同各位街坊打個招呼先！灣仔好！大家好！

因為正尋找大道東舊貌而發現呢度個topic，實在太精彩！知道大家正討論其它，如有打擾各位雅興的話，多多包涵！

先奉上一張東方戲院嘅戲橋做見面禮，收埋響床下底好耐．

引用:

原帖由 langlangnui 於 2008-5-22 20:49 發表
哇，這裡的每一位都知識淵博，實在令人敬佩
我小時候住在春園大廈
甜心麵包店買完麵包到修敦球場等校車

有錢的時候會去石水渠街口的蔡湘記士多買貼水紙
工作後與蔡湘記的太子女（正確說是蔡湘記老闆的侄女， ...

呢位街坊提到蔡湘記，可能同我差唔多年紀．等我都諗番下七八十年代，呢段大道東係點？

夠四十歲嘅街坊一定記得大舞台．由大舞台起向銅鑼灣方向行，春園街斜路路口（即灣仔堂下邊）有一間叫”祥記士多”．同大部份士多一樣，門口有大玻璃罌裝住ｄ餅乾．過咗祥記幾個舖位有條巷，有間”鬥木”舖，經常有個阿婆坐在巷口食大碌竹水煙．迪龍里上有幾檔解簽檔，同時亦有代人寫信寫揮春．石樓梯有兩三個阿婆問人攞錢，其中一個若唔畀錢佢就會鬧人，甚至用米或黃豆擲人．石級下旁邊的是賣香燭舖，跟住係造木箱的，然後係一間鏡（玻璃）舖頭．再過少少就有一盲人算命，其實佢並非完全失明，而係嚴重弱視．然後就係衛生局，經過時聞到好大陣消毒藥水味．樓下車房門口小心車輛出入．過埋郵局，又要小心”生利木行”有工人搬木板．然後ｘｘ建築公司，門口櫥窗有座樓宇模型，但櫥窗好污糟！好似同時亦係一間大光燈代理．隔籬就係”祥安大押”，一個正門，側門開在樓梯那邊．過埋巴士站就到蔡湘記．

阿街坊有無到對面灣仔街市天台的遊樂場？還是經石水渠街橫巷入灣仔峽道遊樂場？呢段石水渠街響七十年代尾左右曾經實施過設為行人專用區（但當時唔係咁名稱），每逢星期六下午至星期日下午禁止車輛使用．因為當時好多小朋友會去果度嘅街坊福利會（or聖雅各）遊玩．我記得我係打康樂棋．石水渠街盡處係另一個遊樂場，有較大型嘅sir滑梯及搖搖板，當然仲有韆鞦同團團轉！

暫時係記得咁多，各位現任或舊街坊有興趣可以補充一下．

見到各位兄台寫得好詳盡，圖文並茂，真係勁到頂唔順！