轉寄： 給2個師奶和中旅社職員夾埋騙錢(請警 惕世人)
給2個師奶和中旅社職員夾埋騙錢(請警惕世人)
小弟經常來回深圳多年, 見過唔少偷偷呃呃既事, 係內地朋友口中都知道好多千奇百怪既騙局, 不過今次因為老細係到, 搞到下下要顧住佢, 一時唔留意, 俾人利用左我既同情心...
由機場開始
事源工作需要, 同老細上大陸做野,4月4日晚坐飛機回到深圳, 大約8點鐘, 到深圳機場, 原本打算坐的士出羅湖, 一出機場, 已經有機埸巴士, 見到機場巴士8點後可以去到羅湖, 又費時搵的士站, 立即就買飛上車, 事件就係咁開始....
上車後大約9點鐘, 到左羅湖火車站西落客, 我因為坐外面個位, 我行先, 我老細跟後面, 我落車時, 有幾條亞嬸係到派咭片, 我冇理會, 我老細係落車既時候, 接左亞嬸既咭片, 與此同時, 佢feel到俾人搞佢後面既褲袋, 唔使秒半既過程, 俾人扒左銀包....
失銀包未係最精彩...
冇辦法, 銀包已失, 第一件事去報案, 行番去廣場果邊, 見到有公安, 立即上前報案, 佢地第一件事就問你係邊到發生, 其實小弟都好清楚公安點做野, 因為我都有好多公安朋友, 知道佢地問案件發生既地點, 係想將問題推比其它派出所搞, 因為佢地分得好清楚, 唔想做野, 不過點都好, 我老細係到, 唯有照行埋去話報案, 老虎都話係廣場範圍比人偷銀包, 佢地話你地唔好報案住, 快d去廣場二樓4C鋪既中旅社辦臨時出境證, 因為9點半要關門, 唔係就要等聽日, 咁我地就即刻去到該處......
羅湖廣場二樓4c鋪中旅社, 專幫人搞臨時証, 同時...
到左中旅社, 見到有一個男職員, 另外, 見到有兩個女人, 其中有一個女人都好似因為失竊而係到搞緊, 開頭我都冇理會佢地, 緊係幫老細搞, 搞臨時出境証, 要兩百元, 果兩個女人, 見到我有拿錢幫老細俾, 即刻向我求助, 話佢地銀包俾人扒左, 冇左證件, 叫我借兩百俾佢, 我見個男職員都話佢地冇錢, 幫下佢地啦, 我見佢係到又驚又哭個樣, 好似好可憐, 咁咪幫埋佢, 幫佢俾埋錢, 佢話未食飯, 我咪俾多一百佢地啦, 又問我拿電話號碼, 話回出來還俾我, (我心諗都預左你地唔會還).
果男職員收左4百蚊人仔, 就幫我老細同埋個女人係到影相用黎搞証件, 果男職員就好似幫我老細搞左幾分鐘, 又呢樣又果樣, 又俾番一張收據佢, 而果兩個女人就好似除左影相, 交左form就冇搞其它野, 連收據都冇.
周圍都係賊, 連中旅社都有害群之馬....
好啦, 搞完手續, 同我老細去食野, 坐低食野既時候, 分析番事件, 認為果賊係係機場跟我地上車到羅湖埋手, 因為我細佢著住件長風褸, 根本見唔到佢後面既褲袋, 佢仲咩住好大個袋, 完全遮住晒, 所以我地斷定佢係係我地買巴士票既時候, 選定我老細做目標. 食完野, 去搵酒店, 等第朝去拿臨時証, 到左朝早11點左右, 打電話過去問, 話已經ok, 我地立刻過去拿, 到左中旅社, 又見到琴晚果個男職員, 另外, 仲有一個女職員, 個男職員俾左証件我老細, 我咪順便多口問句琴晚果兩個女人黎左攞証件未, 個男職員就拿左大概十幾份臨時証係到搵, 跟住又拿一張好似checklist既表係到睇, 佢係到睇既時候, 我留意到佢突然偷望過黎, 跟住講野口疾疾話果兩個女人好似話張回鄉証係朋友到, 已經搵番, 黎退錢走左. 我當時第一個反應唔係覺得俾呢兩個女人呃左我既同情心, 而我第一個反應就係你呢條仆街原來係同佢地夾埋! 不過, 外於我老細係到, 佢又歸心似箭, 而我都無憑無據, 所以我都費時嘈佢, 幾百蚊俾我上左寶貴既一堂, 一家中旅社居然有咁既害群之馬, 夾埋出面既人係到行騙, 你話大陸係唔係就圍都係賊, 又扒手, 又老千, 連專門幫港人辦救命既臨時出境證既中旅社, 都有咁既老千, 你話荒唔荒唐? 大陸人冇得救....
幾百蚊上左寶貴一堂
今次事件, 講真, 令我驚訝既唔係比人呃左幾百蚊, 而係連一家專門幫港人搞遺失証件既中旅社, 入面居然有害群之馬夾埋外人做戲呃錢. 真係可悲! 係大陸, 一定要緊守一樣野, 就係唔好做好人, 今次我失策, 可能見到我老細佢好緊張, 好擔心既神情, 搞到我為左要安慰佢而疏忽左. 所以我奉勸大家, 無論係任何情況下, 係大陸, 只要涉及到錢, 就要小心為上. 仲有最後最緊要一樣野, 大家認為係可信或安全既地方, 其實都可能暗藏危機!
相關搜索目錄: 酒店
