:18 顯示全部帖子
中國合伙人，陳可辛巔峰之作(嚴重劇透)
有人話【中國合伙人】係男版【致青春】
我覺得佢睇戲too simple，too naive
導演陳可辛既視野、編與導既技巧、電影既信息同感染力
遠遠勝過趙薇呢套既幼嫩又粗糙既作品
雖然票房上【致青春】7.2億嬴【中國合伙人】5.4億一條街
但國內票房高從來唔代表套戲質素高
【致青春】嬴既係趙薇，而唔係電影本身
真係硬要用另一套作品去比喻既話
【中國合伙人】可以話係中國版既【作死不離三兄弟】
但無論劇情、格局、電影技巧都高出一班
沒有所謂印度特色既大型歌舞
沒有硬寸制度、畫到出腸既派膠笑位
沒有超現實、又非常漫畫化既tvb式大團圓
真人真事改篇更見說服力
最重要都係三兄弟既選角
就算點樣刻意演得「土鱉」「屌絲」
鄧超、黃曉明、佟大為始終本質上都係高富帥，你會順眼好多
劇本以2006年在紐約上市、市值超過30億的新東方教育科技的創業故事為主線
人物以新東方創始人俞敏洪、徐小平、王強三人為藍本
香港觀眾可能唔係太了解新東方有幾巴
佢係中國目前規模最大既民辦英語培訓學校
亦係暫時國內市值最高評級既教育產業股
年收入超逾幾十億人仔，幾近壟斷國內補習市場
先後成功讓超過4百萬國內考生出國
係國內考生眼中視為留學教父既超然地位
利申左先，新東方的新浪官方博客已表明
新東方沒有參與投資【中國合伙人】
所以大家唔駛擔心會係一套官方自我感覺良好既promote片
反而陳大導將三人拍得很有血肉，角度唔係高高在上
唔係【大亭小傳】果類好浮誇、好抽離既視點
充分運用一個現實既成功例子
譜出一套集友情、夢想、奮鬥，信念頑強，娛樂性與信息內容並重既勵志電影
劇本其實好簡單，三人開辦培訓學校再成功上市
又唔係商戰，文戲咁多，正常導演好難拍得精彩
偏偏陳大導藝高人膽大，劇情推進同節奏拿掐得相當準確
110分鐘絕對係俾陳大導牽住你走
當然編劇周智勇、張冀、林愛華功不可沒
頭場選擇比美東京Doom既萬人演講
選擇倒敘手法明顯係非常正確既部署
一來一開波就拖鞋背心look觀眾可能好難頂
二來萬人空巷既大場面夠晒震撼
亦充份交代到俾觀眾知道，佢地唔單止搵到錢咁簡單，更係萬人敬仰既偶像
好快已經塑造出佢地成功既形象
而呢個形象，和回述大學時既「土鱉」造型有非常大既落差
觀眾自然好期待套戲點樣交代佢地既轉變
未來演講時黃曉明既魅力
偏偏大學時拾到冇朋友，講野口窒窒
未來鄧超冷俊內歛慎言
偏偏大學時熱血自信能言善道鋒芒畢露
劇情一開始就靠兩個角色既落差吸引觀眾看下去
我曾經出文講過好多次
一個好既劇本，係要有起承轉合，同埋衝突
【中國合伙人】明顯係呢兩方面下過一番功夫
劇情推進層層有敘，而且每階段都有亮點
起：交代三人既背景、性格及可取之處，再塑造三人友情既建立
亮點：課室暴動一夫當關，亦成為日後回憶既感動位
承：描述三人畢業後的不同遭遇及生活
兩線平行敘述，黃曉明在國內掙扎生活，鄧超在美國委曲求全
由革職到辦學，由實驗室助理到餐廳侍應
亮點：在學校第一次talk show式授課，笑中有淚
亮點：鄧超巧遇杜鵑街頭真情對話，發人深省
再敘述三人創立公司既經過
亮點：鄧超演講恐懼症反而轉為一對一模擬面試
佟大為電影教英語再到生活英語
黃曉明棟篤英語再到中文發音式英語
轉：鋪排黃曉明和鄧超之間的不和及分歧，三人吵鬧、打架、分開
合：因侵權官司而聚首，最後卻因官司而冰釋前嫌，更成為上市的契機
110分鐘交代以上六層內容，精準到位
比起拖足160分鐘【作死不離三兄弟】自圓其說式既不停回憶插敘
劇本牢固得多，情節流暢，一氣呵成
當然層層有敘好多時就會流於平鋪直敘
【中國合伙人】劇本精妙在最關鍵既場口
經過計算地抽左出黎，到日後以插敘形式補完
大大增加劇本既懸念、觀眾既追看性
鄧超一意孤行堅持上市既真正原因
結尾才以插敘交代，原來係創業初期的第二次赴美
過關時受到歧視、約見時受到冷落
他視為夢想被別人輕視的侮辱
從而激發起要做到行業龍頭，在美國上市吐氣揚眉既執著
到最後他坦誠道出解開心結，才成為三人破鏡重圓既契機
支線鋪排方面，更見陳大導既功力
三人背景交代晒後，節奏鬆一鬆，加場鬼妹女上男下既少少鹽花
再加一條杜鵑既愛情線
如果普通導演呢類支線可能表過就算純為花瓶
偏偏陳大導可以穿針引線
沒有艇上示愛就沒有肺炎，沒有肺炎就塑造唔出鄧超既自私
射燈投景追女，亦成為日後笑位既伏筆
鬼妹既存在，交代出佟大為日後點解可以教人實用生活英語
杜鵑既存在，交代出海外留學生既遭遇，亦同黃曉明條線互扣
黃曉明和杜鵑闊別十年既相遇，更加係神來之筆
而陳大導亦清楚明白兩粒鐘要講晒三個角色可能兩頭唔到岸
英明地將佟大為既篇幅減少，但佢既存在又係劇本上可以起到關鍵既作用
兩人幾場吵架由佢收尾之餘，吵得最僵持時巧妙用佢既婚禮做轉折
佟大為在婚禮上的謝辭「人生最錯既，係同兄弟合伙做生意」
非常絕核到位既一語雙關，起到畫龍點睛既作用
冇呢場婚宴，更加帶唔出之後三人婚宴後混戰正式決裂既精彩一幕
至於衝突，以文戲為主既劇情片，需要編劇既精心計算
劇情才會牢固，整體節奏才不會太拖太悶
頭半部衝突主要來自生活
黃曉明為生活而秘撈、因秘撈而被炒；鄧超到美國後既懷才不遇
絕景往往自強，理想往往係生活逼出來
陳大導好明白呢個係所有平凡人最嚮往既地方
自然開正觀眾既胃口
後半部集中描述兩人既意見分歧
由性格到價值觀到兄弟情既衝突多角度切入
拍得精彩而有層次
相比【喬布斯】，功力完全高出幾班
最後高潮位放係侵權官司，由角色衝突升級到文化衝突
再順理成章義正詞嚴指出外國人眼中既中國人係過時、歧視及誤解既
陳大導好明白呢個係當代中國人最感同身受既地方
再一次開正觀眾既口味
電影雖然強調國內莘莘學子視美國留學為夢想
但陳大導刻意冇著墨描述兩地學校及教育既差異，明顯避重就輕
雖然套戲都有寸中國制度上既不是，但都係點到即止
相反，佢成功以此發揮，維護中國人既尊嚴
刻意矮化左果班告主角既鬼佬律師團
更利用此機會宣佈上市，一下子提高知名度及股值
結局係有D誇張，但以市值超過30億的新東方教育科技為例，又非常具說服力
而成套戲既主旨係表達國內尖子對夢想既追求，土鱉變飛龍既真實故事
片尾字幕時更出現馬雲、王石、柳傳志、俞敏洪、張朝陽等國內當代成功企業家既照片
的確係陳大導針對國內市場既精密佈署
當然總有香港憤青怒罵香港導演拍合拍片放棄香港觀眾
不過呢套擺到明係，又唔似【逃出生天】咁呃你入場，你唔ger可以唔睇架，小乜Q呢！？
坦白講，國內票房賣座既套套收幾億
唔賣座既例如曾志偉拍果堆賀歲垃圾，差極套套都有5千萬人仔
香港口啤載譽既【寒戰】【激戰】，推到盡都唔過5千萬港幣
收得既都仲要俾班被荷里活腦殘片洗能晒腦既粉皮日插夜插冇特技
國內市場大，投資有回報，多老闆開戲，香港導演為國內市場拍戲，有乜好小！？
唔小下自己幾耐冇真金白銀俾錢入戲院睇戲！？唔小下自己幾耐冇睇過港產片！？
【狂舞派】夠地道，支持既最後都係Foxy BT，緊緊過一千萬
市場已經細，仲要心胸狹窄到合拍片都容唔下，拍俾香港觀眾睇為乜？！
合拍片、國產片、港產片、外語片
只要係好電影，就應該入場！
p.s. 好耐冇出過長文，難得假期重拾寫長文既樂趣，能夠寫自己喜歡寫的，暢所欲言，痛快！
p.s. 原文本身係上畫前睇優先場寫左一半，跟住工作繁忙擱筆，再執筆已經唔多記得，所以冇寫落去，類似情況出現係【狂舞派】同【激戰】，多謝讀者係facebook既支持，你地pm我，我先有動力重睇一次，完成到呢篇文呢 ^_^
Youtube：港產不打
http://www.youtube.com/cheungsecond
Facebook：港產
http://www.facebook.com/cheungsecond
Weibo：港產不打_微博
http://weibo.com/cheungsecond
************************
港產不打
全職非牟利網絡打手
100%支持本地製作
乜戲都打，淨係唔打港產
************************
相關搜索目錄: 補習 投資 婚宴 海外留學 外語 娛樂 留學
www.youtube.com/cheungsecond
www.facebook.com/cheungsecond
|
