引用:

原帖由 flowingwater 於 2010-8-12 17:43 發表
前輩, 我很明白你既苦心.係眾人面前說父親的錯又真的幾可悲.

流水兄，希望你不會暗駡我大逆不道就好了。其實我所講的，應該係我老豆之長輩或朋友當時跟他講比較好。

引用:

原帖由 dirtyoldman 於 2010-8-12 11:40 發表

Classic attention seeking behavior, don't take her too seriously.

老人兄又唔可以話佢家姐呢種行為為典形嘅引人注意行為嘅。



正如我响Post #877度講，佢無非都係想平反佢嘅冤屈啫。只要黃小妹嘅家人，肯講句公道話，佢自然會息懷嘅。可惜吖，邊個敢咁做？

引用:

原帖由 suewong 於 2010-8-12 21:55 發表 ...，

我形住係政府做工程師，點知 重有變化!!!

通常回流返黎香港，層樓真是累死人，但你又可以逃過1劫!!!

黃小妹太睇得起小弟了。我並非乜師乜師，只係政府內千千萬個officers中之一個small potato啫。

妳果然料事如神，平賣，不過仲未貴買。我想訪問吓妳，是否曾跟啲利時神婆學過两手？幫我算吓幾時先至買到樓吖？

我依家正係進退两難，唯一可做嘅係sit on the fence，睇吓點先。2002年尾，見香港樓市跌至蔗渣價，於是辭工兼放盤賣樓，响應老董嘅號召，回港救港。可借响英國賣樓手續煩過梵帝崗，買家唔會落細訂，又要等佢做survey及銀行批，三幾個月唔少得。有chain仲大劑，我原本開頭有個幾好嘅offer，hold咗俾佢個幾月，突然拉倒，話佢自己間屋未賣出，又要從頭嚟過。其實我經已放哂盤俾當地所有agents，門前花園楝咗成五六個牌，初初間唔中仲有人睇吓樓，offer吓，點知2003年伊拉克戰事一起，成個市死哂，成三個幾月一個客都冇。卒之賣咗成年半，到2004年夏天才搞惦，仲要減價先賣得出。

妳知喇，2004年中先番到嚟，我要買嗰啲樓經已由三千幾蚊呎升到五千幾蚊，於是入住服務式酒店暫住，將個20呎貨櫃，內有两層屋嘅家當，原封不動存倉。點知住咗年半，嗰市只係有上冇落。唯有面對現實，用月租$25,500 响港島灣頭灣尾租咗個1,200呎臨海單位，又以為暫住喇，點知一住又四年，直到舊年年尾業主加租先至將心愛之垃圾揼咁啲，用月租$25,000响東區租咗依家個八佰多呎單位住。

一子錯，滿盤皆落索。番嚟六年多，前前後後用咗約180萬交租。亞Q精神，好過俾雷曼两個靶打滾咗吖！

引用:

原帖由 suewong 於 2010-8-13 17:14 發表


死!!! 我都同你 1 樣，無殼。

1 向係大學做，未嫁時，有房津；吊左水魚上岸後， ...

冇殼之嗎，唔使死喎。我哋呢個forum啲兄弟姊妹細個時，除咗老何同kintsun兄之外，有幾多個住係私人樓吖？我哋瞓石扲蓆都試過喇！

信我喇，你哋啲80後唔好將啲hard earned money拎去摸頂買樓接火捧呀！What goes up, must come down，定律嚟�謘I

妳既然吊咗條有料水魚，唔使憂噃，淡定有錢剩呀，細妹！

引用:

原帖由 suewong 於 2010-8-13 17:29 發表

嘩! 回流人士，你真是好富貴。

想問下 d 網友，根據陶杰所言，戰後香港人唔將海景當 1 回事，...我地比鬼子佬洗腦，海景先 ...

富貴就唔講得，正如 hkgalbert 兄响post#814曰：..應珍惜青春，少玩點，多貯錢..

因自幼家貧，飬成有危機感，一早已prepare for the rainy day，早排見好天，割咗些少禾青。依家落雨，拎番啲出嚟食啫。都一把年紀咯，死就一世，唔死就大半世，冇理由刻薄自己�謘A係冇？只要唔嫖唔睹，就算買唔到樓，睇嚟都可夠我俩維持依家咁嘅生活水平到乘搭仙鶴航空西去之日。

至於話住海景單位，把鬼！我住到無遮無擋61樓咁高喇，底下啲漁船、大飛、小飛，晨早行過，一時就卜卜聲，一時就V V嘩嘩鬼殺咁嘈。啲大洋船又係，七點未夠就呠行嗰笛開路或call領航員上船。啲水警同海關仲叻，半夜三更用大聲公叫停啲船輯私。仲有，所有船行過都留條大黑煙，船愈大隻愈勁。我住到咁高都聞到攻鼻��脷。早排無線有個documentary咪講啲船一路行一路大噴黑煙囉。

至於話海景，英雄慣見亦常人。睇得多都厭啦！兼且你好得閒咩？啲八卦雜誌睇哂嗱？啲電視劇追哂嗱？啲網上哂嗱？咁喇，第日坐住輪椅唔郁得嗰陣時，都老人與海咯，有排你睇喇！所以業主一話加租，我掹都掹唔切，益吓第二個嘞！

引用:

原帖由 杜友明 於 2010-8-14 07:29 發表 ...，人又老，錢就無，最慘連記性都一曰差過一日，而家做緊香港三等公民....................等食，等屙， ...

Hochong發表於 2010-8-13 22:56 人生贵知足,小时住过朱牯仔木屋,起码不会差过旧时,又有何忧乎!


你哋两位睇嘢又唔使咁灰。Haochong兄相當正面，識得用憶苦思甜去開解。而友明兄你因何咁快就批死自己呢？邊個敢講你打後嘅命運唔會變好？邊個敢講下次你唔會中六合彩呀？

每人一生咁長，並非每個階段皆事事順景。我响政府內之辛酸及在異鄉之失意，一幅被咁長，日後有機會再同大家呻吓。唯在失意期間，最緊要武裝自己，潛伏爪牙，等待出擊。

仲有，失意之時，識得亞Q吓。你估我返遲咗嚟執唔到平貨，睇住個樓價由三千蚊呎升到依家一萬蚊呎冇唔開心呀？等我稍後同你哋講吓我嘅心理歷程，而我點樣令自己冇咁憎恨自己吖嗱！

引用:

原帖由 杜友明 於 2010-8-15 08:58 發表
其實我並不灰，相反，正努力...前往參觀及試四塊半，有很多試過都話舒服，...

友明兄，你去睇過嗰味嘢，想請教吓你，全餐點賣？例牌又幾多呢？有冇最低消費？淨燒會否雙計？二人同行又有否半價優惠咁呢？

引用:

原帖由 杜友明 於 2010-8-15 10:12 發表
mtpen 兄，看來閣下對此很感興趣，莫非...............................預感.........？

友明兄，我玩你咋！Sorry ！不愧為巴打，多謝關心。

慶幸尚未有三高，睇嚟香港政府唔好彩嘞。英國都係，我納咗超過十年 N.I. (National Insurance) ，即國民保險。我已做足一切養生功夫，駁長條老命，老虎魚蝦蟹都食番佢哋嘅長糧夠皮為止。

以你咁好人，第日一定上天堂嘅。唉！聽我講喇，無謂將啲血汗錢咁花呀！

我依家先知啲人點解生十個女都要追番個仔。驚死冇仔送終喎，所以重男輕女，錫住個仔驚佢死先過佢。又死慳死抵，食都唔啥得食，留番筆錢去買個靚棺材、租大餐廳、打齋、買骨灰龕，都唔化嘅！臨死都俾人斬一筆。如果講到咁唔志在嘅，咪捐咗出嚟做善事吖！兼且你估好多人中意睇你副尊容呀？咪作大喇！

生前，將呢筆棺材本，留番嚟買啲優質啲嘅食物食吓，等身體冇咁多病痛仲好喇。响香港唔使驚喎，特區政府大把錢，洗哂又有亞爺醒，佢哋一定會好好睇睇幫你搞得妥妥當當嘅，除非你嫌三嫌四就冇計喇。

我同老妻講過，如果我行先，妳咪鬼將我剩俾妳啲錢咁搞作，燒咗佢就算鬼數嘞，仲要揀件平平地嘅，紙造嘅仲啱，要標明 recycle 嗰隻，環保吖嘛。至於嗰家嘢，更加唔使花十幾萬放响啲乜嘢骨灰龕度。呢，有個乜嘢骨灰公園，嗰度啱我，當肥田料種樹，死咗都益吓個地球吖。又或者乾手淨脚，捐我副嘢俾港大或中大，等啲醫生仔有啲實物玩吓吖。


如果仲覺得唔安樂嘅話，就將原本要俾全餐嗰筆錢，捐哂俾祖國山區啲兒童吖，等我見到上帝同妳講好話保妳嗰陣時，都 convincing 啲吖！

引用:

原帖由 hkgalbert 於 2010-8-17 09:56 發表
誰人可補遺及更正？ : ...

可能 Albert 兄講嗰啲日子係我哋孩童時代嘅，當時仙都唔仙吓，有鬼錢睇戲呀！搭巴士咁貴去到九龍城寨咁遠，唸都未唸過呀！我記得第一次睇戲係响美麗宮。

引用:

原帖由 hkgalbert 於 2010-8-17 09:56 發表 倒不如暫忘憂愁，去九龍城戲院睇那些『 : ...

Albert 兄講得啱，倒不如暫忘憂愁，揾啲嘢開心吓。

其實做人無需要問為乜而生存，睇番我哋自己一生就知。鬼佬俾我哋睇得仲簡單。信教嘅，就話為咗上天堂，無神論者就話無須理會為乜？就像飛鳥或動物，有天就飛，有地就行，有嘢就食。Just get something to do, to kill the time, 然後過一生，that’s it！


咁點 kill 法？有人鍾意生個仔凑吓、有人鍾意工作賺好多錢、有人鍾意返寫字樓搞吓office war、有人鍾意做議員威吓、有人鍾意做義工幫吓人….我就鍾意無�U。我明白 simple is the best！

好似我哋依家咁，上吓網，吹吓水。多得科技唔少，吹水唔使去公園仔，啱就講多句，唔啱即掹，你唔識我，我唔識你，冇是非，幾咁嗰濟。聽日嘅事聽日再算！Am I right？

講起相，Haochong兄响 post #826幅相，天主堂背後個山應該就係雞冠山了。山頂上嗰舊大石响培立度睇冇乜特別，但如果响大同中學或朱古仔嗰邊睇就好似雞冠咁。不過我細個响環山路望過去就覺得似烏龜多啲。

係呢，Haochong兄，得閒試試摷吓仲有乜嘢相啱我哋睇，不妨放上嚟益吓大家吖？又有否美麗宮幅相咁呢？

引用:

原帖由 HAOCHANG 於 2010-8-18 20:47 發表
美丽宫戏院照片难寻,不过在有关电影网页有关美丽宫戏院的典故,上传各位仁兄同享!

Haochang兄找到之料可令我們回味一吓美麗宮昔日之風采，難得。

講開又講，約莫响今年二三月時，壹週刋曾訪問過一位文物收藏家 Dr. Dab Tong 唐卓敏醫生。呢位大醫生正職於瑪利醫院，但佢好巴閉，收藏嘅香港文物連中央圖書館都要問佢借嚟展覽。百幾年前中英將香港割讓嗰條條約都响呢位大醫生手上。

訪問中佢話佢曾經就讀大坑東官立小學。佢兒時在九龍仔出入，好大機會响佢大量香港舊照片中有啲九龍仔嘅在內。

Kintsun兄，你响港大之時，有否識得你呢位師兄弟呢？

其實美麗宮幾時執嘅唧？我好似响各位兄台之前寫嘅嘢度睇到話火燭燒過，係冇？

邊位仁兄如果行經美麗宮舊址時，可否影張想放上嚟俾大家睇吓現時變成點，一齊懷緬吓過去吖，好嗎？

引用:

原帖由 HAOCHANG 於 2010-8-19 21:53 發表
看看美丽宫戏院旧址,据闻现址为普仁大厦,看来与以前很大分别,是否重建或改建?要请教MTPEN仁兄!

多謝 Haochang兄之美麗宮舊址新照。我有十二年冇去過九龍仔了，當時是離港六年後首次再踏足香江，亦不知六年後會回流大把時間睇。當時正一死人尋舊路，惟老妻對我舊史不感興趣，怱怱地看看母校大坑東官立小學便走，行過此大厦往白田地鐵站時也沒有對它看上一眼，反而現在提起想睇而矣。

人好奇怪，冇得時時番嚟就恨睇，��家隨時可去睇就唔去睇。

至於話該大厦是否美麗宮戲院拆後至現今，還望各位仁兄仁姐補充至得。

[ 本帖最後由 mtpen 於 2010-8-20 10:29 編輯 ]

引用:

原帖由 him4466 於 2010-8-20 11:53 發表


是"石硤尾"地鐵站吧

多謝 him 兄更正。人如其名，懵懂筆是也。

引用:

原帖由 小師弟 於 2010-8-19 22:39 發表 我早前有影過附近的照片，再加上一張有關“水喉頭”的相。

小師弟這幅相令小弟勾起無限童年回憶。

50年初家父家族生意失敗後，我與姊姊往澳門投靠住在雅亷坊之伯娘，住了三两年後返港與家人會合，一家人於1956至1958年間租住於大坑東七層大厦C座 (後來叫12座)七樓585室，水喉位對出第一間，亦即相中有個小朋友嗰度。

佢哋打緊牌嗰度係大厦两翼正中間十字通道，風扇捱住呢邊係公共浴室，對面左邊係公共厠所。我係佢哋就唔鍾意响嗰個三殺位度開枱嘞，啲人响背脊挹挹攁攁騷擾我做牌，轉角樓梯旁大把位，都唔知貪嗰度乜嘢好。可能貪嗰度光猛啲又駁到浴室燈位開風扇掛！

睇嚟打緊牌呢幾位亞叔應該係姓馮嘅，仲好老添。

[ 本帖最後由 mtpen 於 2010-8-22 16:08 編輯 ]

引用:

原帖由 him4466 於 2010-8-23 12:08 發表
我係住另外一邊既第一家,即浴室既另外一邊,那時浴室好多道友

Him兄當時居於那一座？又於何年呢？我們會否曾是隣居或樓上樓下呢？

還記得家家户户久不久要楝床板捉木蝨嗎？你曾否被木蝨咬過呢？

我摷到張 1966舊地圖俾大家睇吓，當時大坑東七層大厦仲用緊ABCD…座。其實幾時先改用1234…座呢？

引用:

原帖由 小師弟 於 2010-8-24 23:47 發表
我住十一座五樓198，近官小山邊第一間，背面是樓梯上落位，道友食白粉是見慣，轉角位是我的床位，無落雨就可以訓天光，否則半夜要走入屋屈身，一家十口怎住， ...

小師弟嘅童年苦况，感同身受。我哋嗰個年代之事，只有我哋呢啲老鬼先有共鳴，老何呢個 forum 啱我哋。

大家有否見過有隻會飛嘅昆蟲，形狀似飛蟻，但體積大得多，有成半吋至一吋長，紫色，在陽光下發出紫金色，好靚仔，個頭有一對鉗，所以冇人敢捉��嚟玩，怕俾佢咬，但我未見過佢咬人，亦唔會入屋。我哋叫�鑒y鐵甲將軍。

離開七層大厦後至今未再見過，無論在港各區或世界各地。

引用:

原帖由 flowingwater 於 2010-8-25 11:15 發表
是否有另一叫法"金龜子"?
我小時候用線縛著佢NE飛.

流水兄所指之金龜子是否金红色，好似水曱甴咁嗰隻？又或似臭屁lart？

引用:

原帖由 flowingwater 於 2010-8-30 08:38 發表
前輩..如圖
近十幾年都冇見過有細路玩呢d野.

水兄呢隻嘢我都有玩過，貪佢冇殺傷力。鐵甲將軍個頭有一對鉗就冇人敢玩佢。

我哋嗰代窮，最大娛樂就係通山走，見到啲小昆蟲便就地取材玩餐懵。

引用:

原帖由 HAOCHANG 於 2010-7-29 23:38 發表
其实我们呢的杂闲人等小市民都无多少机会入到陆军球场,至多俾你上后边山头木屋望下来,作山顶下观!
尤其是7,80年代本地足球兴旺日子,陆军球场隔离是花墟球场,足球大战之日买不到球票入场,就走上山上看波,山顶都几热闹吓…...

Haochang兄話响山上睇波免費，但要走鬼�謘C因要保障門票收益，所以週不時會俾差人趕。

1956年時呢個陸軍球塲對上之窩仔山山丘仔中間好熱鬧嘅。當時大坑西街（俗稱Bian 山，即Bian過嗰山），尚未建成，莫講話美麗宮戲院前之窩仔街。想去大埔道，南昌街或深水埗碼頭，又唔想出大坑東道繞過陸軍球塲咁煩，其中一條short-cut係响棠蔭路J 座（後稱第六座）對上山上有條山路，隱沒於两邊木屋中間，沿途有舖仔賣豆腐花、崩大碗、涼粉及嘢食，又有公仔書租。

和味龍 (即水曱甴？) 玩完玩罷仲可以抄嚟食。佢哋最興圍住啲街燈打轉咁飛，呢個時候最多。

一邊捉和味龍，一邊等人燒衣，一邊齊齊叫：「燒衣唔撒錢，今晚俾鬼鏈！」。

引用:

原帖由 小師弟 於 2010-8-31 21:18 發表
間中有時捉到螳螂， ...

螳螂我都捉過，不過有幾次俾佢手臂夾過，好怕啲大隻嘅。我只敢捉啲細細隻啱啱出世嘅 baby 仔嚟玩，夾親都唔痛。

有冇捉過塘 May (蜻蜓)呢？首先揾嚟爛鬼馮強波鞋（白飯魚）一隻 (大中細碼不拘，惟左脚較皆，因通常蝕得少些，比較完整) ，三呎許竹支一條，牛奶 mug 一個。將白飯魚去皮（拆去帆布），膠鞋底剪成粒狀備用。生火，然後將膠粒逐少許倒入牛奶 mug，不斷攪拌，順時針方向，加熱煮溶成糊狀。最後�Q量黐少許於竹支頭即可，見隻黐隻。

啲膠用剩可作下次用，存放於床下底暗角位，亞爸亞媽摷不到為皆。啲膠硬化後不會發出氣味，故無須加蓋，惟切忌將嗰支用過嘅竹仔一併存放（黐完塘 May當塲棄掉更好），以防亞爸亞媽隨手作為夏楚之用，切記！

引用:

原帖由 suewong 於 2010-8-15 00:01 發表 ..快 d 講丫。其實非常好奇，你做公務員，可以提早退休，仲可以搵埋咁多落雨柴.  真羨慕!  識得 d 署長級，退休後，唔做唔得。(被 樓 / 仔女 累)。

見到黃小妹番返嚟呢個 forum 先至醒起未答妳先前問小弟點樣做公務員，可以提早退休，仲可以搵埋咁多落雨柴。

其實黃小妹妳冰雪聰明，早已一語道出我致富之道。妳話見妳啲 friends 臨老乃為層樓同兒女所困，以至未能提早退休。

樓方面，子非魚，焉知魚之樂。香港人好得意嘅，如果睇啱間屋，佢哋特登鍾意貴嗰陣時先去買，平嗰陣時佢反而唔高興。點解？威囉！妳同人講話用壹仟萬買咗層樓威吖，定係話伍佰萬威吖嗱？

至於子女，香港人真慘，呢啲明明係國家/社會共有資產，佢自己冇錢都甘願為國家/社會生出嚟，仲出真金養埋添。真偉大！妳仲講漏咗佢父母添。供養老人家明明係國家/政府嘅責任，香港人又鍾意自己孭埋，更偉大！

我之有今日咁它條，皆由於呢三樣嘢都冇做，又或唔使做，就係咁簡單嘞！        To be continued…

基本上英國嘅社會保障制度已做到老吾老以及人之老，幼吾幼以及人之幼。香港壹萬年後都唔會學到。點解？政府冇錢囉！咁嘅社會保障制度要洗好多錢�謘I正如前衛生福利司楊公子永強問得好：「啲錢邊度嚟呀？天跌落嚟�謘H樹生出嚟�謘H」。

我响英國做嘢時納 25% 稅，出糧每一百鎊，到手時只得番 75 鎊，嗰 25 鎊一早已由公司扣起直接交與税局，連銀行紅簿仔存款利息及股息皆一派就扣，當正入息一併扣稅。行街買嘢食飯，啲數通通加咗 17.5% VAT (Value Added Tax) 即銷售稅，最近更加至 20% 添。

香港人習慣食免費餐，攞着數。只識 take ，唔識 give。佢見人哋晚年有退休金食，就問點解我冇�謘H你試吓問佢要納咁嘅稅吖嗱，即刻暴動都似。

假若邊個特首胆敢响星期一提出學英國呢個社會保障制度方案，星期二唔止50萬人，我包保一千萬人（二佰萬人係由深圳市支援愛港救國同胞自發操落嚟所組成）會上街。星期三中央揾人落嚟先搣佢柴兼雙規佢，星期四打埋柴，星期五如果仲唔出走或保外就醫着草，星期六就抄埋家兼掃地出門添。你估脚痛吓咁簡單呀？

[ 本帖最後由 mtpen 於 2010-9-5 16:18 編輯 ]